“എന്നാ പോട്ട് വിട്….ആ കൊട്ടാരത്തിൽ വളർന്നവളല്ലേ…നമ്മടെ ഒക്കെ സെറ്റപ്പിൽ കൂടിപ്പോയാൽ 2 ആഴ്ച അതിനുള്ളിൽ വല്ല ഹോസ്റ്റലിലേക്കും പൊക്കോളും…പഠിക്കാൻ പോണ കൊച്ചാന്നല്ലേ പറഞ്ഞേ….”
“മ്മ്മ്….ഇല്ലേൽ അവളെ ഞാൻ ചാടിക്കും….”
“ഹ്മ്മ്…ഒന്നു ചാടിച്ചെന്റെയാ കിടക്കണ കട്ടിലുപോലും പോയിക്കിട്ടീത്…ഇനി വീടോടെ പൊക്കോളും…” അരുൺ അവൻ കേൾക്കാതെ പിറുപിറുത്തു…
“അല്ല സ്പോട്ടിൽ താലിം പൊക്കിപിടിച്ചു വരുന്നുണ്ടാർന്നല്ലോ…എവിടുന്നൊപ്പിച്ചു….” വണ്ടി ഓടിച്ചുകൊണ്ടാണ് ഹരിയുടെ ചോദ്യം..
“അതുപിന്നെ….ആ വളവിലെ ഫാൻസികടേന്ന്….നൂലും അവിടന്ന് തന്നെ കിട്ടി..”
“എടാ നാറീ….റോൾഡ് ഗോൾഡ് ആരുന്നോ….”
“അല്ലടാ…പ്ലാറ്റിനം….
ഞാനാര് അംബാനിയോ 5 മിനിറ്റിൽ സ്വർണത്താലിം കൊണ്ടുവരാൻ…അതും ഇമ്മാതിരി പൊള്ളുന്ന വിലയുള്ളപ്പോ….”
“ആ മറുതയിനി എന്ത് വിചാരിക്കും….” ഹരിക്കൊരു ചളിപ്പ് തോന്നി
“അച്ചോടാ മോനേ…പറയുന്നേ കേട്ടാൽ നാലാളു കാണെ കന്യാദാനോം നടത്തികൊണ്ടന്ന പോലുണ്ട്…”
“ അല്ലേൽതന്നെ അവൾ അതും ഇട്ടോണ്ട് ഇമ്മിണി നടക്കും…അതിന്റെ സ്വഭാവം വച്ചിട്ട് വന്ന വഴിക്ക് തന്നെ എറിഞ്ഞുകളഞ്ഞിട്ടുണ്ടാകും….”
“ഹ്മ്മ്….” ഹരി ഒന്നിരുതിമൂളി….
വീട്ടിൽ എത്തുമ്പോൾ മണി 12 കഴിഞ്ഞു….
മനഃപൂർവം വൈകിച്ചതാണ്…ആർക്കും മുഖം കൊടുക്കണ്ടല്ലോ…
പക്ഷെ ഹാളിൽ ലൈറ്റ് തെളിഞ്ഞു കിടപ്പുണ്ട്…അപ്പോ അമ്മ ഉറങ്ങീട്ടില്ല..
അകത്തുകയറിയതും തയ്യൽ മെഷീനു മുന്നിൽ ഇരിപ്പുണ്ട്…
“അമ്മാ….”
മെഷീൻറെ മോട്ടോറിൽ ആഞ്ഞമർത്തി മായ…ശബ്ദം നല്ലവണ്ണം കൂട്ടി…
തനിക്കുള്ളതാണെന്ന് മനസിലാക്കി ഹരി അടുക്കളയിലേക്ക് നടന്നു…
പ്ലേറ്റിൽ മൂടി വച്ചിട്ടുണ്ട്…തണുത്തിരിക്കുന്നു..അതുപിന്നെ ശീലമാണ്…
കൈ കഴുകി കഴിച്ചും കൊണ്ട് ഹാളിലേക്ക് നടന്നു…കസേര എടുത്തു അമ്മയ്ക്ക് അടുത്തേക്ക് ഇട്ട് അതിൽ ഇരുന്നു…
ഒരുരുള എടുത്തു നീട്ടി….
എവിടെ..നോ മൈൻഡ്….
“അമ്മാ….”
പുച്ഛം മാത്രം…
“അമ്മാ….” ആവശ്യക്കാരന് ഓചിത്യം ആവശ്യമേ ഇല്ല…
“മ്മ്മ്…”
“ഞാൻ നോക്കിക്കോളാം….”
“നീ തന്നെ നോക്കണം….”
“അവളോട് ഹോസ്റ്റലിലോ പിജി യിലോ മറ്റോ മാറാൻ പറയ്….”
“നടക്കത്തില്ല….”
“അമ്മാ….”
“ഹരീ…ഇനിയിതിലൊരു വർത്താനം ഇവിടില്ല…ആ മോളിവിടെ ഇഷ്ടമുണ്ടെൽ നിൽക്കും ഇല്ലേൽ ഇല്ല…അതിൽ ഞാനോ നീയോ തീരുമാനം എടുക്കില്ല…”
“എന്നാപ്പിന്നെന്റെ മുറിയെങ്കിലും…..”
സ്രാവിന്റെ ശരീരോം വച്ചോണ്ട് നത്തോലിടെ എക്സ്പ്രഷൻ ഇടുന്നവനെ ഇരുത്തിയൊന്ന് നോക്കി മായ..
“നാണമില്ലല്ലോടാ….”
“ആ കുഞ്ഞിനെ ഞാൻ പിന്നെവിടെ കിടത്തും…”
“ഓ ഒരു കുഞ്ഞ്….” ഹരി ചുണ്ടുകോട്ടി..
ഇനി കാലിൽ കിടത്തി കോരി കൊടുക്ക് അതിന്റെ കുറവോടെ ഉള്ളെന്നും ഞൊടിഞ് കറിയിലെ മുരിങ്ങക്കോലും ഈമ്പിയവൻ എണീറ്റുപോയി….
ആ പോക്ക് കണ്ട മായ ഒന്നു ചിരിച്ചുകൊണ്ട് തയ്ച്ചുതുടങ്ങി…
അകത്തു മുറിയിൽ ഫാനിറ്റിട്ടും പുഴുങ്ങുന്ന ചൂടിലും കൊതുകും കാരണം ഉറങ്ങാതെ തിരിഞ്ഞും മറിഞ്ഞും കിടന്ന അമൃത കേൾക്കുന്നുണ്ടായിരുന്നു ഇതെല്ലാം….
അവളൊന്നു നെടുവീർപ്പിട്ടു….
രാവിലെ അലാറം ഒന്നും ഇല്ലെങ്കിലും കൃത്യസമയത്ത് ഉറക്കമുണർന്നു….
ചെറിയമ്മ ഭരണം കൊണ്ട് ആകെക്കിട്ടിയ ഒരു ഗുണം…പണ്ടുറങ്ങാൻ സമ്മതിക്കാത്തതിന് കുറെ പ്രാകിയിട്ടുണ്ടെകിലും ഇന്നിപ്പോ നന്നായി…
വാതിൽ തുറന്നു കാൽ പുറത്തേക്ക് വച്ചതും കണ്ടു..
ഉടുത്തിരുന്ന മുണ്ടും പുതച്ചു ഹാളിൽ ആകെയിത്തിരി സ്ഥലമുള്ള ആ മുറിവാതിലിന്റെ മുന്നിൽ പായിൽ കിടന്നുറങ്ങുന്നവൻ…
കമിഴ്ന്നാണ് കിടപ്പ്…ഓടാൻ പോകുമ്പോലെ…പുതപ്പ് പാതിയെ മറഞ്ഞിട്ടുള്ളു…
Addict ayi storykk vegam next part idu