“അവള് കുഞ്ഞല്ലേ അമ്മേ….പയ്യെ പഠിച്ചു വരുന്നേ ഉള്ളൂ…അവിടിരുന്നോട്ടെ….” എന്നത്തേയുംപോലെ കഴിക്കാനായി ഇരുന്ന അമ്മുവിനെ നോക്കി മായ കണ്ണടച്ചുകാട്ടി…
“ഏഹ്ഹ് കുഞ്ഞോ…..വയറ്റിലൊന്നും ഒക്കത്തൊന്നും ആവണ്ട പ്രായമായി അപ്പോളാ കുഞ്ഞെന്നൊക്കെ…..”
അമ്മു വിളറിപ്പോയി..
ഹരി പൊട്ടിവന്ന ചിരി കഷ്ടപ്പെട്ട് കടിച്ചൊതുക്കി ചോറുരുട്ടി വായിലേക്ക് വച്ചു….
“പറഞ്ഞമാതിരി കെട്ടും കെടപ്പും ഒക്കെ കഴിഞ്ഞിട്ട് കുറെ ആയില്ലേ….വിശേഷം ഒന്നും ആയില്ലേ ഇതുവരേം….”
അടുത്തതും വന്നട്ടുണ്ട്…..
അമ്മു ചോറിൽ വിരലിട്ടിളക്കി മുഖം ഉയർത്താതെ ഇരിപ്പാണ്…
ഹരി പിന്നെയീ രാജ്യക്കാരനെ അല്ല….
“അവൾ പഠിക്കുവല്ലേ അമ്മേ….അതൊക്കെ കഴിഞ്ഞിട്ടേ ഉള്ളൂ…അമ്മയിപ്പോ കഴിച്ചേ…സ്പെഷ്യലായിട്ട് പൊരിച്ചതാ…” പറഞ്ഞുകൊണ്ട് ചിക്കൻഫ്രൈ പ്ലേറ്റിലേക്കിട്ട് കൊടുത്തു….
അവരത് വാരി വായിലേക്ക് വെക്കുമ്പോളും കണ്ണമ്മുവിൽ തന്നെയാണ്…
“ഈ പെണ്ണെന്താ ഈ നുള്ളിപ്പെറുക്കി ഇരിക്കുന്നെ….ആ ചിക്കനും മീനും ഒക്കെ കൂട്ടിയങ്ങ് കഴിക്ക് പെണ്ണേ…..”
വെറുതേ വിടാൻ ഉദ്ദേശമില്ല….
“അത്….ഞാൻ പച്ചക്കറി മാത്രേ കൂട്ടു അച്ഛമ്മേ…അത്കൊണ്ടാ….”
“ആ അങ്ങനെ പറയ്….വെറുതെയല്ല ഇങ്ങനെ വെര പിടിച്ച പിള്ളേരെ കൂട്ട് ഇരിക്കണേ….ഈ കാടും പള്ളേം മാത്രം തിന്നിട്ടെങ്ങനെ ജീവിക്കാന….ഇറച്ചിയും മീനും ഒന്നും തൊടാണ്ട് ഈ എടുപ്പും തുടുപ്പും കൂടിയോനെ ഒക്കെ നീയെങ്ങനെ മെരുക്കാനാ പെണ്ണേ…..“
”അമ്മേ……“ മായ കടുപ്പിച്ചങ്ങു വിളിച്ചു…..
”പിള്ളേരുടെ അടുത്ത് പറയണ്ട ഭാഷയാണോ ഇത്….അമ്മു കഴിച്ചിട്ടേണീച്ചു പോകാൻ നോക്കിയേ നീ….“
ഊണുമേശയിൽ ഒരു കലഹം ഒഴിവാക്കാൻ സഹനത്തിന്റെ പാതയിൽ നടന്ന മായ സഹികെട്ടു റൂട്ട് മാറ്റിപിടിച്ചു….
”ഹാ….ഞാനിപ്പോ പറഞ്ഞതായോ കുറ്റം….“
”മതി…മതി കഴിച്ചേ എല്ലാരും…“ ഹരിയിടയ്ക്ക് കയറി…
സൈലന്റ് ആയിരുന്നു കഴിക്കുന്നവളുടെ കയ്യിൽ കൈ ചേർത്തുപിടിച്ചൊന്നമർത്തി വിട്ടു ഹരി….ഒന്നുമില്ല ഞ്ഞാനുണ്ടെന്ന മട്ടിൽ…
കഴിച്ചു കഴിഞ്ഞ് അമ്മു മുറിയിൽ കയറി….
പങ്കു ടിവിക്ക് മുന്നിലേക്കും….സ്റ്റാർ സിങ്ങർ കാണാനാണ്…
മായ നാളെ കൊടുക്കാനുള്ള ബ്ലൗസിന്റെ ഹൂക് തുന്നിപിടിപ്പിക്കുകയാണ് ദീവാനിൽ ഇരുന്ന്…
ഹരി മായയുടെ മടിയിൽ തല വച്ച് കാല് ജനലിൽ കയറ്റിവച്ചു ഫോണിലും തോണ്ടി കിടപ്പുണ്ട്….
പങ്കു കിടന്നിട്ട് വേണം ഹരിക്ക് കിടക്കാൻ…
മായയുടെ തലയിലും അത് തന്നെയാണ് ചിന്ത…
പതിനൊന്ന് ആകാറായതും ടിവി ഓഫ് ചെയ്ത് പങ്കു എണീറ്റു….
“നീയിതുവരെ കിടന്നില്ലേ….ആ പെണ്ണുപോയിട്ട് നേരം കുറെ ആയല്ലോ….ചെന്നു കയറിക്കിടക്കെട ചെക്കാ….” മായയുടെ മുറിയിലേക്ക് നടന്നുകൊണ്ട് പങ്കു ആറ്റം ബോംബ് തന്നെ ഇട്ടു…
മായ ഞെട്ടിയിരിപ്പാണ്….
ഹരിയുടെ അവസ്ഥയും വ്യത്യസ്തമല്ല…
മുറിക്കുള്ളിൽ ഇരുന്നു കേട്ട അമ്മുവിന്റെ അടിവയറ്റിന്ന് കയറിപോയ മിന്നൽ തൊണ്ടക്കുഴിയിൽ ഉടക്കിയ അവസ്ഥയിലും….
“ഇവനോടല്ലേ ഞാനീ പറയണതൊന്നും….ചെന്നച്ചീടെ മടീൽ കിടക്കാനുള്ളെന് അവനിവിടെ ഇള്ളക്കുഞ്ഞു കളിച്ചു കിടപ്പാ….എണീച്ചുപോയെടാ….”
അവസാന പറച്ചിലിൽ ഹരിയേണീറ്റ് മുണ്ടഴിച്ചുടുത്തു തന്റെ മുറിക്ക് നേർക്കു നടന്നു….
ചുണ്ടിൽ ഒളിപ്പിച്ച വെടക്ക് ചിരിയോടെ….
മായ ഒട്ടൊരു സംശയത്തോടെ ആ പോക്ക് നോക്കിയിരുന്നു….
അടുത്തിടെ തുടങ്ങിയ അമ്മുവിന്റെ വല്ലാത്തൊരു വിധേയത്വവും ഹരിയുടെ എങ്ങുമില്ലാത്ത അനുസരണയും….
ഒരു ഡൌട്ട്ടിച്ചു തുടങ്ങീട്ട് ഇച്ചിരെ ആയി…
കൊമ്പുകോർത്ത് കൊണ്ടിരുന്നവർ പക്ഷേ കൊമ്പുരുമ്മി തുടങ്ങിയെന്നു ചിന്തിക്കാനുള്ള സെൻസ് എന്നാലും ഇപ്പോളും മായക്ക് അങ്ങായിട്ടില്ല….
ഹരി മുറിക്കകത്തേക്ക് കയറിയതും കട്ടിലിൽ കിടന്നിരുന്ന അമ്മു ചാടിയെണീറ്റിരുന്നു…
കുറ്റിയിട്ടു തിരിഞ്ഞതും ഇവനിതെന്തിനുള്ള പുറപ്പാടാന്നുള്ള മട്ടിൽ നോക്കിയിരിപ്പുണ്ട്….