അന്ന് 3:45 ആയപ്പോ സാന്ദ്ര എന്റെ മാളിലേക്കെത്തി. എന്റെ ഓഫീസിലേക്ക് കേറി വന്നിട്ട് എന്റെ അടുത്തായി നിന്നു. എന്റെ മുഖത്ത് മാസ്ക് ഉള്ളത് കണ്ടിട്ട് അവള്‍ മുഖം ചുളിച്ചു. പക്ഷേ പെട്ടന്ന് കാര്യം മനസ്സിലായത് പോലെ അവളുടെ കണ്ണുകൾ സാധാരണ ഗതിയിലായി.
“ചേട്ടൻ എന്തിനാ എന്നെ കൊണ്ടു വിടാനും എടുക്കാനും ചേച്ചിയെ ഏല്‍പ്പിച്ചത്…!?” അവള്‍ ദേഷ്യപ്പെട്ടു.
ഞാൻ ഒന്നും മിണ്ടിയില്ല.
“എന്നെ എന്തിനാ ബ്ലോക്ക് ചെയ്തത്…!?” അവൾ സങ്കടത്തോടെ ചോദിച്ചു.
അതിനും ഞാൻ മറുപടി കൊടുത്തില്ല.
“ഒരിക്കലും ചേട്ടനെ മാത്രമായി ഞാൻ കുറ്റം പറയില്ല. എന്റെ ചില കൂട്ടുകാരികളും ചേട്ടനോട് കൂടുതൽ അടുപ്പം കാണിച്ചത് കൊണ്ടല്ലേ..!! എന്നിട്ടും ചേട്ടൻ മാത്രം തെറ്റ് ചെയ്തത് പോലെ എന്തിനാ ചേച്ചിയോട് സംസാരിച്ചത്…?” അവള്‍ പെട്ടന്ന് ചൂടായി.
പക്ഷേ ഒന്നും മിണ്ടാതെ കീ ബോർഡിൽ ഞാൻ കുത്തി കൊണ്ടിരുന്നു.
“ആവശ്യമില്ലാത്ത കാര്യങ്ങൾ ചേച്ചിയോട് പറഞ്ഞിട്ട് ഇവിടിരുന്ന് ഇംഗ്ലീഷ് അക്ഷരങ്ങള്‍ എഴുതി കളിക്കുന്നോ..?!” അവള്‍ ദേഷ്യപ്പെട്ടു.
അപ്പോഴാണ് ഞാൻ തുടരെ തുടരെ ഇംഗ്ലീഷ് ആല്‍ഫബെറ്റിനെ ടൈപ്പ് ചെയ്തു കൊണ്ടിരുന്ന കാര്യം മനസിലായത്.
ചമ്മലോടെ കീ ബോർഡിൽ നിന്നും എന്റെ കൈ ഞാൻ എടുത്തു മാറ്റി.
അന്നേരം സാന്ദ്രയ്ക്ക് ഒരു കോൾ വന്നതും അവള്‍ എടുത്തു.
“ഞാൻ മാളിലാണ്. ചേച്ചി ഇങ്ങോട്ട് വന്നാൽ മതി.” സാന്ദ്ര അത്രയും പറഞ്ഞിട്ട് എന്നെ ദയനീയമായി നോക്കിയ ശേഷം ഇറങ്ങി പോയി.
രാത്രി ഒന്‍പത് മണിക്ക് മാൾ പൂട്ടിയ ശേഷം ഹോട്ടലിൽ കേറി കഴിച്ചിട്ടാണ് ഞാൻ വീട്ടിലേക്ക് ചെന്നത്. എല്ലാവരും ഹാളില്‍ തന്നെ ഉണ്ടായിരുന്നു. പക്ഷേ ആരെയും അഭിമുഖീകരിക്കാനുള്ള കരുത്ത് ഇല്ലാത്തത് കൊണ്ട്‌ നേരെ റൂമിലേക്ക് നടന്നു. ജൂലി എന്റെ കൂടെ വന്നതുമില്ല.
ഞാൻ കുളിച്ചിട്ട് ബാത്റൂമിൽ നിന്നും ഇറങ്ങി. റൂമിൽ എന്നെയും കാത്ത് സാന്ദ്ര ഉണ്ടായിരുന്നു. എന്നെ കണ്ടതും ബെഡ്ഡിൽ നിന്നും സാന്ദ്ര എഴുന്നേറ്റു.
“കഴിക്കാനായി ചേട്ടനെ വിളിച്ചോണ്ട് വരാൻ ചേച്ചി പറഞ്ഞു.”
“എനിക്ക് വേണ്ട, ഞാൻ കഴിച്ചിട്ടാ വന്നത്.” പറഞ്ഞിട്ട് ഞാൻ ബെഡ്ഡിന്റെ ഒരറ്റത്തായി കിടന്നു. ഉടനെ സാന്ദ്ര എന്റെ അടുത്തേക്ക് വന്ന് എന്റെ കൈ പിടിച്ച് മണത്തു നോക്കി.
ഇപ്പോഴും ഞാൻ കഴിച്ച ഫുഡിന്റെ മണം ഉണ്ടായിരുന്നോ എന്നറിയില്ല. പക്ഷേ എന്റെ കൈ വിട്ടിട്ട് ബെഡ്ഡിൽ കിടന്ന എന്റെ മൊബൈലിനെ എടുത്ത് സാന്ദ്ര എന്തോ ചെയ്യുന്നത് ഞാൻ കണ്ടെങ്കിലും ഒന്നും മിണ്ടിയില്ല.
സ്വിച്ച് ഓഫ് ചെയ്തു വച്ചിരുന്ന എന്റെ മൊബൈലിനെ ഓണാക്കി അവളുടെ നമ്പറിനെ അൺബ്ലോക്ക് ചെയ്യുകയാണെന്ന് മനസ്സിലായി. അവസാനം സാന്ദ്ര റൂമിൽ നിന്നും പുറത്തേക്ക്‌ പോയി.
ഒരുപാട്‌ നേരം കഴിഞ്ഞാണ് ജൂലി വന്നത്. ഞാൻ ബെഡ്ഡിൽ കിടക്കുന്നത് കണ്ടിട്ട് അവള്‍ ഒരു നിമിഷം അറച്ചു നിന്നു.
ഒടുവില്‍ അവള്‍ വാതിൽ ലോക് ചെയ്തിട്ട് വന്നു.
“ജൂലി…?!” ഞാൻ സങ്കടത്തോടെ വിളിച്ചു. പക്ഷേ അവള്‍ മൈന്റ് ചെയ്യാതെ മരുന്നൊക്കെ കഴിച്ചിട്ട് ലൈറ്റ് ഓഫാക്കി.
എന്നിട്ട് വെറും തറയില്‍ അവൾ ചെന്നു കിടന്നു. എനിക്ക് നല്ല സങ്കടം തോന്നി. ഞാൻ വേഗം ബെഡ്ഡിൽ നിന്നും താഴെയിറങ്ങി നിന്നു.
“ജൂലി, ബെഡ്ഡിൽ കേറി കിടക്ക്.” ഞാൻ പറഞ്ഞു. പക്ഷേ അവള്‍ അനുസരിച്ചില്ല.
ഏറെ നേരം ഞാൻ കെഞ്ചി നോക്കീട്ടും അവളില്‍ നിന്നും പ്രതികരണം ഉണ്ടായില്ല. അവള്‍ അങ്ങനെതന്നെ കിടന്ന് ഉറങ്ങുകയും ചെയ്തു.
അതുകഴിഞ്ഞാണ് അവളെ കോരിയെടുത്ത് ബെഡ്ഡിൽ ഞാൻ കിടത്തിയത്. അവള്‍ക്ക് പുതപ്പും മൂടി കൊടുത്ത ശേഷം എന്റെ മൊബൈലും എടുത്തു കൊണ്ട്‌ ഞാൻ ഹാളില്‍ ചെന്നു കിടന്നു.
എങ്ങനെ തിരിഞ്ഞും മറിഞ്ഞും കിടന്നിട്ടും എനിക്ക് ഉറക്കം വന്നില്ല.
രാത്രി പന്ത്രണ്ടര കഴിഞ്ഞ് സാന്ദ്ര കോൾ ചെയ്തു. നിശബ്ദതയെ ഭേദിച്ച് കൊണ്ട്‌ ആ ചെറിയ ശബ്ദം പോലും ഭയങ്കരമായി ഹാളാകെ മുഴങ്ങി കേട്ടതും ഞാൻ ഞെട്ടി പോയി. രാത്രി മൊബൈലിനെ സൈലന്റിലിടാൻ പോലും ഞാൻ മറന്നു പോയിരിക്കുന്നു.
വേഗം സാന്ദ്രയുടെ കോൾ ഞാൻ കട്ടാക്കി. അതേ സമയം മുകളില്‍ നിന്നും സാന്ദ്ര ധൃതിയില്‍ അവളുടെ റൂമിന്റെ പുറത്തേക്ക്‌ ഓടിയെത്തിയ ശബ്ദവും എനിക്ക് കേട്ടു.
കുറെ കഴിഞ്ഞ് അവള്‍ താഴേക്ക് ഇറങ്ങി വരുന്നതും ഞാൻ കണ്ടു.
സോഫയിൽ കിടക്കുന്ന എന്റെ അടുത്തേക്ക് വന്നിട്ട് എന്റെ വയറിനോട് ചേര്‍ന്ന് അവള്‍ സോഫയിൽ ഇരുന്നു.. എന്നിട്ട് ആ അരണ്ട വെളിച്ചത്തിൽ അവൾ എന്റെ മുഖത്ത് ഉറ്റു നോക്കി.
“സാമേട്ട…, ആവശ്യമില്ലാത്ത കാര്യങ്ങൾ ചേച്ചിയോട് പറഞ്ഞിട്ട് ഈ വീടിനെ എന്തിനാ നരകമാക്കിയത്?” അവള്‍ സങ്കടപ്പെട്ടു.
ഞാൻ ഒന്നും പറയാൻ ആഗ്രഹിക്കാത്തത് കൊണ്ട്‌ മിണ്ടാതെ കിടന്നു.
“ഐഷയെ കുറിച്ച് എന്തിനാ ചേച്ചിയോട് പറഞ്ഞത്..? അവളോട് ചേട്ടൻ വൃത്തികേട് സംസാരിച്ചു എന്നെന്തിനാ പറഞ്ഞത്..?” സാന്ദ്ര ദേഷ്യത്തിലാണ് ആ ചോദ്യം എന്നോട് ചോദിച്ചത്‌.
അപ്പോഴും ഞാൻ മിണ്ടിയില്ല.
“സാമേട്ട…. എന്നോട് എന്തെങ്കിലും സംസാരിക്കു, പ്ലീസ്….!!” എന്നെ പിടിച്ചുലച്ചു കൊണ്ട്‌ അവള്‍ കെഞ്ചി.
പക്ഷേ എനിക്ക് സംസാരിക്കാന്‍ താല്‍പര്യം ഇല്ലായിരുന്നു. ഞാൻ എഴുനേറ്റ് എന്റെ റൂമിലേക്ക് ചെന്നു.
പക്ഷേ ജൂലി ഇപ്പോഴൊന്നും എണീക്കില്ല എന്നറിയാവുന്നത് കൊണ്ട്‌ സാന്ദ്രയും എന്റെ പിന്നാലെ വന്നു.
അതുകൊണ്ട്‌ എന്റെ ബൈക്ക് താക്കോലും എടുത്തു കൊണ്ട്‌ ഞാൻ വീട്ടില്‍ നിന്നിറങ്ങാൻ ശ്രമിച്ചു. പക്ഷേ സാന്ദ്ര എന്റെ കൈയിൽ നിന്നും ചാവിയെ പിടിച്ചു വാങ്ങി.
അതോടെ മുഖവും വീർപ്പിച്ചു കൊണ്ട്‌ ഞാൻ സോഫയിൽ മലര്‍ന്നു കിടന്നു. അവള്‍ക്ക് ഇരിക്കാനുള്ള സ്ഥലം കൊടുക്കാതെ ഞാൻ കൈയും കാലും അകത്തി വച്ചാണ് കിടന്നത്.
എന്റെ കിടപ്പ് അവള്‍ക്ക് തമാശയായി തോന്നിയിട്ടുണ്ടാകും… കാരണം, എന്റെ കിടപ്പ് കണ്ടിട്ട് അവള്‍ ചിരിക്കുകയാണ് ചെയ്തത്. സത്യത്തിൽ എനിക്ക് പോലും ചിരിക്കാനാണ് തോന്നിയത്‌.
പക്ഷേ അവള്‍ക്ക് സ്ഥലം കൊടുക്കാതെ ഞാൻ കിടന്നിട്ടും സാന്ദ്ര പിന്മാറിയില്ല. വാശിയേറിയ കുട്ടിയെ പോലെ അവള്‍ എന്നെ തള്ളി നീക്കി കൊണ്ട്‌ എന്നോട് ചേര്‍ന്ന് ചെരിഞ്ഞ് കിടന്നു. അവള്‍ വീഴാതിരിക്കാനായി എന്റെ മുകളില്‍ കൈയിട്ട് എന്നെയും പിടിച്ചു കൊണ്ടാണ് എന്റെ കൈയിൽ തല വെച്ചവൾ കിടന്നത്.
