എന്റെ ചോദ്യം കേട്ട് അണ്ണൻ ഗൗരവമായി ഒന്ന് ചിരിച്ചു. എന്നിട്ട് സുമ ആരായിരുന്നുവെന്നും എങ്ങനെയാണ് ചേട്ടൻ അവരെ കൂടെ കൂട്ടിയതെന്നും പറഞ്ഞപ്പോ എനിക്ക് കുഞ്ഞമ്മയോട് അടങ്ങാത്ത വെറുപ്പുണ്ടായി.
“റൂബിനെ കുറിച്ച് കൂടുതലൊന്നും അറിയാത്തത് കൊണ്ട് ആദ്യമൊക്കെ സുമക്ക് റൂബിന്റെ കഴിവില് വിശ്വസമില്ലായിരുന്നു.” കുറച്ച് കഴിഞ്ഞ് അണ്ണൻ തുടർന്നു. “പക്ഷേ ഏതാനും ദിവസങ്ങളിൽ തന്നെ സുമയുടെ കാഴ്ചപ്പാട് മാറി. ശെരിക്കും പറഞ്ഞാൽ സുമയ്ക്ക് ഇപ്പൊ അവനോട് ആരാധനയാണെന്ന് തന്നെ പറയാം.” ചിരിച്ചുകൊണ്ട് അണ്ണൻ പറഞ്ഞു.
എനിക്ക് അതുകേട്ട് നല്ല അസൂയ തോന്നി. മനസ്സിൽ ചേട്ടനോട് ഒരു കുഞ്ഞ് പിണക്കവും.
“ഞാൻ അവന്റെ വലങ്കൈ ആണെങ്കിൽ, സുമ അവന്റെ ഇടങ്കൈയാണ്. അവളുടെ ഒരു കാല് നഷ്ടമായെങ്കിലും, എന്നിൽ നിന്നും റൂബിനിൽ നിന്നും അഭ്യാസങ്ങളൊക്കെ നല്ലോണം പഠിച്ച് തെളിഞ്ഞ ഹൈ ലെവൽ അഭ്യാസിയാണ് സുമ.” അണ്ണൻ തുടർന്നു. “റൂബിന് എന്തു പറഞ്ഞാലും സുമ അതൊക്കെ ചെയ്തിരിക്കും. മറ്റ് ജോലികള് കൂടാതെ, റൂബിന്റെ ആരാച്ചാറായി സ്വയം ഏറ്റെടുത്തിരിക്കുകയാണ് സുമ.”
“ആരാച്ചാറോ..! അപ്പൊ സുമ കൊല്ലുകയും ചെയ്യുമോ..?” ഞാൻ ഞെട്ടലോടെ ചോദിച്ചു.
“ശെരിക്കും സുമയൂടെ പേര് കെട്ടല് തന്നെ റൂബിന്റെ ശത്രുക്കൾ പേടിച്ച് മുള്ളും.” അണ്ണൻ സീരിയസ്സായി പറഞ്ഞു. “റൂബിനെ ആരെങ്കിലും തുറിച്ചു നോക്കിയാൽ പോലും, റൂബിന് പോലുമറിയാതെ സുമ അവരെ പേഴ്സണലായി വിസിറ്റ് ചെയ്ത് അവരെ ചോദ്യം ചെയ്തിട്ട് ചെറുതായിട്ടെങ്കിലും ശിക്ഷിച്ചിരിക്കും, അത്രക്ക് പ്രോട്ടക്റ്റീവ് മൈന്റാണ് അവള്ക്ക് റൂബിനോട്. സ്വന്തം കുഞ്ഞനുജനായിട്ടാണ് റൂബിനെ അവള് കാണുന്നത്.”
ചേട്ടനെ സുമ അനുജന്റെ സ്ഥാനത്ത് കാണുന്നുവെന്ന് കേട്ടപ്പോഴാണ് ശെരിക്കും എനിക്ക് സമാധാനമായത്.
“ഓക്കെ അണ്ണാ. ശെരിക്കും കുഞ്ഞമ്മയുടെ സാമ്രാജ്യത്തെ ഉന്മൂലനം ചെയ്യാന് ചേട്ടന് ഉണ്ടായ യഥാര്ത്ഥ പക എന്താണ്…?” ഞാൻ ചോദിച്ചു.
“അത് അല്ലി—”
“അണ്ണാ..,” ഞാൻ പെട്ടന്ന് ഇടക്ക് കേറി സംസാരിച്ചു, “അല്ലിക്ക് വേണ്ടിയും, അരുളിന് വേണ്ടിയും, പിന്നെ നിങ്ങള്ക്ക് വേണ്ടിയും സുമ ചേച്ചിക്ക് വേണ്ടിയും ആണെന്നത് ഒരു വശം നില്ക്കട്ടെ. പക്ഷേ അതുമാത്രമല്ല കാരണമെന്ന് എനിക്കറിയാം. കുഞ്ഞമ്മയെന്ന് പറയുമ്പോ തന്നെ ചേട്ടന്റെ കണ്ണുകൾ എപ്പോഴും ലാവ പോലെ മാറുന്നത് ഞാൻ കാണാറുണ്ട്. അപ്പൊ ചേട്ടന്റെ കണ്ണുകളിൽ ഉണ്ടാവുന്ന ക്രോധം കാണുമ്പോ എനിക്കുപോലും ഭയം തോന്നും.” രണ്ട് മൂന്ന് പ്രാവശ്യം ഞാൻ കണ്ടിട്ടുള്ളു ചേട്ടന്റെ ആ ഭയപ്പെടുത്തുന്ന ഭാവം മനസ്സിൽ വിചാരിച്ച് വിറച്ചുകൊണ്ടാണ് അത്രയും ഞാൻ പറഞ്ഞത്. “എന്നോട് സത്യങ്ങളെല്ലാം പറയുമെന്ന് പറഞ്ഞിട്ട് ഇപ്പൊ പിന്നെയും വളച്ചുകെട്ടല്ലെ അണ്ണാ.”
“ഞാൻ വളച്ചുകെട്ടാനല്ല ശ്രമിച്ചത്. സംഭവങ്ങൾ അതിന്റെ ഓര്ഡരിൽ പറഞ്ഞാലേ നിനക്ക് മനസ്സിലാക്കാൻ കഴിയൂ.”
“ശെരിയാണ്.” ഞാനും സമ്മതിച്ചു. “അണ്ണൻ ഓര്ഡരിൽ തന്നെ പറഞ്ഞോളൂ. പക്ഷേ അണ്ണാ, ചേട്ടന് ചെകുത്താന് എന്ന പേര് എങ്ങനെയാണ് കിട്ടിയതെന്ന് ആദ്യം പറയാമോ..?”
ഉടനെ അണ്ണൻ പൊട്ടിച്ചിരിച്ചു. മല്ലി ചേച്ചിയും ഒപ്പം ചിരിച്ചു.
“അവന്റെ ബിസിനസ്സ് നേട്ടങ്ങളെ തകർക്കാൻ വേണ്ടി ചില വലിയ ബിസിനസ്സ് രാജാക്കന്മാര് ട്രൈ ചെയ്തിരുന്നു. പക്ഷേ തകര്ന്നത് അവരൊക്കെയാണ്. ബിസിനസ്സ് രാജാക്കന്മാരായിരുന്ന അവരെ ഭിക്ഷക്കാരാക്കി നിന്റെ ചേട്ടൻ. അവനെ കൊല്ലാൻ ശ്രമിച്ചവരെ എല്ലാം അവന് കോമയിലാക്കി. അവനോട് വഞ്ചന കാണിച്ചവരേയും ഒരു ദയയും കാണിക്കാതെ അവന് ബിസിനസ്സ് സാമ്രാജ്യത്തിൽ നിന്നും തകർത്ത് തരിപ്പണമാക്കി. അവന്റെ ശത്രുക്കളുടെ പിന്താങ്ങികളായിരുന്ന ചില വലിയ പോലീസ് ഉദ്യോഗസ്ഥരെ പോലും റൂബി തെളിവുകൾ കണ്ടെത്തി നിയമപരമായി കുടുക്കി അവരുടെ ജോലിയില് നിന്നും തെറിപ്പിച്ചു കളഞ്ഞു. അങ്ങനെയാണ് ബിസിനെസ്സ് സാമ്രാജ്യത്ത് അവന് ആ പേര് കിട്ടിയത്.”