അവളുടെ കുസൃതിയോർത്ത് അവന് ചിരി വരുന്നുണ്ടായിരുന്നു…
പിന്നീടുള്ള ദിവസങ്ങൾ സന്തോഷകരമായിരുന്നു… വർഷങ്ങൾ കൂടി കണ്ട ജ്യേഷ്ഠനോടുള്ള ,
വയസ്സറിയിച്ച പെങ്ങളുടെ മനോഭാവത്തിൽ മാറ്റം വന്നു…
അവളെ സ്കൂളിൽ കൊണ്ടുപോവുക..
തിരികെ കൊണ്ടുവരുക…
അതിനിടയിലുള്ള അവധി ദിവസങ്ങളിൽ ബന്ധു വീട് സന്ദർശനം…
സിനിമ ……..
അത്യാവശ്യം കറക്കങ്ങൾ….
മൂന്നു കൊല്ലം മുൻപ് തനിക്ക് നഷ്ടപ്പെട്ട കൂട്ടാളി തിരിച്ചു കിട്ടിയെന്ന തോന്നൽ അവളിലുണ്ടായി…
ഒടുവിൽ പുതിയ കമ്പനിയിൽ നിന്ന് സഞ്ജുവിന് വിളി വന്നു…
അവനത് ഏതു നിമിഷവും പ്രതീക്ഷിച്ചിതാകയാൽ അവന് പ്രശ്നമൊന്നും ഉണ്ടായിരുന്നില്ല..
“ഇനി എന്നാടാ… ?”
പത്മാവതി മകനരുകിലേക്ക് വന്നു…
“കമ്പനി ലീവ് തരും പോലെ……”
അവൻ ശബ്ദമില്ലാതെ ചിരിച്ചു…
“ചഞ്ചുവിന് ഇനി ഒറ്റയ്ക്ക് ദുബായിൽ കറങ്ങാമല്ലോ.. ശല്യപ്പെടുത്താൻ ഞാനുമില്ല… “
അവളുടെ സ്വരത്തിൽ വിഷമം ഉണ്ടായിരുന്നു…
“എനിക്ക് നിന്നെയും മിസ്സ് ചെയ്യില്ലേ, പൊന്നാവേ… “
അവൻ അവളെ ചേർത്തു പിടിച്ച് നെറുകയിലൊന്നു മുത്തി…
പ്രവാസികളുടെ ഏറ്റവും വലിയ വിഷമങ്ങളിലൊന്നാണിത്…
തിരിച്ചു പോക്ക്…!
പുതിയ കമ്പനിയിൽ പ്രശ്നങ്ങളൊന്നുമില്ലായിരുന്നു…
നല്ല സാലറി…
ഉത്തരവാദിത്വങ്ങൾ ഉണ്ടെങ്കിൽ തന്നെയും ജോലി സമയത്തുള്ളവ മാത്രം…
അഞ്ജു ഡിഗ്രിക്ക് ചേർന്നിരുന്നു…
രണ്ടര വർഷത്തെ ലീവ് കഴിഞ്ഞ് സഞ്ജു നാട്ടിലേക്ക് വരുവാൻ മറ്റൊരു കാരണം കൂടി ഉണ്ടായിരുന്നു…
അവന്റെ വിവാഹം….
അത് പത്മാവതിയുടെ സഹോദരൻമാർ കണ്ടുപിടിച്ചതായിരുന്നു…
കൈപ്പുഴ നിന്ന്…
പെണ്ണിന് കളക്ട്രേറ്റിൽ താൽക്കാലിക ജോലിയുണ്ട്…
സ്ഥിരമാകുവാനുള്ള റാങ്കുമുണ്ട്…
ഒരനിയത്തിയുള്ളത് പഠിക്കുന്നു…
അച്ഛനുമമ്മയുമൊക്കെ റിട്ടയേഡാണ്…
അനുപമ…
പേരു പോലെ അവൾ തനിക്ക് അനുപമയാകുമെന്ന് സഞ്ജു കണക്കുകൂട്ടി…
സാമ്പത്തികമായിട്ട് മെച്ചമൊന്നും ഇല്ലെങ്കിലും തറവാട്ടുകാർ തന്നെ…
കാരണവർമാരെ ധിക്കരിച്ചു ശീലമില്ലാത്തതിനാലും പെൺകുട്ടി കുഴപ്പമില്ലാത്തതിനാലും സഞ്ജു സമ്മതം മൂളി…
ജാതകത്തിലും പറയത്തക്ക പൊരുത്തക്കേടുകളൊന്നുമില്ല…
അമ്മയ്ക്കും പ്രായമാകുന്നു…
അഞ്ജുവും ഒറ്റയ്ക്കാണ്…
താൻ പ്രവാസം നിർത്തി തിരിച്ചു വന്നാലും ഭാര്യയ്ക്ക് ജോലിയുമുണ്ട്…
ഒരുപാട് സാമ്പത്തികമുള്ള വീട്ടിലെ പെൺകുട്ടികൾ തന്നിഷ്ടക്കാരികളായിരിക്കാം…
അങ്ങനെ സഞ്ജുവിനെ സ്വാധീനിച്ച ഘടകങ്ങൾ ഏറെയുണ്ടായിരുന്നു…
വെച്ചൂർ അമ്പലത്തിൽ വെച്ചായിരുന്നു വിവാഹം…
സ്ത്രീധനം ആവശ്യപ്പെട്ടില്ലെങ്കിലും അവർ ആവശ്യത്തിന് നല്കിയിരുന്നു…
വിവാഹം കഴിഞ്ഞ് മൂന്നു മാസങ്ങൾക്കു ശേഷം സഞ്ജു വീണ്ടും തിരിച്ചു…
പ്രശ്നങ്ങൾ അവിടെ തുടങ്ങുകയായിരുന്നു…
വന്നു കയറിയ , ജോലിക്കാരി പെണ്ണിന്റെ യഥാർത്ഥ സ്വഭാവം പത്മാവതിയും അഞ്ജുവും അറിഞ്ഞു തുടങ്ങി…
പെൺ ഭരണം…!
പത്മാവതി മകനറിയാതെ
മൗനം പാലിച്ചു…
അഞ്ജു അങ്ങനെയല്ലായിരുന്നു…
ഏട്ടന്റെ സ്നേഹവും സമ്മാനങ്ങളും പങ്കുവെച്ചു പോകുന്നത് അവളെ തെല്ലൊന്നുമല്ല ദു:ഖിപ്പിച്ചത്…
തനിക്കും കൂടി കിട്ടേണ്ടത് ഏട്ടത്തി, അനുഭവിക്കുന്നതിൽ അവൾ തെറ്റ് കണ്ടില്ല.
പക്ഷേ, അനുപമ അവളുടെ സഹോദരിക്കും വീട്ടിലേക്കും കൊടുക്കുന്നത് അഞ്ജു ചോദ്യം ചെയ്തു…
അനാവശ്യ ചിലവുകൾ…
അഞ്ജുവിന്റെയോ പത്മാവതിയുടേയോ ആവശ്യങ്ങൾക്കു പോലും അനുപമ പണം കൊടുക്കണം…
പറമ്പിലെ വിറ്റുവരവ് കണക്ക്…
അതൊക്കെ സ്വന്തം അക്കൗണ്ടിലാക്കിയിരുന്നു അനുപമ…
അത് സ്ഫോടനങ്ങളുടെ തുടക്കമായിരുന്നു…
ശരിക്കും നാലു മലകളുടെ പഴഞ്ചൊല്ല് അന്വർത്ഥമാക്കും വിധമായിരുന്നു കാര്യങ്ങൾ…
അനുപമ, ലീവ് തീരുന്നതിനു മുൻപേ സഞ്ജുവിനെ തിരിച്ചെത്തിച്ചു…
കുടുംബ കലഹം…
പൊട്ടിത്തെറി….
അമ്മ….!
സഹോദരി…….!
ഭാര്യ…..!
ശരിക്കും മൂന്നു സ്ത്രീകളുടെയിടയിൽ കിടന്ന് സഞ്ജു നീറി….
“എനിക്കുമുണ്ട് അനിയത്തി… അവളിങ്ങനെ തൊട്ടതിനും പിടിച്ചതിനും ഒന്നും എന്നോട് പറയാറില്ല….”
സഞ്ജു നിശബ്ദനായി നിലകൊണ്ടു…
തന്റെ ഓരോ വാക്കും സൂക്ഷിച്ചും അളന്നും മാത്രമേ ഉപയോഗിക്കാവൂ എന്ന് അവന് നല്ല ബോദ്ധ്യമുണ്ടായിരുന്നു…