വിനിലയാണെങ്കിൽ വായും പൊത്തി ചിരിക്കുന്നതാണ് ഞാൻ കണ്ടത്. അന്നേരം വലിയ ഒരു ട്രേയുമായി കിച്ചനിൽ നിന്നും ഹാളിലേക്ക് കാല് എടുത്തു വച്ച ദേവി പോലും അവിടെതന്നെ നിന്നിട്ട് ശബ്ദം ഇല്ലാതെ ചിരിക്കുന്നത് കണ്ടു. അതുകാരണം ഗ്ലാസ്സിൽ നിന്നും ജ്യൂസ് തുളുമ്പി ട്രേയിൽ ചിന്തി.
“ഇത്രയും കാലം ഞാൻ അതീവ രഹസ്യമായി സൂക്ഷിച്ചിരുന്ന എന്റെ എല്ലാ രഹസ്യങ്ങളും ഞാൻ ആന്റിയോട് പറഞ്ഞില്ലേ…! പക്ഷെ ആന്റിയുടെ പേരിന്റെ ആദ്യ അക്ഷരം പോലും ആന്റി എന്നോട് പറഞ്ഞില്ലല്ലോ..!!”
ഞാൻ പറഞ്ഞത് കേട്ട് ആന്റിയുടെ മുഖത്ത് പെട്ടന്ന് ഒരു നേര്ത്ത ചിരി മിന്നിമറഞ്ഞു. പക്ഷേ അവരുടെ മുഖം കണ്ടിട്ട് അവർ ഉള്ളില് ചിരിക്കുന്നത് പോലെയാണ് തോന്നിയത്.
“എന്റെ പേരിനെ പോലെ ആന്റിയുടെ പേരിനേയും രഹസ്യമായിട്ടാണ് വച്ചേക്കുന്നതെങ്കിൽ പറയേണ്ട, സാരമില്ല..!” അത്രയും ഞാൻ പറഞ്ഞു കഴിഞ്ഞതും വിനിലയും ദേവിയും അല്പ്പം ഉറക്കെ ചിരിച്ചുപോയി.
അന്നേരം ആന്റിയുടെ ഗൗരവം ഒന്ന് മാറുകയും കുപ്പിവള കിലുക്കിയത് പോലെ ചിരിക്കുകയും ചെയ്തു. പക്ഷേ രണ്ടുമൂന്നു സെക്കണ്ടിൽ തന്നെ ആന്റിയുടെ ആ ചിരി മാറുകയും അവരുടെ ഗൗരവം തിരികെ വരികയും ചെയ്തു.
പക്ഷേ ഇപ്പൊ എന്നോടുള്ള വെറുപ്പും സംശയവും എല്ലാം മാറിയിരുന്നു.
ആന്റി അങ്ങനെ ചിരിച്ചത് കണ്ടതും ദേവിയും വിനിലയും ആശ്ചര്യത്തോടെ പരസ്പരം നോക്കി.
“ദേവാംഗന, അതാണ് എന്റെ പേര്.” ആന്റിയുടെ സോഫ്റ്റ് ശബ്ദം പറഞ്ഞു. ശേഷം ഒരു പുഞ്ചിരി പിന്നെയും ആ മുഖത്ത് മിന്നിമറഞ്ഞു.
അന്നേരം എന്റെ മുന്നില് ദേവി ട്രേയുമായി എത്തിയിരുന്നു. അവളുടെ മുഖത്തും കണ്ണിലും അപ്പോഴും ചിരിയുടെ ലാഞ്ചന ഉണ്ടായിരുന്നു.
അവസാനം ഒരു പുഞ്ചിരിയോടെ കൈയിലുള്ള ട്രേ താഴ്ത്തി തന്നതും അതിൽ നിന്നും ഒരു ഗ്ളാസ് ജ്യൂസ് മാത്രം ഞാൻ എടുത്തു. അതിൽ ഉണ്ടായിരുന്ന സ്വീറ്റ് കേക്ക് ഞാൻ എടുത്തില്ല.
“കേക്ക് എടുക്കു ചേട്ടാ…!” ദേവി കുറെ നിര്ബന്ധിച്ചു.
“വേണ്ട, ജ്യൂസ് മാത്രം മതി.” ഞാൻ പറഞ്ഞു.
ഒടുവില് അവള് നടന്നു ചെന്ന് ആന്റിക്ക് നേരെ ട്രേ പിടിച്ചതും ആന്റിയും എന്നെപോലെ വെറും ജ്യൂസ് മാത്രം എടുത്തു.
ശേഷം ദേവി അതിനെ ടീപ്പോയിൽ വെച്ചതും കുഞ്ഞുങ്ങള് രണ്ടും ഓടി വന്നു. ദേവിയും വിനിലയും ചേര്ന്ന് കുഞ്ഞുങ്ങള്ക്ക് വേണ്ടതൊക്കെ കൊടുത്ത ശേഷം അവര്ക്ക് വേണ്ടതിനെ എടുത്തു.
അതുകഴിഞ്ഞ് സ്ത്രീകൾ മൂന്ന് പേരും എന്തൊക്കെയോ സംസാരിക്കാൻ തുടങ്ങിയതും ഞാൻ എന്റെ മൊബൈൽ എടുത്ത് അതിൽ വന്നിരുന്ന മെസേജിന് മറുപടി കൊടുക്കാൻ തുടങ്ങി.
പിന്നേ ഇടക്കിടെ എന്നോട് എന്തോ പറയാൻ ഉള്ളത് പോലെ ദേവി എന്നെ നോക്കുന്നതും ഞാൻ ശ്രദ്ധിച്ചു. പക്ഷേ അവള് പെട്ടന്ന് നോട്ടം മാറ്റി ആന്റിയെ ഒന്ന് ചിന്താകുഴപ്പത്തോടെ നോക്കീട്ട് അവര്ക്കിടയിലെ സംസാരത്തെ തുടരുകയും ചെയ്യും.
അതൊക്കെ രഹസ്യമായി ഞാൻ വീക്ഷിച്ചെങ്കിലും ദേവിയെ ഞാൻ ഡയറക്റ്റായി നോക്കിയില്ല… കൂടാതെ അവളെ അധികം മൈന്റ് ചെയ്യാതെയാണ് ഞാൻ ഇരുന്നത്.
അതുപോലെ ഇടക്കിടക്ക് ദേവാംഗന ആന്റി എന്നെ നിരീക്ഷിക്കുന്നത് പോലും എന്റെ രഹസ്യ വീക്ഷണത്തില് പെട്ടു. പലപ്പോഴും സംശയ ദൃഷ്ടിയോടെയും അവർ എന്നെ നോക്കിയത്. ഞാൻ ദേവിയെ ഏതു രീതിയില് കാണുന്നു എന്നതിനെ മനസിലാക്കാന് എന്നപോലെ.
വിനില പറഞ്ഞത് പോലെ അവര്ക്ക് ആണുങ്ങളെ എല്ലാം സംശയം ആയിരിക്കും.. ഞാൻ ചിന്തിച്ചു.
കുറെ കഴിഞ്ഞ് ദേവി വിനിലയേയും കൂട്ടി അകത്തുള്ള റൂമിലേക്ക് പോയി. കുട്ടികളും അവരുടെ പാട്ടിന് കളിച്ചു കൊണ്ടിരുന്നു.
അന്നേരം എന്റെയും ആന്റിയുടെ കണ്ണുകളും തമ്മില് ഇടഞ്ഞു. ഞാൻ പുഞ്ചിരിച്ചെങ്കിലും ആന്റി ഗൗരവമായി നോക്കി.
“ഇത്ര ഐശ്വര്യമുള്ള മുഖം ഉണ്ടായിട്ടും ആന്റി അധികം ചിരിക്കാതെ അതിന് ദ്രോഹം ചെയ്യുന്നത് ശെരിയല്ല….!” എന്റെ മനസ്സിൽ ധൈര്യം വരുത്തി കൊണ്ട് ഞാൻ ഉള്ളത് പറഞ്ഞു.