“വരില്ലേ നീയ്…..പ്ലീസ് ടാ….അമ്മയ്ക്ക് സന്തോഷാവും…”
“അമ്മയ്ക്ക് മാത്രോ….”
മറുപടിയൊന്നുല്ല..
“വരാടി…..ഞാനൊന്നവരോട് പറഞ്ഞിട്ട് വരട്ടേ….ആദ്യായിട്ടന്റെ അമ്മൂമ്മ ഒരു കാര്യം ചോദിച്ചിട്ട് അനുസരിച്ചില്ലെന്ന് വേണ്ട…..”
അതുകേട്ടതും അമ്മു പെരുവിരലിൽ ഉയർന്ന് അവന്റെ മുഖം ഇരുകവിളിലും പിടിച്ചു താഴ്ത്തി ചുണ്ടിൽ അമർത്തിയമർത്തി നാലഞ്ചുമ്മ വെച്ചു….
“എന്റെ പഞ്ചാരക്കട്ട….” ഒരുമ്മ കൂടി വെച്ചിട്ടവൾ അവനെ വിട്ട് മരച്ചില്ല വകഞ്ഞുമാറ്റി വെളിച്ചത്തിലേക്കിറങ്ങിയോടിക്കളഞ്ഞു….
അതും നോക്കിനിന്നവൻ ഒന്നു ചിരിച്ചു തല കുടഞ്ഞു കൂട്ടുകാർക്കരുകിലേക്ക് നടന്നു..
ഇറങ്ങാനായി എല്ലാവരോടും യാത്ര പറഞ്ഞു നിൽക്കുന്ന മായയോടൊപ്പം നിൽക്കുമ്പോളും അമ്മുവിന്റെ കണ്ണ് രണ്ടും വട്ടം കറങ്ങി ഹരിയേ തേടുന്നുണ്ടായിരുന്നു…
ഇനി വരാതിരിക്കുവോ പറ്റിക്കുവോ…
യാത്ര പറഞ്ഞ് ഓട്ടോയിൽ കയറാൻ തുടങ്ങുമ്പോളും അമ്മു പയ്യെ തട്ടി തട്ടി നിന്നു തിരിഞ്ഞു നോക്കി…
അവനാ ഏരിയയിൽ പോലും ഇല്ല….
പുറത്തെ ഇരുട്ടിനേക്കാൾ കറുത്തുകയറിയ മുഖവുമായി ഓട്ടോയിൽ ഇരുന്നു…
ഒരു വളവു തിരിഞ്ഞപ്പോൾ വണ്ടിയിൽ അടിച്ച ഹെഡ്ലൈറ്റിന്റെ വെളിച്ചം കാരണം ചിന്നു തിരിഞ്ഞുനോക്കി…
“അതേയ്….ആ കവിളത്തെ ബലൂൺ ഇനി കുത്തിപ്പൊട്ടിച്ചോ….കണവൻ പിറകെ വെച്ചനത്തുന്നുണ്ട്….” ചെവിയിൽ അടക്കം പറഞ്ഞു..
പിന്നോട്ട് തിരിഞ്ഞുനോക്കിയ അമ്മുവും കണ്ടു ചാറ്റൽ മഴയിൽ ബൈക്കുമായി ഓട്ടോക്ക് പിന്നിൽ വരുന്നവനെ….
ചുണ്ടിലൂറിയ പുഞ്ചിരി മുഖം തുടച്ചവൾ മറച്ചുവെച്ചു….
“നീയങ്ങേരെ സാരിത്തുമ്പേൽ…അല്ല അതിവിടെ ഇല്ലല്ലോ…പാവാടചരടിൽ ഇട്ട് കെട്ടിയോടി…എങ്ങനേ നടന്ന മൊതലാ…വന്ന വരവ് കണ്ടാ….ഇന്നിടിവെട്ടി മഴ പെയ്യും…..” ചെവിയിൽ കൊത്തിപെറുക്കുന്നുണ്ട്….
“ഇടീം മഴേം അല്ലേലും ഉണ്ട്….”
“എന്നാ പിന്നെ കാക്ക മലർന്നു പറക്കും….”
“എന്തോന്ന് പിള്ളേരെ കുറെ നേരായല്ലോ കുശു കുശു കുശുന്ന്….ഇത്രേം നേരോം രണ്ടും കൂടെ അങ്ങോടും ഇങ്ങോടും ചെവി തിന്നൽ അല്ലാരുന്നോ ഒന്ന് ചെവിതല കേൾപ്പിക്ക് ബാക്കിള്ളോർക്ക്….” ലളിതമ്മ ക്ഷീണവും ഉറക്കവും കാരണം രണ്ടിനും നേരെ ഒന്ന് ചാടി….
മായ പിന്നെ ക്ഷമ കണ്ടുപിടിച്ചത് ഞാനും എന്റെ കുടുംബക്കാരും എന്ന മട്ടാ….
തല്കാലത്തേക്ക് ചിന്നു ഒന്നോതുങ്ങി….
“കെട്ടിയിട്ട് ആട്ടിക്കോട്ടാ….എനിക്ക് നിന്നെ വച്ച് അങ്ങേർടടുത്തു കുറെ നേടാനുള്ളതാ….കണക്ക് കൊറേ ഇണ്ടേയ്….”
“ആട്ടും….ഞാനല്ല…നിന്റെ പൊന്നേട്ടൻ പോയിട്ട് വൈഷ്ണവിന്റെ നെഞ്ചത്ത് ഹരിതാണ്ഡവം ആട്ടക്കഥ….വേണോ….” കുശുകുശുപ്പ് അങ്ങ് നീണ്ടു..
“ഹേയ്….ഇതുങ്ങളോടല്ലേ പറഞ്ഞേ മിണ്ടാതിരിക്കാൻ..എടാ അജേഷേ വണ്ടിയാ സൈഡിലോട്ട് അങ്ങോതുക്കിക്കേ നടന്നു വന്നോളും രണ്ടും കൂടെയങ്ങ്…..” മൈഗ്രൈൻ കൊണ്ട് തലപ്രാന്ത് പിടിച്ചിരുന്ന ലളിതമ്മ രണ്ടിനും ഒപ്പത്തിനൊപ്പം തുള്ളി….
“ആ നല്ല കാര്യം…അല്ലേലും കുലുങ്ങി എന്റെ നടു വെള്ളം ആകാറായിട്ടുണ്ടാരുന്നു….”
അതും പറഞ്ഞു ഓട്ടോ നിർത്തുമ്മുന്നേ എണീക്കാൻ തുടങ്ങിയ ചിന്നുവിന്റെ കയ്യിൽ അമ്മു കയറിപിടിച്ചു സീറ്റിലേക്ക് തന്നെ ഇരുത്തി…
“നിനക്കെന്തേ വട്ടായോ…ഈ നട്ടപാതിരക്ക് നടക്കാനോ….” ഇനി വൈഷ്ണവ് എങ്ങാനും ആ വഴിക്ക് ഉണ്ടോ എന്നൊരു ഡൗട്ടും ഉണ്ട് അമ്മുവിന്…
“വേണേൽ മതി…ഈ മഴയത്ത് അങ്ങേര്ടെ കൂടെ നിനക്കൊരു റൊമാന്റിക് റൈഡ് ആയിക്കോട്ടെന്ന് ഓർത്തുന്നെ ഉള്ളൂ…ഈ മുട്ടിമുട്ടിയൊക്കെ…എങ്ങനെ….”
പറഞ്ഞുവായിൽ നാക്കിടും മുന്നേ അമ്മു അവളുടെ തുടയിലെ തോല് പൊളിച്ചെടുത്തിരുന്നു….
“പട്ടിച്ചീ….നിന്റെ ഒടുക്കത്തൊരു നുള്ള്…”
തീർന്നില്ല അമ്മയുടെ വക തലക്കിട്ടൊരു അടിം കിട്ടി മുന്നോട്ട്കയറിയിരുന്നു ചിന്നു…
അവളുടെ ആ ഇരിപ്പ് കാരണം കുറച്ചും കൂടെ സ്ഥലം കിട്ടിയ അമ്മു തലചെരിച്ചു ഓട്ടോയുടെ അകത്തെ ട്രാൻസ്പരന്റ് പ്ലാസ്റ്റിക് കൊണ്ടുള്ള ഭാഗത്തുകൂടെ പിന്നിൽ ഹരിയേ നോക്കിയെങ്കിലും മഴ പെയ്തിറങ്ങുന്ന വെള്ളത്തിന്റെ ഒഴുക്ക് മാത്രേ അതിലെ കാണാൻ ഒത്തുള്ളൂ…പിന്നാലെ തന്നെയുണ്ടെന്ന് ബൈക്കിന്റെ വെളിച്ചം കണ്ടാൽ അറിയാം…