ഞാനതിലേക്ക് നോക്കുമ്പോ ദൂരെയെങ്ങോ എന്നെ വട്ടു പിടിപ്പിക്കുന്നതിൽ ത്രിൽ അടിച്ചുകൊണ്ട് ഒരു കാന്താരിയുടെ ചിരി എന്റെ മനസിലേക്ക് വന്നുകൊണ്ടിരുന്നു.
“അങ്കിളേ… സ്‌കോർ എന്തായി!”
“270/8 നമ്മൾ ജയിക്കുമെടാ എന്തായാലും… എന്താടാ സണ്ണീ, കാര്യമായ ചർച്ച ആണല്ലോ മൂന്നും കൂടെ!”
“ഇല്ല അങ്കിളേ, ക്ളസ്സൊക്കെ കഴിയാറായില്ലേ…അതിന്റെ”
“എടുക്കുന്നില്ലേ!???”
“എന്താ അങ്കിളേ..”
“നീ ബിയർ എടുക്കാനല്ലേ വന്നത്…?! എടുത്തോ…”
“ഹിഹിഹി….”
സണ്ണി ബിയറും എടുത്തു വന്നു അടി തുടങ്ങുമ്പോ റെജിൻ ബാൽക്കണിയിൽ നിന്നുകൊണ്ട് വലിക്കുന്നുണ്ടായിരുന്നു.
“സെക്കൻഡ് ഇയർ എക്സാം കഴിഞ്ഞാൽ വെക്കേഷന് ഞാൻ ചേച്ചിടെ വീട്ടിൽ, ബാംഗ്ലൂർ പോവാണ് മാത്യു…”
“മാത്യു…”
“ടാ”
“കേള്ക്കുന്നുണ്ട്..നീ ബാംഗ്ളൂർ പോവാണ് എന്നല്ലേ!…നീ എവിടേലും ഒന്ന് പോ റെജിനെ….” മൂഡ് തീർത്തും മടുപ്പായത് ഞാനറിഞ്ഞു.
“അല്ല മാത്യു ഞാനാലോചിക്കുന്നത്… ഇനി ഇത് നിങ്ങളുടെ ക്‌ളാസ്സിലെ തന്നെ ആരെങ്കിലും ആണൊന്നാണ്…. ഇത്രേം നാളും പറയാതെ, ഇനിയിപ്പോ നിന്നെ പിരിയുന്ന ദുഃഖം കൊണ്ടാണെങ്കിലോ…?!! ചില പെണ്ണുങ്ങൾ അങ്ങനെയൊക്കെ ചെയ്യാറുണ്ടെന്നു കേട്ടിട്ടുണ്ട്, മറഞ്ഞിരിക്കുന്ന ഈ പെണ്ണും ഇതുപോലെ അല്ലെ കത്തും ഫോണുമൊക്കെ ചെയ്തു നിന്നെ….” റെജിൻ നീട്ടിയൊരു പുകയൂതി കൊണ്ട് തിരിഞ്ഞു നിന്നുകൊണ്ടെന്നോടു ആ സംശയവും പങ്കുവെച്ചു.
“ഹേയ് ഒട്ടും സാധ്യതയില്ലേടാ…..” ഞാൻ അവന്റെ സംസാരം പാതിയിൽ മുറിച്ചുകൊണ്ട് അവനെ തന്നെ നോക്കുമ്പോ സണ്ണി പതിയെ ബിയറുമെടുത്തു മുറിയിലേക്ക് കയറി വാതിൽ ചാരി.
“എന്ത് സാധ്യതയില്ലാന്നു..?!!” സണ്ണി ബിയർ ടേബിളിൽ വെച്ചുകൊണ്ട് മസാല പീനട്സ് പാക്കറ്റ് പൊട്ടിച്ചു പ്ളേറ്റിലേക്ക് ആക്കി.
“റെജിൻ പറയുവാണ്, നമ്മുടെ ക്‌ളാസിലെ കക്ഷികൾ ആരെങ്കിലുമാണോന്ന്….”
“ഹഹ ഇവനെയൊക്കെയാരാണ് CID പാച്ചു എന്ന് വിളിക്കുന്നത്, ഇവനെ ഒക്കെ വിളിക്കേണ്ടത്… തായും പൂയും കൂട്ടിയാണ്…”
“സണ്ണീ…എങ്കിൽ ഇയാള് കണ്ടുപിടിച്ചങ്ങു മുന്നിൽ നിർത്തു, വെറുതെ എന്നെ…. ഞാൻ അറ്‌ലീസ്റ് ട്രൈ ചെയുക എങ്കിലും ചെയ്തിട്ടുണ്ട്. എന്നിട്ടു ഇവിടെ ലേഡീസ് ഹോസ്റ്റലിന്റെ മുന്നിൽ കൂടെ നടന്നു ഉള്ള കൂക്കും കിട്ടി നാറി നാണം കേട്ട് വരുവാ ഞാൻ!! ഒരുവിധത്തിൽ എങ്ങനെയോ അടി കൊള്ളാതെ രക്ഷപെട്ടു.!”
“പെണ്പിള്ളേരുടെ കയ്യിന്ന് കിട്ടണമായിരുന്നു നിനക്കൊക്കെ!” സണ്ണി ചിരിച്ചുകൊണ്ട് ബിയർ കുപ്പിയുടെ കഴുത്തു പൊട്ടിച്ചു.
“സണ്ണീ…. നീ അവളെഴുതിയ കത്തുകൾ നീ ഒന്ന് വായിച്ചു നോക്ക്….., പൈങ്കിളി പെണ്ണാണ് അവൾ! പക്ഷെ അത്ര പൊട്ടിയില്ല! ലേശം കുറുമ്പു ഉണ്ട് താനും…”
അത് പറയുമ്പോ മുൻപൊരിക്കലും ഞാനീ കത്തുകൾ ഇത്ര സീരിയസ് ആയിട്ടെടുത്തിരുന്നില്ല! പക്ഷെ വീണ്ടും വീണ്ടും വായിക്കുമ്പോ പെണ്ണിന്റെ മനസിലേക്ക്…….ആ ചുരുളിയിലേക്ക് എന്നെ വലിച്ചങ്ങവളിടുമ്പോ എനിക്ക് തിരികെ പോരാൻ കഴിയുന്നില്ല!! കണ്ടു പിടിക്കണം എന്ന് മനസ്സിൽ പറയുന്നുണ്ട്. ഒപ്പമെന്റെ വാശിയും കൂടെയുണ്ട്, അവളെ കണ്ടു കിട്ടിയാൽ….എന്നെ ഇങ്ങനെ വട്ടുകളിപ്പിച്ചതിനു അവളെക്കൊണ്ട് ഞാൻ…..
പക്ഷെ, ഇന്നിപ്പോ വെറും 5 ദിവസം മാത്രം ബാക്കിയുണ്ടെനിക്ക്. ഇതുവരെ സപ്പ്ളിയൊന്നുമില്ല! പക്ഷെ…. കോളേജിലെ ഞങ്ങളുടെ ഗാങ് ഒന്നിച്ചിരിക്കുന്ന വാകമരച്ചോടും, ലേഡീസ് ഹോസ്റ്റലിന്റെ എതിരെയുള്ള ആമ്പൽ കുളവും പിന്നെ കോളേജിന് പിറകിലെ ഫുട്ബാൾ ഗ്രൗണ്ടും പോലെ….. മനസ്സിൽ എന്നെ അദൃശ്യമായി ഇത്രയും ആഴത്തിൽ പ്രണയിക്കുന്ന അവളെയും എനിക്ക് നഷ്ടമാകുമല്ലോ എന്നോർക്കുമ്പോ….
“മാത്യു നീ അടിക്കുന്നില്ലേ…” ബെഡ്റൂമിന്റെ അരികിൽ ചുവരിൽ പതിപ്പിച്ച കണ്ണാടിയുടെ മുന്നിലെ സ്റ്റാൻഡിന്റെ മുന്നിൽ ബിയർ വെച്ചിരുന്നു. എനിക്കീ തലവേദന ഒഴിവാക്കാതെ അടിക്കാൻ തോന്നുന്നില്ല. ഞാനൊരു സിഗരറ്റ് കത്തിച്ചുകൊണ്ട് ബെഡിൽ നിന്നുമിറങ്ങി ബാല്കണിയിലേക്ക് ചെന്നു. പുറത്തു നേരെ റോഡിലേക്ക് ഉള്ള വ്യൂ ആണ്.
“നീ ഇങ്ങു താ…” റെജിൻ സണ്ണിയോട് ബിയർ എടുപ്പിച്ചു. അവനും പല്ലിന്റെ ഇടയിൽ വെച്ച് കടിച്ചു തുറന്നു. എന്നിട്ട് വായിലേക്ക് കമിഴ്ത്തി തുടങ്ങി.
“പക്ഷെ ഞാനാലോചിക്കുന്നത് അതല്ല മാത്യു….ഈ മൂന്നു വർഷത്തിൽ, കോളേജിൽ നിന്നും ആകെ 6 പെൺകുട്ടികൾ നിന്നോട് പ്രണയാഭ്യര്ത്ഥന നടത്തിയിട്ടുണ്ട്! എന്റെ കൌണ്ട് കറക്ട് അല്ലെ….എഹ് പിന്ന അതിലൊരുത്തി നമ്മടെ റോഷ്ണി മിസ്സും ഉണ്ട്! എന്നിട്ടും… ഈ മരങ്ങോടൻ ആരോടെങ്കിലും തിരിഞ്ഞൊന്നു നോക്കിയാതായി ഞാൻ കേട്ടിട്ടില്ല!”
“അതിലെനിക്കൊരു ദുഖവുമില്ല റെജിനെ…..ഇപ്പോഴും! പക്ഷെ ഈ കുട്ടി. അവളെ കണ്ടിട്ടില്ലെങ്കിലും, ഞാൻ കാമ്പസിൽ ഒരല്പം ബലം പിടിച്ചു നടക്കുന്നവൻ ആണെന്ന് അവൾക്കറിയാം, എന്നിട്ടും എന്നെ ഒരു കുഞ്ഞിനെ പോലെ ആണ് അവളെഴുതിയ എഴുത്തിൽ…..എല്ലാം അവൾ കൊഞ്ചിച്ചുകൊണ്ട് ഓരോന്ന് പറയുന്നത്. പക്ഷെ ഫോൺ ചെയ്യുമ്പോ അവളുടെ ഉള്ളിൽ നല്ല പേടിയുണ്ട് താനും…
“പിടിക്കപെടുമോ എന്ന പേടിയാകും” സണ്ണി ഇടയിൽ കയറി പറഞ്ഞുകൊണ്ട് നിലക്കടല കൊറിച്ചു.
“കേൾക്ക്…..എന്നിട്ടും ധൈര്യം വരുത്തിയാണ് അവളെന്നെ വിളിക്കുന്നത് എന്നാണ് അവൾ പറയുന്നത്. പിന്നെ മുഖം കാണിക്കാതെ പ്രണയിക്കുമ്പോ ഉള്ള സുഖം. അത് വല്ലാത്ത ഒരു ത്രില്ല് ആണ് പോലും…!!!!! എന്റെ കയ്യില് കിട്ടിയാലുണ്ടല്ലോ…..!!!!”
സണ്ണി അന്നേരം ബെഡിലേക്ക് ചരിഞ്ഞു ഇരുന്നുകൊണ്ട് ഏറ്റവും മേലെയുള്ള കത്തുകളിൽ ഒരെണ്ണം എടുത്തുകൊണ്ട് ഒരു ഭാഗം വായിച്ചു.
“ഹൃദയം നെഞ്ചിന്റെ ഇടതും വലതും മാറി മാറി അനുഭവപ്പെടുന്ന ഈ സുഖകരമായ രോഗം എനിക്കാദ്യം നിന്നെ കണ്ടനാൾ മുതൽ ആണ് തോന്നിയത്…. നിന്നോട് സംസാരിക്കാൻ വേണ്ടി ഫോണിൽ ഓരോ നമ്പർ ഞെക്കുമ്പോ… എന്റെ തൊണ്ടയിൽ ഒരിറ്റു വെള്ളം ഇല്ലാത്ത മരുഭൂമി പോലെ….. പക്ഷെ ദേഹം മൊത്തം കുളിരുകൊണ്ട് വിറച്ചുകൊണ്ട് വിയർക്കുന്നുമുണ്ട്…. ഈ സുഖം! മാത്യു…. ഐ ലവ് യു……”
“ഏന്റമ്മൊ കക്ഷി നിന്നെ പ്രേമിച്ചു വട്ടായിട്ടുണ്ട്!!! പക്ഷെ ഇങ്ങനെ ഉള്ള സിറ്റുവേഷൻ പെൺകുട്ടിക്കൾ പെട്ടന്ന് കലം ഉടച്ചുകൊണ്ട്‌ എന്തെങ്കിലും അബദ്ധം കാണിക്കും! പക്ഷെ ഇത്രേം പൈങ്കിളി ആയിട്ടും, ഇവൾ നിനക്ക് പിടി തരുന്നില്ലെങ്കിൽ നമ്മൾ വിചാരിക്കുന്നപോലെയല്ല….”
“അഹ് ഇപ്പൊ മനസിലായല്ലോ എന്റെ ബുദ്ധിമുട്ട്’!!”
“ഒവ്വ….!!” ഞാനും സണ്ണിയും ഒന്നിച്ചു പറഞ്ഞു.
“നമ്മളെകൊണ്ട് ഇതൊന്നും പറ്റില്ലാന്ന് ഈ അജ്ഞാത സുന്ദരിക്കും അറിയാമായിരിക്കും…” റെജിൻ പിന്നെയും മൂപ്പിക്കാൻ തുടങ്ങി.
“സുന്ദരിയോ നീ കണ്ടോ…?! റെജിനെ…” സണ്ണിയാണ് അത് ചോദിച്ചത്. പക്ഷെ ഞാൻ അതേക്കുറിച്ചു ഇതുവരെ ആലോചിച്ചിരുന്നില്ല…
