അയ്യേ.. എന്തൊക്കെയാ ഞാൻ ആഗ്രഹിക്കുന്നത്..!! എന്റെ മനസ്സിന് ശെരിക്കും ഭ്രാന്ത് തന്നെയാ. ഞാൻ ചീത്തയായി…. ഉള്ളില് ഞാൻ നാണിച്ച് ചിരിച്ചു.
“ഓടിക്ക് എന്റെ ഡാലി.”
‘എന്റെ ഡാലി’ എന്ന് ചേട്ടൻ പറഞ്ഞതും എന്റെ ഉള്ള് പിന്നെയും കോരി തരിച്ചു. പണ്ടൊക്കെ സ്ഥിരമായി അങ്ങനെ വിളിക്കുമായിരുന്നു, പക്ഷേ പിന്നീട് ആ വിളി പാടെ കുറഞ്ഞു.
ഞാൻ വണ്ടി മെല്ലെ മൂവ് ചെയ്തു. അല്പ്പം പേടി മാറിയതും സ്പീഡ് അല്പ്പം കൂട്ടി. കുറച്ച് ദൂരം പോയതും എന്റെ ഭയമെല്ലാം മാറി. അപ്പോ അല്പ്പം കൂടെ ഞാൻ സ്പീഡ് കൂട്ടി.
“ചേട്ടാ, എനിക്ക് വഴി അറിയില്ല, കേട്ടോ.”
“പേടിക്കേണ്ട.” എന്നും പറഞ്ഞ് മുന്നില് ഉണ്ടായിരുന്ന ടച്ച് സ്ക്രീനില് ചേട്ടൻ റൂട്ട് മാപ് സെറ്റ് ചെയ്തു തന്നു.
എന്റെ പേടിയെല്ലാം തല്കാലം മാറിയെങ്കിലും റോഡില് നിന്നും ശ്രദ്ധ പോകുമെന്ന ഭയം കാരണം റോഡില് മാത്രം നോക്കിയാണ് ഓടിച്ചത്. ശ്രദ്ധ നഷ്ടമാകുമെന്ന ഭയം കാരണം ചേട്ടനോട് പോലും സംസാരിച്ചില്ല. പിന്നെ മനസ്സിലെ വികാരങ്ങളും ശരീരത്തിന്റെ വികാരവും എല്ലാം എന്നെ ശെരിക്കും തളർത്തിയിരുന്നു. എനിക്ക് ഒന്നും ശ്രദ്ധിക്കാന് കഴിഞ്ഞില്ല.
വെറും അഞ്ചു മിനിറ്റ് കഴിഞ്ഞ് വണ്ടി ഞാൻ ഒതുക്കി നിര്ത്തി.
“പ്ലീസ് ചേട്ടാ… എനിക്ക് ഓടിക്കാനുള്ള ശ്രദ്ധ കിട്ടുന്നില്ല.” ചേട്ടനെ നോക്കാതെ ഞാൻ പറഞ്ഞു.
“ശെരി, ഞാൻ ഓടിക്കാം.” ചേട്ടൻ പറഞ്ഞതും ഞങ്ങൾ സീറ്റ് മാറി.
ഞാൻ ചേട്ടനെ നോക്കാതെ സീറ്റില് ചാരിയിരുന്നു. ഉള്ളില് ഞാൻ എന്തൊക്കെയോ ചിന്തിച്ചു കൂട്ടി. നേരത്തെ നടന്ന കാര്യങ്ങൾ ഓര്ത്ത് പനിക്കും പോലെയാണ് എന്റെ ശരീരം ചൂട് പിടിച്ചിരുന്നത്. ചേട്ടനെ നോക്കാന് തന്നെ എനിക്ക് നാണം തോന്നി. അതുകൊണ്ട് സീറ്റ് പിന്നോട്ട് പുഷ് ചെയ്തിട്ട് ഞാൻ മലര്ന്നു കിടന്നു. എന്നിട്ട് മയങ്ങി.
*******************
*******************
ഇടയ്ക്കിടെ എന്റെ കണ്ണുകൾ റോഡില് നിന്ന് പിന്വലിഞ്ഞ് സീറ്റില് ഉറങ്ങിക്കിടക്കുന്ന ഡാലിയയെ ഉഴിഞ്ഞു. എന്റെ ഉള്ളിന്റെയുള്ളില് ഡാലിയ കേറി സ്ഥാനം പിടിച്ചിരിക്കുകയാണോ? കുറച്ചു മുമ്പ് ഞങ്ങൾ അറിയാതെ സംഭവിച്ചു പോയ കാര്യങ്ങൾ ഒക്കെ എന്നെ വല്ലാത്ത ഒരു അവസ്ഥയില് എത്തിച്ചിരുന്നു. കണ്ട്രോള് നഷ്ടമായി എന്റെ ശരീരം പോലും ചുട്ടു പഴുക്കുന്നത് പോലെയായി.
കുറച്ചു നേരം റോഡില് നോക്കി വണ്ടി ഓടിച്ച ശേഷം എന്റെ തല താനേ തിരിഞ്ഞു. എന്റെ കണ്ണുകൾ പിന്നെയും ഡാലിയയുടെ മേല് പടർന്നു. അവളുടെ മുട്ട് വരെ ഇറക്കമുള്ള കറുത്ത ടോപ്പ് തുടകള് വരെ പൊങ്ങിയാണ് കിടന്നത്. ശരീരത്തോട് ഒട്ടി കിടന്ന ജെഗ്ഗിങ്സ് അവളുടെ കാലും തുടകളുടെ ഷേപ്പും എടുത്തു കാണിച്ചു. ഞാൻ വേഗം നോട്ടം മാറ്റി.
ഡാലിയയുമായി നടന്ന കാര്യങ്ങൾ എല്ലാം എന്റെ മനസ്സിനെ പൊള്ളിച്ചത് പോലെ പെട്ടന്ന് എന്റെ മനസ്സ് വല്ലാതെ നൊന്തു പിടഞ്ഞു…. ഉള്ളില് ഉണങ്ങി തുടങ്ങിയ മുറിവുകൾ പൊട്ടി പുതിയ വേദനകളെ സൃഷ്ടിച്ചു. പക്ഷേ ആ വേദനകള് എന്റെ മനസ്സിന്റെ ആഴത്തില് ഇറങ്ങി വീണ്ടും വളരാൻ ഞാൻ അനുവദിച്ചില്ല. പതിയെപ്പതിയെ ആണെങ്കിലും കഴിഞ്ഞുപോയ എല്ലാ വേദനകളിൽ നിന്നും കര കയറാന് ശ്രമിക്കാൻ തന്നെ ഞാൻ തീരുമാനിച്ചു.
ഉറങ്ങി കിടക്കുന്ന ഡാലിയയെ നോക്കി ഞാൻ പുഞ്ചിരിച്ചു. ഇവളെ കാണുമ്പോ വല്ലാത്ത സന്തോഷം… ഉള്ളില് വല്ലാത്ത പിടിവലി…. പക്ഷേ ഉള്ളില് അവള്ക്കു വേണ്ടി എന്തോ കിനിയുന്നു.
പെട്ടന്ന് ഫോൺ ശബ്ദിച്ചതും അതിലേക്ക് നോക്കി. അല്ലി ആണെന്ന് കണ്ടതും ഉള്ളില് വാത്സല്യം നിറഞ്ഞു.
എടുത്ത് അവളോട് കുറച്ചുനേരം സംസാരിച്ചു. അരുളും ഉണ്ടായിരുന്നു. അവനും എന്നോട് സംസാരിച്ചു.
നാട്ടില് നിന്നും തിരിക്കും മുമ്പ് അവരെ ഞാൻ വിളിച്ചിരുന്നു. ഞാനും ഡാലിയയും അഞ്ചു മണിക്ക് എത്തുമെന്നും പറഞ്ഞായിരുന്നു. അഞ്ചു മണി കഴിഞ്ഞിട്ടും ഞങ്ങൾ കാണാത്തത് കൊണ്ടാ അവർ വിളിച്ചത്. ഞങ്ങൾ ഏഴരയ്ക്ക് എത്തുമെന്ന് അവരോട് പറഞ്ഞിട്ട് ഞാൻ വച്ചു.