അത്രയും പറഞ്ഞിട്ട് ഒരു ദീര്‍ഘനിശ്വാസത്തോടെ ആന്റി തലയാട്ടി.
അന്നേരം സുമിയും, പിന്നേ രണ്ടര വയസ്സുകാരിയുടെ കുസൃതി ചാഞ്ചാട്ടത്തോടെ കിങ്ങിണിയും ഞങ്ങൾ ഇരിക്കുന്ന ഭാഗത്തേക്ക് ചിരിച്ചു കളിച്ചു കൊണ്ട് വന്നു.
കിങ്ങിണിയെ ഞാൻ പെട്ടന്ന് തൂക്കിയെടുത്തപ്പൊ അവള്‍ കരയാന്‍ തുടങ്ങി. ഉടനെ ഞാൻ ഇറക്കി വിട്ടതും അവള്‍ ചിരിച്ചു കൊണ്ട് ഓടി. സുമിയും അവളുടെ പുറകെ ഓടി പോയി.
അപ്പോൾ ആന്റി തുടർന്നു, “പിന്നേ സാധാരണയായി ദേവിയുടെ കൂടെ പഠിച്ചിട്ടുള്ള ആണും പെണ്ണും ഒക്കെ ഇവിടെ വരാറുണ്ട്. പക്ഷേ പണ്ട്‌ അവളുടെ കൂടെ സ്കൂളിൽ പഠിച്ചിരുന്ന മൂന്ന്‌ പയ്യന്മാർ എല്ലാ ശനിയാഴ്ചയും വരുമായിരുന്നു. ആദ്യമൊക്കെ വളരെ മാന്യമായി അവർ പെരുമാറി. പക്ഷേ പോകെപ്പോകെ ചില അര്‍ത്ഥം വച്ചുള്ള സംസാരവും, നോട്ടവും, അതിര് കടന്നുള്ള തമാശയും, ഇടക്ക് തമാശ പോലെ കൈ പിടിച്ചു വലിയും എല്ലാം ആയതോടെ ദേവി തന്നെ അവന്മാരെ ഇവിടെ വരുന്നതില്‍ നിന്നും വിലക്കി. എന്നാല്‍ അവന്മാര് പിന്നെയും വന്നു, മാന്യമായി പെരുമാറി. അതുകൊണ്ട്‌ ഞങ്ങളും അവർ വന്നോട്ടെ എന്ന് കരുതി. പക്ഷേ ഒരിക്കല്‍ അവന്മാര് ദേവിയുടെ എതിർപ്പിനെ വകവെക്കാതെ അവളെ പിടിച്ചു നിർത്തി കൊണ്ട് സെൽഫി എടുക്കാൻ ശ്രമിച്ചു. അവന്മാരുടെ ഉദ്ദേശം അത്ര നല്ലതാണെന്ന് എനിക്ക് തോന്നിയുമില്ല, അപ്പോഴാണ് ഞാൻ ഇടപെട്ടത്. അവന്മാരെ ഞാൻ വിരട്ടി ഓടിക്കുകയും ചെയ്തു.”
“ആന്റി ചെയ്തത് ശെരിയാണ്..!” ഉടനെ മാന്യനേ പോലെ ഞാൻ പറഞ്ഞു.
അന്നേരം രണ്ട് കുഞ്ഞുങ്ങളും പിന്നെയും ഞങ്ങളുടെ അടുത്തേക്ക് വന്നപ്പോ ഞാൻ പിന്നെയും കിങ്ങിണിയെ തൂക്കിയെടുത്തു. ഇത്തവണ അവള്‍ കുറെ നേരം എന്റെ മുഖത്ത് നോക്കിയ ശേഷം ചെറുതായി ചിണുങ്ങി കൊണ്ട് എന്റെ കൈയിൽ പുളഞ്ഞപ്പോ ഒരു ഉമ്മ കൊടുത്തിട്ട് അവളെ ഞാൻ ഇറക്കി വിട്ടു.
പക്ഷേ അവള്‍ എന്ന് തന്നെ കുറെ നേരം നോക്കി നിന്നു. എന്നിട്ട് ഓടിപ്പോയി.
ആന്റി ഒരു പുഞ്ചിരിയോടെ എന്റെ പ്രവൃത്തികളെ തന്നെ നോക്കിയിരുന്നു.
ഒടുവില്‍ ഞാൻ ആന്റിയുടെ മുഖത്ത് നോക്കിയപ്പോ ആന്റി തുടർന്നു,
“ആ ദിവസത്തിന് ശേഷം എന്റെ മോന്റെ ഫ്രണ്ട്സ് ആണെങ്കിലും ദേവി മോളുടെ ഫ്രണ്ട്സ് ആണെങ്കിലും, ചിലരൊക്കെ ഇവിടെ വരുന്നത് കണ്ടാലെ എനിക്ക് സംശയവും പേടിയുമാണ്. പിന്നെ നി ഇവിടെ വന്ന സമയത്ത്‌ ദേവിയെ നി സ്വാഭാവികമായി മാത്രം നോക്കിയെങ്കിലും, എനിക്കെന്തോ നി അവളെ തെറ്റായി നോക്കുന്നത് പോലെയാണ് തോന്നിയത്‌. അതുകൊണ്ട്‌ നീയും ആ ടൈപിൽ പെട്ടവൻ എന്നാണ് ആദ്യം കരുതി ഞാൻ ഭയന്നത്. പക്ഷേ നിന്റെ ശരിക്കുള്ള മുഖവും മനസ്സും ഞാൻ കുറച്ച് മുന്‍പ് കണ്ടു കഴിഞ്ഞു. നിന്നെ ഇപ്പോൾ എനിക്ക് പേടിയില്ല. നി വളരെ നല്ല കുട്ടിയാണ്.” ആന്റി പറഞ്ഞിട്ട് പുഞ്ചിരിച്ചു.
പക്ഷേ ആന്റിയുടെ ആ വാക്കുകൾ എന്നെ ശെരിക്കും അസ്വസ്ഥനാക്കി. കാരണം എന്റെ മനസ്സിൽ ദേവിയെ കുറിച്ച് എന്തൊക്കെ ചിന്തിക്കുന്നു എന്ന് എനിക്ക് മാത്രമേ അറിയൂ.
“നിന്നെ വിശ്വസിച്ച് വീട്ടില്‍ കേറ്റാൻ കഴിയും എന്നും എനിക്ക് മനസ്സിലായി.” ആന്റി പറഞ്ഞിട്ട് ചിരിച്ചു.
ഈശ്വരാ…!! ശെരിക്കും എന്നെ കുറിച്ചുള്ള സത്യങ്ങളെ അറിഞ്ഞാല്‍ അവരെന്നെ ഏഴയലത്ത് പോലും അടുപ്പിക്കില്ല.
അന്നേരം സുമി ചിരിച്ചു കൊണ്ട് ഓടി വന്ന് എന്റെ മടയില്‍ വലിഞ്ഞു കേറി ഇരുന്നു. ഞാനും ചിരിച്ചു കൊണ്ട് അവള്‍ക്ക് ഉമ്മ കൊടുത്തു. അപ്പോൾ അവളുടെ പുറകെ ഓടി വന്ന കിങ്ങിണിയും എന്റെ മടിയില്‍ വലിഞ്ഞു കേറാന്‍ ശ്രമിച്ചു. ഉടനെ ഞാൻ അവളെയും തൂകി എന്റെ മടിയില്‍ അഡ്ജസ്റ്റ് ചെയ്ത് ഇരുത്തി.
ഉടനെ കുഞ്ഞുങ്ങള്‍ രണ്ടും അവരുടെ അടിപിടിയും കളിയും തുടർന്നു.
കുറെ നേരം ഞങ്ങളെ നോക്കിയിരുന്ന ശേഷം ആന്റി പറഞ്ഞു, “എപ്പോ വേണേലും വിനിലയുടെ കൂടെ നിനക്ക് ഇവിടെ വരാം, സാം. വിനില ഇല്ലെങ്കില്‍ പോലും നിനക്ക് ഇവിടെ വരാം.” അതുകേട്ട് ഞാൻ അല്‍ഭുതപ്പെട്ടു പോയി. പക്ഷെ ഞാൻ പുറത്ത്‌ കാണിച്ചില്ല.
ഇടയ്ക്കിടെ കുഞ്ഞുങ്ങള്‍ രണ്ടും താഴെ ഇറങ്ങി കളിക്കും, എന്നിട്ട് എന്റെ മടിയില്‍ തന്നെ കേറി ഇരിക്കും. അതും അവരുടെ ഒരു കളി പോലെ മാറിയിരുന്നു. കിങ്ങിണി എന്നോട് പെട്ടന്ന് തന്നെ അടുക്കുകയും ചെയ്തു.
ഒടുവില്‍ ആന്റി എന്നെ കുറിച്ച് കൂടുതലായി ചോദിക്കാൻ തുടങ്ങിയതും, ഞാൻ എന്നെ കുറിച്ചും എന്റെ കുടുംബത്തെ കുറിച്ചും ആന്റിയോട് ചുരുക്കി പറഞ്ഞു. എന്റെ അമ്മയെ കുറിച്ച് പറഞ്ഞത് കേട്ട് ആന്റിക്ക് നല്ല വിഷമമായി.
ആന്റിയും സ്വന്തം ജീവിതത്തെ കുറിച്ച് എന്നോട് സംസാരിച്ചു. ശേഷം വേറെ കാര്യങ്ങളിലേക്ക് സംസാരം തിരിഞ്ഞു. പല തമാശകളും ഉള്‍പ്പെടുത്തിയാണ് ഞാൻ ഓരോന്നും സംസാരിച്ചത്.
അപ്പോഴൊക്കെ ആന്റി പൊട്ടിച്ചിരിക്കുമ്പോ റൂമിൽ നിന്നും വിനിലയും ദേവിയും എത്തി നോക്കും. അവസാനം ദേവിയും വിനിലയും ഹാളില്‍ വന്ന് ഞങ്ങളുടെ കൂടെ കൂടി.
“ആഹാ… കിങ്ങിണി മോളും ചേട്ടനോട് ഇണങ്ങിയോ..?!” ഇടക്ക് കിങ്ങിണി എവിടെനിന്നോ ഓടി വന്ന് എന്റെ മടിയില്‍ വലിഞ്ഞു കേറാന്‍ ശ്രമിച്ചപ്പോ ദേവി പുഞ്ചിരിയോടെ ചോദിച്ചു.
“അവനോട് ആരെങ്കിലും ഇണങ്ങിയില്ലെങ്കിലെ അല്‍ഭുതപ്പെടാനുള്ളു.” വിനില ചിരിച്ചുകൊണ്ട് ആന്റിയെ നോക്കി.
ഞാൻ ചിരിക്കുക മാത്രം ചെയ്തിട്ട് കിങ്ങിണിയെ തൂകി എന്റെ മടിയിലിരുത്തി.
“പലപ്പോഴും നല്ല മനസ്സുള്ളവരോട് കുഞ്ഞുങ്ങള്‍ പെട്ടന്ന് ഇണങ്ങുമടി, മോളെ.” ആന്‍റിയാണ് മറുപടി കൊടുത്തത്.
“അമ്മ ആരെയും സപ്പോര്‍ട്ട് ചെയ്ത് സംസാരിക്കുന്നത് ഞാൻ ഇതുവരെ കേട്ടിട്ടില്ല.” ദേവി തെല്ല് ആശ്ചര്യത്തോടെ എന്നെ നോക്കി പറഞ്ഞു.
“എനിക്കും നല്ല മനസ്സുള്ളവരെ തിരിച്ചറിയാൻ കഴിയുമെന്ന് കൂട്ടിക്കോ…!!” ആന്റി തമാശ പോലെ പറഞ്ഞു. അപ്പോഴും ദേവിക്ക് ആശ്ചര്യം മാത്രം. വിനില വെറുതെ ചിരിച്ചു.
അന്നേരം ദേവി എന്നെ നോക്കി പറഞ്ഞു, “ചേട്ടന് വല്ല വശീകരണ മന്ത്രവും അറിയാമെങ്കില്‍ എനിക്കും പറഞ്ഞ്‌ തരുമോ… ഇവരെ എനിക്കും മയക്കി എടുക്കണം.”
ദേവിയുടെ തമാശ കേട്ട് ഞങ്ങൾ എല്ലാവരും ചിരിച്ചു. ആന്റി പോലും പൊട്ടിച്ചിരിച്ചു. വിനില എന്നെ കുസൃതിയോടെ നോക്കി. പക്ഷെ എന്തിനാണെന്ന്‌ എനിക്ക് മനസ്സിലായില്ല.
“അവന് വല്ല മന്ത്രവും അറിയാമായിരുന്നെങ്കിൽ ചെറിയ പെണ്‍കുട്ടികളെ മയക്കി എടുക്കുമായിരുന്നു… അല്ലാതെ എന്നെപോലെ പ്രായമായ സ്ത്രീകളുടെ അടുത്ത് മന്ത്രം പ്രയോഗിക്കേണ്ട കാര്യമില്ല.” ആന്റി ചിരിച്ചു കൊണ്ട് പറഞ്ഞു.
