വീട്ടിൽ വന്നു കയറിയതും മഴ നനഞ്ഞു കുളിച്ചു ബൈക്ക് നിർത്തിയവനെ കണ്ടു മായ അത്ഭുതപ്പെട്ടു…
ചിന്നു ഓടി അവരുടെ മുറ്റത്ത് കയറിയിരുന്നു..ലളിതമ്മ സാരിയുടെ മുന്താണി തലയ്ക്കു മുകളിൽ വിടർത്തിപിടിച്ച് അവൾക്കു പുറകെ അങ്ങു പോണുണ്ട്…
“ നീയെന്താടാ ഇത്ര നേരത്തെയൊക്കെ…പതിവില്ലാത്തെ ആണല്ലോ….”
“നാളെ കുറച്ച് നേരത്തെ പോണമ്മാ…ഒന്നു കിടന്നുറങ്ങട്ടെ ഇല്ലേൽ പിന്നെ തല പൊങ്ങില്ല രാവിലെ…”
പറഞ്ഞുകൊണ്ട് ബൈക്ക് നീക്കി മുയൽക്കൂട്ടിനരുകിലെ ചായ്പ്പിനുള്ളിലേക്ക് കയറ്റിവെച്ചു ഹരി…
“നിക്ക് തോർത്തെടുത്തു തരാം…ഇല്ലേൽ അകം മുഴുവൻ വെള്ളം ആകും….”
മായ ഫ്ലാഷിന്റെ വെളിച്ചത്തിൽ താക്കോലിട്ട് ഡോർ തുറന്ന് അകത്തേക്ക് കയറി തോർത്തെടുക്കാനായി അടുക്കള ഭാഗത്തേക്ക് നടന്നു…
അമ്മു തട്ടിത്തടഞ്ഞു സിറ്റൗട്ടിൽ തന്നെ നിൽക്കുന്നുണ്ട്…താൻ പറഞ്ഞിട്ടാണോ നേരത്തെ വന്നെന്ന് ചോദിക്കണം…ഉള്ളൂ തുള്ളിതുളുമ്പിയാണ് വന്നതെങ്കിലും അവൻ നേരത്തെ പോണം അതുകൊണ്ടാ വന്നെന്ന് പറയണ കേട്ടപ്പോൾ ഒന്നു ഡിമ്മായപോലെ…സത്യാണോന്ന് ചോദിക്കണം അത്രേള്ളൂ…
അവൻ ഓടിന്റെ വെള്ള ചാലിൽ തട്ടാതെ അരികും വഴി നടന്ന് പടിയിലേക്ക് കയറിയതും മായ തോർത്തുമായി വന്നു…
അമ്മു സ്കെർട്ട് ന്റെ അറ്റത്തെ നനവ് കുടയുന്നെന്ന മട്ടിൽ നിൽപ്പുണ്ട്…
“നീയെന്തിനാ മോളേ ചാറൽ അടിച്ചു നിക്കണേ…അകത്തുകയറിക്കോ ഇന്നാ ഈ ഫ്ലാഷും കൊണ്ട് പൊയ്ക്കോ ഞാൻ എമർജൻസി തെളിച്ചോളാം..” തോർത്ത് ഹരിയുടെ കയ്യിൽകൊടുത്തിട്ട് ഫോൺ അമ്മുവിന് നേരെ നീട്ടി മായ….
“അമ്മേ മാറ്റാൻ ഒരു മുണ്ടെടുത്തു തന്നെ…തണുത്തിട്ട് മേലാ…..” പടിയിൽ നിന്നു കൊണ്ട് ഷർട്ട് അഴിച്ചു അരപ്രൈസിലേക്ക് വച്ചു ഹരി….
അവനെ പാളി നോക്കി അമ്മയോടൊപ്പം അകത്തേക്ക് കയറാൻ ഒരുങ്ങിയവളുടെ മുടിത്തുമ്പിൽ എത്തിപിടിച്ചവിടെ നിർത്തി…
അമ്മ കാണുമോയെന്ന് നോക്കി ഒന്നാഞ്ഞവളുടെ കയ്യിലെ ഫോൺ വാങ്ങി ഫ്ലാഷ് ഓഫ് ചെയ്തിട്ട് തോർത്ത് തോളിലേക്ക് വച്ചുകൊടുത്തു…
” എനിക്ക്…. അമ്മുചേച്ചിടെ തോർത്ത് വേണം.…ചെല്ല് ചെന്നെടുത്തിട്ട് വായോ….“ അടുത്തേക്ക് നീങ്ങി പറഞ്ഞിട്ട് അവളുടെ പുറത്ത് ചെറുതായൊന്നു തള്ളി ഉള്ളിലേക്ക് വിട്ടു….
അപ്പോളേക്കും മുണ്ടുമായി വന്ന മായയുടെ കയ്യിലെ വെളിച്ചത്തിൽ തോർത്ത് കാണാതെ അമ്മു പാവാടക്ക് സൈഡിലേക്ക് മാറ്റിപ്പിടിച്ചു ചെരിഞ്ഞു നടന്നു മുറിക്കകത്തേക്ക് കയറി…
”അമ്മയെ സ്റ്റോവിൽ ഒരു കലം വെള്ളം വച്ചിട്ടുണ്ട് ഒന്നു മേല് കഴുകിയിട്ടു കിടന്നോ…മഴയാന്ന് നോക്കണ്ട മേലൊക്കെ ഒട്ടും ഇല്ലേൽ….“ മായ അമ്മുവിനോടായി പറഞ്ഞു മുറിക്കുള്ളിലേക്ക് സാരി മാറ്റാനായി കയറിപ്പോയി…
അമ്മു തിണ്ണയിലെ ഇരുട്ടിൽ നനഞ്ഞ ജീൻസ് അഴിച്ചുമാറ്റി മുണ്ടുടുക്കുന്നവന്റെ തോളിലേക്ക് അവളുടെ ഫ്ലമിങ്ങോ പിങ്ക് നിറത്തിലുള്ള flannel ഒരൂഹം വച്ചിട്ടുകൊടുത്തിട്ട് പെട്ടെന്ന് തന്നെ അകത്തുകയറി….
അല്ലെങ്കിലേ ഇരുട്ടും അമ്മയിറങ്ങാൻ എടുക്കുന്ന താമസവും നല്ലതുപോലെ അവൻ മുതലാക്കുമെന്ന് അറിയാം…
“എടാ…ആ ചൂടുവെള്ളമൊന്ന് കുളിമുറിലേക്ക് വെച്ചുതന്നേ നീ….ഈ ഇരുട്ടത്ത് അതും കൊണ്ട് എങ്ങനെ പോകാനാ….എനിക്കൊന്ന് കുളിക്കണം…..”
ആ ഊന്നിയുള്ള എനിക്കൊന്ന് കേട്ടപ്പോളെ ഹരിക്ക് മനസിലായി ഇതമ്മയ്ക്കല്ല അവൾക്കാണെന്ന്…
സില്ലി അമ്മച്ചി…അവൾക്കു കുളിക്കാൻ വെള്ളമല്ല വേണേൽ അവളെ ഞാനിപ്പോ കുളിപ്പിച്ചുകൊടുക്കും ആ അവസ്ഥയാണെന്ന് തനിക്കല്ലേ അറിയൂ…
ദേഹം തുവർത്തി അകത്തേക്ക് കയറി എമർജൻസി ലൈറ്റ് ഒന്ന് ബ്രൈറ്റ് ആക്കി അടുക്കള വാതിലിനു നേർക്ക് തിരിച്ചു വച്ച് ഹരി അവിടേക്കു നടന്നു…
“അമ്മേ…ഒരു തുണിയിങ്ങെടുത്തെ ഇത് തിളച്ചിട്ടുണ്ട്….”
“അമ്മുവേ…ആ കരിക്കലതുണി അവിടെ കാണും ഒന്നെടുത്തുകൊടുത്തേ…..” സാരിയുടെ പിൻ വായിൽ കടിച്ചുപിടിച്ചു അഴിച്ചെടുത്ത പ്ലീറ്റു കയ്യിൽ പിടിച്ചു മായ അമ്മുവിനെ വിളിച്ച് പറഞ്ഞു…