” താഴെ പാഴ്സൽ വാങ്ങാൻ പോകുന്നതിനെന്തിനാ കാറിന്റെ കീ..?? ‘
” എനിക്ക് ഒരു സാധനം കൂടി വാങ്ങാൻ ഉണ്ട്, നീ ഒന്നടങ്ങി നിന്നെ പെണ്ണെ എന്തൊരു ചോദ്യവും പറച്ചിലും ആണ് ഇത്..”
മറ്റൊരു മറുപടി നൽകാതെ ആൽബി താഴേക്ക് ഇറങ്ങിപ്പോയി,
പെട്ടെന്ന് ആൽബി ഒന്നും പറയാതെ താഴേക്ക് ഇറങ്ങി പോയത് എന്താണെന്ന് സ്റ്റെല്ലക്ക് ആകെ ഒരു ആശയ കുഴപ്പമുണ്ടാക്കി.. എങ്കിലും പോയി വരുമ്പോൾ അറിയാമല്ലോ എന്ന് കരുതി അവൾ ആ വിഷയം അവിടെ വിട്ടു.
ഏകദേശം ഒരു മണിക്കൂറോട് കൂടിയാണ് ആൽബി തിരികെ വന്നത് , വന്നു കയറുമ്പോൾ അവൻറെ കയ്യിൽ ഒരു കവർ ഉണ്ടായിരുന്നു കൂടെ ഒരു ചെറിയ ബൂസ്റ്റിന്റെ ബോട്ടിലും
അവൻ തിരികെ വരുമ്പോൾ സ്റ്റെല്ല ഹാളിൽ തന്നെ ഇരിപ്പുണ്ടായിരുന്നു അവളുടെ തൊട്ടടുത്തായി അന്ന മോളും, രണ്ടുപേരും ഒരേ സമയം ചോദ്യചിഹ്നത്തോടെ ആൽബിൻറെ മുഖത്തേക്ക് നോക്കി.
കുഞ്ഞിൻറെ കയ്യിലേക്ക് ഒരു കിൻഡർ ജോയ് വച്ച് കൊടുത്തശേഷം ആൽബിൻ താൻ കൊണ്ടു വന്ന കവർ നേരെ മേശപ്പുറത്തേക്ക് വച്ചു, ശേഷം ആ ബൂസ്റ്റിന്റെ ബോട്ടിലുമായി അകത്തേക്ക് പോയി.
” ആൽബി ഇതെന്താ..?? ”
” അവിടെത്തന്നെ ഇരിക്കാതെ എഴുന്നേറ്റ് നോക്ക് എന്നതാന്ന്..”
അവന്റെ മറുപടി കിട്ടിയതും സ്റ്റെല്ല എഴുന്നേറ്റു വന്ന് കവർ മാറ്റി നോക്കി, അതിൽ ഒരു ഫുൾ ബോട്ടിൽ ബക്കാർഡി ആയിരുന്നു.
ബക്കാഡി ലെമൺ അവൾക്ക് ഏറ്റവും ഇഷ്ടപ്പെട്ട ഫ്ലേവർ ആണ് , കുറച്ചുകാലമായി ആൽബിയുമായി ഒന്നു കൂടിയിട്ട്… അതുകൊണ്ടുതന്നെ സർപ്രൈസ് ആയിട്ട് കൊണ്ടുവന്ന ബോട്ടിൽ അവൾക്ക് കുറച്ച് അധികം സന്തോഷം നൽകി..!!
” ഇതെന്നാ ആൽബി ഒരു ഫുൾ ബോട്ടിൽ ഇന്ന് ആരെങ്കിലും ഗസ്റ്റ് ഉണ്ടോ..?? ”
” അതെന്താ നമ്മൾ അടിച്ചാൽ ഇറങ്ങില്ലെ..??” റൂമിൽ നിന്നും ഡ്രസ്സ് മാറി ഹാളിലേക്ക് വന്നതും ആൽബി ഒരു കളിയാക്കലോടെ ചോദിച്ചു
” എന്റെ കെട്ടിയോനു ഇന്ന് കുറെ പ്ലാൻ ഉണ്ട് എന്ന് തോന്നുന്നുണ്ടല്ലോ..?? ”
” വലിയ പ്ലാൻ ഒന്നുമില്ലെടി നമ്മൾ രണ്ടുപേരും ടെറസിൽ പോയിരുന്നു കുറച്ച് കൊച്ചു വർത്തമാനം പറഞ്ഞു ഒക്കേ ഇതങ്ങടിച്ചു തീർക്കുന്നു അത്രയേ ഉള്ളൂ..!! ”
” ആ കവറിൽ ഇച്ചിരി ബീഫ് ഇരിപ്പുണ്ട് നീ അതും കൂടി ഒന്ന് വരട്ടിയേക്ക് ”
ആൽബി അതും പറഞ്ഞു ബീഫ് എടുത്ത് അവളുടെ കയ്യിലേക്ക് നൽകി, നേരെ വാഷ് റൂമിലേക്ക് കയറി.
ആൽബിന്റെ കൂടെ തുറന്ന് സംസാരിക്കാൻ ഒരു അവസരം അവളും ആഗ്രഹിച്ചതായിരുന്നു എന്തായാലും അവനായിട്ട് കൊണ്ടുവന്ന പ്ലാൻ അവൾക്ക് കുറച്ചു അധികം ഊർജ്ജവും ഉന്മേഷവും നൽകി, ഒരു ചിരിയോടെ സ്റ്റെല്ല ബീഫും കയ്യിൽ എടുത്ത് നേരെ കിച്ചണിലേക്ക് നടന്നു.
രാത്രി ഏകദേശം ഒൻപതരയോടെയാണ് അവർ ഡിന്നർ കഴിക്കുന്നത് , അതിനുശേഷം വേറെ പ്ലാൻ ഉണ്ടായിരുന്നതിനാൽ രണ്ട് പേരും കാര്യമായിട്ടൊന്നും കഴിച്ചില്ല,
സ്റ്റെല്ല കുഞ്ഞിനെ കിടത്തിയുറക്കാൻ നോക്കുമ്പോൾ ആൽബി ബാൽക്കണിയിൽ നിന്ന് ഓരോന്ന് ചിന്തിച്ചു കൂട്ടുകയായിരുന്നു..
കുറച്ചു സമയം കൂടി കഴിഞ്ഞതും അവൾ പതിയെ ശബ്ദമുണ്ടാകാതെ വാതിൽ ചാരി പുറത്തേക്ക് വന്നു,
” അന്ന ശരിക്കും ഉറങ്ങിയോ..?? ഇനി ഇടക്ക് എഴുന്നേൽക്കുമോ..?? ”
” അതൊന്നുമില്ല ആൽബി അവൾ ഉറങ്ങിക്കോളും, നമുക്ക് നോക്കിയാലോ ”
സാധനം എടുത്തതിൽ പിന്നെ സ്റ്റെല്ലക്ക് നല്ല ആവേശമായിരുന്നു.
” എടീ ടെറസിൽ പോയാലോ..?? ”
” ആൽബി അതിപ്പോ കുഞ്ഞിനെ ഒറ്റയ്ക്ക് ഇട്ട് എങ്ങനെയാ പോകുന്നത്..?? ”
” എടി മാക്സിമം ഒരു മണിക്കൂർ അതിനുള്ളിൽ നമ്മൾ ഇത് അടിച്ചു തീർത്തു താഴേയ്ക്ക് വരില്ലേ പിന്നെ എന്നാ..?? ”
ആൽബിയുടെ സജഷൻ കേട്ടതും സ്റ്റെല്ല കുറച്ച് സമയ ഒന്ന് ശങ്കിച്ചു നിന്നു, ശേഷം പോകാമെന്ന് തലയാട്ടി സമ്മതിച്ചു.
ഒരു കൈയിലേക്ക് ബക്കാർഡിയും തന്റെ മറു കയ്യിലേക്ക് സെവൻ അപ്പുമായി ആൽബി പുറത്തേക്ക് ഇറങ്ങി..
” ആൽബി ഒരു മിനിറ്റ് ഫോൺ തന്നേ..”
സ്റ്റെല്ലയുടെ ശബ്ദം കേട്ട് അവൻ തിരിഞ്ഞതും അവൾ മുന്നോട്ട് വന്ന് ആൽബിയുടെ ഫോൺ പോക്കറ്റിൽ നിന്നും എടുത്തു,
ശേഷം സ്വന്തം ഫോണിലെക്ക് ആൽബിയുടെ ഫോണിൽ നിന്നും വിഡിയോ കോൾ ചെയ്ത് കണക്റ്റ് ആക്കിയ ശേഷം അന്നമോൾ കിടക്കുന്ന ബെഡിലേക്ക് വ്യൂ കിട്ടുന്ന രീതിയിൽ അവളുടെ ഫോൺ റൂമിൽ തന്നെ വച്ചു..