🍃 ഇതൾ 🍃- 4 4അടിപൊളി  

​ആ പ്രശ്നത്തിന് അങ്ങനെ ഒരു ശാശ്വത പരിഹാരമായതോടെ വലിയൊരു ഭാരമൊഴിഞ്ഞ ആശ്വാസത്തിലായിരുന്നു പിന്നീട് ഞാൻ. അതിനിടയിൽ വീട്ടിലെ വിവരങ്ങൾ ചോദിച്ചറിഞ്ഞുകൊണ്ട് എറണാകുളത്തുനിന്ന് അച്ഛന്റെ വിളിയെത്തിയിരുന്നു. കാര്യങ്ങളെല്ലാം അമ്മ പറഞ്ഞുകേട്ടപ്പോൾ, പതിവില്ലാതെ അച്ഛൻ എന്റെ തീരുമാനത്തിനൊപ്പം ഉറച്ചുനിന്നു. അവന്റെ കൂടെയുള്ള മേമയുടെ ജീവിതം എന്നേ അവസാനിക്കേണ്ടതായിരുന്നുവെന്നും, ഞാൻ ചെയ്തതാണ് ശരിയെന്നും അച്ഛൻ തുറന്നുപറഞ്ഞത് കേട്ടപ്പോൾ മനസ്സിൽ അച്ഛനോടുള്ള ആദരവ് ഒന്നുകൂടി കൂടി. വീടിന്റെ ഉമ്മറത്തും അടുക്കളയിലുമൊക്കെ പതുക്കെ ചിരികൾ തിരിച്ചെത്തി. മേമ പതിയെപ്പതിയെ ആ പഴയ വിഷമങ്ങളിൽ നിന്നെല്ലാം മോചിതയായി വരികയായിരുന്നു. ഒടുവിൽ മേമയ്ക്ക് സമാധാനം കിട്ടിയിരിക്കുന്നു. അത് ഇനി എന്നും അങ്ങനെതന്നെ ഉണ്ടാകുമെന്നൊരു ഉറപ്പും എന്റെ ഉള്ളിൽ നിറഞ്ഞു.

​മനസ്സിൽ ഒരു ഭാരവുമില്ലാതെയാണ് പിന്നീടുള്ള

ദിവസങ്ങളിൽ ഞാൻ ഓഫീസിലേക്ക് പോയിത്തുടങ്ങിയത്. വളരെ വേഗത്തിൽ തന്നെ യുകെ ക്ലയന്റുകളുടെ വർക്കുകളും സിസ്റ്റത്തിലെ സങ്കീർണ്ണതകളും ഞാൻ പഠിച്ചെടുത്തു. എന്റെ ഏത് സംശയങ്ങൾക്കും തുണയായി, ഒരു നല്ല സുഹൃത്തിനെപ്പോലെ അനു എപ്പോഴും കൂടെത്തന്നെയുണ്ടായിരുന്നു. പഴയ ആ കാർക്കശ്യമെല്ലാം മാറി, അവൾ എന്നോട് കൂടുതൽ അയഞ്ഞതുപോലെയും മനസ്സുതുറക്കുന്നതുപോലെയും എനിക്ക് തോന്നിത്തുടങ്ങി. ഒരുപക്ഷേ, അത് എന്റെ മാത്രം തോന്നലായിരുന്നോ അതോ അവളിലും അങ്ങനെയൊരു മാറ്റം വന്നിരുന്നോ എന്ന് എനിക്ക് തീർച്ചയില്ലായിരുന്നു. ഇതിനിടയിൽ തറവാട്ടിൽ നിന്ന് ഇടയ്ക്കിടെ ഹരണിക വീട്ടിൽ വരാറുണ്ടായിരുന്നു. പണ്ടത്തെപ്പോലെ തന്നെ എന്റെ ഓരോ ചലനങ്ങളെയും വീക്ഷിച്ചും, എന്റെ പിന്നാലെ നടന്ന് അവകാശവാദങ്ങൾ ഉന്നയിച്ചും അവൾ എപ്പോഴും ചുറ്റുമുണ്ടായിരുന്നു. അത് അവളുടെ സ്വാഭാവികമായ രീതിയായതുകൊണ്ട് ഞാനും അതിലേക്ക് കൂടുതൽ ശ്രദ്ധ കൊടുക്കാൻ പോയില്ല.

അങ്ങനെ ചിന്തകളും ജോലിയുമൊക്കെയായി ആ ഒരു മാസം കണ്ണടച്ചുതുറക്കുന്ന വേഗതയിലാണ് കടന്നുപോയത്.

​ആ ഒരു മാസത്തെ സൗഹൃദത്തിനിടയിൽ എപ്പോഴോ ആണ് അനുവിനോടുള്ള എന്റെ വികാരം വെറുമൊരു സൗഹൃദത്തിനപ്പുറത്തേക്ക് വളർന്നു തുടങ്ങിയത്. ദിവസവും കാണുമ്പോഴും, ഒപ്പമിരുന്ന് ജോലി ചെയ്യുമ്പോഴും ഉള്ളിൽ മൊട്ടിട്ട ആ പ്രത്യേക അടുപ്പം വെറുമൊരു തോന്നലല്ല , മറിച്ച് തീവ്രമായ പ്രണയമാണെന്ന് തിരിച്ചറിയാൻ എനിക്ക് അധിക സമയം വേണ്ടിവന്നില്ല. കരിയറും ഭാവിയും മാത്രം ലക്ഷ്യമിട്ട് നടന്ന എന്റെ ഹൃദയത്തിലേക്ക് അവൾ അറിയാതെ കയറിപ്പറ്റുകയായിരുന്നു. ഉടനെങ്ങും അവളെ അത് പറഞ്ഞു മടുപ്പിക്കാതെ, സാവധാനം അനുയോജ്യമായൊരു സമയത്ത് തുറന്നുപറയാമെന്ന് കരുതി ആ വൺസൈഡ് ലവ് ഞാൻ ഓരോ നിമിഷവും സ്വകാര്യമായി ആസ്വദിച്ചു തുടങ്ങി. വർക്കിന്റെ ഭാഗമായി എന്റെ സിസ്റ്റത്തിന് മുന്നിലേക്ക് അവൾ ചാരിനിൽക്കുമ്പോഴൊക്കെയും, ആ ശരീരത്തിൽ

നിന്നൊഴുകിയെത്തുന്ന നേർത്ത പെർഫ്യൂമിന്റെ വശ്യമായ സുഗന്ധം എന്റെ സകല ഇന്ദ്രിയങ്ങളെയും മയക്കി മറ്റേതോ ഒരു സ്വപ്നലോകത്തേക്ക് കൂട്ടിക്കൊണ്ടുപോകുമായിരുന്നു. ആ സാമീപ്യം എനിക്ക് ഓഫീസിലെ ഓരോ ദിവസവും പുതിയൊരു അനുഭവമായി മാറി.

സിസ്റ്റത്തിൽ ലണ്ടൻ പ്രോജക്റ്റിന്റെ വീക്ക്‌ലി ഡാറ്റാ ഷീറ്റ് അപ്‌ഡേറ്റ് ചെയ്തുകൊണ്ടിരിക്കുമ്പോഴാണ് ഇന്റർകോം ബെല്ലടിച്ചത്. ഞങ്ങളോട് രണ്ടുപേരോടും ഉടൻ തന്നെ മാനേജറുടെ ക്യാബിനിലേക്ക് ചെല്ലാൻ പറഞ്ഞിരിക്കുന്നു.

​”എന്താവും ഹരി… പുതിയ ക്ലയന്റ് അപ്‌ഡേറ്റ് വല്ലതും വന്നുകാണുമോ?”

അനു കസേരയിൽ നിന്നെഴുന്നേറ്റ് ഐഡി കാർഡ് ഒന്ന് നേരെയാക്കിക്കൊണ്ട് ചോദിച്ചു.

​”അറിയില്ല അനു, ചെന്ന് നോക്കാം,”

ഞാനും സിസ്റ്റം ലോക്ക് ചെയ്ത് ഒപ്പം നടന്നു.

ക്യാബിനകത്തെ എയർകണ്ടീഷണറിന്റെ മൃദുവായ ഇരമ്പലിലേക്ക് വാതിൽ തുറന്ന് ഞങ്ങൾ രണ്ടുപേരും അകത്തേക്ക് കയറി. മാനേജർ സുരേഷ് കുമാർ ലാപ്‌ടോപ്പ് സ്ക്രീനിൽ നിന്ന് കണ്ണെടുത്ത് ഞങ്ങളെ നോക്കി പുഞ്ചിരിച്ചു.