****************
കമ്പനിയുടെ ഗേയിറ്റിന് മുന്നില് നിര്ത്തിയതും ഒരു സെക്യൂരിറ്റി പുറത്തേക്ക് വന്ന് എന്റെ ഐഡി ചോദിച്ചു. ഐഡി ഇല്ലാത്തത് കൊണ്ട് ഞാൻ എന്റെ അപ്പോയിൻമെന്റ് ലെറ്റർ എടുത്തു കൊടുക്കാന് തുടങ്ങി.
“ആസാദ്, അവരെ കടത്തി വിട്.” പെട്ടന്ന് സാമുവേല് അണ്ണന്റെ ഗാംഭീര്യ ശബ്ദം മുഴങ്ങി. അതേസമയം അയാൾ പുറത്തേക്ക് നടന്നു വന്നു.
ഞാൻ സാമുവേല് അണ്ണനെ നോക്കി പുഞ്ചിരിച്ചു.
“പുതിയ കാറും എടുത്തല്ലോ..!” സാമുവേല് അണ്ണനും പുഞ്ചിരിച്ചു. എന്നിട്ട് അദ്ദേഹം ആസാദിനെ നോക്കി പറഞ്ഞു, “ഡാലിയ ഇന്ന് ഇവിടെ ജോയിൻ ചെയ്യുന്നതേയുള്ളു, അതുകൊണ്ട് ഐഡി ഉണ്ടാവില്ല. പിന്നെ ഡാലിയ നമ്മുടെ റൂബിന്റെ ആളാണ്.”
ഉടനെ ആസാദിന്റെ കണ്ണുകൾ വിടര്ന്നു. അയാള് ബഹുമാനത്തോടെ എന്നെ നോക്കി പുഞ്ചിരിച്ച ശേഷം വേഗം ചെന്ന് ആം ബാരിയർ ഓപ്പണ് ചെയ്തു.
ഞാൻ റൂബി ചേട്ടന്റെ ആളാണെന്ന് സാമുവേല് അണ്ണൻ അയാളോട് പറഞ്ഞത് കേട്ട് എനിക്ക് രോമാഞ്ചം ഉണ്ടായി. അടക്കാൻ കഴിയാത്ത സന്തോഷവും തോന്നി.
“ഡാലിയ പൊയ്ക്കൊ.” സാമുവേല് അണ്ണൻ എന്നോട് പറഞ്ഞു.
ഞാൻ മറ്റൊരു പുഞ്ചിരി കൂടി കൊടുത്തിട്ട് അകത്തേക്ക് ഓടിച്ചു പോയി.
റിസപ്ഷനിൽ ഉണ്ടായിരുന്ന 35 വയസ്സ് തോന്നിക്കുന്ന ഒരു തമിഴ് സ്ത്രീയും, 39 വയസ്സ് തോന്നിക്കുന്ന ഒരു അമേരിക്കൻ സ്ത്രീയും എന്നെ നോക്കി പുഞ്ചിരിച്ചു.
“ഹൈ. എന്റെ പേര് സംഗീത. നിങ്ങൾ ന്യൂ ജോയ്നർ ആണല്ലേ..? എന്താ പേര്..?” തമിഴ് സ്ത്രീ പുഞ്ചിരി മാറാതെ എന്നോട് ചോദിച്ചു.
“പേര് ഡാലിയ. ന്യൂ ജോയ്നർ ആണ്…” ഞാനും പുഞ്ചിരിച്ചു. ഉടനെ സംഗീത കീ ബോർഡിൽ എന്തോ ടൈപ്പ് ചെയ്തു.
“എന്റെ പേര് ഡയാന.” അമേരിക്കൻ സ്ത്രീയും പുഞ്ചിരിയോടെ ഇംഗ്ലീഷിൽ പറഞ്ഞു. “നിങ്ങളുടെ ഡിപ്പാര്ട്ട്മെന്റ് ഹെഡ് ആരാ..?” ഡയാന ചോദിച്ചു.
“മാഡം എയ്ജ്ചൽ റോസ്.” ഞാൻ പറഞ്ഞതും ഡയാന അവരുടെ കമ്പ്യൂട്ടറിൽ അല്പ്പ നേരത്തേക്ക് ബിസിയായി.
സംഗീത എന്നോട് മറ്റു ചില ഡീറ്റയിൽസൊക്കെ ചോദിച്ചു, ഞാൻ മറുപടി കൊടുത്തത് എല്ലാം അവർ കമ്പ്യൂട്ടറില് എന്റർ ചെയ്തു.
“ഓക്കെ. ഫോർത്ത് ഫ്ലോറിൽ D8 ഓഫീസ്. സെക്കന്റ് ലിഫ്റ്റിൽ കേറി ഡാലിയ അങ്ങോട്ട് പൊയ്ക്കോളു.” ഒടുവില് സ്ക്രീനില് നിന്നും മുഖം ഉയർത്തി ഡയാന എന്നോട് പറഞ്ഞു.
ഞാൻ പുഞ്ചിരിയോടെ അവര്ക്ക് നന്ദി പറഞ്ഞിട്ട് മൂന്ന് ലിഫ്റ്റുകൾ ഉള്ള ഭാഗത്തേക്ക് നടന്നു.
അഞ്ചു മിനിറ്റ് നേരത്തെ തന്നെ റോസ് മേഡത്തിന്റെ ഓഫിസ് ഡോറിൽ ഞാൻ നോക് ചെയ്തു.
“കമിന്…” അകത്തു നിന്നും അനുവാദം കേട്ടതും ഞാൻ ഡോർ തുറന്ന് അകത്തു കയറി.
വിശാലമായ ഓഫീസ് ആയിരുന്നു അത്. അകത്ത് അമേരിക്കനായ റോസ് മേഡം മാത്രമല്ല സീനത്തും ഉണ്ടായിരുന്നു. സീനത്ത് എന്നെ കണ്ടതും പുഞ്ചിരിച്ചു.
റോസ് മേഡം അല്പം നേരത്തേക്ക് എന്നെ സൂക്ഷിച്ചു നോക്കിയ ശേഷമാണ് പുഞ്ചിരിച്ചത്.
“ഡാലിയ ഇരിക്ക്.” സീനത്തിന് അടുത്തുള്ള കുഷൻ ചെയർ ചൂണ്ടി റോസ് മേഡം ഇംഗ്ലീഷിൽ പറഞ്ഞു. അപ്പോ ഞാൻ എന്റെ ഹാന്ഡ് ബാഗും ലാപ്ടോപ്പും സീനത്ത് അവളുടെ സാധനങ്ങൾ വച്ചിരുന്ന അതേ ടീപ്പോയിൽ വച്ചിട്ട് സീനത്തിനടുത്ത് ചെന്നിരുന്നു.
റോസ് മേഡം ഒരു വലിയ ഗ്ളാസ് ടെബിനിന് അപ്പുറത്താണ് ഇരുന്നത്. ടേബിളിൻമേൽ രണ്ട് ലാപ്ടോപ്പും, റോൾ ചെയ്തു വച്ചിരുന്ന കുറെ കളർ ചാര്ട്ടുകളും ഉണ്ടായിരുന്നു.
“ആദ്യമെ ഞാൻ നിങ്ങളോട് ഓപ്പണായി കാര്യങ്ങൾ വ്യക്തമായി പറയാം.” റോസ് മേഡം പെട്ടന്ന് ഗൗരവത്തിലായി.
“എട്ട് മണിക്കൂറാണ് നമ്മുടെ നോർമൽ ഡ്യൂട്ടി. ഡ്യൂട്ടി സമയം രാവിലെ 8:00 മുതൽ വൈകിട്ട് 4:30 വരേയും. ഉച്ചക്ക് 12:30 മുതൽ 1:00 മണിവരെ ലഞ്ച് ബ്രേക്ക്.”
റോസ് മേഡം പറഞ്ഞത് കേട്ട് ഞാനും സീനത്തും തലയാട്ടി.
“നിങ്ങൾ വെബ് ഡെവലപ്പർസ് ആണെന്ന് അറിയാം, പക്ഷെ നമ്മുടെ ഈ കമ്പനിയുടെ പോളിസി അല്പ്പം ഡിഫ്റണ്ടാണ്.” റോസ് മേഡം ഞങ്ങളെ സൂക്ഷിച്ചു നോക്കിക്കൊണ്ട് പറഞ്ഞു. “ഇവിടെ നിങ്ങളുടെ ഈ ജോലി മാത്രമല്ല, ഐടി ഫീല്ഡുമായി ബന്ധപ്പെട്ട് ഈ കമ്പനിയിലുള്ള എല്ലാ ഡിപ്പാര്ട്ട്മെന്റിലും ഷിഫ്റ്റ് മാറി നിങ്ങള്ക്ക് വർക്ക് ചെയ്യേണ്ടി വരും.”