കരിപ്പൂർ വിമാനത്താവളത്തിൽ—ആ മനുഷ്യൻ ഇപ്പോൾ വിമാനമിറങ്ങിയിരിക്കുന്നു!
താൻ സഞ്ചരിക്കുന്ന ഇതേ റോഡിലൂടെ തന്നെയാണ് അയാളുടെ കാറും ഇപ്പോൾ കോഴിക്കോട്ടേക്ക് പായാൻ പോകുന്നത്!
അല്പം മുൻപ് ഹമീദ് കാക്കയുടെ വാക്കുകൾ കേട്ടപ്പോൾ ഉള്ളിലുണർന്ന ആ ചെറിയ കുറ്റബോധമെല്ലാം, കടലിലെ തിരമാല വന്ന് മണൽക്കോട്ട തകർക്കുന്നതുപോലെ ഒരൊറ്റ നിമിഷം കൊണ്ട് ഒലിച്ചുപോയി!
ഹമീദ് കാക്ക ഇല്ലായിരുന്നെങ്കിൽ ഇവിടെ നിന്ന് തന്നെ ഏട്ടൻ്റെ കൂടെ കോഴിക്കോട്ടേക്ക് പോകാമായിരുന്നു എന്നവൾ ഒരു നിമിഷം നിരാശയോടെ ഓർത്തു.
എന്തായാലും ആള് നാട്ടിൽ എത്തിയല്ലോ. ഇനി നിരാശയവാതെ, പകരം, ഇനി കഷ്ടിച്ച് മുക്കാൽ മണിക്കൂറിനുള്ളിൽ താൻ അയാളുടെ മുന്നിലിരിക്കുമെന്ന ആ ചുട്ടുപൊള്ളുന്ന ആവേശത്തിൽ അവളിരുന്നു.
“ഞാൻ രാമനാട്ടുകര എത്താറായി ഏട്ടാ… ഒൻപതരയാകുമ്പോഴേക്കും കോഴിക്കോട്ട് എത്തും,” അവൾ വേഗത്തിൽ ടൈപ്പ് ചെയ്ത് അയച്ചു.
രാമനാട്ടുകരയും ഫറോക്കും മീഞ്ചന്തയും പിന്നിട്ട് വണ്ടി കോഴിക്കോട് നഗരത്തിന്റെ തിരക്കിലേക്ക് പ്രവേശിച്ചപ്പോൾ, ജസ്നയുടെ ഉള്ളിലെ ബുദ്ധിമതിയായ തന്ത്രജ്ഞ ഉണർന്നുകഴിഞ്ഞിരുന്നു.
രോഹിത് ഏട്ടൻ തനിക്ക് അയച്ചുതന്നിരുന്ന ലൊക്കേഷൻ കോഴിക്കോട് സൗത്ത് ബീച്ചിനടുത്തുള്ള ‘ദി വരാന്ത ബൈ ദി സീ’ എന്ന അതിസമ്പന്നർ മാത്രം വരുന്ന ഒരു പഴയ പൈതൃക ബംഗ്ലാവ് കഫേ ആയിരുന്നു.
പക്ഷേ ഹമീദ് കാക്കയെ അങ്ങോട്ട് കൊണ്ടുപോകാൻ കഴിയില്ല!
അതിനുവേണ്ടി ഇന്നലെ രാത്രി തന്നെ ജസ്ന ഗൂഗിൾ മാപ്പിൽ കോഴിക്കോട് നടക്കാവിലുള്ള ബിൽഡിംഗുകളെല്ലാം വിശദമായി തിരഞ്ഞു കണ്ടുപിടിച്ചിരുന്നു. നടക്കാവ് ക്രോസ് റോഡിന് സമീപമുള്ള അഞ്ചുനിലയുള്ള ഒരു വലിയ കൊമേഴ്സ്യൽ കോംപ്ലക്സ്.
അതിന്റെ മൂന്നാം നിലയിൽ യഥാർത്ഥത്തിൽ ഒരു പാസ്പോർട്ട് ആൻഡ് വിസ ഏജൻസി പ്രവർത്തിക്കുന്നുണ്ട്; എല്ലാറ്റിനുമുപരി, ആ ബിൽഡിംഗിന് പ്രധാന കവാടം
കൂടാതെ തൊട്ടടുത്ത ഇടറോഡിലേക്ക് ഇറങ്ങാൻ കഴിയുന്ന മറ്റൊരു സൈഡ് എക്സിറ്റും ഉണ്ട്!
“കാക്കേ… ദാ ആ കാണുന്ന വലിയ ഗ്ലാസ്സ് ബിൽഡിംഗിന്റെ മുന്നിൽ നിർത്തിയാൽ മതി. അതിന്റെ മൂന്നാം നിലയിലാണ് ഓഫീസ്,” നടക്കാവിലെ തിരക്കേറിയ റോഡിലേക്ക് എത്തിയപ്പോൾ ജസ്ന പുറത്തേക്ക് ചൂണ്ടിക്കാണിച്ചു പറഞ്ഞു.
ഹമീദ് കാക്ക വണ്ടി ആ വലിയ കോംപ്ലക്സിന് മുന്നിലേക്ക് ഒതുക്കിനിർത്തി ഹാൻഡ്ബ്രേക്ക് വലിച്ചു. എന്നിട്ട് ഡോർ തുറന്ന് പുറത്തേക്കിറങ്ങാൻ ആഞ്ഞു. “വാ മോളേ…
നമുക്ക് മൂന്നാം നിലയിലേക്ക് ലിഫ്റ്റിൽ കയറിപ്പോകാം. കാക്കയും കൂടെ വരാം!”
ജസ്നയുടെ നെഞ്ചൊന്ന് പിടച്ചെങ്കിലും അവളുടെ മുഖത്ത് ഒരു തരി പരിഭ്രമം പോലും കണ്ടില്ല. കാറിൽ നിന്നിറങ്ങി ഹാൻഡ്ബാഗ് തോളിലിട്ടുകൊണ്ട് അവൾ വളരെ ശാന്തമായി പുഞ്ചിരിച്ചു.
“അയ്യോ കാക്കേ… കാക്ക മുകളിലേക്ക് വന്നിട്ട് കാര്യമില്ല,” അവൾ വളരെ ആധികാരികമായി പറഞ്ഞു. “ഇതൊരു വിദേശ എംബസിയുടെ ബയോമെട്രിക് ആൻഡ് ഡോക്യുമെന്റ് അറ്റസ്റ്റേഷൻ സെന്ററാണ്.
ഇക്കാക്ക രാവിലെ തന്നെ എന്നോട് പ്രത്യേകം പറഞ്ഞിരുന്നു അതിന്റെ അകത്തെ വെയിറ്റിംഗ് ഹാളിലേക്ക് വിസയ്ക്ക് അപേക്ഷിക്കുന്ന ആളെ മാത്രമേ സെക്യൂരിറ്റിക്കാർ കടത്തിവിടുകയുള്ളൂ എന്ന്! കൂടെ വരുന്നവർക്ക് അകത്തേക്ക് പ്രവേശനമേയില്ല.”
ഹമീദ് കാക്ക സംശയത്തോടെ ബിൽഡിംഗിലേക്ക് നോക്കി. “അങ്ങനെയാണോ മോളേ? എന്നാ പിന്നെ കാക്ക താഴെ കാറിലിരിക്കാം, മോൾ പോയി ഒപ്പിട്ടിട്ട് വേഗം ഇറങ്ങിവാ!”
കാക്ക അവിടെ കാറിലിരുന്നാൽ താൻ എങ്ങനെ പുറത്തിറങ്ങും?! ജസ്ന തന്റെ അടുത്ത അടവ് പുറത്തെടുത്തു.
“കാക്ക ഈ വെയിലത്ത് ഇവിടെ കാറിലിരുന്ന് പുഴുങ്ങേണ്ട കാര്യമേയില്ല കാക്കേ,” അവൾ വളരെ കരുതലോടെ പറഞ്ഞു. “അവിടെ അകത്ത് രാവിലെ തന്നെ നൂറുകണക്കിന് ആൾക്കാരുടെ വലിയ
ക്യൂ ആയിരിക്കും.
ടോക്കൺ എടുത്ത് എന്റെ ഊഴം എത്തി പേപ്പറുകളെല്ലാം വെരിഫൈ ചെയ്ത് ഒപ്പിട്ടിറങ്ങാൻ എന്തായാലും മൂന്നോ നാലോ മണിക്കൂർ എടുക്കുമെന്നാ ഏജൻസിയിൽ നിന്ന് പറഞ്ഞത്!
ജ്ജ് പൊളിക്ക് മുത്തേ 😄