“നി പോടി. ഐസ്ക്രീം വാങ്ങിച്ചു തരില്ലെങ്കിൽ ഞാൻ വരില്ല.” കുഞ്ഞിനെ പോലെ ഞാൻ ശാഠ്യം പിടിച്ചു.
“അയ്യോ അങ്ങനെ പറയല്ലേ… എന്റെ ഈ വാവയ്ക്ക് എത്ര ഐസ്ക്രീം വേണേലും ഞാൻ വാങ്ങിത്തരാം.” കുഞ്ഞുങ്ങളോട് എന്നപോലെ അവള്‍ കൊഞ്ചി. അങ്ങനെ അവള്‍ കൊഞ്ചി പറഞ്ഞപ്പോ അവളുടെ കണ്ണുകളില്‍ സ്നേഹവും കുസൃതിയും തുളുമ്പുന്നുണ്ടായിരുന്നു.
“അപ്പോ നാളെ നിങ്ങൾ പോകുന്ന സമയം എന്നെ വിളിച്ചാല്‍ മതി. ഞാൻ വരാം.” അതും പറഞ്ഞ്‌ ഞാൻ അവിടേ നിന്നിറങ്ങി.
പുറകില്‍ നിന്നും ഡാലിയ സന്തോഷത്തിൽ വിളിച്ചു കൂവുന്നത് കേട്ട് ഞാൻ പുഞ്ചിരിച്ചു.
***************
എന്റെ മുടിയിഴകളിലൂടെ അവളുടെ വിരലുകള്‍ ഓടി നടന്നു. എന്റെ മുഖമാകെ അവളുടെ ചുംബനങ്ങൾ പതിഞ്ഞു. എന്റെ ചുണ്ടില്‍ അവളുടെ നാവ് ഇഴഞ്ഞു പോയി. കുസൃതിയോടെ അവളുടെ നാവ് എന്റെ ചുണ്ടുകള്‍ക്കിടയിലൂടെ നുഴഞ്ഞു കേറിയതും എന്റെ നാവ് അതിനെ തഴുകി നുണഞ്ഞു. ഡെയ്സി അത് ആസ്വദിച്ചു കിടന്നു. അല്‍പ്പം കഴിഞ്ഞ് ഡെയ്സി എന്റെ നാടിനെ തട്ടിയെടുത്ത് പ്രണയപൂർവം നുണഞ്ഞു. അല്‍പ്പം കഴിഞ്ഞ് എന്റെ നഗ്ന മാറിലൂടെ അവളുടെ മുഖം ഇഴഞ്ഞു നീങ്ങി. എന്റെ ഇടനെഞ്ചിൽ പ്രണയത്തോടെ അവളുടെ ചുണ്ടുകൾ ചുംബിച്ചു. ഒടുവില്‍ അവളുടെ കവിൾത്തടം എന്റെ ഹൃദയത്തിന് മുകളില്‍ അമർത്തി വച്ച് എന്റെ ഹൃദയമിടിക്കുന്ന താളത്തിനൊത്ത് അവളും മധുരമായി മൂളാൻ തുടങ്ങി.
“എന്റെ ഡെയ്സി….”
“ഊം…”
“എന്നും ഇതുപോലെ എന്റെ ഹൃദയമിടിപ്പ് കേൾക്കാൻ എന്തിനാ ഇത്ര കൊതി?”
“എന്റെ ചേട്ടന്റെ ഹൃദയം ‘ഡെയ്സി.. ഡെയ്സി’ എന്നും പറഞ്ഞല്ലേ തുടിക്കുന്നേ. എത്ര കേട്ടിട്ടും എനിക്ക് മതിയാവുന്നില്ല.”
“എന്തിനാ ഈ ഹൃദയം എന്റെ ഡെയ്സിയെ വിളിച്ചു തുടിക്കുന്നേ?” അവളുടെ മുടിയിഴകളിൽ വിരലോടിച്ച് കൊണ്ട്‌ കുസൃതിയോടെ ഞാൻ ചോദിച്ചു.
“ഞാൻ ചേട്ടന്റെ ജീവനില്‍ അലിഞ്ഞു ചേര്‍ന്നത് കൊണ്ടല്ലേ ഇങ്ങനെ കേള്‍ക്കുന്നേ. എപ്പോഴും ചേട്ടന്റെ ഹൃദയ ശബ്ദം എനിക്ക് കേള്‍ക്കണം.” പറഞ്ഞിട്ട് അവള്‍ പിന്നെയും, പിന്നെയും എന്റെ ഹൃദയ ഭാഗത്ത് ചുംബിച്ചു.
ഉടനെ അവളെ ഞാൻ മുകളിലേക്ക് വലിച്ച് എന്നോട് ചേർത്തു പിടിക്കാൻ ശ്രമിച്ചതും എന്റെ കൈകൾ അവളുടെ ശരീരത്തിലൂടെ കടന്നുപോയി. അപ്പോൾ കരഞ്ഞുകൊണ്ട് അവള്‍ അപ്രത്യക്ഷയായി.
“എന്നെ വിട്ടു പോകല്ലേ ഡെയ്സി.” അലറി വിളിച്ചു കൊണ്ട്‌ ഉറക്കത്തിൽ നിന്നും ഞാൻ ഉണര്‍ന്നു.
“ഡെയ്സി…!!!” ഞാൻ വിങ്ങിപ്പൊട്ടി. “എന്തിനാ എന്നെ വിട്ട് പോയത്?”
ഒരുപാട്‌ നേരം ഞാൻ അങ്ങനെ തന്നെ ഇരുന്നു. ശേഷം ഞാൻ കിടന്നു. പക്ഷേ ഉറങ്ങാൻ കഴിഞ്ഞില്ല. ഒടുവില്‍ എഴുനേറ്റ് ഞാൻ താഴേ ചെന്ന് വാതില്‍ തുറന്ന് മുറ്റത്തിറങ്ങി.
കാര്‍ ഷെഡ്ഡിലെ ഷട്ടർ തുറന്ന് അകത്തെ ലൈറ്റുമിട്ട് എന്റെ മഹീന്ദ്ര ഥാർ റോക്സിനെ ഞാൻ നോക്കി നിന്നു. ഫൈവ് സീറ്റർ, കറുത്ത എസ് യു വി ആണ് എന്റെ വണ്ടി. ഡെയ്സിക്ക് ഏറ്റവും ഇഷ്ടപ്പെട്ട നിറം.
ഇനി ഉറങ്ങാൻ കഴിയില്ലെന്ന് മനസ്സിലായതും ഞാൻ എന്റെ വണ്ടിയും വല്യച്ചന്റെ കാറും വാഷ് ചെയ്യാൻ തുടങ്ങി.
“റൂബി……!!” വല്യമ്മയുടെ പതിഞ്ഞ ശബ്ദം കേട്ടതും ഞാൻ ജോലി നിര്‍ത്തി വല്യമ്മയെ നോക്കി പുഞ്ചിരിച്ചു. പക്ഷേ ആ മുഖത്ത് വിഷമം മാത്രമാണ് നിറഞ്ഞിരുന്നത്.
“എന്താ മോനെ ഇവിടെ നി ചെയ്യുന്നേ?”
“വണ്ടി കഴുകുന്നു.”
“രാത്രി മൂന്ന്‌ മണിക്കോ!?” വിഷമത്തോടെ വല്യമ്മ ചോദിച്ചു.
ഞാൻ മിണ്ടാതെ നിന്നതും വല്യമ്മ എന്റെ കൈ പിടിച്ച് വീട്ടിനകത്തേക്ക് കൂട്ടിക്കൊണ്ടു പോയി.
“കഴിഞ്ഞതൊന്നും ചിന്തിക്കാതെ മോനെ.” വല്യമ്മ പടികള്‍ കേറുന്നതിനിടെ വല്യമ്മ ഉപദേശിച്ചു. “ചെല്ല്, ചെന്ന് ഉറങ്ങാൻ ശ്രമിക്ക്.” മുകളില്‍ എന്റെ മുറിയില്‍ എത്തിയതും വല്യമ്മ സ്നേഹത്തോടെ പറഞ്ഞു.
ഞാൻ ഒന്നും മിണ്ടാതെ ബെഡ്ഡിൽ കേറി കമിഴ്ന്നു കിടന്നു. ഇടക്കിടക്ക് ഒളികണ്ണിട്ട് വല്യമ്മ പോയ എന്ന് നോക്കി. പക്ഷെ എന്റെ കോപ്രായം കണ്ടുകൊണ്ട് പുഞ്ചിരിയോടെ വല്യമ്മ അവിടെതന്നെ ഉണ്ടായിരുന്നു.
ഒരുപാട്‌ നേരം കഴിഞ്ഞിട്ടും ഞാൻ ഉറങ്ങുന്നില്ലെന്ന് കണ്ടതും വല്യമ്മ എന്റെ അടുത്തു വന്നിരുന്ന് കുഞ്ഞുങ്ങള്‍ക്ക് തട്ടി കൊടുക്കുന്ന പോലെ എനിക്ക് തട്ടി തരാൻ തുടങ്ങി.
ഉടനെ എല്ലാം മറന്ന് ഉള്ളില്‍ ഞാൻ ചിരിച്ചതും എന്റെ ശരീരം കുലുങ്ങി.
“കള്ളന്‍…” ഞാൻ ചിരിക്കുന്നത് കണ്ട് വല്യമ്മ സ്നേഹത്തോടെ പറഞ്ഞതും ഞാൻ കുലുങ്ങി ചിരിച്ചു. എന്നിട്ട് കുസൃതിയോടെ വല്യമ്മയുടെ കൈ പിടിച്ച് തള്ളവിരൽ എന്റെ വായിൽ വച്ച് കുഞ്ഞുങ്ങളെ പോലെ നുണഞ്ഞു.
“കള്ളന്‍ കുഞ്ഞു വാ….” വല്യമ്മ ഒരു ചിരിയോടെ എന്റെ വായിൽ നിന്നും തള്ളവിരൽ വലിച്ചു മാറ്റി.
ശേഷം എനിക്ക് ഇഷ്ടപ്പെട്ട ഒരു പാട്ടിന്റെ ഈണം പോലെയാണ് എന്റെ ദേഹത്ത് വല്യമ്മ പതിയെ താളം തട്ടിയത്. അതിനെ ആസ്വദിച്ചു കൊണ്ട്‌ ഞാൻ കിടന്നു. എന്റെ കണ്ണുകൾ മെല്ലെ അടഞ്ഞു.
കുറെ കഴിഞ്ഞ് എന്റെ കവിളത്ത് ഉമ്മ തന്നിട്ട് വല്യമ്മ എഴുനേറ്റ് പോകുന്നത് ഞാൻ അറിഞ്ഞു.
********************
“എടാ മോനെ…” വല്യമ്മ എന്നെ പതിയെ തട്ടിയുണർത്തി.
ഞാൻ ചിണുങ്ങിയതും ചിരിച്ചുകൊണ്ട് വല്യമ്മ എന്നെ പിടിച്ചുലച്ചു.
“ഞാൻ ഉറങ്ങിക്കോട്ടേ എന്റെ സൂസി മോളെ.” ഞാൻ പിന്നെയും ചിണുങ്ങി.
“ഞാൻ നിന്റെ മോളാണോടാ, കള്ളാ…?” പൊട്ടിച്ചിരിയോടെ വല്യമ്മ എന്റെ ചെവിക്ക് പിടിച്ചു കിഴുക്കി.
ഞാൻ അനങ്ങാതെ കിടന്ന് ഉറങ്ങാൻ ശ്രമിച്ചു.
“ഉച്ച ഒരുമണി കഴിഞ്ഞു, കേട്ടോ.” വല്യമ്മ പിന്നെയും എന്നെ ഉലച്ചു. “ഡാലിയ മോള് വിളിച്ചായിരുന്നു.”
അപ്പോഴാണ് കാര്യം ഓര്‍ത്തു ഞാൻ ചാടി എഴുന്നേറ്റത്.
“ശോ… പൊഴിക്കരയിൽ കൂടെ പോകാമെന്ന് ഞാൻ ഏറ്റതാ. അവള്‍ എപ്പഴാ വിളിച്ചത്?”
“വിരളണ്ടാ..” വല്യമ്മ ചിരിച്ചു. “ഇപ്പഴാ അവള്‍ വിളിച്ചത്. നി ഉറങ്ങുന്ന കാര്യം പറഞ്ഞപ്പോ രണ്ടുമണിക്ക് നിന്നെ അങ്ങോട്ട് പറഞ്ഞു വിടാന്‍ അവള്‍ ആവശ്യപ്പെട്ടു.”
ഹോ, അപ്പോ ഇനിയും സമയമുണ്ട്.” ഞാൻ സമാധാനിച്ചു.
“ഇനി എണീറ്റേ. ഫ്രെഷായി വന്ന് കഴിക്കാൻ നോക്ക്.” അതും പറഞ്ഞ്‌ വല്യമ്മ താഴേക്ക് പോയി.
ഞാൻ കുളിച്ച് ഫ്രെഷായി താഴെ ചെന്നു.
“വല്യച്ചൻ എവിടെ?”
“ഇലക്ട്രിസിറ്റി ബോർഡിൽ നിന്നും കോൾ വന്നടാ മോനെ. പതിവ് പോലെ വല്യച്ചന്റെ എന്തോ സഹായം വേണം പോലും. കേട്ടത് പാതി കേള്‍ക്കാത്ത പാതി അങ്ങേര് പൊട്ടത്തരം പാടിക്കൊണ്ട് ഇറങ്ങിയോടി.” ഇപ്പോഴും ആ കാഴ്ച കണ്‍മുന്നില്‍ നില്‍ക്കും പോലെ വല്യമ്മ പറഞ്ഞിട്ട് ചിരിച്ചു. “ശെരി നി ഇരിക്ക്, നമുക്ക് കഴിക്കാം. വല്യച്ചൻ വരാൻ വൈകും.”
വല്യച്ചനെ മനസ്സിൽ ഓര്‍ത്തു ചിരിച്ചുകൊണ്ട് ഞാൻ കഴിക്കാൻ ഇരുന്നു. റിട്ടയരായ ശേഷവും ഇടയ്ക്കിടെ വല്യച്ചന് ഇതുപോലത്തെ കോളുകള്‍ വരാറുണ്ട്, സഹായം ആവശ്യപ്പെട്ടു കൊണ്ട്‌. വല്യച്ചനും ഉത്സാഹത്തോടെ ഓടി ചെല്ലും. പുള്ളിക്ക് അതൊരു സന്തോഷമാണ്.. വല്യ അഭിമാനവുമാണ്.