ആര്യൻ അത് കണ്ട് ചിരിച്ച ശേഷം ശാലിനിയുടെ മുഖത്തേക്ക് നോക്കിയിരുന്നു. അവളുടെ വലിയ കണ്ണുകളും നീണ്ട മൂക്കും തത്തമ്മ ചുണ്ടുകളും നുണക്കുഴിയും എല്ലാത്തിനും ഇന്നെന്തോ ഇതുവരെ ഇല്ലാതിരുന്ന ഒരു പ്രത്യേക ചന്തം എന്ന് അവന് തോന്നി.
ആര്യൻ്റെ സൂക്ഷ്മതയോടെയുള്ള നോട്ടം കണ്ട ശാലിനിക്ക് ഉള്ളിൽ ഒരു ചെറിയ നാണം വന്നു. അവൻ്റെ കണ്ണുകൾ തൻ്റെ മുഖത്തിലെ ഏതൊക്കെ ഇന്ദ്രിയങ്ങളിലേക്കാണ് പോകുന്നതെന്ന് അവൻ്റെ കൃഷ്ണമണിയുടെ ചലനത്തിൽ നിന്നും അവൾക്ക് വ്യക്തമായിരുന്നു.
ഒടുവിൽ അവളുടെ ചുണ്ടുകളിലേക്ക് നോക്കി ഇരിക്കുന്ന അവൻ്റെ കണ്ണുകളിലേക്ക് നോക്കിക്കൊണ്ട് അവൾ “എന്താ…?” എന്ന് പതിഞ്ഞ താളത്തിൽ ചോദിച്ചു.
“ഏയ് ഒന്നുമില്ല…എന്നെ അടിച്ചിട്ട് ഇപ്പോ പാവത്തെ പോലെ ഉള്ള ഇരുപ്പ് കണ്ട് നോക്കിയിരുന്നു പോയതാണെ…”
“അത് അറിയാതെ പറ്റിയതാടാ…ഞാൻ എത്ര വട്ടം സോറി പറഞ്ഞു…”
“മ്മ്…ഇത്തവണത്തേക്ക് ക്ഷമിച്ചിരിക്കുന്നു…”
“അടുത്ത തവണയോ…?”
“ഞാനും തിരിച്ചടിക്കും…”
“മ്മ്…അടിക്കാൻ ഇങ്ങോട്ട് വാ…”
“എന്തേ…ഞാൻ അടിച്ചാൽ കൊള്ളൂലെ?”
“കൊള്ളും കൊള്ളും…നീ എൻ്റെ കയ്യീന്ന് കൊള്ളും…”
“എങ്കിൽ ചേച്ചിക്ക് വരുന്ന കത്തുകൾ എല്ലാം ഞാൻ തിരിച്ചയക്കും…”
“അയ്യടാ…”
“ഒരു അയ്യടയും ഇല്ല ശർക്കര അടയും ഇല്ലാ…”
“പോടാ ചെക്കാ…ഹഹ…”
“ഇന്നലെ
അമ്മയുടെയും അമ്മുവിൻ്റെയും നാമജപം കഴിഞ്ഞെന്ന് മനസ്സിലായ ശാലിനി പെട്ടെന്ന് തന്നെ കട്ടിലിൽ നിന്നും ചാടി എഴുന്നേറ്റു.
“അവർ എഴുന്നേറ്റെന്ന് തോന്നുന്നെടാ…നമ്മൾക്ക് അങ്ങോട്ട് പോകാം വാ…”
ആര്യനും അതിന് മൂളിയ ശേഷം അവളുടെ പിന്നാലെ നടന്നു.
“അമ്മൂട്ടിയുടെ നാമ ജപം ഒക്കെ കഴിഞ്ഞോ…” അകത്തേക്ക് ഓടി വന്ന അവളെ എടുത്ത് ഒക്കത്ത് വെച്ചുകൊണ്ട് ആര്യൻ ചോദിച്ചു.
“ഹാ കഴിഞ്ഞു…”
“അമ്പോറ്റിയോട് എന്തൊക്കെ പ്രാർത്ഥിച്ചു…?”
“പരീക്ഷക്ക് ജയിക്കാനും അമ്മേടെ ദേഷ്യം പെട്ടെന്ന് മാറാനും…”
അത് കേട്ട് നിന്ന ആര്യനും ശാലിനിയും അമ്മയും ഒരുപോലെ പൊട്ടിച്ചിരിച്ചു പോയി.
“ഡീ ഡീ…നിൻ്റെ പ്രാർത്ഥന കുറച്ച് കൂടുന്നുണ്ട്…” എന്ന് പറഞ്ഞ് ശാലിനി അമ്മുവിനെ അവൻ്റെ ഒക്കത്ത് നിന്നും എടുത്തോണ്ട് അവനെയും വിളിച്ച് അടുക്കളയിലേക്ക് പോയി.
അവർ നാല് പേരും അടുക്കളയിൽ നിന്ന് കൊച്ചു കൊച്ചു തമാശകളും കാര്യങ്ങളും ഒക്കെ പറഞ്ഞുകൊണ്ട് ശാലിനി അത്താഴം റെഡി ആക്കിയ ശേഷം ആര്യനോട് ഭക്ഷണ മേശയിലേക്ക് ഇരിക്കാൻ പറഞ്ഞു. അവൾ അവന് ആഹാരം വിളമ്പി കൊടുത്തു. ആര്യൻ അവരോടും ഇരിക്കാൻ ആവശ്യപ്പെട്ടു. ഒടുവിൽ അവൻ്റെ നിർബന്ധത്തിന് വഴങ്ങി അവരും അവനോടൊപ്പം ഇരുന്ന് തന്നെ ആഹാരം കഴിച്ചു.
ഭക്ഷണം കഴിച്ച് കഴിഞ്ഞ ശേഷം ആര്യൻ ഏകദേശം പതിനഞ്ച് മിനുട്ടുകൾ കൂടി അവിടെ ഇരുന്ന ശേഷം അവരോട് യാത്ര പറഞ്ഞ് അവിടെ നിന്നും ഇറങ്ങി വീട്ടിലേക്ക് പോയി.
വീട്ടിലെത്തിയ ആര്യൻ കുറച്ച് നേരം കൂടി പുസ്തകം വായിച്ചിരുന്ന ശേഷം യാത്രാ ക്ഷീണം കാരണം നേരത്തെ തന്നെ കിടന്നു.
##################################
പിറ്റേദിവസം രാവിലെ തന്നെ ആര്യൻ കുളത്തിൽ പോയി കുളി ഒക്കെ കഴിഞ്ഞ് തിരികെ വന്നു. ചന്ദ്രികയോട് ഉച്ചക്ക് ഊണ് വേണ്ടാ എന്ന് ആര്യൻ പറഞ്ഞിരുന്നു. രാവിലത്തെയും ഉച്ചക്കത്തെയും ആഹാരം ഉണ്ടാക്കിയ ശേഷം ഓഫീസിൽ പോകാൻ റെഡി ആയ ആര്യൻ ഭക്ഷണം കഴിച്ചു.
എട്ടര ആയപ്പോഴേക്കും ആര്യൻ വീട് പൂട്ടി ഇറങ്ങി. ഗേറ്റിന് പുറത്ത് ലിയയെ കാത്ത് നിൽക്കുന്ന ആര്യനെ കണ്ട മോളി മുറ്റത്തേക്ക് ഇറങ്ങി നിന്നുകൊണ്ട് അവനെ വിളിച്ചു.
“ആര്യാ…”
“എന്താ ചേട്ടത്തി?”
“ഒരു സഹായം വേണമായിരുന്നു…സുഹറയുടെ അടുത്ത് നിന്നും എൻ്റെ ഒരു ബ്ലൗസ് അവളത് തയിച്ചു കഴിഞ്ഞെങ്കിൽ ഒന്ന് വാങ്ങിക്കൊണ്ട് വരാമോ വരുമ്പോ…”
“അതിനെന്താ ചേട്ടത്തി…ഞാൻ വാങ്ങിക്കൊണ്ട് വരാം…ഇന്ന് കിട്ടുമോ… രണ്ടാഴ്ചക്കുള്ളിൽ തരാം എന്നല്ലേ അന്ന് പറഞ്ഞിരുന്നത്…”
“ഹാ ഏതായാലും ആര്യൻ ഒന്ന് ചോദിച്ച് നോക്ക് കിട്ടുവാണെങ്കിൽ കൊണ്ടുപോരെ…പൈസ ദാ ഞാൻ ഇപ്പോ എടുത്തുകൊണ്ട് വരാം…”
“ഇപ്പോ വേണ്ട ചേട്ടത്തി ഇന്ന് കിട്ടുവാണേൽ ഞാൻ കൊടുത്തോളാം…”
“എങ്കിൽ ശരി ആര്യാ…”
“ശരി ചേട്ടത്തി…”
മോളി വീടിനുള്ളിലേക്ക് കയറിപ്പോയി. രണ്ട് മിനുട്ടുകൾ കൂടി കഴിഞ്ഞപ്പോൾ ലിയ നടന്നു വന്നു.
ആര്യനെ കണ്ടതിൻ്റെ സന്തോഷം മറ്റെല്ലാവരെയും പോലെ തന്നെ ലിയയിലും ഉണ്ടായിരുന്നു. കുറച്ച് കൂടുതൽ ആണെങ്കിലേ ഉള്ളൂ. ലിയ വേഗം തന്നെ നടന്ന് അവൻ്റെ അരികിൽ എത്തി. അവൾ ഒന്നും മിണ്ടാതെ അവനെ തന്നെ നോക്കി നിന്നു.
“എന്താ ചേച്ചീ ഇങ്ങനെ ആദ്യമായിട്ട് കാണുന്ന പോലെ നോക്കുന്നത്…”
“ഏയ് ഒന്നുമില്ല…നീ എപ്പോ എത്തി?”
“ഞാൻ ഇന്നലെ വൈകിട്ട് തന്നെ എത്തി…”
“നാട്ടിലെ വിശേഷങ്ങളൊക്കെ പറ…കേൾക്കട്ടെ…”
“ഇപ്പോ തന്നെ വേണോ…ഓഫീസിൽ എത്തിയിട്ട് പറഞ്ഞാൽ പോരെ…” ആര്യൻ അവളെ കളിയാക്കി പറഞ്ഞു.
“ഓ…മതി മതി…എങ്കിൽ വാ വേഗം പോകാം…”
“മ്മ്…കേറിക്കോ…”
ലിയ അവനോടൊപ്പം സൈക്കിളിൽ കയറി അവൻ്റെ തോളിൽ പിടിച്ചിരുന്നുകൊണ്ട് ഓഫീസിലേക്ക് യാത്ര ആയി. ഓഫീസിൽ ചെന്ന ലിയ ആദ്യം തന്നെ അവൻ്റെ വിശേഷങ്ങൾ ചോദിച്ചറിയാൻ തിടുക്കം കാട്ടി.
“ടാ പറ…അമ്മ എന്ത് പറയുന്നു…സുഖം ആണോ…?”
“സുഖം സുഖം…എല്ലാം ഞാൻ വിശദമായിട്ട് ഉച്ചക്ക് പറയാം…നമ്മൾക്കാദ്യം പണി തീർക്കാം പിന്നെ സമയം കിടക്കുവല്ലെ…”
“മ്മ് ശരി…”
അവർ രണ്ടുപേരും അവരുടെ ജോലികളിലേക്ക് കടന്നു. ജോലി എല്ലാം തീർത്ത് ഏകദേശം പതിനൊന്നരയോട് കൂടി ആര്യൻ തിരിച്ചെത്തി. ലിയയുടെ ജോലി പക്ഷേ തീർന്നിട്ടുണ്ടായിരുന്നില്ല. അവൻ അവള് വരാൻ വേണ്ടി അകത്ത് വെയിറ്റ് ചെയ്തു. ഒടുവിൽ ലിയയുടെ ജോലി കഴിഞ്ഞപ്പോ സമയം ഒരു മണി ആകാറായിരുന്നു. ഇനി എങ്കിൽ പോയി കഴിച്ചിട്ട് വരാമെന്ന് പറഞ്ഞ് ആര്യൻ വീട്ടിലേക്ക് പോയി.
ഭക്ഷണം കഴിച്ച് കഴിഞ്ഞ് ആര്യൻ തിരികെ വരുന്നതും കാത്ത് ലിയ അക്ഷമയായി ഇരുന്നു. ഒടുവിൽ ആര്യൻ തിരികെ വന്ന് ലിയയോടൊപ്പം ഇരുന്നു.
“ടാ ഇനി പറ…”
“ഹാ ചോദിക്കൂ മാഡം…”
“കളിക്കാതെ പറയുന്നുണ്ടോ…”
“ഹാ പറയാം പറയാം…ശെടാ…കേട്ടോ…
ഞാൻ ഒരു പത്തര കഴിഞ്ഞപ്പോൾ വീട്ടിൽ എത്തി…ചെന്ന് കയറിയപ്പോൾ അമ്മ ഞെട്ടി…ആദ്യം കെട്ടിപ്പിടിച്ച് കുറേ ഉമ്മ ഒക്കെ തന്നെങ്കിലും ഒരു രാത്രി നിൽക്കാൻ വേണ്ടി മാത്രം അങ്ങോട്ട് വന്നതിന് പിന്നെ കുറേ വഴക്ക് പറഞ്ഞു…അതുകഴിഞ്ഞ് ഒരു ആഴ്ചക്ക് ശേഷം അമ്മ ഉണ്ടാക്കിയ കറികൾ കൂട്ടി ചോറ് കഴിച്ചു…ഇവിടുത്തെ വിശേഷങ്ങൾ പറഞ്ഞു…കിടന്നുറങ്ങി…വെളുപ്പിനെ എഴുന്നേറ്റു…കരച്ചിലും പിഴിച്ചിലും ഒക്കെ കഴിഞ്ഞ് ഇങ്ങോട്ടുള്ള വണ്ടി കയറി…ശുഭം…”