🍃 ഇതൾ 🍃- 4 4അടിപൊളി  

​അപ്പോഴും അവളുടെ വിറയൽ മാറിയിരുന്നില്ല. നെഞ്ചിൽ കൈവെച്ച്, വായ തുറന്ന് ശ്വാസമെടുക്കാൻ പാടുപെടുകയായിരുന്നു അവൾ. ഞാൻ അവളുടെ അരികിലിരുന്ന് തോളിൽ പതുക്കെ തട്ടിക്കൊടുത്തു. കാറ്റിൽ അവളുടെ നനഞ്ഞ മുടിയിഴകൾ മുഖത്തേക്ക് വീണുകിടന്നു. ഒന്നും മിണ്ടാതെ, അവളുടെ ആ ശ്വാസം നേരെയാവുന്നതുവരെ ഞാൻ കാവലിരുന്നു.

​കുറേ സമയം കഴിഞ്ഞപ്പോൾ, കടൽക്കാറ്റിന്റെ തണുപ്പിൽ അവളുടെ മനസ്സ് പതുക്കെ ശാന്തമായിത്തുടങ്ങി. വിറയൽ കുറഞ്ഞുവന്നു. സാരിത്തുമ്പ് വിരലുകളിൽ ചുറ്റിപ്പിടിച്ച്, കരഞ്ഞു വീർത്ത കണ്ണുകളോടെ അവൾ പതുക്കെ തലയുയർത്തി എന്നെ നോക്കി.

​”ഹരി… ഞാൻ…… ഞാൻ….കാരണം… അയാൾ… നിന്നെ……”

​തൊണ്ടയിടറി, ഓരോ വാക്കും വിക്കിപ്പതറിയാണ് അവൾ പറഞ്ഞുനിർത്തിയത്. ആ കണ്ണുകളിൽ എന്നെ അപമാനത്തിൽ ചാടിച്ചതിലുള്ള അങ്ങേയറ്റത്തെ കുറ്റബോധം നിറഞ്ഞുതുളുമ്പുന്നുണ്ടായിരുന്നു.

​അയാളുടെ വാക്കുകളിൽ നിന്നും അനുവിന്റെ പ്രതികരണത്തിൽ നിന്നും ആ വ്യക്തി ആരായിരിക്കുമെന്ന് എനിക്ക് ഏകദേശ ധാരണ കിട്ടിയിരുന്നു. എങ്കിലും, ആ യാഥാർത്ഥ്യം അവളുടെ സ്വന്തം നാവിലൂടെത്തന്നെ കേൾക്കണമായിരുന്നു…

​ഞാൻ അവളുടെ കണ്ണുകളിലേക്ക് നോക്കി വളരെ പതുക്കെ, ആർദ്രമായി ചോദിച്ചു.

​”അനു… അത്… ആരാ…?”

​ആ ചോദ്യം കേട്ടതും അനുവിന്റെ കണ്ണുകളിൽ വീണ്ടും കണ്ണീർ തിങ്ങിനിറഞ്ഞു. അവൾ എന്റെ മുഖത്തേക്ക് തന്നെ നോക്കി.

ഒരു നിമിഷം കണ്ണുകൾ അമർത്തിച്ചിമ്മി, വിറയ്ക്കുന്ന ചുണ്ടുകളോടെ പറഞ്ഞു.

​”എന്റെ………ഭർത്താവായിരുന്നു…!!!!!”

… എന്റെ കാതുകളിലേക്ക് ആഞ്ഞുവീണ ആ വാക്ക് കേട്ട നിമിഷം, എന്റെ ഉള്ളിൽ ലോകം മുഴുവൻ നിശ്ചലമായിപ്പോയി.

കരഞ്ഞു കലങ്ങിയ ആ കണ്ണുകളിലേക്ക് നോക്കാൻ പോലും ആവാതെ ഞാൻ അന്ധകാരത്തിൽ തളക്കപ്പെട്ടു!!!..

​ശരീരത്തിലെ സകല ഞരമ്പുകളിലെയും ചോര ഒരു നിമിഷം കൊണ്ട് വറ്റിപ്പോയതുപോലെ, തലച്ചോറിലേക്ക് ഒരു വല്ലാത്ത മരവിപ്പ് പടർന്നുപിടിച്ചു. കൺമുന്നിൽ ഇരുട്ട് മൂടുന്നതുപോലെ തോന്നി. ഞാൻ മനസ്സിൽ ദൈവത്തെപ്പോലെ പ്രതിഷ്ഠിച്ച, കൺകുളിർക്കെ നോക്കിനിന്ന ആ പെണ്ണ്… മറ്റൊരാളുടെ ഭാര്യയായിരുന്നവളാണ്! അവളുടെ ശരീരത്തിലും മനസ്സിലും മറ്റൊരാൾ നൽകിയ മായാത്ത അടയാളങ്ങളുണ്ട്… ഒരമ്മയാവാൻ കൊതിച്ച്, ആ ഗർഭപാത്രത്തിൽ മറ്റൊരുത്തന്റെ ചോരയിൽ പിറന്നൊരു കുഞ്ഞിനെ ചുമന്ന ക്രൂരമായൊരു ഭൂതകാലം അവൾക്കുണ്ടായിരുന്നു!

​ആ തിരിച്ചറിവ് എന്റെ നെഞ്ചിലേക്ക് ആഴ്ന്നിറങ്ങിയത് ഒരു കൊടുംവാളായിട്ടായിരുന്നു. എന്റെ ചുണ്ടുകൾ അനങ്ങിയില്ല. നാവ് തൊണ്ടയിൽ ഒട്ടിപ്പിടിച്ചുപോയി. അനു കരഞ്ഞുകൊണ്ട് എന്റെ മുഖത്തെ ആ ഭാവമാറ്റം നിസ്സഹായതയോടെ നോക്കിനിൽക്കുമ്പോഴും, ഒരു ജീവനറ്റ ശിലപോലെ, ശ്വാസമെടുക്കാൻ പോലും മറന്ന് ഞാൻ ശൂന്യതയിലേക്ക് നോക്കി മരവിച്ചിരിക്കുകയായിരുന്നു……….

( തുടരും…)

___________________________________________….

Past അടുത്ത പാർട്ടിൽ പറയാം….ഈ പാർട്ടിൽ എഴുതാം എന്നാണ് കരുതിയത്… But അത് നല്ല ലേറ്റ് ആകും എന്നതുകൊണ്ടാണ് അടുത്തപ്പാർട്ടില്ലാക്കിയത്…..so ꜱᴛᴀʏ ᴛᴏᴏɴ….

-മയക്കണ്ണൻ -©