അമ്മ അത്താഴത്തിനുള്ള കറികൾ ചൂടാക്കുന്നുണ്ട്..
അവൻ മുറീന്ന് ഇറങ്ങിയപാടെ അമ്മു എണീറ്റു…ഇങ്ങനൊരുറക്കം പതിവില്ലാത്തോണ്ടാകും തലയ്ക്കാകെ ഒരു പെരുപ്പും മന്ദതയും…
എഴുന്നേറ്റ് ബെഡിൽ ഇരുന്നു ചുറ്റും നോക്കി….
ഈശ്വരാ പാതിരാത്രി ആയോ….ചാടിപിടിച്ചു ബെഡിൽ നിന്നും ഇറങ്ങി…
തലയിൽ ചുറ്റഴിഞ്ഞു കിടന്ന തോർത്തും അഴിച്ചെടുത്തു അടുക്കളയിലേക്ക് ചെന്നു…
ഹരിയെ കണ്ടതും ഒന്നറച്ചു നിന്നു ഇറങ്ങാൻ…
ഫോണും നോക്കി സ്ലാബിൽ ചാരിനിന്നവനും തലയുയർത്തി….
ആ മറുക്…..
Hd ക്ലാരിറ്റിയിൽ തലയിലേക്ക് വന്നതും
“അമ്മേ….ചോറെടുക്ക്….എനിക്കെറങ്ങാറായി…” ന്നും പറഞ്ഞ് ഒരു പോക്ക്…
അടുക്കള വാതിലിൽ നിന്ന അമ്മു ഒന്നൊതുങ്ങിക്കൊടുത്തു….
“മോളും വാ…ഞാനും കഴിക്കാൻ ഇരിക്കുവാ….” പറഞ്ഞുകൊണ്ട് മായ ഒരുകയ്യിൽ അവനുള്ള പ്ലേറ്റും മറുകയ്യിൽ പപ്പടം പൊരിച്ചിടുന്ന ചെറിയ ബക്കറ്റുമായി നടന്നു….
അമൃതയാ അടുക്കളയിൽ തന്നെ നിന്നു..
ആകെ ഒരു വല്ലായ്മ…
ഇന്നലെ വന്നുകയറിയപ്പോൾ ഉണ്ടായിരുന്ന അത്ര ബുദ്ധിമുട്ടും അന്യത ബോധവും ഇപ്പോൾ തോന്നുന്നില്ല..ഒരു പരിധി വരെ, അല്ല പൂർണ്ണമായും മായമ്മയുടെ പെരുമാറ്റം തന്നെ ആണതിന് കാരണം…
തനിക്കൊരു മേമയോ വല്യമ്മയോ ഉണ്ടായിരുന്നെങ്കിൽ അവർ തന്റമ്മയെപ്പോലെ സ്നേഹനിധി ആയിരുന്നെങ്കിൽ അവരുടെ കൂടെ വിരുന്നു നിൽക്കാൻ പോകുമ്പോൾ ഉള്ളൊരു വികാരം അതാണ് തനിക്കിവിടെ…
പക്ഷെ അതത്രയും അവനെ കാണുന്നിടം വരെ മാത്രം….
അവനെ അഭിമുഖീകരിക്കുമ്പോൾ എന്തോപോലെ…
ദഹിക്കാൻ പറ്റാത്ത പലതും മനം പുരട്ടിവരുമ്പോലെ…
എത്രയൊക്കെ മനസ്സിനെ പറഞ്ഞു പഠിപ്പിച്ചാലും ഓർമ വച്ച നാള് മുതൽ വിളക്ക് വച്ചാരാധിച്ചു പോന്നിരുന്ന നാഗയക്ഷിയുടെ മുന്നിൽ വച്ചവൻ കെട്ടിയ താലി…
അഴിച്ചുമാറ്റിയെങ്കിലും അദൃശ്യമായവിടെ കിടന്നത് ഉടൽ പൊള്ളിക്കുമ്പോലെ….
കഴുത്തിലേക്ക് കൈ നീണ്ടു…
ഒരു കരച്ചിൽ തൊണ്ടക്കുഴിയിൽ എത്തി തങ്ങിനിന്നു….
അംഗീകരിക്കാൻ പറ്റില്ലെനിക്ക്…..തടുക്കായിരുന്നില്ലേ….
അവളാ നാഗദൈവങ്ങളോട് പരിഭവിച്ചു…
“ഇവിടെന്താ ഇങ്ങനെ നിക്കണേ….വാ ചോറൊക്കെ ഞാൻ എടുത്തിട്ട് വരാം…ഇച്ചിരെ കഴിച്ചിട്ട് കിടന്നോ….”
അവളിപ്പോളും ഉറക്കത്തിന്റെ കെട്ടിലാണെന്നാണ് മായ വിചാരിച്ചത്….
“എനിക്ക് വേണ്ടമ്മാ…വിശപ്പില്ല…”
വയറെരിയുന്നുണ്ടേലും അവൾ കള്ളം പറഞ്ഞു…അവനോടൊപ്പം ഇരിക്കാൻ വയ്യ…
“രാത്രി വിശന്നാലോ…ഒരു വാ കഴിച്ചിട്ട് കിടക്ക്….വന്നേ എന്റെ മോള്….”
മായ അവൾക്കു കൂടി വിളമ്പി എടുത്തു…
“വേണേൽ തിന്നോളും…കൈക്കുഞ്ഞൊന്നും അല്ലല്ലോ…അമ്മ അമ്മേടെ പണി നോക്കിക്കേ….ഇവളുടൊക്കെ അഹങ്കാരത്തിനു ഒരു നേരം പട്ടിണി കിടക്കുവാ നല്ലത്….”
പ്ലേറ്റ് സിങ്കിലേക്കിട്ട് കൈ കഴുകും വഴി അവൻ പറഞ്ഞു..
“നീയിത്ര വേഗം കഴിച്ചു കഴിഞ്ഞോ…”
“മ്മ്മ്…” വായും മുഖവും കഴുകി തന്നെ തുറിച്ചു നോക്കുന്നവൾക് മുഖം കൊടുക്കാതെ ഹാളിലേക്ക് നടന്നു…
അവളെ അമ്മ ഇവിടെ പിടിച്ചിരുത്തുവോ എന്നോർത്ത് പ്ലേറ്റിലുള്ളത് വാരി വിഴുങ്ങി വെള്ളം കുടിച്ചിറക്കീതാണെന്ന് അവനല്ലേ അറിയൂ…
10 മണി ഒക്കെ കഴിഞ്ഞപ്പോഴേക്കും അരുൺ വന്നു ആക്കൂടെ ഹരി ഇറങ്ങി…
അവൻ ഇറങ്ങി ഒരഞ്ചു മിനിറ്റ് കഴിഞ്ഞപ്പോളാണവൾക് ചാർജ്റിന്റെ കാര്യം ഓർമ വന്നത്…
അഭി കൊടുത്ത ബോക്സിൽ ചാർജർ ഇല്ലാത്തത് കൊണ്ട് അവൾക്ക് ഹരിയുടേത് എടുത്തു കൊടുത്തിരുന്നു മായ..
“അമ്മേ…ചാർജർ കൊണ്ടോയിട്ടില്ല….”
അവൾ പുറത്തേക്ക് മുഖം കൊണ്ട് കാണിച്ചു മായയോട് പറഞ്ഞു..
“അത് സാരല്ല…പോയിട്ടില്ലേൽ അവൻ വന്നു എടുത്തോളും അല്ലേൽ കൂടെ ഉള്ള ആരുടേലും എടുത്ത് കുത്തിക്കോളുംനേ…” അതും പറഞ്ഞു ബാത്റൂമിലേക്ക് കയറി…
Addict ayi storykk vegam next part idu