‘എന്താ സനൂപേട്ടാ ഒരു നാറ്റം മുറിയിൽ..?
സുനി ആണ് ആദ്യം അത് സംസാരിച്ചത്
‘അറിയില്ലെടാ.. വന്നപ്പോൾ ഞാൻ ഒന്ന് ഇവിടെ ഒക്കെ നോക്കിയിരുന്നു.. എന്തോ ചത്തു ചീഞ്ഞ മണം പോലെ..’
സനൂപേട്ടൻ പറഞ്ഞു
‘വല്ല എലിയും ആയിരിക്കും..’
ഞങ്ങൾ റൂമിൽ തപ്പാൻ ആരംഭിച്ചു. പക്ഷെ ഒന്നും കണ്ടെത്തിയില്ല. സുനി ആണേൽ കതകിന് ഇടയിൽ നിന്ന് ചത്തു ചീഞ്ഞ ഒരു പല്ലിയെ കണ്ടു പിടിച്ചു
‘ഇതാണോ ഇത്രയും നാറ്റം വരുത്തുന്നത്..? എനിക്ക് തോന്നുന്നില്ല..’
ഞാൻ പറഞ്ഞു
‘ഞാൻ അത് കളഞ്ഞിട്ട് ഡെറ്റോൾ വാങ്ങി കൊണ്ട് വരാം. ഇവിടെ അല്ലേൽ ഇന്ന് എനിക്ക് കിടക്കാൻ പറ്റില്ല. നിങ്ങൾ മൊത്തത്തിൽ ഒന്ന് നോക്ക് അപ്പോളേക്ക്..’
സനൂപേട്ടൻ ഒരു പേപ്പറിൽ പല്ലിയെ പൊതിഞ്ഞു കൊണ്ട് പുറത്തേക്ക് പോയി
ഞങ്ങൾ പിന്നെയും അവിടെ ഒക്കെ തപ്പാൻ തുടങ്ങി.. ഒടുവിൽ ആ ദുർഗന്ധത്തിന്റെ ഉറവിടം തപ്പി തപ്പി ഞങ്ങൾ അവിടെ കൂട്ടി ഇട്ടിരുന്ന തുണിയുടെ അടിയിൽ കിടന്ന ഒരു ബോക്സിൽ എത്തി.. ആ തുണി എല്ലാം മാറ്റിയപ്പോ തന്നെ റൂമിൽ നാറ്റം ഇരട്ടി ആയി.. ഇതിനുള്ളിൽ നിന്നാണ് ഈ ദുർഗന്ധം വരുന്നത്.. ഞങ്ങൾ ഉറപ്പിച്ചു
‘ഇതെന്താടാ സനൂപേട്ടന്റെ ലഞ്ച് ബോക്സ് വല്ലതും ആണോ..? പുള്ളി പാത്രം കഴുകി വയ്ക്കാഞ്ഞിട്ട് ആണോ ഈ മണം..?
ഞാൻ മൂക്ക് പൊത്തി ചോദിച്ചു
‘എടാ ഇത്.. ഇത് ആ ബോക്സ് അല്ലേ..?
സുനി എന്നോട് പറഞ്ഞു
‘ഏത് ബോക്സ്..?
ഞാൻ തിരിച്ചു ചോദിച്ചു. ഞാൻ ഇങ്ങനെ ഒരു ബോക്സ് കണ്ടിട്ട് കൂടിയില്ല
‘എടാ അന്ന് നമ്മൾ ഹോട്ടലിൽ പോയപ്പോൾ അവിടെ വച്ച് എനിക്ക് കിട്ടിയതാ.. തുറന്നു നോക്കാൻ തുടങ്ങിയപ്പോൾ നീ വന്നു എന്നെ വിളിച്ചോണ്ട് ഓടി.. നിന്നോട് പറയാനും വിട്ടു പോയി..’
സുനി പറഞ്ഞു
‘ഹോട്ടലിൽ നിന്ന് കിട്ടിയതോ..?
എനിക്ക് ആ ബോക്സിൽ എന്തോ അപാകത മണക്കാൻ തുടങ്ങി
‘നീ.. നീ അത് തുറന്നെ..’
ഞാൻ അവനോട് പറഞ്ഞു
സുനി മൂക്ക് പൊത്തി ആ ബോക്സ് തുറന്നു.. ഞങ്ങൾ രണ്ടും അതിലേക്ക് നോക്കി..
ആ ബോക്സിനുള്ളിൽ അളിഞ്ഞു തുടങ്ങിയ ഒരു മനുഷ്യന്റെ കൈപ്പത്തി.. നെറ്റിയിൽ ഒരു ബുള്ളറ്റ് തറച്ചത് പോലെ ഞാൻ കട്ടിലിലേക്ക് ഇരുന്നു.. സുനി പെടന്ന് വീഴുവായിരുന്നു..
‘എന്തുവാടാ മൈരേ നീ ഈ കൊണ്ട് വന്നത്..?
ഞാൻ അവനോട് ചോദിച്ചു.. അവനു ഉത്തരം ഇല്ലായിരുന്നു..
അവൻ ഉത്തരം പറയേണ്ടത് ഇല്ലായിരുന്നു.. അത് എനിക്ക് തന്നെ മനസിലാകുമായിരുന്നു. ആ കൈപ്പത്തി അലക്സാണ്ടർ ചമ്പാരന്റെ ആണ്. ആ കൊലപാതകി കൈപ്പത്തി വെട്ടി മാറ്റി ബോക്സിൽ ആക്കിയാണ് എന്റെ മുന്നിലേക്ക് വന്നത്. ഞങ്ങളുടെ സംഘട്ടനത്തിൽ അത് തെറിച്ചു താഴെ വന്നിട്ടുണ്ടാകും. അത് സുനി കണ്ടും കാണും..
മരിച്ചു കിടക്കുന്ന അലക്സാണ്ടർ ചമ്പാരന്റെ ചിത്രം ഞാൻ ഒന്നൂടെ ഓർത്തു. അയാളുടെ ഇടത് കൈപ്പത്തി അറ്റ് പോയിരുന്നു. ശരിയാണ്.. ഞാൻ ഇപ്പോളത് ഓർമ്മിക്കുന്നുണ്ട്. ആ കൊലപാതകത്തിന്റെ ഞെട്ടലിൽ ഞാൻ അപ്പോൾ അത് വലിയ ശ്രദ്ധ കൊടുത്തിരുന്നില്ല പക്ഷെ വീണ്ടും ഓർക്കുമ്പോ ശരിയാണ്.. ഇത് മരിച്ചു പോയ ചമ്പാരന്റെ കയ്യാണ്
‘നീയെന്നെ കൊലക്കുറ്റത്തിന് അകത്തു കേറ്റിയിട്ടേ അടങ്ങൂ അല്ലേടാ നാറി..’
ഞാൻ സുനിയുടെ കോളറിൽ പിടിച്ചു കൊണ്ട് ചോദിച്ചു
‘ഞാൻ അറിഞ്ഞോടാ ഇതിനുള്ളിൽ ചത്തവന്റെ കയ്യാണെന്ന്..?
സുനി എന്നോട് ചോദിച്ചു
‘ഇത്രയും ദിവസം ആയിട്ടും ഇത് പോലൊരു കാര്യം കയ്യിൽ ഉള്ളത് നീ എന്നോട് പറഞ്ഞോ..?
ഞാൻ അവനോട് ചോദിച്ചു
‘ഈ കാര്യം ഇനി മിണ്ടരുത് എന്നല്ലേ നീ പറഞ്ഞത്. അത് കൊണ്ട് ആണ് നമ്മൾ അവിടെ പോയപ്പോൾ ഉള്ള ഒന്നും ഞാൻ നിന്നോട് പിന്നെ പറയാഞ്ഞത്..’
സുനി പറഞ്ഞു
‘ഓ എന്തൊരു അനുസരണ.. എന്തൊരു അനുസരണ..’
എനിക്ക് പേടിയും ദേഷ്യവും എല്ലാം ഒരുമിച്ച് പെരുത്തു കയറി
‘എടുക്കടാ.. ഇത് എവിടെ ആണെന്ന് വച്ചാൽ കൊണ്ട് കള.. എന്നിട്ട് നീ ഇനി ഇങ്ങോട്ട് വന്നാൽ മതി.. കൊണ്ട് പോടാ..’