അർച്ചനയ്ക്ക് അവളുടെ സംസാരം കേൾക്കുമ്പോൾ തന്നെ ചിരി വരുന്നുണ്ടായിരുന്നു, അവൾ ചിരി മറയ്ക്കാൻ ശ്രമിച്ചു പക്ഷേ പറ്റിയില്ല. അവൾ ചിരിച്ചിട്ട് ചുണ്ട് കടിച്ച്, ചിരി മായ്ച്ചു. ആദിൽ അത് കണ്ട് അവളെ നോക്കി ചിരിച്ചു, അർച്ചന പിന്നെ ബലം പിടിക്കാൻ നിന്നല്ല, അവൾ തിരിച്ച് അവനെ നോക്കിയും ചിരിച്ചു.
അർച്ചന എഴുന്നേറ്റ് ചെന്ന് പഞ്ചിങ്
മെഷീനിൽ അവളുടെ വിരൽ വച്ച്, കീപാഡിൽ എന്തോ ടൈപ്പ് ചെയ്തു.
ആമിന അവളെ നോക്കി തലയാട്ടി ചിരിച്ചിട്ട് തിരിച്ച് നടന്നു.
വിരല് വെക്ക് ആമിന സിസ്റ്ററേ, അർച്ചന ശബ്ദത്തിന് കടുപ്പം കൂട്ടി അവളോട് പറഞ്ഞു.
സോറി, അത് ഞാൻ മറന്നു. ആമിന പെട്ടെന്ന് വന്ന് പഞ്ചിങ് മെഷീനിൽ വിരൽ അമർത്തി.
താങ്ക്സ് കേട്ടോ, ഇങ്ങള് മുത്താണ് അർച്ചന മാഡം.
അർച്ചനയ്ക്ക് അവളുടെ ഓമനത്തം തുളുമ്പുന്ന, ചിരിക്കുന്ന മുഖത്ത് നോക്കി ഒന്നും ദേഷ്യപ്പെട്ട് പറയാൻ തോന്നിയില്ല. അവൾക്ക് ആമിനയുടെ കവിളിൽ പിടിച്ച് ഒന്ന് നുള്ളിയാൽ കൊള്ളാമെന്ന് ഉണ്ടായിരുന്നു. പക്ഷേ സ്വന്തം പദവി ഓർത്ത് അത് ചെയ്തില്ല.
അർച്ചന ചിരിച്ചിട്ട് തിരിച്ച് റിസപ്ഷനിലേക്ക് നടന്നു. ആമിന വീണ്ടും റിസപ്ഷന്റെ അടുത്തേക്ക് ചെന്ന് ആദിലിനോട് ചോദിച്ചു.
അനക്ക് 4 ഈസമാ നൈറ്റ്‌ ആദിലെ?
അതെ സിസ്റ്ററെ, അവൻ മറുപടി പറഞ്ഞു.
സിസ്റ്ററിന് ചേഞ്ച് ചെയ്യണ്ടേ? അവൻ അവളോട് ചോദിച്ചു.
ശോ, ഞാൻ അത് മറനീനി. അവൾ തലയിൽ കൈവെച്ച് പറഞ്ഞിട്ട് ചേഞ്ചിങ് റൂമിലേക്ക് നടന്നു.
അർച്ചനയ്ക്ക് വീണ്ടും ചിരി വന്നു, ആമിന പോയിക്കഴിഞ്ഞപ്പോൾ അവൾ ആദിലിനോട് ചോദിച്ചു. ആമിന സിസ്റ്റർ എപ്പോഴും ഇങ്ങനെ ആണോ?
അവൻ ചിരിച്ചുകൊണ്ട് മറുപടി പറഞ്ഞു.
സംസാരം എപ്പോഴും ഇങ്ങനെതന്നാ. ഞാൻ
ഒന്ന് രണ്ട് തവണയേ പുള്ളിക്കാരിയുടെ കൂടെ
ഡ്യൂട്ടി ചെയ്തിട്ടുള്ളൂ. ഓടിനടന്ന് പണിയെടുക്കും, എല്ലാവരോടും നല്ല ജോളിയാ. അതുകൊണ്ട് എല്ലാർക്കും ഭയങ്കര കാര്യമാ.
അവൻ പറഞ്ഞ് അവസാനിപ്പിക്കുന്നതിന് മുമ്പേ അർച്ചന എന്തോ ഓർത്തത് പോലെ കമ്പ്യൂട്ടറിൽ നോക്കി ചികയാൻ തുടങ്ങി. സംസാരം തീരുന്ന മുൻപ് അവൾ
ശ്രദ്ധ കമ്പ്യൂട്ടറിലേക്ക് തിരിച്ചത് കണ്ടപ്പോൾ അവന് കുറച്ച് ഈർഷ്യ തോന്നി. അവനും കമ്പ്യൂട്ടറിലേക്ക് തിരിഞ്ഞു.
കുറച്ചുകഴിഞ്ഞ് ഡ്രസ്സ് ഒക്കെ മാറി
ആമിന റിസപ്ഷന്റെ ഉള്ളിലേക്ക് വന്നു,
നീല നിറത്തിൽ ഉള്ള പാൻ്റും, അതേ നിറത്തിൽ തന്നെയുള്ള ഹാഫ് കൈ
ടോപ്പും, അതിൻ്റെ അടിയിൽ ഇളം നീല നിറത്തിലുള്ള ഒരു ഫുൾ കൈ ബനിയനുമാണ് അവളുടെ യൂണിഫോം.
ആദിൽ അവൾക്ക് കയറാനായി കുറച്ച് ഒതുങ്ങി കൊടുത്തു. അവൾ ഉള്ളിൽ കയറി അവിടെയുള്ള ഒരു ചെയർ നീക്കിയിട്ട് അർച്ചനയുടെയും ആദിലിന്റെയും നടുവിലായി ഇരുന്നു.
അവിടമാകെ അത്തറിൻ്റെ മണം നിറഞ്ഞു.
ഈടെ പേഷ്യൻറ്റ്സ് ഒന്നും ഇല്ലേ? ആമിന ആദിലിനോട് ചോദിച്ചു.
എനിക്ക് അറിയില്ല സിസ്റ്ററെ, എനിക്ക് ആരെയും അസൈൻ ചെയ്തിട്ടില്ല.
ഈടെ ഇന്ന് പണി ഒന്നും കാണില്ലാ അല്ലെ? ആമിന അവനോട് ചോദിച്ചു.
ഇല്ലെങ്കിൽ കൊള്ളാം, സിസ്റ്റർ വെറുതെ പറഞ്ഞ് ആരെങ്കിലും വരാതിരുന്നാൽ മതി.
ഇൻ്റെ കരിനാക്ക് ഒന്നും അല്ല. ആമിന നാക്ക് പുറത്തേക്ക് നീട്ടി കാണിച്ചു.
ഇടം കണ്ണിലൂടെ ഇത് കണ്ടു കൊണ്ടിരുന്ന അർച്ചനയ്ക്ക് ചിരി പൊട്ടി.
ആമിന തിരിഞ്ഞ് അർച്ചനയോട് ചോദിച്ചു. അർച്ചന മാഡത്തിന് ഒത്തിരി ജോലിയുണ്ടോ ഇന്ന്? അല്ലേൽ നമ്മ്ക്ക് മിണ്ടിം പറഞ്ഞും ഒക്കെ ഇരിക്കാരുന്നു.
ജോലി ഒന്നും ഇല്ല, ഒരു കാര്യം നോക്കുവായിരുന്നു.
എന്താ നോക്കുന്നെ?
ആമിന നിഷ്കളങ്കതയോടെ ചോദിച്ചു.
സാധാരണ നമ്മൾ മൂന്ന് പേരും ഒരിടത്ത് ഡ്യൂട്ടിക്ക് വരേണ്ടതല്ല, എന്താ അങ്ങനെ വന്നത് എന്ന് നോക്കുവായിരുന്നു.
അതെന്താ നമ്മൾ മൂന്നും ഒരിടത്ത് ഡ്യൂട്ടിക്ക് വന്നാൽ ?
ആമിന അവളോട് ചോദിച്ചു.
ഒരേ സ്ഥലത്ത് നിന്നുള്ളവരെ
മാത്രമായി ഒരിടത്ത് ഡ്യൂട്ടിക്ക് ഇടില്ല, മിക്സ് ചെയ്താ ഇടുന്നെ. അർച്ചന പറഞ്ഞു.
അതിന് നമ്മൾ മൂന്നും ഒരേ സ്ഥലത്ത് നിന്ന് അല്ലല്ലോ ആമിന പറഞ്ഞു.