“കാൽ വെള്ളത്തിലേക്ക് വെക്ക്…നീര് കുറയാൻ നല്ലതാ….” വെള്ളത്തിലേക്ക് അല്പം ഉപ്പിട്ടുകൊണ്ടവൻ പറഞ്ഞു…
ഇളം ചൂടുവെള്ളത്തിൽ കാൽപാദം മുങ്ങിയതും ഒരു സുഖം തോന്നി…
അവളവനെ തന്നെ നോക്കി…ഒരു ദിവസത്തെ പരിജയം മാത്രമുള്ള തന്നോട് ഇത്ര പരിഗണനയോ അവനു…സദാ ഗൗരവം വിട്ടുമാറാത്ത മുഖത്തേക്ക് അവൾ കണ്ണ് പറിക്കാതെ നോക്കിയിരുന്നു…ഉള്ളു കൊണ്ട് പാവമാണെന്നു തോന്നുന്നു…
“ഒന്നും ഉണ്ടാക്കാൻ നിക്കണ്ട…ഞാൻ ജോഗിങ് ണ് പോകുവാ തിരികെ വരുമ്പോൾ വാങ്ങിയിട്ട് വരാം”
അന്നുച്ചയോടെ അവന്റെബുള്ളറ്റ് വീട്ടിലെത്തിച്ചിരുന്നു….അവർ പുറത്ത് പോയി അവൾക്കുവേണ്ട സാധനങ്ങളും ഡ്രൈ ഫ്രൂട്ട്സ് നട്സ് ഉം മരുന്നുകലുമൊക്കെ വാങ്ങിച്ചു…അടുക്കളയിലേക്ക് വേണ്ടതെന്നു അവൾക് തോന്നിയതും..ഇനി കുറച്ചുനാൾ അവൾ കൂടെ പെരുമാറേണ്ടത് അല്ലെ….
രണ്ടു ദിവസത്തിന് ശേഷം join ചെയ്യേണ്ട അന്ന് രാവിലെ അടുക്കളയിൽ തന്നെ സഹായിക്കുന്നവനെ കൗതുകത്തോടെ നോക്കി അവൾ..എത്ര വേഗമാണവൻ ഓരോന്നും ചെയ്യുന്നത്..അതും നല്ല വൃത്തിയിൽ കയ്യൊതുക്കത്തോടെ…
അപ്പവും കിഴങ്ങുകറിയും ഉച്ചത്തേക്ക് ചോറും മോരുകറിയും മീൻ പൊരിച്ചതും വേലിക്കൽ നിന്ന ചീര പറിച്ചൊരു തോരനും ഉണ്ടാക്കി രണ്ടുപേരും കൂടെ..അവനെത്ര പറഞ്ഞിട്ടും കൂട്ടാക്കാതെ അവളും അവനോടൊപ്പം കൂടി
അവൻ യാത്ര പറഞ്ഞിറങ്ങിയതും ആകെമൊത്തമൊരു ശൂന്യത….
മുറ്റത്തും അടുക്കളപ്പുറത്തുമൊക്കെയായി സമയം തള്ളിനീക്കെ പുറത്തുനിന്നൊരു വിളികേട്ടു…
ചെന്നുനോക്കുമ്പോൾ ഒരു അമ്മച്ചി വെളുക്കെ ചിരിച്ചുകൊണ്ട് നില്കുന്നു…പഴേ സിനിമാനടി ഫിലോമിനയെപോലുണ്ട് കാണാൻ…
“ഞാനേ മേരിയാ….തോമചേട്ടന്റെ കെട്ടിയവളാ…കൊച്ചറിയുമോ എന്നെ…”
അവര് പറഞ്ഞതും ആളെ പിടികിട്ടി…
“കയറി വാ അമ്മച്ചി….”
അവളാ വിളിച്ചത് അവർകങ്ങു ബോധിച്ചു..
SI ടെ ഭാര്യ എന്നു വച്ച കൊച്ചമ്മ സ്വാഭാവം ആയിരിക്കും എന്ന് കരുതിയ അവർക്കവളെ നല്ലോണം
ഇഷ്ടായി…
ഒരു തനിനാടൻ അമ്മച്ചി..അവൾക്കതാണ് തോന്നിയത്…ആ കുറച്ചു സമയം കൊണ്ട് അവരാ നാടിന്റെ ചരിത്രം വരെ പറഞ്ഞുകൊടുത്തു..ചുറ്റും റബ്ബർ തോട്ടവും ഏലവും ആയ അവിടെ അടുത്തുള്ള ഏകവീട് മേരിയമ്മച്ചിയുടെ ആണ്..അതു കഴിഞ്ഞാൽ പിന്നടുത്ത തോട്ടത്തിലാനൊരു വീടുള്ളു…
ഉച്ചക്കുണ്ണാനായി ശബരി വന്നുകയറിയതും അവർ ഇറങ്ങി…
“സാറെ കൊച്ചിനിപ്പോ 8 കഴിയാറായില്ലേ കുഴമ്പ്തേച്ചു കുളിയും കുറുന്തോട്ടികഷയാവുമൊക്കെ തുടങ്ങേണ്ട സമയമായി…ഞാൻ പറഞ്ഞു തരാം അതാ അങ്ങാടികടേന്ന് വാങ്ങിക്കൊണ്ടു കൊടുക്കണേ…ഇതൊക്കെ കാർന്നോന്മാര് ചെയ്യണ്ടതാ…നിങ്ങള് പ്രേമിച്ചു കെട്ട്യോണ്ട് അല്ലെ വീട്ടുകാരൊന്നും ഇല്ലാതെ..അതോണ്ടാ ഞാൻ പറയുന്നേ…”
അവനതു കേട്ടതും അവളെ നോക്കി…ആളകത്തേക്ക് വലിഞ്ഞിരുന്നു…
“ആര് പ്രേമിച്ചു കെട്ടീന്ന്”
ഹാളിലേക്ക് വരുന്ന വഴി അടുക്കളയിലേക്ക് മുങ്ങുന്നവളെ കണ്ടതും വിളിച്ചു ചോദിച്ചു…
“അവര് വീട്ടുകാരെ കുറിച്ച് ചോയ്ച്ചപ്പോ എനിക്കറീലാരുന്നു അതാ അങ്ങനെ
പറഞ്ഞോഴിഞ്ഞേ” അവന്റെ പ്ലേറ്റിലേക്ക് വിളമ്പിക്കൊണ്ടവൾ പറഞ്ഞു…
“അങ്ങനെ അറിയാൻ മാത്രം ആരൂല്ല..ആരൊക്കെയാണെന്ന് എനിക്കുപോലും അറിയില്ല..പിന്നല്ലേ നിന്നോട് പറയാൻ…”
അവളൊന്നും മനസിലാകാതെ നോക്കി
“ഓർഫെനേജിലാ വളർന്നെ..”
പിന്നെവളൊന്നും ചോദിച്ചില്ല അവനൊന്നും പറഞ്ഞുമില്ല
ഗ്യാസ് കയറിയത് കൊണ്ടാകും മുഴുവൻ കഴിക്കാതെ എണീക്കാൻ തുടങ്ങിയതും അവളുടെ പ്ലേറ്റ് വാങ്ങി അതിൽ ബാക്കി ഉണ്ടായിരുന്നത് അവന്റെ പ്ലേറ്റ് ഇലേക്ക് ഇട്ടു കഴിക്കാൻ തുടങ്ങി…
“ഫുഡ് വേസ്റ്റ് ആക്കരുത്”
“മ്മ് ” അവളൊന്ന് മൂളികൊണ്ട് അവനെ സംശയത്തോടെ നോക്കി എണീറ്റുപോയി.. പോയതും അവനൊളിപ്പിച്ചയാ കള്ളച്ചിരി കൂടുതൽ വിടർന്നു…
ദിവസങ്ങൾ കടന്ന്പോയി….
ശബരി തോമചേട്ടനുമായും മെരിച്ചേട്ടത്തിയുമായി വല്യ അടുപ്പമൊന്നും ആയില്ലെങ്കിലും അവർ പറയുമ്പോലെ എല്ലാം അവൾക്കായി
അവൻ എത്തിച്ചുകൊടുത്തു..
അതിനുപകരം കൂടി അവൾ അവരുമായി കൂട്ടായി..റബ്ബർ പാലെടുക്കുമ്പോൾ വർത്താനം പറഞ്ഞു ചാച്ചാന്ന് വിളിച്ചവൾ തോട്ടത്തിലൂടെ നടന്നു….വയസാംകാലത്തൊരു മകളെ കിട്ടിയതിൽ അവരും സന്തോഷിച്ചു..ആ കിലുക്കാംപെട്ടിയെ ഉള്ളഴിഞ്ഞു സ്നേഹിച്ചു…