“ശരി.. ചെയ്യാം…”
കുറച്ചു കഴിഞ്ഞു ചേച്ചി വിളിച്ചു..
“മോനെ നിനക്ക് പണി തന്നത് നമ്മുടെ പ്യൂൺ ചേട്ടൻ ആണ്…”
“ങേ ചേച്ചി കണ്ടോ?”
“മ്മ്മ്.. ഞാൻ അയച്ചിട്ടുണ്ട് നിന്റെ വാട്ട്സ്ആപ്പിൽ… പാർട്ട് പാർട്ട് ആയി ആണ് അയച്ചത്… നോക്കിക്കോ..”
“ചേച്ചി ഒത്തിരി നന്ദി…”
“ആ വരവ് വച്ചോ…” എന്ന് പറഞ്ഞു അവർ ചിരിച്ചു..
ഞാൻ അയച്ച വീഡിയോ നോക്കി.. അവൾ വന്നു വിളിക്കുന്നതും ഞങ്ങൾ റൂമിലേക്ക് പോകുന്നതും കണ്ടു.. റൂമിൽ എത്തി സംസാരിച്ചപ്പോൾ പ്യൂൺ ചേട്ടൻ അകത്തേക്ക് ചായ കൊണ്ടുവരികയും ഒരു ചെറിയ ഫോൺ ഉണ്ട് അയാളുടെ കയ്യിൽ.. അത് പേനകൾ ഇട്ടു വെക്കുന്ന ഒഴിഞ്ഞ ജാറിൽ ഇട്ടു വച്ച് പോകുന്നു..
മീറ്റിംഗ് കഴിഞ്ഞു ആദ്യം പോയത് അശ്വിനി ആണ്. അവൾ എന്റെ പുറകിൽ വന്നു ഒരു ഫ്ലയിങ് കിസ് തന്നിട്ടാണ് പോകുന്നത്.. ഞാൻ അത് കാണുന്നില്ല..
ഞാനും പോയി കഴിഞ്ഞു പ്യൂൺ ചേട്ടൻ വന്നു ആ കൊച്ചു ഫോൺ എടുത്തു പോകുന്നു.. അതാണ് എനിക്കിട്ടു കിട്ടിയ പണി. അയാൾക്ക് അറിയില്ലേ അവിടെ cctv ഉണ്ടെണ്? ആ…
അച്ചുവിനോട് സംശയിച്ചതിൽ ദേഷ്യം തോന്നൽ പാടില്ല.. എന്നാൽ അവൾ ഉപയോഗിച്ച രീതി തെറ്റാണ്..
ഞാൻ ഒന്ന് കുളിച്ചു.. അമ്മയുടെ മുഖത്തു നോക്കിയില്ല. അനിയത്തി കോളജിൽ പോയിരിക്കുന്നു. ഞാൻ ഡ്രസ്സ് മാറി ഇറങ്ങി.
ബൈക്ക് എടുത്തു നേരെ അവളുടെ വീട്ടിലേക്ക് വിട്ടു.. ഗേറ്റ് കടന്നു ബൈക്ക് അകത്തു ചെന്നപ്പോൾ അവൾ എവിടെയോ പോകാൻ റെഡി ആയി നിൽക്കുന്നുണ്ട്..
നന്നായി കരഞ്ഞ മുഖം..
എന്നെ കണ്ടതും ആ മുഖത്ത് ദേഷ്യം നിറഞ്ഞു…
“അർജുൻ… നിന്നോട് ഒരിക്കലും എന്റെ മുൻപിൽ വരരുത് എന്നല്ലേ പറഞ്ഞത്?”
അവൾ അലറി..
“സോറി മാഡം.. വരേണ്ടി വന്നു…”
ഞാൻ പതിയെ പറഞ്ഞു.. എന്റെ മാഡം വിളി അവളെ ഒരു നിമിഷം നിശബ്ദത ആക്കി..
“എനിക്ക് ചതിയന്മാരെ കാണുന്നത് തന്നെ വെറുപ്പാണ്…”
അവൾ വീണ്ടും ഒച്ച ഉയർത്തി..
അത് കേട്ടുകൊണ്ടാണ് അവളുടെ അമ്മ വന്നത്..
“മോളെ വീട്ടിൽ വരുന്നവരോട് ഇങ്ങനെ ആണോ പെരുമാറുക? നീ അവനു പറയാൻ ഉള്ളത് കേട്ടോ?”
അവൾ ഒന്നും മിണ്ടിയില്ല..
ഞാൻ ആ ഫോൺ എടുത്തു വീഡിയോ പ്ലേയ് ചെയ്തു അവളുടെ അമ്മയുടെ കയ്യിൽ കൊടുത്തു.. അവർ അത് വാങ്ങി നോക്കി..
മുഖഭാവങ്ങൾ മാറി മാറി വന്നു.. അവസാനം അവർ എന്നെ അതിശയത്തോടെ നോക്കി ഫോൺ അവൾക്ക് കൈമാറി.. അവളും സംശയത്തോടെ എന്നെ നോക്കി വീഡിയോ കണ്ടു…
അവളുടെ കണ്ണുകൾ നിറഞ്ഞു ഒഴുകുന്നതും ചുണ്ടുകൾ വിറക്കുന്നതും എനിക്ക് കാണാൻ കഴിഞ്ഞു..
“അജു… ഞാൻ….”
അവൾ വാക്കുകൾ കിട്ടാതെ പതറി..
“അജു അല്ല മാം.. ചതിയൻ.. ചീറ്റ്, അങ്ങനെ ഒക്കെ മതി.. ഇനി ഞാൻ ഈ മുൻപിൽ വരില്ല. എല്ലാത്തിനും നന്ദി മാത്രം….”
അതും പറഞ്ഞു ഞാൻ ഫോൺ വാങ്ങി തിരിഞ്ഞു നടന്നു.. ഒന്നും പറഞ്ഞില്ല. ഒരു പരിഭവവും ഇല്ലാതെ..
“അജു….”
എന്ന നെഞ്ച് തകർന്ന വിളി ഞാൻ കേട്ടിരുന്നു.. എന്നാലും നില്ക്കാൻ
തോന്നിയില്ല.. വണ്ടി എടുത്തു വന്നു..
വീട്ടിൽ വന്നു.. അമ്മ എന്തോ തയ്ക്കുന്നുണ്ട്..
“അമ്മെ….?”
“നീ എന്നോട് മിണ്ടണ്ട… എന്റെ മകൻ എന്ന് വിളിക്കാൻ പോലും എനിക്കിപ്പോൾ നാണക്കേട് ആണ്… “
അമ്മ എടുത്തടിച്ചതു പോലെ പറഞ്ഞു..
“അമ്മ എടുത്തു വീശുന്ന വാക്കുകൾ നന്നായി ശ്രദിച്ചോ….? ഒരുപക്ഷെ ഇത് മാറ്റേണ്ടി വന്നാൽ തിരിച്ചെടുക്കാൻ ആകില്ല….”
ഞാൻ ഒരു വാണിംഗ് പോലെ പറഞ്ഞു..
“നീ അവളെ ചതിച്ചു… ചതിക്കാൻ നിന്നെ ഞാൻ പഠിപ്പിച്ചിട്ടില്ല. ഇനി നിനക്ക് എന്റെ സ്നേഹവും കിട്ടില്ല. മരിക്കേണ്ടി വന്നാൽ പോലും ഞാൻ ആരെയും ചതിക്കില്ല അർജുൻ….”
അമ്മ അത് പറഞ്ഞപ്പോൾ എനിക്ക് സങ്കടം തോന്നി.. അമ്മ എന്റെ പേര് വിളിച്ചിരിക്കുന്നു… ഇനി എന്ത് പറയാൻ? അമ്മക്ക് അശ്വിനിയെ അത്ര വിശ്വാസം ആണ്.. അതാണ് അവൾ ചതിച്ചു എന്ന് പറഞ്ഞത് കണ്ണും അടച്ചു വിശ്വസിച്ചത്..
“ശരി അമ്മെ…. പക്ഷെ ഈ പറഞ്ഞതിന് അമ്മ കരയും… ഓർത്തോ….”
അതും പറഞ്ഞു ഞാൻ ഇറങ്ങി… എല്ലാം കൈവിട്ടു പോയത് പോലെ ഒരു ഫീലിങ്ഹ്.. ഇല്ല. തകരാൻ പാടില്ല.
ഞാൻ നേരെ ജിമ്മിൽ പോയി. അവിടെ ഇരുന്നു. ഉച്ച ആയപ്പോൾ വണ്ടി എടുത്തു പോയി ടൗണിൽ ഇട്ടു. അപ്പോഴാണ് ഒരു ഓട്ടം വന്നത്. കൂട്ടത്തിൽ പുതിയ വണ്ടി എന്റെ ആണ്..
കോഴിക്കോട് പോകണം. ആരും ഇല്ല പക്ഷെ കുറച്ചു ബുക്കുകളും അനുബന്ധ സാധനങ്ങളും ഒക്കെ ആണ്. ഒരു കോളജിലേക്ക് എത്തിച്ചു തിരിച്ചു കുറച്ചു സാധനങ്ങൾ കൊണ്ടു വരണം. അവിടെ ഒരു ദിവസം നിൽക്കുകയും വേണം..
ഞാൻ സമ്മതം അറിയിച്ചു. അപ്പോൾ അവർ ബാഗുകൾ വണ്ടിയിൽ നിറച്ചു. കുറച്ചു ലാബ് ഉപകരണങ്ങൾ ഉള്ളതുകൊണ്ട് ആണ് നല്ല വണ്ടി എടുത്തത് എന്ന് അവർ പറഞ്ഞു. അഡ്രസ് തന്നു. കോഴിക്കോട് ക്രിസ്ത്യൻ കോളജിലേക്ക് ആണ്.
ആരോടും പറയാൻ ഇല്ല. ഞാൻ വണ്ടി വിട്ടു. സമയം 3 മണി ആയിരുന്നു. 250 കിലോമീറ്റർ വരും കോഴിക്കോടിന്. ഞാൻ പലതും ആലോചിച്ചു ഡ്രൈവ് ചെയ്തു..
ഫോൺ റിങ് ചെയ്തു.. അശ്വിനി ആണ്.. എടുത്തില്ല. അവളുടെ അമ്മയും വിളിച്ചു.. എടുത്തില്ല..
കോളേജ് കഴിഞ്ഞു വന്നപ്പോൾ എന്നെ കാണാത്തത് കൊണ്ട് ആകും ചിഞ്ചു വിളിച്ചു..
“ഏട്ടാ.. എവിടെ ആണ്?”
“എന്താടീ?”
“അച്ചു ചേച്ചിയും അമ്മയും വന്നിട്ടുണ്ട്….”
“അതിനു ഞാൻ എന്ത് വേണം?”
“അവർ അമ്മയോട് കാര്യങ്ങൾ ഒക്കെ പറഞ്ഞു.. “
“എന്തിനാണ്? എന്റെ അമ്മക്ക് എന്നെ വിശ്വാസം ഇല്ല.. പിന്നെയാണോ അശ്വിനിക്കും അവളുടെ അമ്മയ്ക്കും? നല്ല തമാശ…. “
ഏട്ടാ…. “
ചിഞ്ചു കരയുകയാണ്..
“മോളെ.. നിനക്ക് ഏട്ടനെ വിശ്വാസം ഉണ്ടായല്ലോ? അത് മതി.. അത് മാത്രം മതി എനിക്ക്…”
എന്റെ തൊണ്ട ഇടറി..
“ഏട്ടൻ ഒന്ന് വരുമോ ഇവിടെ?”
“ഇനി ഞാൻ വരുന്നില്ല… പിന്നെ വിളിക്കാം മോളെ…”
അത് പറഞ്ഞ ശേഷം ഞാൻ ഫോൺ വച്ചു.. കൂടുതൽ ഒന്നും ചിന്തിക്കാതെ ഡ്രൈവിങ്ങിൽ ശ്രദ്ധിച്ചു..
കോഴിക്കോട് എത്തിയപ്പോൾ സമയം കുറെ ആയതു കൊണ്ട് ഒരു റൂം എടുത്തു. ഫോൺ ഓഫ് ആയിപോയിരുന്നു.. ഓൺ ആക്കിയില്ല.. ആർക്കു വേണ്ടി?
രണ്ടു ദിവസം എടുത്തു തിരിച്ചു വരാൻ.. വൈകുന്നേരം അവർ തന്ന ഗുഡ്സ് എല്ലാം എത്തിച്ചു അവർ നല്ല പൈസയും തന്നു. വീണ്ടും ടാക്സി ഡ്രൈവർ എന്ന ജോലി… എന്ത് ചെയ്യാൻ?
വീട്ടിൽ എത്തി. ചിഞ്ചു ഓടി വന്നു കെട്ടിപിടിച്ചു കരഞ്ഞു… എവിടെ ആയിരുന്നു ഏട്ടാ… ഞങ്ങൾ എത്ര കാത്തിരുന്നു?”
“ഞങ്ങളോ? നീ അല്ലാതെ വേറെ ആരാ എന്നെ കാത്തിരിക്കാൻ?”
അതും പറഞ്ഞു ഞാൻ നേരെ നോക്കിയത് അടുക്കളയിൽ നിന്നും വന്ന അമ്മയുടെ മുഖത്തേക്ക് ആണ്.. അമ്മ മുഖം കുനിച്ചു..
ഞാൻ പഴ്സിൽ നിന്നും പൈസ എടുത്തു അനിയത്തിയുടെ കയ്യിൽ വച്ചു..
എന്നിട്ടു റൂമിൽ പോയി തോർത്ത് എടുത്തു ഒന്ന് കുളിച്ചു വന്നു.. കിടക്കാൻ ഒന്നും തോന്നിയില്ല. നേരെ പുറത്തേക്ക് നടന്നു..