എന്റെ കണ്ണുകളിൽ ഇരുട്ട് കയറി വരുന്നത് പോലെ. ആകെ എനിക്ക് കാണാൻ സാധിക്കുന്നത് വെള്ളത്തിനടിയിൽ കാണുന്ന ഒരു പച്ച ചുരിദാർ ആണ്. താൻ തോറ്റിട്ടില്ല എന്ന് അറിയിക്കാൻ എന്നോണം മുങ്ങി കിടക്കുന്ന ശിവ ചേച്ചി.. ശ്വാസം മുട്ടി മരിച്ചവർ ഒക്കെ ഇതേ അവസ്ഥയിലൂടെ കടന്നു പോയിട്ട് ഉണ്ടാകുമെന്ന് ഞാൻ ഓർത്തു. എന്തൊരു ഭയാനകം ആയ അവസ്ഥ ആണ്.. കുറച്ചു മുന്നേ ശിവ ചേച്ചി പറഞ്ഞ പെൺകുട്ടിയുടെ കഥ ഞാൻ ഓർത്തു. ആ പെൺകുട്ടിയും ശ്വാസം മുട്ടി ആവില്ലേ മരിച്ചത്.. ശിവ ചേച്ചി ഉണ്ടാക്കി പറഞ്ഞ കഥയാണോ അതെന്ന് എനിക്ക് ഉറപ്പില്ല. എന്നാലും അത് സത്യം ആണെങ്കിൽ ആ പെണ്ണ് ഞാൻ ഇപ്പൊ കടന്നു പോയ അവസ്ഥ അറിഞ്ഞിട്ട് ഉണ്ടാകണം.. കണ്ണുകളിൽ ഇരുട്ട് വല്ലാതെ പടർന്നു ശിവേച്ചിയുടെ അടയാളം ആയ പച്ച ചുരിദാർ കൂടി കാണാൻ കഴിയുന്നില്ല. എന്റെ ബോധം മറയുകയാണോ..? പതിയെ എന്റെ കൈകൾ പാറയിൽ നിന്നും വേർപെട്ടു. അവിടെ ഇനിയും പിടിച്ചു ഇരിക്കാൻ ഞാൻ ശ്രമിച്ചാൽ പോലും എനിക്ക് കഴിയില്ല
കണ്ണുകളിൽ ഇരച്ചു കയറി വന്ന ഇരുട്ടിനൊപ്പം ഞാൻ മറ്റൊന്ന് കൂടി കണ്ടു. വെളുത്ത വസ്ത്രം ധരിച്ച ഒരു പെൺകുട്ടി എനിക്ക് നേരെ നീന്തി വരുന്നു. അവളെ എനിക്ക് വ്യക്തമായി കാണാം. വെള്ളത്തിന്റെ കലക്കൽ ഇല്ലാതെ തെളിച്ചത്തിൽ എനിക്ക് അവളെ കാണാം. ആ പെണ്ണിന്റെ കണ്ണുകൾ വല്ലാതെ തിളങ്ങുന്നുണ്ട്. കണ്ണുകൾ മാത്രമല്ല. അവളുടെ ശരീരവും വല്ലാതെ തിളങ്ങുന്നു. അല്ല വിളറി വെളുത്തിരിക്കുന്നു. ഒരുപാട് നേരം വെള്ളത്തിൽ കിടന്നാൽ കയ്യൊക്കെ കുതിർന്നു വെളുക്കില്ലേ..? അത് പോലെ. ദേഹം മുഴുവൻ അത് പോലെ വെളുത്തിരിക്കാൻ ഇവൾ ഒരുപാട് നേരം ആയി വെള്ളത്തിൽ ആയിരിക്കുമല്ലോ…? ഒരുപാട് നേരമല്ല.. ഒരുപാട് കാലം…. ഇതാ പെൺകുട്ടി ആണ്. ശിവേച്ചി മുന്നേ പറഞ്ഞ കഥയിലെ മുങ്ങി മരിച്ച പെൺകുട്ടി..
‘ചാവാൻ പോവണോ…?
അവൾ എന്നോട് ചോദിച്ചു
അല്ല. ഇത് പന്തയം വച്ചു മുങ്ങിയതാണ്. ആത്മഹത്യ ശ്രമം അല്ല. ഞാൻ അവളോട് പറഞ്ഞു. അല്ല പറയാൻ ശ്രമിച്ചു.
‘നിലയുള്ളിടത്തു മുങ്ങി ചാവാൻ പറ്റില്ല. ചാവണേൽ ദേ നടുവിലേക്ക് വന്നാൽ മതി..’
അവൾ പറഞ്ഞു. അവൾക്ക് എങ്ങനെ വെള്ളത്തിന് അടിയിൽ സംസാരിക്കാൻ കഴിയുന്നു. എനിക്ക് പറ്റില്ലല്ലോ. എനിക്കെന്നല്ല ആർക്കും പറ്റില്ല. ഇവൾ മരിച്ചത് കൊണ്ടാവണം ഇവൾക്ക് അതിന് കഴിയുന്നത്
‘ചാവണ്ട…’
ഞാൻ ഒരുവിധം പറഞ്ഞു. അത് അവൾക്ക് മനസിലായി എന്ന് തോന്നുന്നു.
‘എന്നാൽ എഴുന്നേൽക്ക്..’
അവൾ എന്നെ തൊട്ട് കൊണ്ട് പറഞ്ഞു. വെള്ളതിനേക്കാൾ തണുപ്പുണ്ട് അവളുടെ കൈകളിൽ
‘മുഹും..’
വേണ്ടെന്ന മട്ടിൽ ഞാൻ തലയാട്ടി. പക്ഷെ അവൾ വിട്ടില്ല. എന്റെ മുടിയിൽ പിടിച്ചു എന്നെ മുകളിലേക്ക് ഉയർത്തി. വെള്ളത്തിന് മുകളിലേക്ക് എത്തുന്നത് വരെ ഞാൻ അവളെ വ്യക്തമായി കണ്ടു. ഞാൻ വെള്ളത്തിന് മേലേ എത്തിയതും അവൾ പെട്ടന്ന് ഇല്ലാതെ ആയി. അല്ല അവളുടെ സ്ഥാനത്തു പകരം ശിവേച്ചി ആയിരുന്നു എന്നെ വെള്ളത്തിൽ നിന്ന് പൊക്കിയത്
‘എന്തൊരു കിടപ്പാടാ ശ്വാസം പിടിച്ചു.. ഞാൻ കരുതി നിന്റെ ബോധം പോയെന്ന്…’
ചേച്ചി കിതച്ചു കൊണ്ട് പറഞ്ഞു
എനിക്ക് മറുപടി ഒന്നും കൊടുക്കാൻ പറ്റിയില്ല. പട്ടിയെ പോലെ അണച്ചു ഞാൻ പടിയിലേക്ക് തല വച്ചു കിടന്നു. ഞാൻ വല്ലാണ്ട് അണച്ചു പോയി.
‘നന്ദുച്ചേട്ടൻ ജയിച്ചേ.. നന്ദു ചേട്ടൻ ജയിച്ചേ..’
ആയിഷ കുട്ടി സന്തോഷത്തിൽ കയ്യടിക്കുന്നത് ഞാൻ കണ്ണടച്ചു കിടന്നു കേട്ടു
‘ചേച്ചി എപ്പോ പൊങ്ങി.. ഞാൻ.. ഞാൻ കണ്ടില്ല..’
അണപ്പ് ഒന്ന് മാറിയപ്പോ ഞാൻ സംസാരിച്ചു
‘ഞാൻ കുറച്ചായി. എന്നിട്ടും നീ പൊങ്ങി വരാഞ്ഞപ്പോ ഞാൻ കരുതി നീ അടിയിൽ മുങ്ങി ചത്തെന്നു..’
ചേച്ചി തമാശ പോലെ പറഞ്ഞു
‘ചാവാൻ പോയതാ. അപ്പോളാ ചേച്ചി പറഞ്ഞ പ്രേതം വന്നു എന്നെ പൊക്കി എടുത്തത്..’
ഞാൻ പറഞ്ഞു
‘പ്രേതം നിന്റെ..’