രാത്രി കിടക്കുന്നതിനു മുന്നായി ഫോൺ എടുത്തു നോക്കിയപ്പോൾ ശിവയുടെ ഫോണിൽ നിന്നും മെസ്സേജ് വന്നു കിടപ്പുണ്ട്, സ്റ്റെല്ല വാട്സ് അപ്പ് തുറന്നു നോക്കിയതും വീണ്ടും സമയം ചോദിച്ചുകൊണ്ടുള്ള മെസ്സേജ് തന്നെയാണ്.
അവൾ പറയാമെന്ന് മാത്രം മറുപടി നൽകി ഫോൺ എടുത്തു വച്ച് തിരികെ ആൽബിയുടെ അടുത്തേക്ക് എത്തി,
അതേ സമയം ആൽബി മുന്നോട്ടുള്ള എക്സാമിന്റെ കാര്യങ്ങളെ പ്പറ്റി കാര്യമായി എന്തോ ചെയ്യുകയായിരുന്നു.
” എടി നീ അവിടെ ഇരുന്നേ കുറച്ചു കാര്യങ്ങൾ സംസാരിക്കാൻ ഉണ്ട്..”
സ്റ്റെല്ല അടുത്തേക്ക് വന്നതും ആൽബി അവളെ പിടിച്ചിരുത്തി.
” എന്താ ആൽബി..?? ”
ആൽബിയുടെ പെട്ടെന്ന് ഉള്ള പെരുമാറ്റത്തിന്റെ കാരണം അവൾക്ക് മനസിലായില്ല, അവൻ എന്താണ് പറയാൻ പോകുന്നതിനെ പറ്റി യാതൊരു ഐഡിയയും ഇല്ലാതെ അവൾ ആൽബിയുടെ അടുത്തു പോയിരുന്നു.
” ഞാൻ പറഞ്ഞില്ലേ എക്സാമിന്റെ കാര്യം..?? ബോസ്സ് മെയിൽ അയച്ചിരുന്നു, ഈ വരുന്ന ചൊവ്വാഴ്ച്ച ആണ് എക്സാം സ്കെഡ്യൂൾ ചെയ്തിരിക്കുന്നത്, കോപ്പ് ഇത്ര പെട്ടെന്ന് അവർ സമയം അറിയിക്കും എന്ന് ഞാൻ തീരെ കരുതിയില്ല, എനിക്ക് പ്രീപെയ്ഡ് ആവാൻ ഒട്ടും സമയമില്ല ”
ആൽബിൻ ലാപ്പിൽ എന്തൊക്കെയോ ഫയൽസ് ഓടിച്ചു നോക്കി കൊണ്ടിരുന്നു.
” അതെന്താ.. ആൽബി ഇത്ര പെട്ടെന്ന് ഡേറ്റ് അയച്ചത്..?? ”
ആൽബിയെ പോലെ സ്റ്റെല്ലയും അത് തീരെ പ്രതീക്ഷിച്ചിരുന്നില്ല.
” ഇനി അതും പറഞ്ഞിരുന്നിട്ട് കാര്യമില്ല പെണ്ണേ, നീ എന്നെ വേഗം ഹെല്പ് ചെയ്തെ, ഞാൻ നിനക്ക് കുറച്ചു ഫയൽസ് മെയിൽ ചെയ്തിട്ടുണ്ട് അതൊക്കേ ഒന്ന് ഓടിച്ചു നോക്കിക്കേ ”
ആൽബിയുടെ തിരക്കും പരവേശവും കണ്ടതും അവൾ ചോദിക്കാനും പറയാനും വന്ന കാര്യം അപ്പാടെ വിഴുങ്ങി.
ഈ സമയം അവനോട് ഇതിനെപ്പറ്റി ചോദിച്ചാൽ ശരിയാവില്ല എന്ന് അവൾക്ക് ഒരു ഉൾവിളി തോന്നി,
ആൽബി അവൾക്ക് ഷെയർ ചെയ്ത ഫയൽസ് എല്ലാം അവൾ ഓപ്പൺ ചെയ്തു കൊണ്ട് അവന്റെ എക്സാമിന്റെ കാര്യങ്ങളിലേക്ക് ശ്രദ്ധ തിരിച്ചു.
പിറ്റേ ദിവസം ശനിയാഴ്ച്ചയും ആൽബി കൂടുതൽ സമയവും ലാപ്ടോപ്പിൽ അവന്റെ എക്സാമിനുള്ള കാര്യങ്ങൾ പ്രിപ്പയേർഡ് ചെയ്തു കൊണ്ടിരിക്കുകയായിരുന്നു,
ഇതിനിടയിൽ പലതവണ ശിവ മെസ്സേജ് അയച്ചു എങ്കിലും ആൽബിയോട് ഈ കാര്യം ഇപ്പോൾ സംസാരിക്കുന്നത് നല്ലതിനാവില്ല എന്ന് അവൾക്ക് തോന്നി,
ചൊവ്വാഴ്ച്ച എക്സാം നടക്കുന്നതിനാൽ ഇപ്പോൾ ആൽബി അതിന്റെ കാര്യത്തിൽ കൂടുതൽ ശ്രദ്ധ കൊടുത്തിരിക്കുകയാണ്, ഇപ്പോൾ അവനെ സപ്പോർട്ട് ചെയ്യുക എന്നതാണ് തൻറെ പ്രഥമ ദൗത്യം.
ശനിയാഴ്ച രാത്രി പതിവുപോലെ അവർ പുറത്തൊക്കെ പോയിരുന്നു , തിരികെ വരുമ്പോൾ കാറിൽ നിന്നും സ്റ്റെല്ല ഒരിക്കൽ കൂടി വിഷയം എടുത്തിടാൻ നോക്കി എങ്കിലും, ആൽബി വലിയ താല്പര്യമില്ലാതെയാണ് സംസാരിച്ചു കൊണ്ടിരുന്നത് , അതുകൊണ്ടു തന്നെ ഇപ്പോൾ അവനോട് ഈ കാര്യം വീണ്ടും സംസാരിക്കുന്നത് കൂടുതൽ പ്രശ്നങ്ങളിലേക്ക് പോവുകയുള്ളൂ എന്ന് അവൾക്ക് മനസ്സിലായി.
എന്തായാലും ഒരു വിധത്തിൽ പഴയ മനസ് ആയി വന്നിരിക്കുകയാണ് ഇപ്പോൾ ഒരു പ്രഷർ കൊടുത്തതുപോലെ തോന്നിപ്പിച്ചാൽ പിന്നെ അതു മതിയാവും, ഇത്തവണ ശിവയെ കാണുന്നതു വേണ്ട എന്ന് വെക്കാം എന്ന് തന്നെ അവൾ മനസ്സിൽ തീരുമാനിച്ചു…!!!
ഒരുപാട് ആഗ്രഹിച്ചിരുന്നിട്ട് പെട്ടെന്ന് തീരുമാനം മാറ്റേണ്ടി വന്നതിൽ അവൾക്ക് കുറച്ച് അധികം വിഷമം തോന്നിയിരുന്നു, അതുകൊണ്ടുതന്നെ തിരികെ അപ്പാർട്ട്മെന്റിലേക്കുള്ള കാർ യാത്രയിൽ അവൾ പുറത്തേക്ക് തന്നെ നോക്കിയിരിക്കുകയായിരുന്നു.
സ്റ്റെല്ലയുടെ പെട്ടെന്നുള്ള ഭാവ മാറ്റം ആൽബി ശ്രെദ്ധിച്ചിരുന്നു എങ്കിലും അവൻ അതിനെപ്പറ്റി കൂടുതൽ ഒന്നും ചോദിക്കാൻ പോയില്ല.
പതിവു പോലെ അന്ന് രാത്രിയും പുലർന്നു, രാവിലെ ആൽബി എഴുന്നേറ്റ് വരുമ്പോൾ സ്റ്റെല്ലയുടെ മുഖത്ത് വലിയ തെളിച്ചം ഒന്നും ഇല്ലായിരുന്നു,
” എന്നാ പറ്റി പെണ്ണേ മുഖം വാടി ഇരിക്കുന്നത്..?? ”
അവൻ ഹാളിലെ കസേര വലിച്ചിട്ട് ടേബിളിൽ അവൾക്ക് ഓപ്പോസിറ്റ് ആയിരുന്നു.