ലവ് യു മുല്ലപ്പൂ ….!
കൗമാരപ്രണയം തുറന്നു പറഞ്ഞ പ്രണയിനിയുടെ മനം പോലെ അവൾ കുളിരണിഞ്ഞു …
ബഡ്ഡ് ലാംപിന്റെ മങ്ങിയ വെട്ടം പതിനാലാം രാവായി …
രാപ്പനി പിടിച്ചവളേപ്പോലെ കിടക്കയിൽ കിടന്നവൾ രോമാഞ്ചമണിഞ്ഞു … ഉള്ളം കൈയ്യിലും കാലടികളും വിയർപ്പു നുര പൊട്ടുന്നതും ഇക്കിളി പടരുന്നതും ജാസ്മിൻ ഒരു മനോഹര സ്വപ്നത്തിലെന്നവണ്ണം അറിഞ്ഞു …
ഒൻപതിലോ, പത്തിലോ പഠിക്കുമ്പോഴാണ് മുല്ലവള്ളിയുമായി ഷാനു ആദ്യം വന്നതെന്ന് അവളോർത്തു … അന്നു തുടങ്ങിയതാണോ റബ്ബേ അവനീ ……?
മുല്ലച്ചെടികളാണധികവും അവന്റെ ചെടികളിൽ .. ഷാനു മുല്ലച്ചെടികളെ പരിപാലിക്കുന്നതും മണത്തു നോക്കുന്നതും അവളുടെ മനസ്സിലൂടെ ചിത്രങ്ങൾ കണക്കെ ഒരുപാടാവർത്തി ഓടിപ്പോയി …
മുല്ലയെന്നാൽ ജാസ്മിനാണെന്ന് സ്കൂളിൽ പഠിച്ചറിയാം, അതിനിത്ര ആന്തരാർത്ഥവും താനതറിയാൻ വൈകിയതും അവളെ വെകിളിപിടിപിച്ചുകൊണ്ടിരുന്നു ..
അവന്റെ പ്രേമം മുല്ലയോടല്ല …. അവന്റെ പ്രേമം തന്നോടാണ്.. അത് മനസ്സിലാക്കാൻ ഒരു നൊടി പോലും അവൾക്ക് വേണ്ടി വന്നില്ല …
” ന്റെ മുല്ല വാടിയിരിക്കുന്നു..”
അവനുമായി പിണക്കത്തിലായിരുന്നപ്പോൾ അവൻ പറഞ്ഞതും അവൾക്ക് ഓർമ്മ വന്നു …
റബ്ബേ…. നീ തുണ…..
ഫോൺ വീണ്ടും ഇരമ്പി ….
“മുല്ല ഇഷ്ടാ… പക്ഷേ അതിനേക്കാൾ എനിക്കിഷ്ടം…….”
അവൻ പറഞ്ഞില്ലെങ്കിലും എന്താണെന്ന് അവൾക്കറിയാമായിരുന്നു …
“മുല്ലപ്പൂ ഭ്രാന്തൻ….” കൗമാരക്കാരിയുടെ മനസ്സിളക്കത്തോടെ അവൾ ടൈപ്പ് ചെയ്ത് വിട്ടു …
” അല്ല , ………… ഭ്രാന്തൻ. ” മറുപടി വന്നു .. അതും എന്താണെന്ന് അവൾക്കറിയാമായിരുന്നു …
“ചങ്ങലക്കിടും ….”
” ചങ്ങലകൾ പൊട്ടിച്ചെറിയണം … ” അവന്റെ ആ മറുപടിയുടെ അർത്ഥവും അവൾക്കറിയാമായിരുന്നു ..
“കുതിരവട്ടത്തേക്കയക്കും ….”
” ഇതിന് മരുന്ന് അവിടില്ല … ”
മരുന്നെന്താണെന്നും അവൾക്കറിയാമായിരുന്നു ..
” ഷോക്കടിപ്പിക്കും … ”
” ന്നാലുമത് മാറൂലാ…” തന്നെ വല്ലാത്തൊരുൻമാദം വരിഞ്ഞു മുറുക്കുന്നത് അവൾ അനുഭവിച്ചു തുടങ്ങിയിരുന്നു …
ആ ചാറ്റിംഗിൽ ഒരു പ്രത്യേക അനുഭൂതി അവളും കണ്ടെത്തിത്തുടങ്ങിയിരുന്നു …
ഒരുപാട് മറുപടികൾ അവനു കൊടുക്കാനായി മനസ്സൊരുങ്ങിയെങ്കിലും അങ്ങനെയങ്ങു കൈവിട്ടു കളിക്കാൻ അവൾ തയ്യാറായിരുന്നില്ല …
“ന്നാ ഭ്രാന്തനായി നടക്കേണ്ടി വരും … ”
” ന്നാലും നിക്കിഷ്ടാ , ഈ ഭ്രാന്തൊരു സുഖാ …”
വരികൾക്കിടയിലൂടെയല്ലാതെ ഒരു വാക്കു പോലും ഷാനു പറഞ്ഞിട്ടില്ല, എന്നത് അവൾ ശ്രദ്ധിച്ചു..
ക്ഷമയുള്ളവനാണവൻ… ക്ഷമയുള്ളവനെ തോൽപ്പിക്കുക ദുഷ്ക്കരമാണ്…
ഈ അവസ്ഥ തുടർന്നാൽ തനിക്കു വട്ടായിത്തീരും എന്ന് അവൾക്ക് നിശ്ചയമായിരുന്നു…
” പകൽ വന്നു കിടക്കും… അങ്ങനെ ഭ്രാന്ത് മാറ്റാൻ നോക്ക് … ” ഒടുവിൽ അവൾ മെസ്സേജ് വിട്ടു …
” നോക്കാം ….”
കുറച്ചു നേരം നിശബ്ദത …
” ഒരാഴ്ച ആ മരുന്ന് പരീക്ഷിക്കട്ടെ …. കുറവില്ലേൽ …..?”
” കുറയും…” അവൾ മറുപടി കൊടുത്തു …
” ഇല്ലേൽ …..?”
“😠😠😠….”
അവൾക്ക് ദേഷ്യം വന്നു എന്ന് കരുതിയാകണം ഷാനു പിന്നീടൊന്നും മിണ്ടിയില്ല …
പിറ്റേന്ന് നേരം വെളുക്കുമ്പോൾ അവന്റെ മുഖത്തേക്ക് നോക്കണമല്ലോ എന്ന ചിന്തയുള്ളതിനാൽ ഇനിയും ഇത് തുടരുക അഭികാമ്യമല്ലെന്ന് അവൾക്കറിയാമായിരുന്നു.. പറയാനുള്ളത് പറഞ്ഞു കഴിഞ്ഞു … ഇനി ….?
ഒരു നെടുവീർപ്പോടെ അവൾ ഫോൺ കിടക്കയിലേക്കിട്ടു.
പിറ്റേന്നും മോളിയെ ജാസ്മിൻ ക്ലാസ്സിലേക്ക് വിട്ടില്ല .. ഷാനു വൈകിയാണുണർന്നത്. അപ്പോഴേക്കും ജാസ്മിൻ ജോലികളെല്ലാം ഒതുക്കിയിരുന്നു.. അവൻ മുറിയിൽ നിന്നിറങ്ങി വരുമ്പോൾ ഡോറയുടെ മുൻപിലായിരുന്നു മോളി ..
ഷാനു ബാത്റൂമിലേക്ക് പോകുന്നത് കണ്ടു കൊണ്ട് ജാസ്മിൻ ചായക്ക് വെള്ളം വെച്ചു.
പതിവില്ലാതെ ഷാനു കുളിക്കാതെ കയറി വരുന്നതു കണ്ട് അവളത് ഭുതപ്പെട്ടു.
” ഇയ്യ് കുളിച്ചില്ലേ ….?”
“ഇല്ല … ”
” അതെന്തേ , പതിവങ്ങനെയല്ലല്ലോ …”
ചായ ഗ്ലാസ്സിലേക്ക് പകരുന്ന അവളുടെയടുത്തേക്ക് അവൻ ചെന്നു… “ആ മണമങ്ങനെ ശരീരത്തു കിടന്നോട്ടെ …”