ഹരിയമ്മുവിനെ നോക്കുമ്പോൾ അവൾ അടുക്കളയിലേക്ക് ഓടുന്നുണ്ട്…
അവൾ എന്തോ കൊളുത്തികൊടുത്തതാണെന്ന് അവൻ ഊഹിച്ചു…
എന്നാൽ ദോശ കരിഞ്ഞ മണം അടിച്ചിട്ട് സ്റ്റോവ് ഓഫ് ആക്കാൻ ഓടിയതായിരുന്നു അമ്മു…
ദോശച്ചട്ടി സ്റ്റോവിൽ നിന്നു എടുക്കുന്നതിനിടക്ക് ഇനിയിതിന്റെ ബാക്കി എനിക്കിട്ടെന്ത് പണിയാണോ ഈശ്വരാ എന്നോർത്തവൾ കരിഞ്ഞ ദോശ ഇളക്കി മാറ്റി അതു കളയാനായി തിരിഞ്ഞതും അടുക്കള വാതിലിന്റെ കട്ടിളമേൽ ഇരുകയ്യും വച്ച് അവളെ തന്നെ നോക്കിനിക്കുന്ന ഹരി…
ഞൊടിയിടയിൽ ചട്ടുകം ഒരേറും കൊടുത്ത് വർക്ക് ഏരിയ കടന്നു അമ്മു….
മറുതക്ക് പൂച്ചേടെ റിഫ്ളക്സ് ആലോന്ന് ഓർത്തവൻ പിറകെ വച്ചുപിടിച്ചെങ്കിലും അപ്പോളേക്കും വേലിക്കൽ ലളിതമ്മയോട് സംസാരിച്ചു നിൽക്കുന്ന മായയുടെ അടുത്ത് എത്തിയിരുന്നു അമ്മു….
“നിന്നെ ഞാൻ എടുത്തോളാടി പുല്ലേയെന്ന് ചുണ്ടനക്കി…
അമ്മുഅതിന് മായ കാണാതെ പുച്ഛിച്ചു ചുണ്ടുകോട്ടി….
ആ ഭിത്തിയിൽ ചാരിവച്ചിരിക്കുന്ന ഓലമടലെടുത്തു അവളുടെ തല വഴിക്ക് ഒന്നുകൊടുക്കാൻ തോന്നി ഹരിക്ക്….
പന്ന മോള്….അവൻ പല്ലുകടിച്ചു…
അപ്പൊ മുതൽ ഹരി നോക്കുന്നതാ അവളെയൊന്നൊറ്റക്ക് കിട്ടാൻ….
രണ്ടും കൂടെ എന്താ ഡീലെന്ന് അറിയില്ല പണ്ട് തന്റെ പിറകേന്ന് മാറാത്ത ചിന്നുവിപ്പോ അമ്മുന്റെ സൈഡ് ആണ്…തന്റെ തലവെട്ടം കണ്ടാൽ അമ്മുന് ഇൻഫർമേഷൻ പോകും….
പഠിച്ച പണി പതിനെട്ടും നോക്കിയിട്ടും അവളെ ഒതുക്കത്തിലവനൊന്നു കിട്ടിയില്ല….
എന്തിനേറെ മറുതയാ മുറിക്ക് പുറത്തിറങ്ങി അന്നവൻ കണ്ടിട്ടില്ല…
പിറ്റേന്ന് മൈക്കിൾ ചേട്ടന്റെ കടയിലെ ലോഡുമായി അവൻ തമിഴ്നാട് ഓട്ടവും പോയി….
പിന്നുള്ള നാലഞ്ച് ദിവസം അമ്മു ആഘോഷിച്ചു….
അവനില്ലാതെയാ വീട്ടിൽ സർവ സ്വാതന്ത്ര്യം….
പക്ഷെയെത്ര കെഞ്ചിയിട്ടും പുഴയിലേക്ക് മാത്രം മായ വിട്ടില്ല…
അതൊഴിച്ചു ബാക്കിയെല്ലാം അവളും കിച്ചും ചിന്നൂം കൂടങ് തകർത്തുവാരി….
വീടിനു മുറ്റത്തെ പേരയിലും ചാമ്പയിലും പുളിയൻമാവിലും ഇനിയൊരൊറ്റ കായ് ബാക്കിയില്ല മൂന്നും കൂടെ ഒരുക്കി നിർത്തിയിട്ടുണ്ട്…
എല്ലാം കഴിഞ്ഞിപ്പോ മൂവാണ്ടന്മാവിലാണ് കണ്ണ്….അത് പഴുത്തിട്ട് തൊട്ടാ മതീന്ന് ഹരി ഓർഡർ ഇട്ടിട്ട് പോയിരിക്കുന്നതുകൊണ്ട് അതു താഴെ നിന്ന് നോക്കി വെള്ളമിറക്കലെ ഉള്ളൂ…
ഇലുമ്പൻ പുളിക്കു മാത്രം കാര്യമായ വാട്ടം ഇല്ല….ഒടുക്കത്തെ പുളി ആയോണ്ട് ആ വഴിക്കങ്ങനെ കണ്ണ് പോയിട്ടില്ല….
പക്ഷെ നാലഞ്ച് ദിവസം കഴിഞ്ഞപ്പോൾ കയ്യീന്ന് പോയി…
അവസാനം മായേടെ കാലും കയ്യും പിടിച്ച് ഒരു കുല മൊത്തത്തിൽ ഒടിക്കാതെ പല കുലെന്നായി തോട്ടിക്ക് പറിച്ചു ഒരു പത്തിരുപത്തെണ്ണം….
ഞെട്ട് കണ്ടിച്ചുനോക്കുമ്പോ നല്ല ചിനച്ചു ചുവന്ന മാങ്ങ…വായിൽ വെള്ളമൂറി….
പിന്നെ ചടപടെന്ന് കമുകിന്റെ പാള വെട്ടി അതിലേക്ക് കഴുകിയ മാങ്ങ പൂളിയിട്ടു കൂടെ ഡെക്കറേഷന് കുറച്ച് പൈനാപ്പിളും അയല്പക്കത്തെ ഏതോ വീട്ടീന്ന് കിട്ടിയ പനിനീർ ചാമ്പങ്ങയും….
വാളൻപുളീ കുതിർത്തു കൊഴുത്ത ചാറിൽ മുളക്പൊടീം ഉപ്പും ഇട്ട് അതിനു മുകളിലേക്ക് ഒഴിച്ചിളക്കി….
ചിന്നൂന്റെ പരീക്ഷണം ആണ് എന്താകുവോ എന്തോ….
തിന്നുന്നതൊക്കെ കൊള്ളാം വയറിളക്കിയേക്കല്ലെന്നും പറഞ്ഞു മായ കുടുംബശ്രീ മീറ്റിംഗിന് പോയി…
ഓട്ടം കഴിഞ്ഞു ഹരി വന്നുകയറുമ്പോൾ വീടാകെ ശാന്തം…
എല്ലാരും എവിടെപ്പോയി…
ചാരിയിട്ട വാതിൽ തുറന്ന് അകത്തുകയറി…
കിച്ചു ഉള്ളപ്പോ ഇതിങ്ങനെ മൂകമായി കിടക്കാറുള്ളതല്ല…
ഷർട്ടിന്റെ ബട്ടൺ അഴിച്ചു അടുക്കളയിലേക്ക് നടക്കും വഴി പിറകുവശത്തു എന്തോ സംസാരം കേട്ടു…
അവൻ ജനലിലൂടെ നോക്കുമ്പോൾ വിറകുപുരയുടെ മുന്നിൽ കൊക്കോയുടെ ചുവട്ടിലെ തണലിൽ വട്ടം കൂടിയിരുന്നു എന്തോ പെറുക്കിതിന്നുന്ന മൂവർ സംഘം…
Addict ayi storykk vegam next part idu