ഇനി ഇവിടെ നിന്നൂട.. എന്റെ മനസ്സ് പറഞ്ഞു.. ഇത് ഒന്നും നമ്മൾ ഡീൽ ചെയ്യണ്ട കേസ് അല്ല. സനൂപേട്ടൻ എന്നോട് പറഞ്ഞ കാര്യം ഞാൻ ഓർത്തു. ഇവരായി അടുക്കാനും കൊള്ളില്ല പിണങ്ങാനും കൊള്ളില്ല.. ഞാൻ ഒന്നും കണ്ടിട്ടുമില്ല കേട്ടിട്ടുമില്ല..
ഞാൻ വേഗത്തിൽ താഴേക്ക് ഇറങ്ങി ഓടി. ലിഫ്റ്റ് തുറക്കാൻ ഒന്നും ഞാൻ കാത്തു നിന്നില്ല.. അത്രയും നില ഞാൻ താഴേക്ക് ഓടി ഇറങ്ങി.. ഞാൻ താഴെ ഫ്ലോറിൽ ചെന്നപ്പോ സുനി അവിടെ എഴുന്നേറ്റ് നിൽപ്പുണ്ട്.. റിസപ്ഷനിലെ പയ്യൻ ഫോണിൽ ആരെയോ വിളിക്കുന്നുണ്ട്. അവന്റെ മുഖം ആകെ വല്ലാതായി തോന്നുന്നു.. ഇവർ കാര്യം അറിഞ്ഞോ..?
‘ഡാ നീ എന്നോട് പറയാതെ എവിടെ പോയതാ..? മോളിൽ എന്തോ വിഷയം നടന്നിട്ടുണ്ട്.. എന്താന്ന് അറിഞ്ഞിട്ട് പോകാം..’
സുനി എന്നെ കണ്ട ഉടനെ അടുത്തോട്ടു വന്നു പറഞ്ഞു
‘നീ വന്നേ.. വാ പോകാം..’
ഞാൻ അവന്റെ കൈ പിടിച്ചു പുറത്തേക്ക് ഓടി
‘എടാ നീ എവിടെ പോകുവാ. അവിടെ എന്തോ വിഷയം ഉണ്ട്.. മോളിലത്തെ ഫ്ലോറിൽ നിന്ന് ആരോ എന്തോ വിളിച്ചു പറഞ്ഞു.. ഫോൺ വരുന്ന കേട്ടാണ് ഞാൻ ഉണർന്നത്..’
സുനി എന്നോട് പറഞ്ഞു
‘പൊന്ന് മോനെ.. സംസാരിക്കാൻ ഒന്നും നേരമില്ല.. വന്നു കേറ്..’
ഞാൻ അവനെ ഉന്തി തള്ളി വണ്ടിയിൽ കയറ്റി
ബൈക്കിൽ ഇരിക്കുമ്പോ എല്ലാം എന്താണ് പ്രശ്നം എന്ന് അവൻ എന്നോട് ചോദിക്കുന്നുണ്ട്.. പക്ഷെ ഞാൻ ഒന്നിനും മറുപടി കൊടുത്തില്ല.. റൂമിൽ വന്നു കുറച്ചു വെള്ളം കുടിച്ചാലെ എനിക്ക് ഇത്തിരി എങ്കിലും സമാധാനം ആകൂ..
ലോഡ്ജിൽ വന്നു ബൈക്ക് വച്ച് മുകളിലെ ഞങ്ങളുടെ മുറിയിലേക്ക് ഞാൻ ഓടി.. റൂമിന് മുന്നിൽ വന്നു പേഴ്സ് എടുക്കാനായി പോക്കറ്റിൽ നോക്കുമ്പോ ആണ് പേഴ്സ് കാണുന്നില്ല.. ദൈവമേ.. അതിനി എവിടെ പോയി..
‘എന്റെ പേഴ്സ് കാണുന്നില്ല..’
ഞാൻ സുനിയോട് പറഞ്ഞു
‘കാണുന്നില്ല എന്ന് വച്ചാൽ.. അത് നിന്റെ കയ്യിൽ ഉണ്ടായിരുന്നോ..?
സുനി എന്നോട് ചോദിച്ചു
‘പിന്നെ എന്റെ കയ്യിൽ അല്ലാതെ അത് വേറെ എവിടെ പോകാനാണ്..?
എനിക്ക് അരിശം വന്നു..
‘റൂമിന്റെ കീ നിന്റെ പേഴ്സ് ൽ ആയിരുന്നോ..?
സുനി എന്നോട് ചോദിച്ചു
‘എനിക്ക് അറിയില്ല..’
എനിക്ക് ആകെ ഭ്രാന്ത് പിടിച്ച അവസ്ഥ ആയിരുന്നു..
‘എന്റെ കയ്യിൽ ഉണ്ടോന്ന് നോക്കട്ടെ…’
സുനി അവന്റെ പോക്കറ്റ് പരതി..
‘എന്താടാ താമസിച്ചത്…?
പെട്ടന്നാണ് സനൂപേട്ടൻ വാതിൽ തുറന്നത്.. മൂപ്പര് ഉറങ്ങി ഇല്ലെ..?
‘മറ്റേ താരയുടെ കേസ് ഞാൻ പറഞ്ഞില്ലേ.. അതാണ് താമസിച്ചത്..’
സുനി ആണ് മറുപടി കൊടുത്തത്
‘ആ ദേ.. താക്കോൽ എന്റെ കയ്യിൽ ഉണ്ട്..’
സുനി പോക്കറ്റിൽ നിന്ന് താക്കോൽ എടുത്തു
‘സനൂപേട്ടാ.. കുറച്ചു വെള്ളം തരുമോ..?
ഞാൻ ആകെ പരവേശപ്പെട്ടു നിൽക്കുക ആയിരുന്നു
‘എന്താടാ.. ആകെ വല്ലാതെ ആയിട്ടുണ്ടല്ലോ നീ.. വാ.. അകത്തേക്ക് വാ..’
സനൂപേട്ടൻ എന്നെ അകത്തേക്ക് ക്ഷണിച്ചു. റൂം തുറക്കാതെ സുനിയും എന്റെ ഒപ്പം അകത്തേക്ക് വന്നു..
‘നിങ്ങൾ എന്താ ഉറങ്ങാതെ ഇരുന്നത് ഇത്രയും നേരം ആയിട്ട്…?
സുനി അകത്തു കയറി കട്ടിലിൽ ഇരുന്നു സനൂപേട്ടനോട് ചോദിച്ചു
‘എടാ വൈഫിന്റെ അമ്മാവൻ മരിച്ചു.. ഞാൻ വെളുപ്പിനെ ട്രെയിൻ ൽ കോട്ടയം വരെ പോകുവാ.. അതാണ് ഉറങ്ങാഞ്ഞത്.. ഇനി മൂന്നാല് ദിവസം കഴിഞ്ഞേ വരൂ..’
സനൂപേട്ടൻ എനിക്ക് ഒരു ഗ്ലാസിൽ വെള്ളവുമായി വന്നു.. ഞാൻ ഗ്ലാസ്സ് വാങ്ങി ഒറ്റ വലിക്കു കുടിച്ചു തീർത്തു..
‘കുറച്ചൂടെ…’
ഞാൻ പിന്നെയും വെള്ളം ചോദിച്ചു. സനൂപേട്ടൻ പിന്നെയും വെള്ളം ഗ്ലാസ്സിലേക്ക് ഒഴിച്ചു..
‘ഇവനെന്ത് പറ്റിയെടാ..?
സനൂപേട്ടൻ സുനിയോട് ചോദിച്ചു
‘അറിയില്ല.. ഇവന്റെ പേഴ്സ് കളഞ്ഞു പോയി. ഇനി അതിന്റെ ആണോ.. പക്ഷെ ഹോട്ടൽ മുതൽ ഇവൻ ഇങ്ങനെ ആണ്.. എന്തോ കണ്ടു പേടിച്ച പോലെ..’
സുനി പറഞ്ഞു
‘എന്താടാ…? പേഴ്സ് എവിടെ കൊണ്ട് കളഞ്ഞു.. വല്ല ഓർമ്മയും ഉണ്ടോ..?