‘ഓഹ്… അത് കുഴപ്പമില്ല… ദേ ബിന്നിൽ ഉണ്ട്..’
അർജുൻ റീ -സൈക്കിൾ ബിന്ന് എടുത്തു കൊണ്ട് പറഞ്ഞു. ഡിലീറ്റ് ആകുന്ന ഫോട്ടോസ് ആദ്യമേ അതിൽ ആണ് വരുന്നത്. ആ കാര്യം ഇഷാനി ഓർത്തില്ല. ഫോട്ടോസ് തിരിച്ചു കിട്ടിയപ്പോൾ അവന്റെ മുഖത്തെ സന്തോഷം കണ്ടപ്പോൾ ഇഷാനിക്ക് മുമ്പ് ഉണ്ടായതിലും ദേഷ്യം ഇരച്ചു കയറി.. എങ്ങനെയോ അവൾ അതടക്കി പിടിച്ചു..
‘ഈ ഫോട്ടോസ് ഒക്കെ എന്തിനാ… ഇപ്പോളും..?
മടിച്ചു മടിച്ചു അവൾ ചോദിച്ചു. അവനിൽ നിന്ന് അവൾക്ക് കേൾക്കണം അതിന്റെ ഉത്തരം..
‘ഓ.. ഇത് അന്നത്തെ കുറെ മെമ്മറിസ്.. അവൾ പറഞ്ഞു ഇത് കളയരുതെന്ന്.. സൊ ഇതൊന്നും കളഞ്ഞില്ല..’
അർജുൻ പറഞ്ഞു. ലക്ഷ്മിക്ക് ഇപ്പോൾ ഈ ലോകത്ത് ഏറ്റവും വെറുപ്പ് തന്നോടാവും.. പക്ഷെ എങ്കിലും അവൾ തനിക്ക് പ്രിയപ്പെട്ടവൾ ആണ്.. അവളുടെ ഫോട്ടോസിൽ നോക്കി കൊണ്ട് അവൻ ഓർത്തു
ലക്ഷ്മിയുടെ ഫോട്ടോ പോയെന്ന് കേട്ടപ്പോൾ അവനിൽ ഉണ്ടായ വിഷമവും, അത് തിരിച്ചു കിട്ടിയപ്പോൾ അവന് ഉണ്ടായ സന്തോഷവും എല്ലാം അവളെ വല്ലാതെ ചൊടിപ്പിച്ചു.. എല്ലാം നിർത്തി എന്ന് പറഞ്ഞിട്ടും ഇപ്പോളും ഇവന്റെ ഉള്ളിൽ എവിടൊക്കെയോ അവളുണ്ട്. അത് ഇഷാനി തിരിച്ചറിഞ്ഞു. ചോദിക്കാൻ പാടില്ലാഞ്ഞിട്ടും അവൾ അത് ചോദിച്ചു
‘അവളെ മറന്നില്ലേ ഇത് വരെ…?
‘ഹേയ് അതൊക്കെ എങ്ങനാ മറക്കുക. You should never forget anyone that you’ve loved എന്നല്ലേ…’
അർജുൻ അവളുടെ ഫോട്ടോസിൽ നോക്കി കൊണ്ട് പറഞ്ഞു. ആ സമയം ഇഷാനി എന്ത് ചിന്തിക്കും എന്നൊന്നും അവൻ ഓർത്തില്ല. അവനപ്പോൾ ലക്ഷ്മിയെ പറ്റി മാത്രമാണ് ചിന്തിച്ചത്.. അവന്റെ ഓർമ്മകളിൽ ലക്ഷ്മി ഉണ്ടെന്ന് അവനിൽ നിന്ന് തന്നെ അവൾ അറിഞ്ഞു. ഒരുപക്ഷെ തന്നെക്കാൾ തീവ്രമായ ഓർമ്മകൾ ആയിരിക്കും അർജുന് അവളോട് ഉള്ളത്.. കാരണം അവൾ ആണല്ലോ തന്നെക്കാൾ അവനുമായി….
അതാലോചിച്ചപ്പോൾ ഇഷാനിക്ക് ഉള്ളിൽ ഒരു പൊള്ളൽ അനുഭവപ്പെട്ടു. തന്നോട് അവന് പ്രണയം ആയിരുന്നു.. ശരിയാണ്. പക്ഷെ ലക്ഷ്മി ആണ് അവന് എല്ലാം കൊടുത്ത പെണ്ണ്.. ലൈഫിൽ എന്നേക്കാൾ അവന് ഓർത്തിരിക്കുക അവളെ ആയിരിക്കും.. എന്നേക്കാൾ അവനെ അറിയുന്നത് അവൾക്ക് ആയിരിക്കും. ഇഷാനി ആ ക്രൂരസത്യം ഈറൻ കണ്ണുകളോടെ തിരിച്ചറിഞ്ഞു. നിലാവിന്റെ നേരിയ പാൽ വെളിച്ചം ടെറസിൽ തട്ടി പ്രതിഫലിക്കുന്നുണ്ട് എങ്കിലും അവളുടെ നോവ് കാണാൻ അർജുനപ്പോൾ കഴിഞ്ഞില്ല.. പകരം അവൻ കണ്ടത് അവളുടെ ഒരു ചിരിയാണ്..
‘നിന്റെ ഒരു പിക് ഉണ്ടല്ലോ.. ഇത് ഡിലീറ്റ് ആക്കിയപ്പോൾ ആണോ മൊത്തത്തിൽ പോയത്..?
അർജുൻ അവളുടെ ഫോട്ടോ അവളെ കാണിച്ചു. ലക്ഷ്മി ആയി കംമ്പയർ ചെയ്യാൻ വേണ്ടി താൻ എടുത്തു ഡിലീറ്റ് ആക്കിയ ഇളിച്ചോണ്ട് ഇരിക്കുന്ന ഒരു പിക്ക്.. അയ്യേ… ഇവനത് കണ്ടു.. ദേഷ്യത്തിനും നൊമ്പരത്തിനും ഒക്കെ ഒപ്പം അവളിൽ ജാള്യത വന്നു നിറയാൻ തുടങ്ങി
‘അത് കളഞ്ഞേ അതിൽ നിന്ന്..’
അവൾ കയ്യെത്തി ഫോൺ പിടിക്കാൻ ശ്രമിച്ചു
‘ഹേയ്.. നല്ല ഫോട്ടോ ആണല്ലോ.. നീ ഫോട്ടോ എടുക്കുമ്പോ ചിരിക്കാറില്ല എന്ന് പറഞ്ഞിട്ട് ഇതിൽ നല്ല ചിരിയാണ്..’
ഫോൺ അവൾക്ക് കൊടുക്കാതെ കൈ മാറ്റി അർജുൻ പറഞ്ഞു
‘ഓ.. ഞാൻ അത്ര സുന്ദരി ഒന്നുമല്ല..’
തന്നിൽ പൊന്തി വന്ന വികാരങ്ങളുടെ എല്ലാം ഒരു ഒരു അവിയൽ പരുവം അവളെ കൊണ്ട് അങ്ങനെ പറയിച്ചു..
‘നല്ല പിക് ആടി.. നീ ഇങ്ങനെ ഫോട്ടോക്ക് പോസ് ചെയ്തു ഞാനങ്ങനെ കണ്ടിട്ടില്ല. പിന്നെ നിനക്ക് ഇഷ്ടം അല്ലേൽ കളഞ്ഞോ.. ഞാൻ ഈ ഡ്രസ്സ് ഒക്കെ താഴെ കൊണ്ട് വച്ചിട്ട് വരാം..’
ഫോൺ അവളുടെ കയ്യിൽ കൊടുത്തിട്ട് അർജുൻ ടെറസിൽ കെട്ടിയിരുന്ന അയയിൽ നിന്നും ഡ്രെസ്സുകൾ പെറുക്കാൻ തുടങ്ങി. അപ്പോളാണ് അവിടെ കിടക്കുന്ന ഡ്രസ്സുകളിൽ തന്റെ വസ്ത്രങ്ങളും ഉണ്ടെന്ന് അവൾക്ക് മനസിലായത്..
‘ഇതെന്റെ ഡ്രസ്സ് അല്ലേ..?
അവൾ ചോദിച്ചു
പിന്നെ അല്ലാതെ ഇവിടെ ആരാ ഹൂഡി ഒക്കെ ഇടുന്നത്..
ഇഷാനി അയയിൽ നോക്കിയപ്പോൾ കീറിയ പാന്റ് ഒഴിച്ച് താൻ അന്നിട്ടിരുന്ന ഡ്രസ്സ് എല്ലാം അവിടെ ഉണ്ട്.. ഹൂഡി മാത്രം ആയിരുന്നു എങ്കിൽ അവൾക്ക് വിഷയം ഇല്ലായിരുന്നു.. പക്ഷെ കൂട്ടത്തിൽ അവളുടെ ഇന്നേഴ്സ് എല്ലാം ഉണ്ട്. നാണക്കേട് കൊണ്ട് അവൾ ചൂളിപ്പോയി..
‘എന്റെ ഡ്രസ്സ് അവിടെ ഇട്ടാൽ മതി. കൈ അഴിച്ചു കഴിഞ്ഞു ഞാൻ അലക്കിക്കോളാം..’
‘കൈ ശരിയായി കഴിഞ്ഞു നീ അലക്കിക്കോ.. വേണോങ്കിൽ എന്റെ കൂടെ അലക്കിക്കോ.. ഇതിപ്പോ വെറുതെ അവിടെ മുഷിഞ്ഞു കിടക്കണ്ട എന്ന് വച്ചു അലക്കിയതാ..’
അർജുൻ അത് പറഞ്ഞു അവളുടെ ഡ്രസ്സ് ഓരോന്നായി മടക്കി കയ്യിൽ വച്ചു. അവളുടെ ബ്രായും പാന്റിയും അവൻ ആ കൂട്ടത്തിൽ എടുത്തു മടക്കി കയ്യിൽ വച്ചു. ഇഷാനിക്ക് തന്റെ തൊലി ഇളകി വരുന്നത് പോലെ തോന്നി. ഇന്നോളം ഒരു പുരുഷൻ തന്റെ ഇന്നേഴ്സ് ഒന്നും കണ്ടിട്ടോ തൊട്ടിട്ടോ ഇല്ല.. അർജുൻ ആണെങ്കിൽ കൂടെ അങ്ങനെ ചെയ്തപ്പോൾ അവൾക്ക് ഒരു ബുദ്ധിമുട്ട് തോന്നി.. അതിന്റെ കൂടെ മുമ്പ് ഉണ്ടായിരുന്ന ദേഷ്യം കൂടി ആയപ്പോൾ അവളുടെ ശബ്ദം കുറച്ചു പരുഷമായി
‘അതിന്റെ ആവശ്യമില്ല.. എന്റെ ഡ്രസ്സ് ഞാൻ കഴുകിക്കോളാം..’
‘നീ ഇങ്ങനെ വയ്യാത്തപ്പോൾ വാശി പിടിക്കാതെ..’
അവൻ സൗമ്യമായി പറഞ്ഞു
എന്റെ ഡ്രസ്സ് അവിടെ ഇട്.. അത് നീ എടുക്കണ്ട..’
ഇഷാനിയുടെ സംസാരം വീണ്ടും മോശമായി
‘നീ എന്താണ് ഉദ്ദേശിക്കുന്നത് എന്ന് എനിക്ക് മനസിലാകും. നിന്റെ ബുദ്ധിമുട്ടും എനിക്ക് മനസിലാകും. പക്ഷെ ഇതൊക്കെ ഒരു വലിയ കാര്യമായി എടുക്കാതെ…’
അവൾ ഉദ്ദേശിച്ചത് തന്നെ ആയിരുന്നു അർജുൻ പറഞ്ഞത്. അവളുടെ ബ്രായും പാന്റിയും അലക്കുമ്പോൾ ഒന്നും അവയെ മറ്റൊരു കണ്ണിൽ അർജുൻ നോക്കിയില്ല. സാഹചര്യം ഇതായത് കൊണ്ട് തന്നെ അത്തരമൊരു ചിന്ത അവനുണ്ടായില്ല..
‘എനിക്ക് ഇതൊക്കെ വലിയ കാര്യമാണ്.. എന്റെ ഡ്രസ്സ് ഒന്നും എടുത്തു പെരുമാറാൻ ഞാൻ നിനക്ക് പെർമിഷൻ തന്നിട്ടില്ല.. സൊ പ്ലീസ്…’
അത് കുറച്ചു കൂടി പോയിരുന്നു. ഇത്രയും ഹെല്പ് ചെയ്ത, ഇത്രയും ദിവസം തന്റെ കാര്യങ്ങൾ നോക്കിയ ഒരാളോടാണ് താനീ പറഞ്ഞത് എന്ന് മനസിലാക്കാൻ അവൾക്ക് കുറച്ചു സമയം എടുത്തു. പക്ഷെ അതിനുള്ളിൽ തന്നെ അർജുന് ഫീൽ ആയിരുന്നു. അർജുൻ കയ്യിലിരുന്ന അവളുടെ ഡ്രസ്സ് അതേ പോലെ അയയിൽ തിരിച്ചു ഇട്ടു. ഇനി ഇവിടെ വൈബ് അടിച്ചു ഇരിക്കേണ്ട കാര്യമില്ല എല്ലാം കുളമായി എന്ന് മനസിലായി രണ്ട് പേരും എഴുന്നേറ്റു.. താഴേക്ക് ഇറങ്ങാൻ ഇഷാനി അർജുന്റെ തോളിൽ മാത്രം സപ്പോർട്ട് ചെയ്തു ഇറങ്ങി. നല്ല വേദന തോന്നിയെങ്കിലും അവനുമായി വഴക്ക് ഇട്ടു കഴിഞ്ഞു അവനെ കൊണ്ട് തന്നെ എടുപ്പിച്ചു ഇറക്കുന്നത് അവൾക്കൊരു ബുദ്ധിമുട്ട് ആയിരുന്നു. അർജുനും ഒന്നിൽ കൂടുതൽ ആ കാര്യത്തിൽ നിർബന്ധിക്കാൻ പോയില്ല. കാൽ നല്ലവണ്ണം വേദനിച്ചിട്ട് ആണെങ്കിലും അവൾ താഴെ കട്ടിലിൽ വന്നു ഇരുന്നു..