അവളാണെങ്കിൽ കുറെ പ്രായമായ അമ്മച്ചിമാരുടെ അടുത്ത് പെട്ട അവസ്ഥയിലും….മായ കൊണ്ടുപിടിച്ചു സംസാരം ആണ് ചിന്നു മൈലാഞ്ചിക്ക് പെണ്ണിനെ ഒരുക്കാൻകൂടി….
ആ അവസ്ഥ കണ്ടിട്ട് ഹരിക്ക് ചിരിയും വരുന്നുണ്ട് പാവവും തോന്നുന്നുണ്ട്….
“ആ മോളേ…..മോളിപ്പോളും പഠിക്കാണല്ലേ…..വിശേഷം വല്ലോം ഒക്കെ ഉണ്ടോ…..” ഏതോ വയസായ മുതുക്കിയമ്മ ആണ്…..
അമ്മുവിന്റെ കണ്ണ് രണ്ടും ഇപ്പൊ താഴെ വീഴും….
സ്പീക്കറിനുള്ള വയർ വലിക്കാൻ എക്സ്റ്റൻഷൻ കേബിൾ ജനലിലൂടെ ഇടാൻ വന്ന ഹരി അത് കേട്ടു ഒന്ന് സ്റ്റക്ക് ആയി…..
“ഇപ്പോളത്തെ പിള്ളേരല്ലെന്ന്….ഇതൊക്കെ നേരത്തേ കാലത്തെ ആയ മിടുക്കെന്ന് ഇരിക്കും….നമ്മടെയ തെക്കേലെ രാജിടെ മരുമോൾ ഇല്ലേ…അവളിങ്ങനെ പിന്നത്തേക്ക് വച്ച് വച്ച് ഇപ്പൊ ആശൂത്രീ കേറി നടക്കുവാ…..”
അവർ ഇരുന്ന് പറച്ചിൽ തുടങ്ങി…ചുറ്റുമുള്ളവർ അതുകേട്ട് അമ്മുവിന്റെ നേരെ ചോദ്യ ഭാവത്തിൽ നോക്കുന്നുണ്ട്…അവൾക്കു കുടിക്കാൻ സർബത്ത് എടുക്കാൻ പോയ മായ വന്നിട്ടുമില്ല..
അമ്മു ഇരുന്നുരുകി…..
“ഡീ…..അമ്മൂ….നിന്റെ ഫ്രണ്ട്സ് ആരൊക്കെയോ വനേക്കുന്നു നിന്നെ ചോദിക്കുന്നുണ്ട്…” ഹരി ജനാലയിലേക്ക് അല്പം നീങ്ങിനിന്ന് പറഞ്ഞു….
കേൾക്കണ്ട താമസം ദാ വരുന്നു ഹരിയേട്ടാന്നും പറഞ്ഞവൾ എണീറ്റു മുറി കടന്നു…
ഹരിയത് പ്രോസസ്സ് ചെയ്യുന്നതിന് മുന്നേ അവൾ അവിടം വിട്ടിരുന്നു….
ആ വല്ല നാക്കുപിഴയും ആരിക്കുമെന്നും പറഞ്ഞവൻ കേബിളും അകത്തേക്കിട്ട് പിറകുവശത്തേക്ക് മാറി….
കുറച്ച് കഴിഞ്ഞു മൈലാഞ്ചി ചടങ്ങുകൾ തുടങ്ങിയിട്ടുണ്ട്….
വീടിന് മുറ്റത്ത് കെട്ടിയ ഒരു ചെറിയ സ്റ്റേജിൽ ആണ് ചടങ്ങ്….
ഓരോരുത്തരായി പെണ്ണിന് മൈലാഞ്ചി ഇട്ടുകൊടുക്കുകയും മധുരം കൊടുക്കുകയും ചെയ്യുന്നുണ്ട്….
കൂടെയുള്ള കല്യാണം കഴിഞ്ഞ ചേട്ടന്മാരൊക്കെ ഭാര്യമാരെ കൊണ്ട് കയറുന്നുണ്ട് അത് കാണുമ്പോൾ ഹരിക്കൊരു പൂതി…..
അമ്മുനേം കൂട്ടി സ്റ്റേജിൽ കയറി ഇട്ടുകൊടുക്കണം…
വല്ലാത്ത ജാതി ആഗ്രഹങ്ങളെ….
പക്ഷെ ആരോട് പറയും…..
രണ്ടും കൂടങ്ങനെ കണ്ണും കണ്ണും നോക്കിയും ഇടയ്ക്ക് സ്റ്റേജിലേക്ക് നോക്കിയും കഥകളിച്ചോണ്ട് ഇരിക്കുന്നതിന്റെ ഇടയിൽ ദീപു മൈക്കും എടുത്ത് സ്റ്റേജിൽ കയറി….
ഓരോരുത്തരെ വിളിച്ചു കയറ്റാൻ തുടങ്ങി അതിന് മെമ്പോടിയായി അവർക്കിട്ട് ട്രോളും….
എല്ലാവരും കുഴപ്പമില്ലാത്ത രീതിക്ക് മിനുങ്ങി നിൽക്കുന്നുണ്ട് അതുകൊണ്ടുതന്നെ ആസ്വദിക്കുന്നും ഉണ്ട്…
ആശാനും ഭാര്യയും കയറിയപ്പോളും അവരെയും എയറിൽ കയറ്റിയവനെ തന്തക്കിട്ട് തന്നെ വെക്കുന്നോടായെന്നും പറഞ്ഞൊരു കൊട്ടും തലയ്ക്കിട്ട് വാങ്ങി പിന്നെയും ദീപു തുടർന്ന്….
“സുഹൃത്തുക്കളെ അടുത്തതായി കടന്നു വരുന്നത് നമ്മുടെ……അമ്പലക്കുട്ടനും സഹധർമ്മിണി അമ്മുചേച്ചിയും……..ആ വന്നാട്ടെ പൊന്നാട്ടെ……”
ഇവന്റെ ചാട്ടം എങ്ങോട്ടാണെന്ന് ആദ്യമേ മനസിലാക്കി നോക്കിയിരുന്ന അരുൺ അത് കേട്ടപാടെ കുക്കിവിളിച്ചു…ബാക്കിയുള്ളവർ അതേറ്റു പിടിച്ചു….
അമ്മുവാകെ തൊലി പൊളിഞ്ഞു നിപ്പാണ്….ഹരിക്കൊരു കൂസലുമില്ല ഇതിപ്പോ രോഗി ഇച്ഛിച്ചതും വൈദ്യൻ കല്പിച്ചതും സെയിം ആയ അവസ്ഥയാണ് അവന്….
ആകെ വിയർത്ത് മായയെ നോക്കിയ അമ്മുവിനോട് മായ കണ്ണടച്ചു പോയിട്ട് വരാൻ പറഞ്ഞു….
ഒരു സൈഡിൽ നിന്നും ഹരി കയറിയപ്പോൾ മറുസൈഡിൽ നിന്നും അമ്മുവിനെ ചിന്നു കൂടെ ചെന്നു കയറ്റിവിട്ടു….
പെണ്ണിനിരുവശവും ഇരുന്ന് മൈലാഞ്ചി ഇടുമ്പോൾ അമ്മു വെറുതെപോലും അവനെയൊ സ്റ്റേജിനു മുന്നിലേക്കോ നോക്കിയില്ല…..
കൈ വിറച്ചിട്ട് മൈലാഞ്ചി വെറ്റിലയിൽ തോണ്ടി വയ്ക്കാൻ കൂടെ പറ്റുന്നില്ല….
ഹരി മൈലാഞ്ചിയും ഇട്ട് മധുരവും കൊടുത്തുകഴിഞ്ഞാണ് അമ്മു അതൊന്നു ഇട്ടുവയ്ക്കുന്നത്….
വെപ്രാളത്തിൽ മധുരം പോലും വെയ്ക്കാതെ എണീക്കാനാഞ്ഞതും ദീപുവിന്റെകമന്റ്പിന്നാലെ വന്നു..