“ആന്റിക്ക് ഇഷ്ട്ടപ്പെട്ട ആകാശത്ത് വച്ചു തന്നെ ആന്റിയെ തട്ടിയെടുക്കാൻ അങ്കിള് ഒളിച്ചിരിപ്പുണ്ടാകും…!” ഒന്നും ചിന്തിക്കാതെ ഞാൻ പറഞ്ഞു.
ഞാൻ അങ്ങനെ പറഞ്ഞപ്പോ ആന്റി സ്തംഭിച്ചു പോയി. അപ്പോഴാണ് അങ്ങനത്തെ മണ്ടത്തരം പറയേണ്ടായിരുന്നു എന്നതിനെ ഞാൻ ചിന്തിച്ചത്.
പക്ഷേ പെട്ടന്നു തന്നെ അവർ സ്വയം മറന്ന് പൊട്ടിച്ചിരിച്ചു. കുറെ നേരം ആന്റി നിര്ത്താതെ ഉറക്കെ ചിരിച്ചു.
ആന്റിയുടെ ചിരി കേട്ട് റൂമിൽ നിന്നും ദേവി ഓടി നടയില് വന്ന് നിന്നിട്ട് നോക്കുന്നത് കണ്ടു.
അവൾ അന്തം വിട്ടാണ് ആന്റിയെ നോക്കി നിന്നത്. വിശ്വസിക്കാൻ കഴിയാത്ത പോലെ അവള് എന്നെയും ആന്റിയെയും മാറിമാറി നോക്കുന്നുണ്ടായിരുന്നു. ദേവിയുടെ തൊട്ടു പിറകെ വിനിലയും ഓടി വന്ന് ആശ്ചര്യത്തോടെ ആന്റിയെ നോക്കി. എന്നിട്ട് വിടര്ന്ന കണ്ണുകളോടെ വിനില എന്നെയും നോക്കി.
അവസാനം ആന്റി ചിരി നിർത്തി കണ്ണില് നിന്നും വന്ന വെള്ളമെല്ലാം തുടച്ചു കൊണ്ട് എന്നെ നോക്കി പുഞ്ചിരിച്ചു.
അപ്പോഴാണ് പരിസരബോധം വന്നത് പോലെ ആന്റി ചുറ്റിലും നോക്കിയത്.
ദേവിയും വിനിലയും ആന്റിയെ അദ്ഭുതത്തോടെ നോക്കി നില്ക്കുന്നത് കണ്ടിട്ട് ആന്റി പുഞ്ചിരിച്ചു. അതോടെ അവർ രണ്ടുപേരും തിരികെ റൂമിലേക്ക് പോയി.
ശേഷം ആന്റി എന്റെ മുഖത്ത് നോക്കിയതും ഞാൻ ചോദിച്ചു, “ആന്റി വീട്ടില് ഭയങ്കര സ്ട്രിക്റ്റ് ആണോ..?”
ഉടനെ ആന്റിയുടെ മുഖം മാറി.
“ആന്റിയുടെ ചിരി കണ്ടപ്പോ ദേവി ടീച്ചർ ശെരിക്കും അന്തിച്ചു പോയി… ആന്റി ചിരിച്ചപ്പോ അവിടെ കളിച്ചു കൊണ്ടിരുന്ന കിങ്ങിണി മോളും ഒപ്പത്തിനൊപ്പം ചിരിക്കുന്നത് ഞാൻ കണ്ടു. ഒരു നിമിഷം ഈ വീട് തന്നെ സ്വര്ഗം പോലെ തോന്നിച്ചു. അപ്പോ പിന്നെ നിങ്ങള്ക്ക് ഈ ഗൗരവം കളഞ്ഞൂടേ..?”
എന്റെ പറച്ചില് കേട്ട് ആന്റി ആലോചനയോടെ കുറെ നേരം എന്നെ നോക്കിയിരുന്ന ശേഷം പറഞ്ഞു, “പണ്ട് മുതലേ എന്റെ വീടിന്റെ സാഹചര്യവും, എന്നെ വളര്ത്തിയ രീതിയും, ഞാൻ വളര്ന്ന രീതിയും, പിന്നെയും നിന്നോട് പറയാൻ കഴിയാത്ത വേറെയും കാരണങ്ങള് കൊണ്ടാണ്… അധികം സന്തോഷവും ചിരിയും എന്റെ ജീവിതത്തിൽ ഇല്ലാതെ പോയത്. അതുകൊണ്ടാണ് ഇങ്ങനെ ഞാൻ ആയിപ്പോയത്..” ആന്റി പറഞ്ഞിട്ട് വലുതായി പുഞ്ചിരിച്ചു.
ഞാനും കൗതുകത്തോടെ അവരെ തന്നെ നോക്കി കൊണ്ടിരുന്നു.
“പലരും എന്നോട് പല രീതിക്കുള്ള ഉപദേശങ്ങള് തന്നിട്ടുണ്ട്. എന്നാൽ അതൊന്നും മുഖവിലയ്ക്ക് ഞാൻ എടുത്തില്ല. പക്ഷേ എന്നെക്കാളും എത്രയോ പ്രായത്തില് ചെറിയവനായ നി എനിക്ക് എന്തൊക്കെയോ പറഞ്ഞും മനസ്സിലാക്കിയും തന്നിരിക്കുന്നു… ചിന്തകളിലൂടേയും മനസ്സിലൂടേയും നി ഒരുപാട് കാര്യങ്ങളെ എനിക്ക് കാണിച്ച് തന്നിരിക്കുന്നു. നീ കാരണം എന്റെ മുഖത്തിലേ പേശികള്ക്കും നല്ല ഉണര്വ്വും ജീവനും വച്ചിരിക്കുന്നു. ഇപ്പോൾ ഞാൻ പോലും എന്നിലെ മാറ്റങ്ങളെ സ്നേഹിക്കാന് തുടങ്ങി കഴിഞ്ഞു, സാം. ഇനിയും മാറ്റങ്ങൾ സംഭവിക്കും, നോക്കിക്കോ.” ആന്റി പുഞ്ചിരിയോടെ പറഞ്ഞു.
“ആന്റി ചിരിക്കുമ്പോ ഭയങ്കര ഐശ്വര്യമാണ്… ചിരിക്കുമ്പോ ആന്റിയുടെ പേരിന് പറ്റിയ പോലെ ദൈവ സ്ത്രീയായി തന്നെ തോന്നിപ്പോകുന്നു.” ഞാൻ പറഞ്ഞതും ആന്റി വലിയ മണി കിലുങ്ങിയത് പോലെ ഉറക്കെ ചിരിച്ചു.
പിന്നെയും ദേവിയും വിനിലയും എത്തി നോക്കിയ ശേഷം ഉള് വലിഞ്ഞു. അവരുടെ മുഖത്ത് ആശ്ചര്യവും പുഞ്ചിരിയും എല്ലാം ഉണ്ടായിരുന്നു.
ആന്റി അവരെ കാണുകയും ചെയ്തു. എന്നിട്ട് മുഖവും ചുളിച്ചു കൊണ്ട് എന്നെ നോക്കി ചോദിച്ചു, “എടാ സാം, ദേവിയെ നി ടീച്ചർ എന്നാണോ വിളിക്കാറുള്ളത്…?”
“എനിക്ക് ദേവി ടീച്ചറെ അത്ര പരിചയമൊന്നുമില്ല, ആന്റി. ഒരിക്കല് വിനിലയുടെ കൂടെ സ്കൂളിൽ പോയപ്പോ വിനില ദേവി ടീച്ചറെ പരിചയപ്പെടുത്തി തന്നു. പിന്നെ ഇപ്പൊഴാണ് ടീച്ചറെ ഞാൻ രണ്ടാമതായി കാണുന്നത്.”
ഉടനെ ആന്റിയുടെ മുഖത്ത് ചെറിയ കുറ്റബോധം ഉണ്ടായി. എന്നിട്ട് കുറ്റം ഏറ്റു പറയുന്നത് പോലെ അവർ പറഞ്ഞു, “നി എത്ര നല്ല ചെക്കനാണ്, സാം… വെറുതെ ഞാൻ നിന്നെ സംശയിച്ചു പോയി.”
“ങേ…, ആന്റി എന്നെ എങ്ങനെ സംശയിച്ചു എന്ന പറയുന്നത്..?” ഞാൻ ശെരിക്കും അന്ധാളിച്ചു പോയി.
ഉടനെ ആന്റിയുടെ മുഖത്ത് ജാള്യത നിറഞ്ഞു.
“ഇത് ആണുങ്ങള് ഇല്ലാത്ത വീടാണ്, സാം. അതുകൊണ്ട് വളരെ സൂക്ഷിച്ചില്ലെങ്കില് ഞങ്ങൾക്ക് തന്നെയാണ് പേര് ദോഷം.” ആന്റി ഗൗരവത്തിൽ പറഞ്ഞു.
“അങ്ങനെ കാരണം ഇല്ലാതെ ആര്ക്കും പേര് ദോഷം ഉണ്ടാവില്ല, ആന്റി. പക്ഷേ അത് പോട്ടെ, ഇപ്പൊ ആന്റി പറഞ്ഞു വരുന്നത് എന്താണെന്ന് എനിക്ക് മനസ്സിലായില്ല…!!” തല ചൊറിഞ്ഞു കൊണ്ട് ഞാൻ പറഞ്ഞു.
“ഈ വീട്ടില് ഞാനും ദേവിയും കിങ്ങിണിയും മാത്രമാണ് സ്ഥിരമായി താമസിക്കുന്നത്. മാസത്തിന് അല്ലെങ്കിൽ രണ്ടു മാസത്തിന് ഒരിക്കല് മാത്രമേ എന്റെ മോന്, അതുതന്നെ ദേവിയുടെ ഭർത്താവ്, മുംബൈയില് നിന്നും ഇവിടേക്ക് വരത്തുള്ളു – ഒരാഴ്ച കഴിഞ്ഞ് തിരികെ പോകുകയും ചെയ്യും.”
അവിടം കൊണ്ട് ആന്റി നിര്ത്തിയതും ഞാൻ തല ചൊറിഞ്ഞു.
ഒരു പുഞ്ചിരിയോടെ ആന്റി തുടർന്നു, “സ്ഥിരമായി ആണുങ്ങള് ഇല്ലാത്ത വീട്ടിലെ പെണ്ണുങ്ങളെ ദ്രോഹിക്കാൻ ഒരുപാട് പേർ ഉണ്ടാവും, സാം. ഒരു ചെറിയ സാഹചര്യം ലഭിച്ചാലും അതിനെ മുതലെടുക്കാന് ആളുകൾ ഒത്തിരി ഉണ്ടാവും. അപ്പോ ആര്ക്കും ആ സാഹചര്യം കൊടുക്കാതെ ജീവിക്കേണ്ട കടമ ഞങ്ങൾക്കാണുള്ളത്. ഇക്കാലത്ത് ചീത്ത പേരിനെ സമ്പാദിക്കാൻ വെറും നിസാരമായ കാര്യങ്ങൾ തന്നെ ധാരാളം…! അതുകൊണ്ട് കഴിഞ്ഞ ഒന്നര വര്ഷമായി പുറത്തുള്ള ഏറെകുറെ എല്ലാ ആണുങ്ങളെയും അധികമായി ഈ വീട്ടില് ഞാൻ കേറ്റാറില്ല.”
അത്രയും പറഞ്ഞിട്ട് ആന്റി എന്നെയും നോക്കി മിണ്ടാതിരുന്നു.
“സോറി ആന്റി. ആന്റിയുടെ സംശയവും പേടി തോന്നാനുള്ള കാരണങ്ങളും ഒക്കെ ഇപ്പോൾ എനിക്ക് മനസ്സിലായി. ഞാൻ ഇവിടെ വരാൻ പാടില്ലായിരുന്നു… സോറി ആന്റി, ഇപ്പൊ തന്നെ ഞാൻ പോയേക്കാം.” അതും പറഞ്ഞ് ഞാൻ വേഗം എഴുന്നേറ്റു.
“അയ്യേ… എന്താ ഇത് സാം. നി എങ്ങും പോകേണ്ട, മര്യാദയ്ക്ക് അവിടെ തന്നെ ഇരുന്നു. ഞാൻ കാര്യം പറയട്ടെ.” പെട്ടന്ന് ആന്റി എഴുനേറ്റ് എന്റെ കൈയിൽ പിടിച്ച് എന്നെ അതേ കസേരയില് ഇരുത്തി.
ഞാനും അല്പ്പം അസ്വസ്ഥതയോടെ അവരെ നോക്കി ചോദിച്ചു, “ഒന്നര വര്ഷത്തിനു മുമ്പ് ഇവിടെ എന്തെങ്കിലും സംഭവിച്ചോ..?”
“ആദ്യമൊക്കെ എന്റെ മോന് ഇവിടെ ഇല്ലാത്ത സമയത്ത് പോലും അവന്റെ കൂട്ടുകാരൊക്കെ ശനിയാഴ്ചയും ഞായറാഴ്ചയും ഒക്കെ ഇവിടെ വരുമായിരുന്നു. ഞങ്ങൾക്ക് ഒരു കൂട്ടും ആകും, പിന്നെ എന്തെങ്കിലും ആവശ്യവും കാര്യങ്ങളും ഉണ്ടെങ്കില് സഹായിക്കാൻ ആരെങ്കിലും ഉണ്ടല്ലോ എന്ന് കരുതി അന്നൊക്കെ ഞങ്ങൾക്കും സന്തോഷം ആയിരുന്നു. പക്ഷെ അതിൽ ഒരുത്തൻ സ്ഥിരമായി ദേവി മോളെ വെറുതെ തൊടുകയും തോണ്ടുകയും ചെയ്യുമായിരുന്നു. അനാവശ്യമായി അരുതാത്ത ഭാഗത്തും അവന് തട്ടുകയും നുള്ളകയും ചെയ്തതോടെ ദേവി അവനോട് ദേഷ്യപ്പെട്ടു. ദേഹത്ത് തൊട്ട് സംസാരിക്കരുത് എന്നും മാന്യമായി വിലക്കി. പക്ഷേ അവന് അതൊന്നും കാര്യമാക്കിയില്ല. അവസാനം മോള് എന്നോടും പറഞ്ഞു. ഞാനും അവന്റെ പ്രവര്ത്തിയെ ശ്രദ്ധിക്കാന് തുടങ്ങി. അവസാനം എന്റെ മുന്നില് വച്ചു പോലും അവന് അവളുടെ പിന് ഭാഗത്ത് നുള്ളകയും ചെയ്തു. പോരാത്തതിന് കൂടെ ഉള്ളവമ്മാർ അവനെ തിരുത്താൻ നോക്കാതെ തമാശ കണ്ടത് പോലെ ചിരിക്കുകയും ചെയ്തതോടെ അവനെയും അവന്റെ കൂടെ ഉള്ളവരേയും ഞാൻ ചെവി നിറയെ കേൾപ്പിച്ച ശേഷം പുറത്താക്കുകയും ചെയ്തു.”