ഇത് മിക്കവാറും ഒരു തീരുമാനം ആകുമെന്ന് ഹരിക്ക് ഉറപ്പും ആയി….
പങ്കുന്റെ സ്വഭാവം വച്ചിട്ട് അമ്മുവിനെ എന്തായാലും കയറി ചൊറിയും….
സർവ്വം സഹയായ അമ്മ പക്ഷേ അതൊരു കാരണവശാലും അനുവദിച്ചുകൊടുക്കാനും പോണില്ല…
എന്താകുവോ എന്തോ….
കൈവിട്ടുപോകുവാണേൽ ഇടപെടാം….
ഒന്നു നെടുവീർപ്പിട്ടവൻ അടുക്കളയിലേക്ക് നടന്നു…
.
ഊണ് കഴിഞ്ഞ് വൈകിട്ടത്തേക്ക് ചിക്കൻ വാങ്ങാനായി ഹരി കവലക്കിറങ്ങി…
ചിക്കനും കൂടെ അമ്മുവിന് പനീറും വാങ്ങി വീട്ടിൽ കൊടുത്തിട്ട് കുളിയും കഴിഞ്ഞ് കവലക്ക് തന്നെ പിന്നെയുമിറങ്ങി….
അമ്മുവും ചിന്നുവും കോളേജ് വിട്ടുവരുമ്പോൾ തിണ്ണയിൽ ഇരുന്നു മുറുക്കി മുറ്റത്തേക്ക് നീട്ടി തുപ്പുന്നുണ്ട് പങ്കു….
കണ്ടവഴിക്ക് ആ മൊതലിനെ നീയൊന്ന് സൂക്ഷിച്ചോ എന്നൊരു വാണിംഗും അമ്മുവിനെറിഞ്ഞു കൊടുത്ത് ആങ്ങളയെക്കാൾ സ്പീഡിൽ പെങ്ങൾ അവരുടെ പെരയ്ക്കാത്തു കയറി….
വേലി കടന്നു മുറ്റത്തേക്ക് കയറിയ അമ്മുവിനെ പങ്കു അടിമുടിയൊന്നു സൂക്ഷിച്ചുനോക്കി….
“നീയാണോടി എന്റെ ചെറുക്കൻ കൊണ്ടുവന്ന പെണ്ണ്….” പടിയിലേക്ക് അവൾ കാലെടുത്തുവച്ചില്ല അതിന് മുന്നേ മൂപ്പത്തി ഡ്യൂട്ടി തുടങ്ങി….
അമ്മു ഇതേത് അവതാരം എന്ന മട്ടിൽ ഒന്ന് നോക്കി…ചിരിക്കണോ വേണ്ടയോ…കൺഫ്യൂഷനാണ് അറിഞ്ഞൂടാ…
“അളവും തൂക്കോം ഒക്കെ കുറവാണേലും അടിച്ചോണ്ടു പോന്നപ്പോ ചന്തോം മോറും ഒക്കെ നോക്കിത്തന്നെയാ ചെക്കൻ കൊണ്ടന്നെക്കണേ….നല്ല ശ്രീത്തോമുണ്ട്…നിന്റെ പേരെന്താടി പെണ്ണേ….” വായിലെ മുറുക്കാൻ ചാണ്ടി കൂടെ മുറ്റത്തേക്ക് തുപ്പി അവർ അമ്മുവിനോട് ചോദിച്ചു….
“അമൃത…..” അമ്മു മറുപടി പറഞ്ഞുകൊണ്ട് ചെരിപ്പൂരി തിണ്ണയിലേക്ക് കയറി…
അപ്പോളേക്കും വിചാരണ കേട്ട് അടുക്കളപ്പുറത്തെങ്ങോ നിന്ന മായ ഓടിപിടിച്ചെത്തിയിരുന്നു….
“അമ്മുവേ….ചെന്നു കുളിച്ചിട്ട് വന്നേ…ചായ കുടിക്കാം..അമ്മേം വാ കഴിക്കാം…..”
പിടിച്ചപിടിയാലേ അവളുടെ കയ്യിൽ നിന്നു ബാഗും വാങ്ങി പിടിച്ച് വലിച്ചു മായ അകത്തേക്ക് കൊണ്ടുപോയി….
മുറിക്കകത്തു കയറ്റി…
“എന്റെ അമ്മായിയമ്മയാ…എന്തേലും കുത്തും കോളും ഒക്കെ വച്ച് പറയും…കിള്ളി കിള്ളി ചോദിക്കും…അടക്കമില്ലാത്ത നാക്കാ എന്തുണ്ടെലും അമ്മയോട് പറയണം…പിന്നൊത്തിരി പുറത്തിറങ്ങേണ്ട പഠിക്കാനുണ്ടെന്നും പറഞ്ഞു മുറിക്കകത്തു ഇരുന്നോ….അവരെന്തേലും പറഞ്ഞാൽ വിഷമിക്കല്ല് അമ്മയോട് പറയണം കേട്ടോ….” ഒറ്റ ശ്വാസത്തിൽ അടക്കിപിടിച്ചു പറഞ്ഞിട്ട് മായ പുറത്തേക്കിറങ്ങി…
അമ്മുവിന് വന്ന ആൾ കുറച്ച് danger ആണെന്ന് മാത്രം മനസിലായി….
മണിയാറു കഴിഞ്ഞതേ ടിവി ഓണാക്കി സീരിയലിന്റെ മുന്നിൽ കയറി പങ്കു….ഇനിയത് ഓഫാക്കണേൽ പതിനൊന്നുമണിയെങ്കിലും ആകും…
അമ്മു വിളക്ക് വച്ചു നാമം ജപിക്കുമ്പോളും ഉച്ചത്തിൽ സീരിയൽ ഡയലോഗ് കേൾക്കാം ബാക്ഗ്രൗണ്ടിൽ….
അവൾ വിളക്കുമായി തിരിച്ച് അകത്തുകയറുമ്പോളും അതു തന്നെ സീൻ….
ടിവിയിൽ നിന്ന് കണ്ണുപോലും പറിക്കുന്നില്ല…
ഡയലോഗ് അവിടെ ആണേലും ഭാവാഭിനയം മൊത്തം പങ്കുന്റെ മുഖത്താ…
അമ്മു ചിരി കടിച്ചുപിടിച്ചു വിളക്കണച്ചു അടുക്കളയിലേക്ക് ചെന്നു…
മായയെ സഹായിക്കാൻ….
ഇടയ്ക്ക് പിന്നാമ്പുറം വഴി ചിന്നുവും എത്തി ചിക്കൻഫ്രയുടെ പങ്കുപറ്റാൻ…
അവിടുന്നും കിട്ടി അമ്മുവിന് സ്റ്റഡിക്ലാസ്…
സിലബസ് പങ്കജാക്ഷിയമ്മ തന്നെ….
ഒൻപതു കഴിഞ്ഞപ്പോളേക്ക് ഹരി കയറിവന്നു….പങ്കു ഉള്ളതുകൊണ്ട് കുറച്ചു നേരത്തെ ആക്കിയതാണ്…
ഇല്ലേൽ കുടിച്ചില്ലേലും കുടിച്ചുന്ന് പറഞ്ഞാകും മൂപ്പത്തിടെ വക അടുത്ത അടി….
അടുക്കളയൊതുക്കി എല്ലാമെടുത്തു ഡൈനിങ് ടേബിളിൽ വച്ചു അമ്മുവും മായയും കൂടി…
നേരത്തെ കഴിക്കണം പങ്കുവിന്…
ഷുഗറും കൊളെസ്ട്രോളും ഒക്കെയുണ്ട് അതാ…
“മരുമോളിരിക്കുമ്പോ നീയാണോ മായേ വിളമ്പുന്നെ….നീയങ്ങു വിളമ്പിക്കെടി പെണ്ണേ….”
നായ്ക്കുരണ സമാസമം മിക്സ് തുടങ്ങിയിട്ടുണ്ട്…