“എന്റെ പൊന്നു മോനെ, ഇത്രയൊക്കെ ഇവിടെ നടന്നിട്ടും ഞാനൊന്നും അറിഞ്ഞില്ലാലോ, ശെയ്! ഹല്ലാ; എന്നിട്ട് നിനക്കാ കാന്താരിയെ കണ്ടുപിടിക്കാൻ ഇതുവരെ പറ്റിയില്ലെന്നാണോ പറയുന്നേ ?”
എന്റെ വീട്ടിലെ തന്നെ മുകൾ നിലയിലെ മുറിയിൽ ബെഡിലേക്ക് ചാരിയിരുന്നുകൊണ്ട്, ബാൽക്കണിയിലേക്ക് ഞാൻ നോക്കുമ്പോ ഈയിടെ വെച്ചു പിടിപ്പിച്ച Exotic Rose Papageno ഇളം കാറ്റിൽ ഇടയ്ക്കിടെ എന്നെയൊന്നു തല ചരിച്ചു നോക്കുന്ന പോലെയെനിക്ക് തോന്നി. കാന്താരിയെ കണ്ടുപിടിക്കണ്ടേ എന്നിപ്പോളെന്നോട് ചോദിച്ചത് സണ്ണിയാണ്. അവൻ എന്റെ വീട്ടിലേക്ക് കുറച്ചു മുൻപ് വന്നതേയുള്ളു. റെജിൻ ഏകദേശം ഒരു മണിക്കൂറിൽ കൂടുതലായി വന്നിട്ട്. സണ്ണി എന്റെ ക്‌ളാസ് മേറ്റും റെജിനെന്റെ ജൂനിയറുമാണ്.
“അല്ലേലും എന്നെ പറഞ്ഞാ മതിലോ, സണ്ണീ… ? ദേ നിക്കുന്നത് കണ്ടില്ലേ, CID പാച്ചുവാണെന്നും പറഞ്ഞിട്ടൊരുത്തൻ, നിനക്ക് തന്ന സമയം തീർന്നു റെജിനെ. കാര്യങ്ങളെ അവിയല് പോലെ ആക്കി തരാൻ നീ മിടുക്കനെന്നു ഞാനിപ്പോഴാണ് മനസിലാക്കിയത്, അവളിന്നു വൈകീട്ടെന്നെ വിളിച്ചപ്പോൾ, സംസാരിക്കുന്ന കൂട്ടത്തിൽ എന്നോട് ഒരു സംശയം പോലെ പറഞ്ഞു ചിരിക്കുകയും ചെയ്തു!!! ഗേൾസ് ഹോസ്റ്റലിന്റെ മുന്നിൽ കിടന്നു കറങ്ങിയാൽ….CID ക്കു പെൺപിള്ളേർടെ കയ്യീന്ന് അടി കിട്ടും ന്ന്..”
“ഇനി ഏതെങ്കിലും ആമ്പിള്ളേര് പ്രാങ്ക് പോലെ ഒപ്പിക്കുന്ന പണി ആണെങ്കിലോ… മാത്യു!” റെജിന്റെ പ്ലിങ്ങിയ ചിരിയുടെയുള്ള സംശയം കേട്ടതും എനിക്ക് പെരുത്ത് വന്നു.
“ഹേ, അതൊന്നും അല്ലേടാ …. റെജിനെ, നമ്മളെ അങ്ങനെ പണി തരാനും മാത്രം, കോളേജിൽ ആർക്കാണ് ധൈര്യം! സെക്കൻഡ് ഇയറിൽ ഞങ്ങൾ ഹോസ്റ്റലിൽ കേറി തല്ലുണ്ടാക്കിയത് അറിഞ്ഞ ആരേലുമീപ്പണി ചെയ്യുമോ?!” റെജിനോട് സണ്ണി അങ്ങനെ പറയുമ്പോ അവൻ മുറിയിലെ മൂലയിൽ വെച്ചിരിക്കുന്ന സ്റ്റഡി ടേബിളിന്റെ മുകളിൽ കയറി ഇരുന്നുകൊണ്ട് ചുവരിലെ ബോബ് മാർലിയുടെ ഫോട്ടോയിലേക്ക് ഒന്ന് നോക്കി. ഒപ്പം പെട്ടെന്നെന്തോ മനസ്സിൽ സ്ട്രൈക്ക് ചെയ്തു കിട്ടിയപോലെ അവനെന്നോട് പറയാൻ തുടങ്ങി.
“ടാ മാത്യു. ഇതിപ്പോ വല്യ പണിയൊന്നുമല്ലെടാ, അവളെ നമുക്ക് കണ്ടുപിടിക്കാം….. പിന്നെ നീ പറഞ്ഞില്ലേ, നിന്നെ അവൾ ഇടക്ക് ലാൻഡ്‌ലൈനിൽ വിളിക്കാറുണ്ടെന്നു. നീ ആ നമ്പറിലേക്ക് തിരിച്ചു വിളിച്ചോ…”
“അതൊക്കെ ഞാൻ നോക്കിയതാണ്, സണ്ണീ, പിന്നെ അതൊരു ബൂത്തിലെ നമ്പർ ആയിരുന്നെടാ…” ഞാനത് പറയുമ്പോ അവനും ഊഹിച്ചു കാണും കോളജിന്റെ മുന്നിൽ മൂന്നാലു ടെലിഫോൺ ബൂത്ത് ഉള്ളകാര്യം.
“എന്തായാലുമവൾക്ക് സ്വന്തമായി സെൽഫോൺ ഉണ്ടാകുമായിരിക്കും, ഇതിപ്പോ നിന്നെ മനഃപൂർവം ചുറ്റിക്കാൻ വേണ്ടിയാണ് എന്നുള്ളത് അത് ക്ലിയർ ആണ്.” സണ്ണിയത് പറഞ്ഞുകൊണ്ട് എന്നോട് സിഗരറ്റ് വാങ്ങിച്ചു കത്തിക്കാൻ തുടങ്ങി.
“ഇനി അവൾക്ക് നിന്റെ മുന്നിൽ വരാൻ ഇനി പേടിയാണെങ്കിലോ? ഇങ്ങനെയുമുണ്ടോ പെൺകുട്ടികൾ!!!!!” അല്ല! നീയത്രക്ക് നല്ല പേരാണല്ലോ ….കോളജിൽ ഉണ്ടാക്കിയേക്കുന്നെ!!!” റെജിനെകൊണ്ട് പറ്റില്ല എന്നുള്ള ബോധം അവനെ ശെരിക്കും പ്രാന്തനാക്കി എന്ന് വെണം പറയാൻ. ഞാൻ അവനെ നോക്കുമ്പോ അവൻ ഓരോന്ന് വയിട്ടലച്ചുകൊണ്ടിരുന്നു. പെണ്ണ് ജയിക്കുന്ന ഇടത്തു ആണിന് ഈഗോ ഹേർട്ട് ആകുകയും ചെയുന്നത് സാധാരണയാണല്ലോ!
“ഇനിയിപ്പോ ഒരാഴ്ച്ച കൂടിയേ ഉള്ളു നമ്മടെ ക്‌ളാസ് കഴിയാൻ!!!”
“ഒന്ന് മിണ്ടാതിരിക്ക് റെജിനെ….”
സണ്ണിയും ക്ഷമ നശിച്ചു കൊണ്ടത് പറയുമ്പോ എനിക്കുമെന്തോ റെജിനെ പിടിച്ചു ഒന്ന് പൊട്ടിക്കാൻ തോന്നി, അവനെ ഞാനൊന്നു കലിപ്പിച്ചു നോക്കിയതും അവൻ തല താഴ്ത്തി.
“അത്, വിട്; ബിയർ ഇരിപ്പുണ്ടോ മാത്യു….?!” സണ്ണി റെജിനെ നോക്കി ചിരിച്ചു കൊണ്ട് സമാധാനിപ്പിച്ചു. സണ്ണിയോട് ഞാനനുഭവിക്കുന്ന ഈ മാനസിക വിഷമം, ഞാനിതു നേരത്തെ പറയാത്തതിൽ എനിക്കൊരു വിഷമം ഉള്ളിൽ തോന്നാതിരുന്നില്ല, പക്ഷെ അവൻ ഈയിടെ സപ്പ്ളി എക്സാം ഒക്കെ ആയി തിരക്കായിരുന്നല്ലോ! അവനോടു പറഞ്ഞാൽ അവനെന്നെ എല്ലാം വിട്ടെറിഞ്ഞു ഹെല്പ് ചെയുകയും ചെയ്യും.
“താഴെ ഫ്രിഡ്ജിലുണ്ടല്ലോ…” എന്റെ ചുണ്ടിനു മീതെയുള്ള വെട്ടിയൊതിക്കിയ മീശയെ ഇടം കൈ ചൂണ്ടു വിരൽകൊണ്ട് താത്തി പിടിച്ചുകൊണ്ട്, ഞാൻ സണ്ണിയോട് വാങ്ങി വെച്ചിട്ടുണ്ടെന്ന അർഥത്തിൽ ചിരിച്ചു. ഞായറാഴ്ച മാത്രമേ ഞങ്ങൾക്കീ പരിപാടിയുള്ളൂ. അതും അപ്പന്റെ സമ്മതത്തോടെ! ആള് റിട്ടയർ പോലീസ് സിംഹം ആണ്. മുൻപൊരിക്കൽ പുറത്തു വെള്ളമടിച്ചു ഞങ്ങൾ മൂന്നും കൂടെ ബഹളം ഉണ്ടാക്കിയപ്പോൾ അപ്പൻ അന്ന് കലിപ്പിൽ കല്പിച്ചതാണ് വീട്ടിൽ വെച്ചടിച്ചോളാൻ. അതീ പിന്നെയാണീ മുറി വല്ലപ്പോഴും ബിയർ മണം കൊണ്ട് കിക്ക് ആവുന്നത്…
“നിന്റെ അപ്പൻ വന്നിട്ടുണ്ടാകുമോ?! ഞാൻ വരുമ്പോ ഉണ്ടായിരുന്നില്ല…”
“ഉണ്ടാകും… ഇച്ചിരി മുൻപ് കാർ വന്നു പോർച്ചിലേക്ക് കയറുന്നത് ഞാൻ കെട്ടായിരുന്നു, അപ്പനറിയാത്തത് ഒന്നുമല്ലലോ, നീ പോയി എടുത്തേച്ചും വാ സണ്ണീ. നിനക്ക് വേണോ…റെജിനെ?!”
റെജിൻ, വെറും ഒരാഴ്ച കൊണ്ട് എന്നെ ചുറ്റിക്കുന്ന ആ പെണ്ണിനെ പുഷ്പം പോലെ കണ്ടുപിടിച്ചു മുന്നിലിട്ട് തരാമെന്നൊക്കെ തള്ളി മറിച്ചിട്ട് നടപ്പില്ല എന്ന് മനസിലായപ്പോൾ ഒഴിയാൻ വന്നതാണിപ്പോ എന്റെ വീട്ടിലേക്ക്. പിന്ന ഓഫ്‌കോർസ് ബിയർ അടിക്കാനും. സണ്ണി വരും മുന്നേ എല്ലാം പറഞ്ഞു തീർക്കാൻ ആയിരുന്നു അവന്റെ പ്ലാൻ! അപ്പോഴേക്കും സണ്ണിയും വന്നല്ലോ.
“ബിയർ വേണം, അതിനല്ലേ വന്നത് ഹിഹി, പക്ഷെ തിരികെ പോകുമ്പോ മാമന്മാര് നമ്മളെ ഊതിക്കുമോ സണ്ണി!” റെജിൻ ഒരു തവണ പെട്ടിട്ടുണ്ട് പിന്നെ അപ്പൻ ആണ് വിളിച്ചു പറഞ്ഞിട്ട് അവനെയിറക്കിയതും, എന്നാലുമവൻ അപ്പന്റെ മുന്നിൽ വെച്ചിട്ടും ഇടക്ക് അടിക്കാറൊക്കെ ഉണ്ട്.
“ജോർജ്‌ വർഗീസ് അല്ലെ താഴെ ഇരിക്കുന്നെ, വിളിച്ചു പറയിക്കാം… അല്ലെ മാത്യു!” സണ്ണി ചിരിച്ചുകൊണ്ട് ടേബിളിൽ നിന്നും ചാടിയിറങ്ങി റെജിൻ അന്നേരം ബാല്കണിയിലേക്ക് നടന്നു വിദൂരതയിലെ ഇരുട്ടിലേക്ക് നോക്കി, ചെറു മിന്നാമിനുങ്ങളെ കൈവീശിക്കൊണ്ടിരുന്നു.
“എന്റെ പൊന്നു സണ്ണീ, ഇന്നാളത്തെ പോലെ ഒന്നുടെ വേണ്ട, അപ്പൻ എല്ലാം കുറക്കാൻ എന്നോട് പറഞ്ഞിട്ടുണ്ട്!”
ഏറെ നേരമായി എസി 19 ലു ഇട്ട എന്റെ മുറി നല്ല തണുപ്പുണ്ട്, ഞാൻ ബെഡിലേക്ക് തന്നെ ചരിഞ്ഞിരുന്നു. കാല്‌ പെരുവിരൽ വിരലൊന്നു മടക്കി പൊട്ടിച്ചു. വെള്ള പൂക്കൾ വിരിച്ച കിടക്കവിരിപ്പിലേക്ക്, നോക്കിയിരുന്നു. ബെഡിൽ നിറയെ പേരു പോലും അറിയാത്ത, കാണാൻ സുന്ദരിയാണോ എന്നറിയാത്ത…. എന്നെ ആദ്യമായി പ്രേമകുഴിയിൽ തള്ളിയിട്ട പെൺകുട്ടിയുടെ, മുപ്പതിലേറെ കത്തുകൾ നിരത്തിയിട്ടിരുന്നു…..
