“അമ്മാ….ഒരു കാര്യം ചോദിക്കട്ടെ….”
ഹരി അമ്മുവിനെ അമ്മ കാണാതെ മിക്സ്ചറിലെ കടല എടുത്തെറിഞ്ഞു ശ്രദ്ധ ക്ഷണിച്ചിട്ട് അമ്മയുടെ നേരെ തിരിഞ്ഞു…
മായ എന്തെന്ന ഭാവത്തിൽ അവനെ നോക്കി…
“നമുക്കാ സ്ഥലത്ത് ഒരു വീട് വച്ചാലോ….”
മായ കേൾക്കാൻ പാടില്ലാത്തതെന്തോ കേട്ട മട്ടിൽ കണ്ണ് രണ്ടും തുറിച്ചുവന്നു…
“വീട് വെക്കാനോ….”
“മ്മ്മ്…”
“അതിനൊക്കെ ഒരുപാട് കാശ് വേണ്ടെടാ….ഈ അവസ്ഥയിൽ ഇപ്പൊ എവിടുന്നാ നമുക്ക്….”
“കാശിന്റെ കാര്യം അവിടെ നിക്കട്ടെ…വീട് പണിയാൻ അമ്മയ്ക്ക് ഓക്കേ ആണോ…”
“അത് പിന്നാർക്കാ ഓക്കേ അല്ലാത്തത്…അല്ലെ മോളേ….” മായ ഒന്നു തിരിഞ്ഞ് അമ്മുവിനോടായി ചോദിച്ചു…
അമ്മു അതിന് ഒന്നു പുഞ്ചിരിച്ചു…
“ഞാനൊരു ചിട്ടി കൂടിയിട്ടുണ്ടായിരുന്നു ksfe ഇൽ…ഒരു പത്തിന്റെ…ഇനി 2 അടവും കൂടെ ബാക്കിയുണ്ട്…അതു കിട്ടിയാൽ തുടങ്ങി വെക്കാമ്മ…” അവൻ നിർത്തിയിട്ടു മായയെ നോക്കി…
“അതിലൊക്കെ നിക്കുവോ അതിന്….”
“ഇല്ല….ബാക്കിക്ക് നമുക്കിതിന്റെ പിറകിലുള്ള ഒരു 10 സെന്റ് വിറ്റാലോ അമ്മാ….അതും കൂടെ ആയാൽ തികയും…” അവൻ സമ്മതം പ്രതീക്ഷിച്ചു മായയുടെ മുഖത്ത് തന്നെ കണ്ണുനാട്ടിരിപ്പാണ്…
അമ്മുവും അതേ….
“അതിപ്പോ എടിപിടീന്നൊക്കെ എങ്ങനെയാ…ആള് വരണ്ടേ സമയം എടുക്കില്ലെടാ….”
“ആളൊക്കെ ഉണ്ട്….ടിജോയ്ക്ക് ഇത് വാങ്ങാൻ ഒരു താല്പര്യം ഉണ്ട്…അവർക്ക് അവിടെ അയല്പക്കം അത്ര രസമില്ല അവിടുന്ന് മാറണം എന്നാ…പിന്നെ പഴയവീടല്ലേ പുതിയത് പണിയാനും പ്ലാൻ ഉണ്ട്….
സെന്റിന് രണ്ട് വച്ചിട്ട് അവന് ഓകെയാണ്…അഡ്വാൻസ് ആയിട്ട് അഞ്ചും ബാക്കി ഒരു നാലു മാസത്തിൽ തരാമെന്നും ആണ് പറഞ്ഞത്…
അപ്പൊ മൊത്തം മുപ്പത് വരും അമ്മാ….
ഒരു 3bhk ഇന്റീരിയർ അടക്കം അത്യാവശ്യം നല്ല രീതിക്ക് തീർന്നുകിട്ടും…എക്സ്റ്റീരിയർ ഒക്കെ പയ്യെ നോക്കാം…“ ഹരി പ്രതീക്ഷയോടെ അവന്റെ പ്ലാൻ പറഞ്ഞുനിർത്തി…
മായ അന്തം വീട്ടിരിപ്പാണ്…
അവനെന്തൊക്കെയോ സ്വരുക്കൂട്ടുന്നുണ്ടെന്ന് അറിയാമെങ്കിലും ഇത്രയൊക്കെ അവർ പ്രതീക്ഷിച്ചിരുന്നില്ല…
അമ്മുവിന് പിന്നെ മുന്നേ അറിയാവുന്നതുകൊണ്ട് വലിയ ഞെട്ടൽ ഒന്നും ഇല്ല…
“നീയിത്രെ ഒക്കെ ആലോചിച്ചു കൂട്ടിയിരുന്നോടാ….”
മകൻ ഇടക്കാലം കൊണ്ട് അത്രയ്ക്കും പക്വതയിൽ ഒരു കാര്യം ചെയ്യുന്നത് ആദ്യമായി കാണുന്നതിന്റെ ഒരു അവിശ്വസനീയത ഉണ്ട് മുഖത്ത്….
“എനിക്കും ഉണ്ട് ഒരൊന്നിന്റെ…കിട്ടുമ്പോൾ ഈ വീടൊന്ന് തേക്കാൻ ഓർത്തിരുന്നതാ…ഇനിയിപ്പോ അതിലേക്ക് ഇട്ടോ….”
മായ അതിന് സമ്മതവും പറഞ്ഞു…
“നീയെന്താ അമ്മു ഒന്നും മിണ്ടാത്തെ….എന്താ മോൾടെ അഭിപ്രായം….”
“ഞാനെന്ത് പറയാനാമ്മ….നല്ല കാര്യല്ലേ….”
അതിനിടയിൽ ഹരി ഫോണെടുത്ത് ടിജോയ്ക്ക് കോൾ ചെയ്തിരുന്നു…അവൻ ഡ്യൂട്ടിയിൽ ആയതുകൊണ്ട് പെട്ടെന്ന് കാര്യം പറഞ്ഞ് അവസാനിപ്പിച്ചു തിരികെ വന്നു…
“നാളെ അവന്റെ പപ്പേം മമ്മിയും വരും സ്ഥലം കാണാൻ….അവന്റെ പപ്പ കണ്ടിട്ടുള്ളതാ എന്നാലും മമ്മി കൂടൊന്ന് കാണട്ടെ എന്നിട്ടാ കൂടെ അഡ്വാൻസും തന്ന് എഗ്രിമെന്റ് എഴുതീട്ട് പോകാമെന്ന്…..”
ചെറിയ വിഷമം ഉണ്ട് മായക്ക്….എന്നാലും ഒരു നല്ല കാര്യത്തിനല്ലേ നല്ലൊരു വീടിനല്ലേ എന്നോർക്കുമ്പോൾ അതങ്ങ് മറവിക്ക് വിട്ടു…
“ആ മൂവാണ്ടൻ പോകുവോ അമ്മേ…..”
അത്രേം നേരം വായടച്ചിരുന്നവൾ തുറന്ന് ചോദിച്ച ചോദ്യം കൊള്ളാം…
ഹരിയിതിനു പഠിക്കാൻ മാത്രേ ബുദ്ധിയുള്ളോ ദൈവമേ എന്നോർത്തുപോയി…
“ഇല്ലെന്റെ മോളേ…അതിപ്പുറത്തെ അതിരല്ലേ പോവില്ല….”
വിഭജന കരാറിൽ ഒപ്പുവച്ചപ്പോൾ ആവശ്യങ്ങൾ അംഗീകരിച്ചുകിട്ടിയ പ്രസിഡന്റിന്റെ ഭാവത്തിൽ അമ്മു മിക്സ്ചറെടുത്തു വായിലേക്കിട്ടു…
പിറ്റേന്ന് അഡ്വാൻസ് വാങ്ങി എഗ്രിമെന്റ് എഴുതി…
രണ്ടുമാസം കഴിഞ്ഞ് മഴ ഒന്നൊതുങ്ങീട്ട് വീടുപണി തുടങ്ങാമെന്ന് വച്ചു….