അവിടെനിന്നും താക്കോൽ വാങ്ങി അവർ വീടുതുറന്നു കയറി…..നാളുകൾ പൂട്ടിയിട്ടതിന്റെ മുഷിപ്പ് മണം…..
ജനലും വാതിലുമെല്ലാം തുറന്നിട്ടു……അവളകത്തു ഓരോ മുറിയിലും കയറിയിറങ്ങി….കഷ്ടപ്പാട് മാത്രമായിരുന്നു കൂട്ടിനെങ്കിലും 18 വർഷം തന്റെ വാപ്പയോടും ഉമ്മയോടും ഒപ്പം കഴിഞ്ഞ ഇടം…..ഉമ്മ കിടന്നിരുന്ന കട്ടിൽ കണ്ടതും സങ്കടം അണപൊട്ടിയോഴുകി…..കട്ടിലിലേക്ക് കമിഴ്ന്നു വീണു കരഞ്ഞു…….
കുഞ്ഞിനെയുമെടുത്തു വന്നപ്പോൾ എങ്ങലടിച്ചു കരയുന്നവൾ…..അവളെ കുറച്ചുനേരം തനിച്ചു വിട്ടവൻ…..
ഒന്നു കരഞ്ഞുതീർന്നപ്പോൾ ആശ്വാസം തോന്നിയവൾക്….എഴുന്നേറ്റ് ചെല്ലുമ്പോൾ കുഞ്ഞിനെ കിണറ്റുകരയിൽ കുളിപ്പിച്ചു വസ്ത്രം മാറ്റുകയാണ് ശബരി…..
“ഒന്നു കുടിപ്പിച്ച് ഉറക്കിയേ കുഞ്ഞേ…..നിലക്കുഞ്ഞാകെ വാടി…..”
പൊടിയടിച്ച ബെഡ്ഷീറ് എടുത്തു മാറ്റി അലമാരി തുറന്നോരെണ്ണം എടുത്തു….പൂപ്പൽ മണം….അതു മാറ്റിവെച്ചു അവളിട്ടിരുന്ന തട്ടം എടുത്തു ബെഡിലേക്ക് വിരിച്ചു..കുഞ്ഞിനേയും കൊണ്ട് അതിലേക്ക് കിടന്നു…..പാലുകൊടുത്തു തട്ടിത്തട്ടിയുറക്കി……
കറന്റ് കണക്ഷൻ കട്ട് ആയിരുന്നു…..അത്യാവശ്യത്തിനു വേണ്ട വെള്ളം അവൻ കോരി കൊടുത്തു…..കൊണ്ടുവന്ന ബാഗ് തുറന്നു ഡ്രസ്സ് എടുത്തു മാറ്റി…കുറച്ച് സമയം കുഞ്ഞിനടുത്തേക്ക് കയറികിടന്നു…..
ഇടയ്ക്കു മൂത്താപ്പയുടെ കാർ വന്നുനിൽക്കുന്നതും ഇവിടേക്ക് നോക്കി അയാൾ വീട്ടിലേക്ക് കയറുന്നതും ഫിദ കണ്ടു……
“ഫിദാ food വാങ്ങിക്കണ്ടേ……എന്നെയൊരു അര മണിക്കൂർ കഴിഞ്ഞു വിളിക്കട്ടോ” എന്നും പറഞ്ഞവൻ ഒന്ന് മയങ്ങി…വിശപ്പില്ലാതിരുന്നതിനാൽ ഉറങ്ങിക്കോട്ടെയെന്നവളും വച്ചു..
ഒരു മണികൂറോളം കഴിഞ്ഞപ്പോൾ ശബരിയുടെ
ഫോണിലേക്ക് കാൾ വന്നു….സ്റ്റേഷനിൽ നിന്നും ci ആണ്……
“നമുക്കൊന്ന് സ്റ്റേഷൻ വരെ പോകണം കുഞ്ഞേ….”
അവൾ നെറ്റിചുളിച്ചവനെ നോക്കി…..
“ഒന്നുമില്ല…..നിന്റെ പേരിൽ അവർ ഒരു മിസ്സിംഗ് കേസ് കൊടുത്തിരുന്നു…..അതിന്റെ കാര്യത്തിനാ…നിന്നെ സ്റ്റേഷനിൽ കൂട്ടി ചെല്ലണമെന്ന്….”
അവൾ തലകുലുക്കി…..ശബരിയുണ്ടേൽ ഏത് നരകത്തിലേക്കും പോകും ഫിദ…..
ഡ്രസ്സ് മാറ്റി കുഞ്ഞിനെയുമെടുത്തു അവർ ഇറങ്ങി……
ഉറങ്ങുന്ന നിലക്കുഞ്ഞിനെ തോളിൽ കിടത്തി ഫിദയുടെ കയ്യുംപിടിച്ചു ശബരി പടികൾകയറി……മാസങ്ങൾക്കു മുമ്പ് മെമ്പറുടെ കൂടെ അപമാനത്താൽ കുനിഞ്ഞ തലയോടെ കയറി ചെന്നിടത്തു അവൾ ധൈര്യത്തോടെ തലയുയർത്തി നിന്നു…….
പഴയ സഹപ്രവർത്തകർ അവനോട് സംസാരിച്ചുകൊണ്ട് അടുത്തേക്ക് വന്നു….
കേസിനെ കുറിച്ചും മറ്റും പുതിയ si യോട് അന്വേഷിച്ചു…..
“ഇഷ്ടത്തിലായിരുന്നു ഞങ്ങൾ….അവൾക് പ്രായപൂർത്തി ആയതിനു ശേഷമാണു തുടങ്ങുന്നത്…..വീട്ടിൽ വിവാഹം ആലോചിച്ചു ചെന്നാൽ വേറെ മതം ആയതിനാൽ സമ്മതിക്കില്ലെന്നു പറഞ്ഞു ഒരു അമ്പലത്തിൽ വച്ചിവളെ ആരും അറിയാതെ താലി കെട്ടിയിരുന്നു..അവൾക്കൊരു ധൈര്യത്തിന്…പതിയെ വീട്ടിൽ സംസാരിക്കാമെന്നു കരുതി…പിന്നെ പ്രെഗ്നന്റ് ആയപ്പോൾ കൂടെ കൂട്ടാൻ കരുതിയിരിക്കുമ്പോളാണ് ഇങ്ങനൊക്കെ സംഭവിക്കുന്നത്…..വിവാഹം കഴികാതെ ഉള്ള ജീവിതം സർവീസിലെ moral conduct നു എതിരായത് കൊണ്ട് ആക്ഷൻ ഉണ്ടാകുമോയെന്നോർത്ത് ഇവളെയും കൊണ്ടാ രാത്രി ഇടുക്കിക്ക് പോകുകയായിരുന്നു ഞാൻ…….“
എല്ലാ കുറ്റവും സ്വയം ഏറ്റെടുത് എവിടെയും സത്യം വിളിച്ചുപറയാതെ അതിന്റെ പേരിൽ വരാവുന്ന അനന്തര ഫലങ്ങളെ കുറിച്ചോർക്കാതെ തന്റെ അഭിമാനം സംരക്ഷിച്ചു പിടിക്കുന്നവനെ തന്റെ കുഞ്ഞിനെ ചോദ്യ ചിഹ്നമാക്കാത്തവനെ അവൾ അങ്ങേയ്യറ്റം പ്രണയത്തോടെ,ബഹുമാനത്തോടെ നോക്കി…..
“അപ്പോ ഇതാർന്നോടാ നിന്റെ മംഗലാപുരം പോക്ക്……ഈ കൊച്ചിനെ കാണാനാരുന്നോ നിന്ന നിൽപ്പിൽ എമർജൻസി ലീവും എടുത്ത് പൊയ്കൊണ്ടിരുന്നേ…….” അവിടെ അവനോടെല്പം അടുപ്പം ഉണ്ടായിരുന്ന പ്രായം ചെന്ന രാമേട്ടൻ തോളിൽ അടിച്ചുകൊണ്ട് ചോദിച്ചു….
അതിനവൻ ഒന്ന് ചിരിച്ചതേയുള്ളു……
“കഥ മൊത്തം പോരട്ടെ….ഇതെപ്പോ തുടങ്ങി…..”