ഞങ്ങളെ ഒരു വലിയ ഹാളിലേക്കാണ് അവള് കൂട്ടിക്കൊണ്ടു പോയത്. പ്ലാസ്റ്റിക് കസേരകളെ ഇരുപത് നിരകളിളായി ഇട്ടിരുന്നു. ഓരോരുത്തരായി, ഏറ്റവും മുന്നില് നിന്ന്, അവര്ക്ക് ഇഷ്ട്ടപ്പെട്ട കസേര നോക്കി ഇരിക്കാൻ തുടങ്ങി.
ഞാനും രണ്ടാമത്തെ നിരയില് ചെന്ന് ഒരു കസേരയില് ഇരുന്ന. ഉടനെ വിനില എന്റെ അടുത്തിരുന്നു. സുമി എന്റെ മടിയിലും.
അല്പ്പ സമയത്തിനുള്ളില് മീറ്റിംഗ് ആരംഭിച്ചു. ഒപ്പം മഴയും തുടങ്ങി.
ഞാൻ ദേവിയെ തന്നെ നോക്കിയാണിരുന്നത്.
ഇടയ്ക്കിടെ ദേവിയുടെ മിഴികള് എന്റെ കണ്ണുമായി ഇടഞ്ഞു. അവള് പുഞ്ചിരിച്ച് കൊണ്ട് പെട്ടന്ന് നോട്ടം മാറ്റുകയാണ് ചെയ്തത്.
അവസാനം വിനില എന്നെ നുള്ളിയതും ദേവിയുടെ മേലുള്ള എന്റെ നോട്ടം മാറ്റി ഞാൻ താഴേ നോക്കിയിരുന്നു.
അഞ്ചാം ക്ലാസ് വരെയുള്ള സ്കൂളിനെ എട്ടാം ക്ലാസ് വരെ ഉയര്ത്താന് തീരുമാനിച്ചു എന്നും, അതിന് ഡൊണേഷൻ ആവശ്യപ്പെട്ടു കൊണ്ടുള്ള മീറ്റിംഗ് ആയിരുന്നു നടന്നത്. അര മണിക്കൂറില് മീറ്റിംഗ് കഴിയുകയും ചെയ്തു.
ആ മീറ്റിംഗ് കഴിഞ്ഞതും, ക്ലാസ് ടീച്ചറും പേരൻസും തമ്മിലുള്ള ഒരു ചെറിയ മീറ്റിംഗ് കൂടി അതാത് ക്ലാസ്സിൽ വച്ചു നടക്കുമെന്ന് അറിയിപ്പുണ്ടായി.
അതുകൊണ്ട് യുകേജി കുട്ടികളുടെ രക്ഷിതാക്കള് എല്ലാവരും ദേവിയുടെ കൂടെ പോകാൻ റെഡിയായി.
അപ്പോൾ മഴയുടെ ശക്തിയും കൂടിയിരുന്നു. മീറ്റിംഗ് ഹാളില് നിന്നും ഇറങ്ങി ഇടനാഴിയിലൂടെ മഴ നനയാതെയാണ് ഞങ്ങൾ ക്ലാസില് കേറിയത്.
കുട്ടികൾ എല്ലാവരും ബെഞ്ചിൽ ഇരുന്നു. രക്ഷിതാക്കളും ദേവി ടീച്ചറും നിന്നുകൊണ്ടാണ് കുട്ടികളെ കുറിച്ചുള്ള കാര്യങ്ങളെ ചർച്ച ചെയ്തത്. ഇടക്ക് ഈ കുട്ടികളെ പഠിപ്പിക്കുന്ന വേറെയും ടീച്ചേഴ്സ് വന്ന് കുട്ടികളെ കുറിച്ച് സംസാരിച്ച ശേഷം പോകുകയും ചെയ്തു.
വെറും പതിനഞ്ചു മിനിറ്റ് കൊണ്ട് ആ മീറ്റിംഗും കഴിഞ്ഞു. അന്നേരം മഴയുടെ ശക്തി കുറഞ്ഞെങ്കിലും മഴ നിന്നില്ല. പക്ഷേ എല്ലാവരും അവരവരുടെ കുഞ്ഞുങ്ങളെ കൂട്ടിക്കൊണ്ടു പോകാനും തുടങ്ങി.
എന്നാൽ മഴ തോരുന്നതും നോക്കി ഞാനും വിനിലയും സുമിയും ക്ലാസ്സിൽ തന്നെ നിന്നത് കൊണ്ട് ദേവിയും പോയില്ല.
വിനിലയും ദേവിയും കാര്യമായി എന്തൊക്കെയോ ചർച്ച ചെയ്യാൻ തുടങ്ങിയതും, ഞാനും സുമിയും അവിടെ ഉണ്ടായിരുന്ന ബെഞ്ചിൽ പോയിരുന്നു.
“ഞാൻ എപ്പോഴും പറയുന്ന ദേവി ടീച്ചർ ഇതാണ്.” സുമി എന്നോട് രഹസ്യം പറഞ്ഞു.
“എനിക്ക് മനസ്സിലായി.” ഞാൻ സുമിയുടെ കാതില് പറഞ്ഞു.
“വീട്ടില് എനിക്ക് കൂടുതൽ ഇഷ്ട്ടം ഉള്ളവരെ കുറിച്ച് ടീച്ചർ എപ്പോഴും ചോദിക്കും, അപ്പോ ഞാൻ സാമങ്കിളെ കുറിച്ച് പറയും.” സുമി സന്തോഷത്തോടെ പറഞ്ഞു.
“എന്നെ കുറിച്ച് നി എന്തൊക്കെയ പറഞ്ഞിട്ടുള്ളത്…?”
“എനിക്ക് അറിയാവുന്ന എല്ലാം പറഞ്ഞിട്ടുണ്ട്.” നിഷ്കളങ്കമായി അവള് പറഞ്ഞതും എനിക്ക് ചിരി വന്നു.
“സാം…!” പെട്ടന്ന് വിനില വിളിച്ചത് കേട്ട് ഞാൻ അങ്ങോട്ട് നോക്കി.
“ഇവിടെ വാ സാം.”
ഉടനെ ഞാനും സുമിയും എഴുനേറ്റ് ചെന്നു.
“ദേവിക്ക് നിന്നോട് എന്തോ ചോദിക്കാനുണ്ടത്രേ.”
വിനില പറഞ്ഞതും ദേവി വിരണ്ടു.
“അയ്യോ ചേച്ചി… ചേച്ചി തന്നെ ചോദിച്ചാല് മതി.”
കാര്യം എന്താണെന്ന് അറിയാതെ അവർ രണ്ടുപേരെയും ഞാൻ മാറിമാറി നോക്കി.
“എടാ, ദേവിയുടെ ഒരു കസിന് ഉണ്ട്. പേര് ആതിര. മുപ്പത്തി മൂന്ന് വയസുണ്ട്. ആ ചേച്ചി പ്ലസ് ടു വരെ പഠിച്ചിട്ടുണ്ട്. രണ്ട് കുട്ടികളും അവർക്കുണ്ട്. ആതിര ചേച്ചിയുടെ ഭർത്താവിന് സ്വന്തമായ കൃഷി പണിയാണ്. അത്യാവശ്യം വരുമാനം ഉണ്ടെങ്കിലും ചില സമയത്ത് ബുദ്ധിമുട്ടാണ്. അതുകൊണ്ട് അടുത്തുള്ള എന്തെങ്കിലും സൂപ്പര് മാർക്കറ്റിലോ മറ്റോ ജോലി കിട്ടുമോ എന്ന് ആതിര ചേച്ചി ദേവിയോട് അന്വേഷിക്കാന് പറഞ്ഞിരുന്നത്രേ.”