വെല്യ ഫാം ആണോ മാഡം? ആമിനയുടെ ചോദ്യങ്ങൾ നിർത്താൻ വേണ്ടി ആദിൽ അർച്ചയോട് ചോദിച്ചു.
അതെ, കുറച്ച് കൊമേഴ്ഷ്യലാണ്. പശുവും, ആടും, കോഴിയും എല്ലാം ഉണ്ട്.
എല്ലാം ആര് നോക്കും? ആമിന ചോദിച്ചു
5-6 സ്ഥിരം ജോലിക്കാർ ഉണ്ട്, അർച്ചന മറുപടി
പറഞ്ഞു.
അന്റെ ഫാമിലി ഈടെ ഒണ്ടോ ആദിലെ? ആമിന ഉടനെ അവന്റെ നേരെ തിരിഞ്ഞു.
ഇല്ല ഞാൻ ഒറ്റക്കാ. അവൻ മറുപടി പറഞ്ഞു.
കല്യാണം കഴിഞ്ഞിനി? ആമിന ചോദിച്ചു.
ഏഹ്? ആദിൽ മനസ്സിലാവാത്തത് പോലെ തിരിച്ച് ചോദിച്ചു.
കല്യാണം കഴിഞ്ഞോ എന്ന്? ആമിന വിശദീകരിച്ചു.
ഇല്ല, അവൻ മറുപടി പറഞ്ഞു.
അനക്ക് എത്ര വയസ്സായി? നോക്കുനില്ലേ?
24 വയസ്സ് കഴിഞ്ഞു. നോക്കുന്നുണ്ട്.
ആമിന ആശ്ചര്യത്തോടെ വാ തുറന്നിട്ട് വാപൊത്തി അര്‍ച്ചനയെ നോക്കി, എന്നിട്ട് ആദിലിനെ നോക്കി പറഞ്ഞു.
അന്നേ കണ്ടാൽ അതിൽ കൂടുതൽ പ്രായം പറയുട്ടോ, 24ലേ ആയിട്ടുള്ളേൽ ഇനിം സമയം ഇണ്ടെല്ലോ.
നേരത്തെ നോക്കി തുടങ്ങണം എന്ന് പറയുന്നു.
ആര്? വീട്ടുകാരോ അതോ ഇയ്യോ? ആമിന കളിയാക്കി.
രണ്ടും, ആദിൽ ഒരു കള്ളനാണം അഭിനയിച്ച് ചിരിച്ചു.
ആമിന അത് കണ്ട് കുലുങ്ങി പൊട്ടിച്ചിരിച്ചു.
നല്ല പെൺകുട്ടിയൊൾ വല്ലതും ഉണ്ടെങ്കി ഞാനും പറയാം കേട്ടോ.അർച്ചന മാഡം ഒന്ന് നോക്കിയേക്കണേ. അവൾ അർച്ചനയെ നോക്കി പറഞ്ഞു
അർച്ചന ഒന്നും മിണ്ടാതെ ചിരിച്ചിട്ട് തലയാട്ടി.
അനക്ക് ലൈൻ ഒന്നും ഇല്ലേ? ആമിന ശബ്ദം താഴ്ത്തി അവനോട് ചോദിച്ചു.
ഇപ്പൊ ഇല്ല. ആദിൽ അതിലും
ശബ്ദം താഴ്ത്തി അവളോട് പറഞ്ഞു.
ആമിനക്ക് അവൻ അവളെ അനുകരിച്ച് അങ്ങനെ ചെയ്തത് വലിയ തമാശയായി തോന്നി. അവൾ അവന്റെ തുടയിൽ കൈകൊണ്ട് മെല്ലെ അടിച്ചിട്ട് ഉറക്കെ പൊട്ടിച്ചിരിച്ചു.
അർച്ചന കമ്പ്യൂട്ടറിൽ നിന്നുള്ള നോട്ടം വിട്ടിട്ട് ആമിനയുടെ ചെയ്തികൾ കണ്ട് ചിരിച്ചുകൊണ്ട് ഇരുന്നു. അർച്ചനക്ക് അവളെ നല്ലോണം ബോധിച്ചു. നിഷ്കളങ്ക സ്വഭാവം, ഒരു ലക്കും ലഗാനും
ഇല്ലാത്ത നാക്ക്.
അന്റെ ലൈൻ പൊട്ടി പോയാ? എത്ര നാൾ ഉണ്ടാരുന്നു? ആമിന അവനോട് ചോദിച്ചു.
5-6 വർഷം ഉണ്ടാരുന്നു. അവൻ മറുപടി പറഞ്ഞു.
ഉയ്യോ? ആമിന വാ പൊത്തി, അവളുടെ മുഖത്തെ ചിരി മറഞ്ഞ്, വ്യാകുലതയായി മാറി.
എന്തെ നിർത്തിയെ? അവൾ സീരിയസ് ആയി അവനോട് ചോദിച്ചു.
അവൾടെ വീട്ടിൽ സമ്മതിച്ചില്ല. ഗവണ്മെന്റ് ജോലി വേണം അവർക്ക്. അവൻ പറഞ്ഞു.
ഓൾ ഒന്നും പറഞ്ഞില്ലേ? ആമിന ചോദിച്ചു.
അവൾ വീട്ടുകാരെ എതിർക്കില്ല. അവൻ പറഞ്ഞു.
ആമിന എന്തോ ആലോചിച്ചിട്ടെന്ന പോലെ ഇരുന്നു. അവൾടെ കണ്ണ് നിറഞ്ഞ് വന്നു, അവൾ കരച്ചിൽ മറച്ച് പിടിക്കാൻ ശ്രമിച്ചെങ്കിലും നടന്നില്ല. ഒരു തുള്ളി കണ്ണുനീർ അവളടെ കണ്ണിൽ നിന്നും കവിളിൽ വീണ്‌ ഒഴുകി ഇറങ്ങി. അവൾ അത് പെട്ടെന്ന് തന്നെ കൈവെള്ള കൊണ്ട് തുടച്ചു.
ആദിൽ ഇത് കണ്ട് വല്ലാതെയായി, അവന് പെട്ടെന്ന് എന്ത് പറയണം എന്ന് അറിയില്ലായിരുന്നു. അവൻ മുഖത്ത് ഒരു ചിരി വരുത്തിക്കൊണ്ട് പറഞ്ഞു.
എനിക്ക് കുഴപ്പം ഒന്നും ഇല്ല സിസ്റ്ററെ.
അർച്ചന കൈ എത്തി അവിടെ ഇരുന്നു ടിഷ്യൂ ബോക്സ്‌ എടുത്ത് അവൾക്ക് നേരെ നീട്ടി. അവൾ അത് ഒരെണ്ണം എടുത്തിട്ട് മൂക്ക് തുടച്ചുകൊണ്ട് എഴുനേറ്റു.
വാഷ്റൂമിൽ പോയിട്ട് വരാം, അവൾ പറഞ്ഞിട്ട് എഴുനേറ്റ് പോയി.
ആദിൽ വഴി മാറി കൊടുത്തു. അവൾ പോയപ്പോ അവൻ അർച്ചനയെ നോക്കി പറഞ്ഞു.
പാവം, ഭയങ്കര സെൻസിറ്റീവാ അല്ലെ?
അർച്ചന അവനെ തുറിച്ച് നോക്കി രണ്ട് നിമിഷം ഇരുന്നു. എന്നിട്ട് അധികം ശബ്ദം ഉയർത്താതെ പറഞ്ഞു.
സിസ്റ്റർ, സിസ്റ്ററിന്റെ
പാസ്ററ് ഓർത്ത് കരഞ്ഞതാവും, ആദിലിനെ കുറിച്ച് ഓർത്തിട്ടാവില്ല.
ഓ…
അവൻ അപ്പോഴാണ് അങ്ങനെ ഒരു സാധ്യതയെ പറ്റി ചിന്തിച്ചത്. ആലോചിച്ചപ്പോ അതായിരിക്കും നടന്നതെന്ന് അവന് തോന്നി.
വരുമ്പോ കൂടുതൽ ചോദിച്ച് വിഷമിപ്പിക്കേണ്ട. അർച്ചന ഒരു താകീത് പോലെ അവനോട് പറഞ്ഞു. അവൻ തലയാട്ടി. അവർ രണ്ട് പേരും കമ്പ്യൂട്ടറിലേക്ക് തിരിഞ്ഞു. ഒരു പത്ത് മിനിറ്റ് കഴിഞ്ഞപ്പോ ആമിന വന്നു, ആദിൽ അവൾക്ക് ഉള്ളിലേക്ക് കയറാൻ വഴി കൊടുത്തു.