“മ്മ്മ്…തികയ്ക്കണം…ഒരു സ്ഥിരവരുമാനം ഇല്ലാതെ ലോൺ ഒക്കെ എടുക്കാൻ അത്ര ധൈര്യം പോരാടി…”
ഹരി ആലോചനയിൽ പറഞ്ഞു..
“അമ്മയെന്നോടൊന്നും ഇതുവരേം പറഞ്ഞിട്ടില്ലല്ലോ….ഇത്രേം വല്യ കാര്യൊക്കെ എന്നോടൊളിപ്പിക്കുവോ…..”
“ഇല്ല…..അമ്മയോട് ഞാൻ പറഞ്ഞിട്ടുണ്ടെങ്കിൽ അല്ലെ അമ്മ നിന്നോട് പറയു…..”
“ങേഹ്…..അമ്മയോട് പറയാതെയാ നീ വീടൊക്കെ വെക്കാൻ പോണേ…..” അവൾക്കത്ര വിശ്വാസം ആയിട്ടില്ല…
“പറയും….പറയാണ്ടൊന്നും ചെയ്യില്ല….പക്ഷെ ഇപ്പോളല്ല…”
“അതെന്താ….”
“എന്നെക്കരുതി ഒരുപാട് പ്രതീക്ഷ വച്ചിരുന്നതാ എന്റെ മായക്കുഞ്ഞ്….എല്ലാം തച്ചുടച്ചു കയ്യിൽ കൊടുത്തവനാ ഞാൻ….ഇനിയിതിൽ കൂടി ഒരു മോഹം കൊടുക്കാൻ ധൈര്യം പോരാടി….എന്നെക്കൊണ്ട് കൂട്ടിയാൽ കൂടുവോന്ന് പോലും തീർച്ചയില്ല….എല്ലാം ഒന്നും വട്ടം കൂട്ടിയെത്തിക്കട്ടെ…എന്നിട്ട് അമ്മയോട് പറയാമെന്നാ വിചാരിക്കണേ….“ നോവുകലർന്നിട്ടുണ്ട് അവന്റെ ശബ്ദത്തിൽ….
അമ്മുവത് മനസിലാക്കിയ പോലെ അവളുടെ തലമുടിയിൽ ഇരുന്ന അവന്റെ വിരലിൽ ഒന്നു വിരൽമുറുക്കിയയച്ചു….
“ആ വീട് പൊളിക്കുവോ…” ഒരു തരി വിഷമം പോലെ അമ്മുവിന്…
അതു കണ്ടിട്ടു പൊടിക്ക് മനസു നിറഞ്ഞു ഹരിക്ക്…എത്ര മോശം ആണെങ്കിലും അവനാ വീട് സ്വർഗം ആണല്ലോ…
“ഇല്ലെടി….പണ്ട് അമ്മേടെ അച്ഛനും അമ്മേം മരിക്കുമ്പോൾ അമ്മയ്ക്കും പേരാമ്മയ്ക്കും കൂടെ കൊടുത്തൊരു വീടുണ്ടായിരുന്നു…അത് വിറ്റു കിട്ടിയ ഷെയർ കൊണ്ട് അന്ന് പേരപ്പൻ കവലയ്ക്ക് അടുത്ത് സ്ഥലം ആയ വാങ്ങി തന്നത്..ഞാനും അമ്മയും ചെറുതായിരുന്നല്ലോ..അവിടെ വീട് വെക്കാന പ്ലാൻ…മെയിൻ റോഡ് സൈഡ് അല്ലെ…അതാവും കുറച്ചൂടെ സൗകര്യം….ഇത് നമുക്ക് മെയ്ന്റനൻസ് ചെയ്ത് വാടകക്ക് കൊടുക്കാം….”
സ്വപ്നങ്ങളും പ്രതീക്ഷകളും ഷെയർ ചെയ്യാൻ ഒരാളെ കിട്ടിയകണക്ക് ഹരി പതിയെ ഇറക്കി വെക്കുകയായിരുന്നു കുറച്ചൊക്കെ…
“നീയതൊക്കെ വിട്ടേ….എന്നിട്ട് നമ്മടെ കാര്യത്തിലേക്ക് വാ….” ഹരി അവന്റെ നെഞ്ചിൽ കുത്തികൊള്ളുന്ന അവളുടെ ക്രാബ് ഊരി സൈഡിലേക്ക് വച്ചു…
അമ്മു ഇടംകൈ അവന്റെ നെഞ്ചിൽ കുത്തി ചെരിഞ്ഞു കിടന്നു മുഖത്തേക്ക് നോക്കി…
പട്ടുപോലുള്ള മുടി അഴിഞ്ഞു ചിതറി അവന്റെ നെഞ്ചിലേക്ക് വീണു…
“ഞാനേ….അങ്ങേയറ്റം സാധാരണക്കാരൻ ആടി….നിന്റെ നിലക്കോ വിലക്കോ ചേരുന്നവൻ അല്ലാ…നിന്റെ ആഗ്രഹങ്ങൾക്കോ സ്വപ്നങ്ങൾക്കോ ഒത്ത ജീവിതം ആയിരിക്കില്ല…കുറച്ചുനാൾ എന്റെ വീട്ടിൽ നിന്ന അനുഭവം നിനക്കുണ്ടല്ലോ…അതു വച്ചിട്ട് നീ തന്നെ ഒന്നോർത്തു നോക്ക്…“ അവളുടെ മൂക്കിൻതുമ്പിൽ പെരുവിരൽ ഉരസിക്കൊണ്ട് ഹരി തുടക്കമിട്ടു പറഞ്ഞു…
“എന്തോർത്തു നോക്കാൻ…..” ഡിഫെൻസ് മോഡിലായി അമ്മു..
“അമ്മു നീയിപ്പോ ഞാൻ ഒരു സ്റ്റെപ് പിന്നോട്ട് വെക്കുന്നെന്റെ വാശിക്ക് രണ്ട് സ്റ്റെപ് മുന്നോട്ട് വെക്കാനായി കാണിച്ചുകൂട്ടുമ്പോലെയാ…
അവസാനം തിരഞ്ഞെടുത്തത് അല്ലെങ്കിൽ വന്നുചേർന്നത് തെറ്റായിരുന്നു എന്ന് തോന്നരുത്…”
അവൻ തന്റെ ഭാഗം ക്ലിയർ ആയും പറഞ്ഞു..
“ നിനക്കിതെന്താ…..നല്ല രീതിക്ക് കോംപ്ലക്സ് ഉണ്ട് നിനക്ക്….ഞാൻ നിന്നെക്കാൾ വലിയ വീട്ടിലേ ആണെന്നുള്ളത്….പിന്നൊരു സൈഡിൽ കൂടി പഠിത്തതിന്റെയും….എടാ നീയൊന്ന് ഓർത്തുനോക്ക്…ഒന്നു സ്നേഹിക്കാൻ ഇത്രയൊക്കെ ചിന്തിച്ചു കൂട്ടണ്ടെ കാര്യമുണ്ടോ…
ഇനി ഉണ്ടെന്ന് തന്നെ വച്ചാലും ഇതൊക്കെ ഓർക്കേണ്ട ആൾ ഞാനല്ലേ…നിന്റെ ഉള്ളിലെ കുറ്റബോധം ആണ് നിന്നെക്കൊണ്ടിതൊക്കെ പറയിക്കണത്…അപ്പോ ഞാനോ….എന്തെങ്കിലും സെൽഫ് റെസ്പെക്ട് ഉണ്ടോടാ എനിക്ക്….”
അമ്മു എണീറ്റു മുടിയെടുത് അവന്റെ കയ്യിൽ നിന്നും ക്രാബ് വാങ്ങി വാരിക്കെട്ടി….
“എടീ നീയിപോ പറഞ്ഞില്ലേ ഒരു സെൽഫ് റെസ്പെക്ടും ഇല്ലാണ്ട് നിന്റെ ജീവിതം ഇങ്ങനൊക്കെ ആക്കിയത് ഞാൻ ആണെന്ന് പോലും ഓർക്കാതെയാണ് നീയെന്നോട് അടുക്കുന്നതെന്ന്….അത് കൊണ്ടുതന്നെ പിന്നീടൊരിക്കൽ പ്രായവും പക്വതയും ആകുമ്പോൾ ജീവിതസാഹചര്യം മാറുമ്പോൾ regret ചെയ്യാൻ ഇടയാക്കല്ല്…എനിക്കതാ പറയാനുള്ളു…”