“ഇനി എന്റേന്ന് ങ്കൂടി കിട്ടണ്ടാന്ന് ണ്ടങ്ങേ മോങാണ്ട് നടന്നോ….”
ഞാൻ മറുപടി നൽകാതെ മുഖം തുടക്കുമ്പോളേക്ക് അമർ വീണ്ടും പറഞ്ഞു
“നിന്ന്യേ ഒന്ന് നേരെയാക്കണം ന്ന ഒരൊറ്റ ഉദ്ദേശങ്കൊണ്ടാ ഞാൻ അങ്ങനെ ഒക്കെ പറഞ്ഞെ…. അതാണങേ വിനയ് ഓവറാക്കും ചെയ്തു…. എന്നാലും ഇങ്ങനെ ഇത്രേം ഒന്നും കരുതീല്ല….”
ഈ ആജാനുബാഹു സോറി പറയാൻ പോവുന്നോ എന്ന് ആലോചിച്ച് കിട്ടാൻ പോവുന്ന സോറി കാത്തിരിക്കുമ്പോ കിട്ടി…
“അതുമ്പറഞ്ഞു ഈ പെണ്ണുങ്ങള്ടെ സ്വഭാവം മാറ്റീല്യങേ ണ്ടല്ലോ…. എന്റെ തനി സ്വരൂപം നീ കാണും ട്ടോ….”
“മ്മ്”
“വാ തൊറന്ന് പറയടാ ആണുങ്ങളെ പോലെ….”
“ശരീന്ന്…”
എന്റെ സംസാരത്തിലെ സ്ത്രൈണത അയാളെ തൃപ്തിപ്പെടുത്തിയില്ല എന്ന് തോന്നുന്നു….എങ്കിലും ഏതാനും നിമിഷം കഴിഞ്ഞു അമർ പറഞ്ഞു…
“വോക്കെ.. പിന്നെ, ഐ ലവ് യൂ ന്ന് പറയുമ്പോ ഒരു തെളക്കം ഇണ്ടാരുന്നല്ലോ നിന്റെ കണ്ണീ…. ന്താടാ നന്ദനേനെ നിനക്ക്???”
“പോയേ എന്റേന്ന് കിട്ടൂട്ടാ… എനിക്ക് അവ്ളോട് ഒന്നൂല്യ…”
“പിന്നെ ആരോടാ??? തത്തയോടാ???”
എനിക്ക് ഒരു നിമിഷം അതിനു മറുപടി ഉണ്ടായില്ല….
“ആള് കൊള്ളാലോ…”
അതും പറഞ്ഞു അമർ എന്റെ മുൻപിൽ കയറി എന്നെ ഫേസ് ചെയ്തു നിന്നു….
ആദ്യം അയാളെ തല ഉയർത്തി നോക്കി എങ്കിലും ആ കണ്ണുകളിലെ രൂക്ഷത കണ്ട് വീണ്ടുമെന്റെ മുഖം കുനിഞ്ഞു… ഇനി അമറിനു എങ്ങാനും??? എന്നാൽ ഞാൻ വീണ്ടും പെട്ടു…
“ടാ ചെക്കാ… ഒര് കാര്യമ്പറയാം…”
“തത്തയെ…”
അങ്ങനെ അതും തീരുമാനമായി എന്ന് മനസ്സിൽ ആലോചിക്കുമ്പോളേക്ക് അടുത്ത ഡയലോഗ് വന്നു…
“തത്തയെ എന്നല്ല ആരെ ആണെങ്കിലും…. നിനക്ക് ഒരു മാസം ടൈം തരും… എങ്ങനെയും വളച്ചു കുപ്പീൽ ആക്കിക്കോ… ഇല്ലെങ്കീ….”
ഇതിപ്പോ രോഗി ഇച്ഛിച്ചതും പ്രേമം.. വൈദ്യൻ കല്പിച്ചതും പ്രേമം എന്ന നില ആയല്ലോ ഭഗവാനെ എന്ന് തലപൊന്തിച്ചു തൊഴാൻ നോക്കി.. എവടന്ന്…. കത്തി നിക്കണ സൂര്യൻ അല്ലേ കക്ഷി… എന്റെ പ്രാർത്ഥന വേണ്ടെന്നും പറഞ്ഞു അങ്ങേര് കറക്റ്റ് ആയിട്ട് ഒരു മേഘത്തിനു ഉള്ളീ ഒളിച്ചു….
“ഇല്ലെങ്കീ??”
സത്യത്തി അത്ഭുതം കൊണ്ട് എന്റെ സൗണ്ട് അല്പം ഉയർന്നു….
“ഇല്ലെങ്കീ…എന്റെ ഇടിക്കട്ട നിന്റെ കവിളിനെ ചുംബിക്കും…. എന്ത് വേണം ന്ന് ഇപ്പൊ പറഞ്ഞൊ… ഇടിക്കട്ട കൊണ്ടുമ്മ വേണോ അതോ പെണ്ണിന്റേന്ന് വേണോ??”
“എനിക്കെന്റെ ചെലചാട്ടീടേന്ന് മതി…”
അറിയാതെ തന്നെ ഞാൻ പറഞ്ഞു പോയി…
അപ്പോളേക്കും ഞങ്ങൾ അവരുടെ സ്ഥിരം സ്ഥലത്തെത്തി…. അമറും ആയുള്ള കമ്പനി മൂലം ദർശനും വിനയും എന്നോട് അടുത്തു….
അന്ന് ഉച്ചക്ക് അവളെ…. എന്റെ ചെലചാട്ടിയെ കാണുമ്പോൾ അവളുടെ മുഖത്ത് എന്ത് പറ്റിയെന്ന ചോദ്യമുണ്ടായിരുന്നു… ഒന്നുമില്ലെന്ന ഭാവത്തിൽ കണ്ണടച്ച് കൈ കാണിച്ചപ്പോൾ അവളൊന്നു മധുരമായി പുഞ്ചിരിച്ചു….
ദിവസങ്ങൾ കടന്നു പോയി കൊണ്ടിരുന്നു… എന്നെ കാണുമ്പോൾ ഒക്കെ എനിക്കായി സമ്മാനിക്കാൻ അവളൊരു പുഞ്ചിരി അവളുടെ ചുണ്ടിൽ കരുതി…
അമറിന്റെ സപ്പോർട്ട് ഉള്ളത്കൊണ്ട് എനിക്കാരെയും പേടിക്കാതെ നടക്കാനും കഴിഞ്ഞു… പലയിടത്ത് നിന്നും ഉയരുന്ന ചാന്തേ എന്നുള്ള വിളി അവഗണിക്കാൻ ഞാനും പഠിച്ചു….
ദിവസങ്ങൾ കടന്നുപോയി….
ഒരാഴ്ച കൂടിയെ ഒള്ളു അമർ തന്ന ടാർജറ്റിലേക്ക്… ഇപ്പോളേക്ക് അവർ മൂവരും ആയി നല്ല കമ്പനി ആയെന്ന് മാത്രം അല്ല ഞങ്ങൾ നാലു പേരുടെ ഒരു ടീമായി വളർന്നു… അവർക്ക് കൊഞ്ചിക്കാൻ ഉള്ള കുഞ്ഞാവ ഞാനും🤪…
അന്നൊരു സ്ട്രൈക്ക് ഡേ ആയിരുന്നു…. എന്നും ആഘോഷമുള്ള ടീമ്സിന് ഹോളിഡേ കിട്ടിയാൽ പറയായുണ്ടോ??
അമറും വിനയ് യും ബീവറേജിലേക്കും ദർശൻ ടച്ചിങ്‌സ് നും പോയി… എന്റെ പണി ക്യാംപസ്സിൽ ആരും കേറാത്ത കാട് പോലുള്ള ഇടത്ത് മരച്ചുവട്ടിൽ ഇരിക്കാൻ ഉള്ള സെറ്റ് അപ്പ്….
അഞ്ചു മിനിറ്റ് കൊണ്ടു അത് ചെയ്തു തീർത്തു ഞാൻ കോളേജ് ക്യാംപസിലെ 1st ഇയർ bsc ഫിസിക്സിന് അടുത്തേക്ക് തിരിച്ചു നടന്നു…..
അപ്പോളും സ്ട്രൈക്ക് വിളി ഘോരഘോരം മുഴങ്ങുന്നുണ്ട്…. അധികം വൈകാതെ ഞാൻ കണ്ടു… എന്റെ ചെലച്ചാട്ടികിളിയെ
എന്നത്തെയും പോലെ ഒരു വലിയ സുഹൃത് കൂട്ടത്തിനു നടുവിലാണ് അപ്പോളും കക്ഷി…. ആ കൂട്ടത്തിൽ എന്ന് മാത്രം അല്ല…. കോളേജിലെ തന്നെ ആൺകുട്ടി എന്നോ പെൺകുട്ടി എന്നോ ഭേദമന്യേ മിക്കവാറും എല്ലാ കുട്ടികളോടും ഒരേ പോലെ കമ്പനി ആയി നടക്കുന്ന വായാടിപെണ്ണ്….
കാണാൻ നന്ദനയെ പോലെ ഒന്നും ഇല്ലെങ്കിലും അവളോട് ഉള്ള ഒരട്രാക്ഷൻ….. അത് കാണും തോറും കൂടി വരുന്നതേ ഒള്ളു….
ഇരുനിറം ആണെങ്കിലും ഐശ്വര്യമുള്ള മുഖം… സ്പെക്സ് ഒക്കെ വച്ച ഒരു കുഞ്ഞു പെണ്ണ്…. അവളുടെ മൂക്കിന് മാത്രം അല്പം നീളകൂടുതൽ ഉണ്ട്… അത് അവളുടെ ഐശ്വര്യം വർദ്ധിപിക്കുന്നെ ഒള്ളു എന്ന് മാത്രം…..
പക്ഷേ ഇതു വരേയ്ക്കും അവളിങ്ങോട്ട് വന്നു സംസാരിച്ചത് അല്ലാതെ അവളുടെ പേര് പോലും അറിയില്ല….
അപ്പോൾ അകലെ നിന്ന് അവൾ ഫ്രെണ്ട്സിന്റെ ഒപ്പം വരുന്നത് കണ്ടതും ഞാനവർ വരുന്ന വഴിയിൽ നിന്ന് അരികിലേക്ക് ഒതുങ്ങി അരമതിലിൽ ചാരി നിന്നു….
ആദ്യമായാവും ഞാനവളെ തനിച്ചു ഇത്പോലെ ശ്രദ്ധിച്ചു നോക്കി നില്കുന്നത്…..
കക്ഷി ആണെങ്കിൽ ചെലച്ചാട്ടി കിളിയെ പോലെ പരിസരം മറന്നുള്ള ചിരിയും സംസാരവും ആയി ഒരു കൂട്ടത്തിന് നടുവിലാണ്….
അതിനിടെ കക്ഷി എന്തോ ഡയലോഗ് വിട്ടെന്ന് തോന്നുന്നു… ഒപ്പം നടന്ന മറ്റൊരു കൊച്ചു അവളെ അടിക്കാൻ ഓങ്ങി… അതിൽ നിന്ന് രക്ഷപെടാൻ അവൾ മുന്നോട്ട് ഓടുമ്പോളാണ് എന്നെ കാണുന്നത്….
മുപ്പത്തി രണ്ടു പല്ലും കാണിച്ചുള്ള അവളുടെ ചിരി അതോടെ നാണത്തിൽ കുതിർന്ന പുഞ്ചിരിയായി മാറി…. സ്വിച്ച് ഇട്ടത് പോലെ അവൾ ഓട്ടം നിറുത്തി….. പിറകിൽ നിന്ന് വന്ന കുട്ടിയുടെ കയ്യിൽ നിന്ന് പുറത്ത് നല്ലൊരു അടി കിട്ടിയെങ്കിലും അതൊന്നും അവളെ ബാധിക്കാത്തത് പോലെ,….
ഇടക്ക് മുഖം കുനിച്ചും… ഇടക്ക് എന്നെ ഒളികണ്ണാലെ നോക്കിയും അവൾ എനിക്ക് അരികിൽ വരെയെത്തി….
എനിക്ക് അരികിൽ എത്തുമ്പോളേക്ക് അവളുടെ വേഗത കുറഞ്ഞു കുറഞ്ഞു അവൾ ഏകദേശം ആ കൂട്ടത്തിന്റെ പിറകിലെത്തിയിട്ടുണ്ട്….
അല്പം ഒതുങ്ങി നിന്ന് അവളെ മാത്രം വീക്ഷിക്കുന്ന എന്നെ പാസ് ചെയ്യുന്നതിന് തൊട്ടുമുൻപ് അവൾ എന്നെ നോക്കി പുരികം ഉയർത്തി എന്താണ് എന്ന് ചോദിക്കും പോലെ…
അത്പോലെ തന്നെ ഞാനും തല അനക്കി കൊണ്ടു അവളെ എനിക്ക് അരികിലേക്ക് വിളിച്ചു…
എന്തോ മഹാപാപം പോലെ അവൾ നിഷേധിച്ചു കൊണ്ടു തലയിളക്കി കൂട്ടുകാരികൾക്ക് ഇടയിലേക്ക് കയറി നടന്നു….. ചെറിയൊരു നിരാശ തോന്നി…. പക്ഷേ അവൾ ഇടയ്ക്കിടെ തിരിഞ്ഞു നോക്കുന്നത് കണ്ടപ്പോൾ എന്റെ ചുണ്ടിലൊരു പുഞ്ചിരി വിടർന്നു….
ഗേറ്റിൽ നിന്ന് പുറത്തേക്ക് അവർ കടക്കുമ്പോൾ അവളുടെ അവസാന നോട്ടം പ്രതീക്ഷിച്ചെങ്കിലും അവളാ നേരം ഒപ്പം ഉള്ള കൊച്ചിനോട് എന്തോ സംസാരിച്ചു കൊണ്ടു കണ്ണിൽ നിന്ന് മറഞ്ഞു…