എനിക്ക് ഉടനെ കാര്യം പിടികിട്ടി.
“എന്റെ മാളിൽ ജോലി കിട്ടുമോ എന്നാണോ ദേവി ടീച്ചർ ചോദിക്കുന്നത്..?”
“അതുതന്നെ..!” വിനില പറഞ്ഞു.
ഞാൻ ദേവിയെ നോക്കി. അവള്‍ അസ്വസ്ഥതയോടെ നില്‍ക്കുകയായിരുന്നു.
“ഞാൻ നോക്കട്ടെ… അടുത്ത ആഴ്ച ഉറപ്പായും ഞാൻ മറുപടി പറയാം.” ആലോചനയോടെ ഞാൻ പറഞ്ഞു.
എന്റെ മാളിൽ ജോലിക്ക് നില്‍ക്കുന്ന ഒരു ചേച്ചിക്ക് ഉച്ച വരെ മാത്രമേ നിൽക്കാൻ കഴിയൂ. ദിവസവും അവർ ഉച്ചക്ക് പോകുന്നത് കൊണ്ട്‌ അവരുടെ ജോലിയും മറ്റുള്ളവർ ആണ്‌ ചെയ്യുന്നത്… എന്തായാലും ശെരിക്കും ഒന്ന് നോക്കീട്ട് മറുപടി കൊടുക്കാൻ ഞാൻ തീരുമാനിച്ചു.
“മറുപടി എന്താണെങ്കിലും അറിയിക്കണം… അപ്പോ ജോലി കിട്ടിയാലും ഇല്ലെങ്കിലും അതനുസരിച്ച് മുന്നോട്ടുള്ള കാര്യങ്ങൾ തീരുമാനിക്കാന്‍ കഴിയും.” ദേവി അല്‍പ്പം സീരിയസ്സായി പറഞ്ഞു.
ദേവി അവളുടെ ശത്രുവിനോട് സംസാരിക്കും പോലെയാണ് എന്നോട് സംസാരിച്ചത്. എനിക്ക് ശെരിക്കും ദേഷ്യമാണ് വന്നത്. പക്ഷേ പുറത്ത്‌ കാണിച്ചില്ല. എന്നാൽ വിനില മുഖം ചുളിച്ചു. അവളുടെ മുഖത്ത് കടുത്ത ദേഷ്യം തെളിയുകയും ചെയ്തു.
സാധാരണയായി പുറത്തുള്ള ആരെങ്കിലും എന്നെ ദേഷ്യത്തില്‍ നോക്കിയാൽ പോലും വിനില അവരെ വെറുതെ വിടാറില്ല. പണ്ട്‌ സ്കൂളിൽ വച്ചും അല്ലാതെയും എനിക്കുവേണ്ടി ഒരുപാട്‌ അടിപിടി കൂടിയിട്ടുണ്ട്.
ഇപ്പോൾ ദേവിയുടെ ഇത്തരം സംസാര രീതി വിനിലയെ ചൊടിപ്പിച്ചു.
“ശെരി ടീച്ചർ, ഞാൻ അറിയിക്കാം…. പക്ഷേ ആരെയാ അറിയിക്കേണ്ടതാണ്..?” ഞാൻ ദേവിയോട് ചോദിച്ചു.
ഉടനെ ദേവി വിനിലയുടെ നേര്‍ക്ക് തല കൊണ്ട്‌ കാണിച്ചിട്ട് ഗൗരവത്തിൽ പറഞ്ഞു, “നിങ്ങൾ വിനില ചേച്ചിയോട് കാര്യം പറഞ്ഞാല്‍ മതി. ചേച്ചി എന്നെ വിളിച്ചോളും.”
എനിക്ക് ചൊരിഞ്ഞ് കേറി വന്നു.
സൗന്ദര്യം ആവോളം കിട്ടിയത് പോലെ ജാടയും കൂടുതൽ ഉണ്ടെന്ന് മനസ്സിലായി.
“സാം എന്നെ എന്തിന്‌ അറിയിക്കണം..? അങ്ങനെ എന്നെ അറിയിക്കേണ്ട കാര്യമൊന്നുമില്ല, ദേവി.” പെട്ടന്ന് വിനില മുഖത്തടിച്ചത് പോലെ ദേഷ്യത്തില്‍ പറഞ്ഞതും ദേവിയുടെ മുഖം വല്ലാണ്ടായി.
“അതെന്താ ചേച്ചി അങ്ങനെ പറഞ്ഞത്..?” വിനിലയുടെ ദേഷ്യം കണ്ടിട്ട് ദേവി വിഷമത്തോടെ ചോദിച്ചു.
“എന്റെ ദേവി, ഇവിടെ ആവശ്യം നിനക്ക് ആണെന്ന് മനസ്സിലാക്കണം.” വിനില കടുപ്പിച്ച് പറഞ്ഞു. “പിന്നേ മറ്റാര്‍ക്ക് വേണ്ടിയും സാമിനോട് ഞാൻ ഒരുകാര്യവും ആവശ്യപ്പെട്ടിട്ടില്ല. പക്ഷേ നീ എന്നോട് ചോദിച്ചത്‌ കൊണ്ട്‌ മാത്രമാണ് ഞാൻ സാമിനോട് ശുപാര്‍ശ ചെയ്തത്. ഇനി ആവശ്യക്കാര്‍ തന്നെ അവനോട് നേരിട്ട് ഇടപെടുന്നതാണ് അതിന്റെ മര്യാദ.” വിനില ദേവിയോട് കടുപ്പിച്ച് പറഞ്ഞിട്ട് എന്നെ നോക്കി. “ദേവി നിനക്ക് നമ്പര്‍ തരും, സാം. എന്തുണ്ടെങ്കിലും നി അവളെ തന്നെ വിളിച്ചാൽ മതി.” വിനില പുഞ്ചിരിയോടെ മയത്തില്‍ എന്നോട് പറഞ്ഞു.
“സോറി ചേട്ടാ, ഞാൻ ചിന്തിക്കാതെ അങ്ങനെ പറഞ്ഞു പോയി. ചേച്ചി പറഞ്ഞ പോലെ നിങ്ങൾ എന്നെ വിളിച്ചാല്‍ മതി.” ഒടുവില്‍ അവള്‍ ഗൗരവം വെടിഞ്ഞതും എനിക്ക് ആശ്വാസമായി.
ഞാൻ അവളെ നോക്കി പുഞ്ചിരിച്ചു.
അവളും ഒരു പുഞ്ചിരിയോടെ തുടർന്നു, “പിന്നെ ആതിര ചേച്ചിയുടെ കാര്യങ്ങൾ എന്തെങ്കിലും നിങ്ങള്‍ക്ക് അറിയണമെങ്കില്‍ ചേച്ചിയുടെ നമ്പറും ഞാൻ തരാം. ചേട്ടൻ നേരിട്ട് അവരോട് സംസാരിച്ചാലും മതി.”
അത്രയും പറഞ്ഞിട്ട് അവള്‍ സ്വന്തം നമ്പര്‍ പറയാൻ തുടങ്ങിയതും ഞാൻ വേഗം എന്റെ മൊബൈലിനെ എടുത്തു.
അതിൽ കുറെ മെസേജും മിസ്ഡ് കോളും ഉണ്ടായിരുന്നു. പക്ഷേ ആരാണെന്ന് ഞാൻ നോക്കിയില്ല.
ദേവി പറഞ്ഞ അവളുടെ നമ്പര്‍ സേവ് ചെയ്തിട്ട് അവളെ നോക്കി.
“ആതിര ചേച്ചിയുടെ നമ്പറും ഞാൻ തരാം.” അതും പറഞ്ഞ്‌ അവള്‍ സ്വന്തം മൊബൈലില്‍ സേര്‍ച്ച് ചെയ്തു. ശേഷം അവള്‍ പറഞ്ഞ രണ്ടാമത്തെ നമ്പറും സേവ് ചെയ്തിട്ട്, എന്റെ നമ്പര്‍ കൊടുക്കാനായി ദേവിക്ക് ഞാൻ ഒരു മിസ്സ്ഡ് കോളും കൊടുത്തു.
“പിന്നേ ചേട്ടൻ എന്നെ ദേവി എന്ന് വിളിച്ചാല്‍ മതി. മുതിര്‍ന്നവര്‍ എന്നെ ടീച്ചർ എന്ന് വിളിക്കുന്നത് കേള്‍ക്കാന്‍ ഏതോ പോലെ.” അവള്‍ ചടപ്പോടെ പറഞ്ഞതും ഞാനും തലയാട്ടി.
ശേഷം വിനിലയും ദേവിയും മാറി നിന്ന് എന്തോ കാര്യമായി സംസാരിക്കാൻ തുടങ്ങി. സുമി എന്നോട് എന്തൊക്കെയോ പറഞ്ഞു കൊണ്ടിരുന്നു.
അവസാനം മഴ തോർന്നതും ഞാനും വിനിലയും സുമിയേ കൂട്ടിക്കൊണ്ട് സ്കൂളിന്റെ പുറത്തേക്ക് വന്നു.
സുമിയെ മുന്നില്‍ ഇരുത്തി… വിനില പുറകില്‍ കേറിയതും ഞാൻ സൂക്ഷിച്ച് ബൈക്ക് ഓടിച്ചു.
“ഡാ വായിനോക്കി…, മീറ്റിംഗ് സമയത്ത് ദേവിയെ വിഴുങ്ങും പോലെയാണല്ലോ നോക്കിയത്‌…!?” പോകുന്ന വഴിക്ക് വച്ച് വിനില എന്റെ തുടയിൽ നുള്ളി കൊണ്ട്‌ അല്‍പ്പം ദേഷ്യത്തില്‍ ചോദിച്ചു.
“ദൈവമേ….,, എവിടെ ചെന്നാലും എന്നെ കുറ്റപ്പെടുത്താനായി നി ആരെയെങ്കിലും ഏല്‍പ്പിക്കുന്നത് എന്തിനാ….?” ദൈവത്തോട് ഞാൻ പരാതി പറഞ്ഞതും വിനില ചിരിച്ചു.
“എടാ സാം, ദേവിക്ക് വേണമെങ്കിൽ നിന്റെ നമ്പറിനെ ആതിര ചേച്ചിക്ക് കൊടുത്തിട്ട് അവരെ കൊണ്ടുതന്നെ നിന്നെ വിളിപ്പിക്കാമായിരുന്നു. പക്ഷേ എന്റെ പുറത്തുള്ള വിശ്വാസത്തിന്‍റെ പേരിലാണ് ദേവി സ്വന്തം നമ്പര്‍നെ നിനക്ക് തന്നതെന്ന് ഓർക്കണം. അതുകൊണ്ട്‌ എന്റെ പോന്നു മോന്‍ മിസ്സ് യൂസ് ഒന്നും ചെയ്തേക്കല്ലേ…!!”
“ഞാൻ മിസ് യൂസ് ഒന്നും ചെയ്യില്ല.”
“കൂടാതെ, എന്നെ നിനക്ക് നന്നായറിയാം..! ആരുടെ പുറത്ത്‌ തെറ്റാണെങ്കിലും എനിക്കത് വിഷയമല്ല, നമ്മുടെ കുടുംബത്തിന് പുറത്തുള്ള ആര് നിന്നെ കുറ്റം പറഞ്ഞാലും അവരോട് ഞാൻ ക്ഷമിക്കില്ല… അവർ വിവരമറിയുകയും ചെയ്യും. അതുകൊണ്ട്‌ എനിക്കും ദേവിക്കും ഇടയില്‍ നി പ്രശ്നം ഒന്നും വരുത്തരുത്.” വിനില സീരിയസ്സായി പറഞ്ഞു.
“എടി, ഞാൻ ആരെയും ശല്യം ചെയ്യാനൊന്നും പോണില്ല, പോരെ..!?”
“അതുമതി.” എന്റെ മാറില്‍ തഴുകി കൊണ്ട്‌ അവള്‍ പറഞ്ഞു.
“ദേവിയുടെ ഭർത്താവിന് എന്താ ജോലി..?” ഞാൻ ചോദിച്ചു.
“പുള്ളി മുംബൈയില്‍ എന്തോ ബിസിനസ്സ് ചെയ്യുന്നു. മാസത്തിൽ നാലോ അഞ്ചോ ദിവസം ഇവിടെ നാട്ടില്‍ നില്‍ക്കും.”
അതിനുശേഷം ഞാൻ കൂടുതൽ ഒന്നും ചോദിക്കാതെ ബൈക്ക് ഓടിച്ച് വിനിലയും സുമിയേയും വീട്ടിലെത്തിച്ചു. ഉച്ചക്ക് വിനിലയുടെ വീട്ടില്‍ നിന്നാണ് ഞാൻ ഭക്ഷണം കഴിച്ചത്.
കഴിച്ചു കഴിഞ്ഞ് ഞാൻ മാളിലേക്ക് പോകുന്നു എന്നും പറഞ്ഞ്‌ ഇറങ്ങുന്ന നേരം വിനില പറഞ്ഞു, “എടാ നാളെ വെള്ളിയാഴ്ചയാണ്, ഉച്ചക്ക് സുമി ക്ലാസ് കഴിഞ്ഞു വന്നതും ഞങ്ങളെ നിന്റെ വീട്ടില്‍ കൊണ്ടാക്കണം. എനിക്ക് ശെരിക്കും ബോര്‍ ആയി തുടങ്ങി. വൈകുന്നേരം വരെ കാത്തിരിക്കാന്‍ വയ്യാ.”
