പൊട്ടികരയുന്ന അവളുടെ മുഖത്തുനിന്നും അവൾ ചെയ്ത തെറ്റിനുള്ള പശ്ചാത്താപം ഉണ്ടായിരുന്നു. എനിക്ക് എന്ത് ചെയ്യണമെന്നറിയാതെയായി. അവളെ ഇത്രേം കാലം അകറ്റി നിർത്തിയതിൽ ഞാൻ എന്നെ തന്നെ വെറുത്തു. പാവം പെണ്ണ്.. എല്ലാവരുടെയും നടുവിൽ കിടന്ന് അവൾ ഒരുപാട് അനുഭവിച്ചു.. കൂടുതൽ എനിക്ക് പിടിച്ചു നിൽക്കാൻ കഴിഞ്ഞില്ല..
അവളുടെ അടുത്തേക്ക് ചെന്നു. തിരിഞ്ഞു നിന്ന അവളെ തോളിൽ പിടിച്ചു എന്റെ നേരെ നിർത്തി.. അത്ഭുതത്തോടെ അവളെന്റെ കണ്ണുകളിലേക്ക് നോക്കി.. ധാരയായി ഒഴുകുന്ന കണ്ണുനീർ ഞാൻ തുടച്ചു കൊടുത്തപ്പോൾ അവളെന്നെ പൊട്ടി കരഞ്ഞുകൊണ്ട് കെട്ടിപിടിച്ചു.. എനിക്കും കരയാതിരിക്കാൻ കഴിഞ്ഞില്ല.. കുറെ നേരം ഞങ്ങൾ കെട്ടിപിടിച്ചു കരഞ്ഞു..
“”നിനക്കൊന്നു വിളിച്ചൂടായിരുന്നോ പെണ്ണെ ..”” കരയുന്നതിനിടയിൽ ഞാൻ ചോദിച്ചു.
“”എങ്ങനെ വിളിക്കും, അന്ന് മുതൽ നിന്റെ ഫോൺ സ്വിച്ച് ഓഫ് അല്ലെ. “” വിതുമ്പി അവളതു പറഞ്ഞപ്പോൾ അവളുടെ കൈകളിൽ ഞാനൊന്നു തടവി. പെട്ടെന്ന് എന്തോ കൈകളിൽ തടഞ്ഞ ഞാൻ അവളെ മാറ്റി നിർത്തി അത് നോക്കി..
“”എന്തായിത് “” അവളുടെ കൈകളിൽ പിടിച്ചു ഞാൻ ചോദിച്ചു.
“”ഒന്നുമില്ല.”” കൈ പിന്നിലേക്ക് പിടിച്ചവൾ പറഞ്ഞു..
“”ഇനിയും എന്നോട് എല്ലാം ഒളിച്ചുവെക്കണമെന്നുണ്ടോ?”” ആ ചോദ്യത്തിൽ അവളെന്നെയൊന്നു നോക്കി..
“”അത്.. നിന്നെ നഷ്ടപ്പെട്ടു എന്ന് കരുതി ഞാൻ.. ഞാൻ കയ്യൊന്നു മുറിച്ചതാ “” തുളുമ്പി നിൽക്കുന്ന കണ്ണുകളുമായി അവളതു പറഞ്ഞപ്പോൾ എനിക്ക് എന്നെ നിയന്ത്രിക്കാനായില്ല.. അവളെ കെട്ടിപിടിച്ചു ഞാൻ കരഞ്ഞു പൊട്ടിക്കരഞ്ഞു.. ഉറക്കെ.. എന്നെ ഇത്രെയും ഇവൾ സ്നേഹിക്കുന്നുണ്ടോ..
“”എന്തിനാടീ പോന്നേ നീ അങ്ങനെ ചെയ്തേ.. “”
ഇടറിയ ശബ്ദത്തോടെ ഞാൻ ചോദിച്ചു..
“”നിനക്ക് അറിയില്ല എന്റെ വേദന, അച്ഛന് സുഖമില്ലാതായപ്പോൾ മാത്രമാണ് ആ ശ്രമങ്ങൾ ഞാൻ ഉപേക്ഷിച്ചത്.. പിന്നീട് അച്ഛന് ഒന്നും ചെയ്യാൻ കഴിയാഞ്ഞിട്ടാണ് ഞാൻ ജോലിക്ക് പോയത്..””
“”നീയെന്തിനാ അങ്ങനെയൊക്കെ ജോലിക്ക് പോകുന്നെ.. ഒരു വാക്ക്… ആ ഇനി പറഞ്ഞിട്ട് കാര്യമില്ല.. ഇനിയാ ജോലിക്ക് പോകണ്ടാ “”
“”അല്ലെങ്കിലും ഇനിയാ ജോലിക്ക് പോകാൻ പറ്റില്ല. 10 ദിവസം അടുപ്പിച്ചു ലീവ് ചോദിച്ചപ്പോൾ തന്നെ എന്നോട് അവർ പോകാൻ പറഞ്ഞു.. പക്ഷെ എനിക്കതിനേക്കാളും വലുത് നീയാ. നിന്നെ കാണാൻ വേണ്ടി മാത്രമാണ് ആ ജോലി ഉപേക്ഷിച്ചു ഞാൻ ഇങ്ങോട്ട് വന്നേ. ഒരു പക്ഷെ നീയെന്നെ മൈൻഡ് ചെയ്യാതെ പോയെങ്കിൽ പിന്നെയൊരു ദിവസം എന്റെ ജീവിതത്തിൽ ഉണ്ടാവില്ലായിരുന്നു.”” ഒരു നെടുവീർപ്പോടെ അവളതു പറഞ്ഞു..
“”ടീ ഇങ്ങോട്ട് നോക്കിയേ, നിന്നോടുള്ള ദേഷ്യത്തേക്കാളും കൂടുതൽ നിന്നോടെനിക്ക് ഇഷ്ടമുണ്ട്. നീ അടുത്തേക്ക് വരുമ്പോ എനിക്ക് പേടിയായിരുന്നു.. ഞാൻ നിന്നെ കെട്ടിപിടിക്കുമോന്നു. അത്രയ്ക്ക് ഇഷ്ട്ടാടീ പെണ്ണെ എനിക്ക് നിന്നെ “” അവളുടെ താടിയിൽ പിടിച്ചു ഞാനതു പറഞ്ഞപ്പോൾ എന്റെ ചുണ്ടിലൊരു മുത്തം തന്നു അവൾ വീണ്ടും ഓർത്തു ഓർത്തു പൊട്ടിക്കരഞ്ഞു..
“”നമുക്ക് എല്ലാരോടും പറയണ്ടേ, വാ നിന്റെ നിരപരാധിതം എല്ലാവരും അറിയട്ടെ .. വാ “” അവളെന്റെ കൈകൾ പിടിച്ചു നടന്നു.. ഒരു അധികാരം കയ്യിൽ കിട്ടിയ പോലെയായിരുന്നു അവൾ.
“”വേണ്ട,, നിന്റെ അച്ഛന്റെ അവസ്ഥ എന്നേക്കാൾ കൂടുതൽ നന്നായി എനിക്കറിയാം. വയ്യാണ്ടിരിക്കുന്ന സമയത്ത് അമ്മാവന് ഇതൊന്നും താങ്ങില്ല.. വേണ്ട.. നീ എന്നെ ചതിച്ചിട്ടില്ല എന്ന് എനിക്ക് മനസിലായല്ലോ അതുമതി “” പോകാൻ തുനിഞ്ഞ അവളെ പുറകിലേക്ക് വലിച്ചു കൊണ്ടു ഞാൻ പറഞ്ഞു.
“”എടാ നീ “” എന്തോ പറയാൻ വന്ന അവളുടെ വായ ഞാൻ പൊത്തി പിടിച്ചു..
“” വേണ്ട ഒന്നും പറയണ്ട “” അവളെ പിടിച്ചു ഞാൻ കൈവരികളുടെ അടുത്തേക്ക് ചെന്നു നിന്നു.
കൈ വരികളിൽ കുത്തി നിന്ന് താഴത്തേക്ക് നോക്കി നിന്നു. ഓണനാളിലെ കളികളുമായി പിള്ളേരെല്ലാവരും മുറ്റത് ആഘോഷത്തിലാണ്..