‘എല്ലാം വാങ്ങിയോ..? കഴിക്കാൻ എന്താ വാങ്ങിയേ.. മാഗിയോ..? മാഗി ആണോ പൊട്ടാ ഞാൻ വാങ്ങിച്ചോണ്ട് വരാൻ പറഞ്ഞത്.. എന്തെലും ബേക്കറി ഐറ്റം അല്ലായിരുന്നോ..?
ഇഷാനി അവനോട് സ്വകാര്യമായി ആയി പറഞ്ഞതെങ്കിലും ഹോളിൽ ഉള്ള ആൾക്കും അത് കേൾക്കാവുന്നതേ ഉള്ളായിരുന്നു. അയാളെ കണ്ടപ്പോൾ അർജുന്റെ മുഖം കുറച്ചു ടെൻഷൻ ആകുന്നത് ഇഷാനി കണ്ടു. താൻ പറഞ്ഞത് ഒന്നും അവൻ ശ്രദ്ധിച്ചിട്ടില്ല. അകത്തിരിക്കുന്ന ആളുടെ വരവാണ് അവന്റെ മുഖഭാവം മാറാൻ കാരണം. അതപ്പോ ഹൌസ് ഓണർ അല്ലേ..? പിന്നെ എന്തിനാണ് അയാൾ ഇവിടെ കയറി അധികാരത്തിൽ ഇരുന്നത്.. അർജുനെ കണ്ടു കസേരയിൽ നിന്നും എഴുന്നേറ്റു.. ആരാണിയാൾ…? ഇഷാനിക്കും പെട്ടന്ന് ടെൻഷൻ കയറാൻ തുടങ്ങി
‘അച്ഛനെപ്പോൾ വന്നു..?
അർജുൻ ശബ്ദം താഴ്ത്തി ചോദിച്ചു
അച്ഛൻ… എന്റെ ദൈവമേ അർജുന്റെ അച്ഛൻ.. അവന്റെ അച്ഛൻ ആയിരുന്നോ ഇത്. എന്നിട്ടാണോ താൻ ഒരു ഹൌസ് ഓണറോട് എന്ന പോലെ അദ്ദേഹത്തോട് പെരുമാറിയത്. തന്നെക്കുറിച്ച് എന്ത് ഇമ്പ്രെഷൻ ആയിരിക്കും ഇപ്പോൾ പുള്ളിക്ക് ഉണ്ടായിരിക്കുക.. ശോ.. ഇഷാനിയുടെ കിളി മൊത്തത്തിൽ പോയി. കയ്യിലിരുന്ന കടയിൽ നിന്ന് വാങ്ങി കൊണ്ട് വന്ന കവറും പെട്ടന്ന് താഴെ പോയി
ഒരു ചളിപ്പോടെ അവൾ കവർ എടുത്തിട്ട് അർജുന്റെ തോളിന്റെ മറവിൽ ജാള്യതയോടെ നിന്നു. അർജുന്റെ അച്ഛൻ ആയിരുന്നു ഇതെന്ന് അറിഞ്ഞിരുന്നു എങ്കിൽ കുറച്ചു കൂടി ബഹുമാനത്തോടെ ഒക്കെ സംസാരിക്കാമായിരുന്നു. താൻ മോശം ആയി ഒന്നും പറഞ്ഞില്ല. പക്ഷെ എന്തോ ഒരു അബദ്ധം കാണിച്ചത് പോലെ ഇഷാനിക്ക് തോന്നി
‘ഞാൻ വന്നിട്ട് ഒരു പത്തു മിനിറ്റ് ആയി..’
അർജുന്റെ അച്ഛൻ പറഞ്ഞു. ഇഷാനി മെല്ലെ അർജുന്റെ പിന്നിൽ നിന്നും കുറച്ചു നീങ്ങി രഘുനാഥിന് കാണുന്ന രീതിയിൽ നിന്നു.
‘എന്ത് പറ്റി…? എന്തെങ്കിലും അത്യാവശ്യം..? ഒന്ന് വിളിക്കാതെ പെട്ടന്ന്…?
അർജുൻ ഒരു വല്ലായ്മയോടെ ചോദിച്ചു
‘ക്രിസ്തുമസ് ആയിട്ട് രണ്ട് ദിവസം നീ വീട്ടിൽ വന്നു നിൽക്കുമെന്ന് കരുതി. അതുണ്ടായില്ല. ഓഫിസിലോട്ടും ചെല്ലാറില്ല എന്ന് പറഞ്ഞു. നീ അത്ര ബിസി ആണേൽ നിന്നെ ഒന്ന് ഇവിടെ വരെ കണ്ടിട്ട് പോകാമെന്നു കരുതിയാണ് ഇങ്ങോട്ട് വന്നത്. ഞാൻ വന്നത് നിങ്ങൾക്ക് ബുദ്ധിമുട്ട് ആയോ..?
രഘുനാഥ്‌ കണ്ണാടിക്ക് മുകളിലൂടെ കണ്ണുകൾ അവർക്ക് നേരെ പായിച്ചു കൊണ്ട് ചോദിച്ചു
‘ഞങ്ങൾക്ക് ബുദ്ധിമുട്ട് എന്ത്.. ഇവൾ.. ഞങ്ങൾ ഫ്രണ്ട്സ് ആണ്.. ഇവൾക്ക് ചെറിയൊരു ആക്‌സിഡന്റ് പറ്റിയപ്പോൾ ഇങ്ങോട്ട് കുറച്ചു ദിവസത്തേക്ക് ഷിഫ്റ്റ്‌ ആയതാണ്. അല്ലാതെ ഞങ്ങൾ ഒരുമിച്ചല്ല… ‘
ഇഷാനിയുടെ ആക്‌സിഡന്റനേ പറ്റി പറഞ്ഞു അർജുൻ അവളുടെ മുറിവ് അച്ഛനെ കാണിക്കാൻ നോക്കിയപ്പോൾ കയ്യിലെ കെട്ടഴിച്ചു അത് ഓക്കേ ആയി. നെറ്റിയിൽ ആണേൽ ചെറിയൊരു മുറിവ്. മുട്ടിലെ മുറിവ് കരിഞ്ഞു വന്നത് കൊണ്ട് ഇഷാനി ട്രാക്ക് സ്യൂട് ആയിരുന്നു ഇട്ടിരുന്നത്. അത് കൊണ്ട് മുട്ടിലെ മുറിവും കാണിച്ചു കൊടുക്കാൻ പറ്റിയില്ല. അച്ഛൻ താൻ പറഞ്ഞത് വിശ്വസിച്ചില്ലേ എന്ന് അർജുന് തോന്നി
‘ശരി.. ഞാൻ ഇറങ്ങുന്നു.. നിന്നെ കണ്ടല്ലോ. ഇനി പോകുന്നു..’
രഘുനാഥ്‌ അർജുനോടായി പറഞ്ഞു
‘അച്ഛൻ എന്നെ കാണാൻ വേണ്ടി മാത്രം വന്നതാണോ..?
‘അല്ല. ഞാൻ ദേവരാജനെ ഒന്ന് കാണാൻ ഇറങ്ങിയതാ. അപ്പോൾ നിന്നെ ഒന്ന് കണ്ടിട്ട് പോകാമെന്നു കൂടി കരുതി..’
ദേവരാജൻ അച്ഛന്റെ ബന്ധുവും സുഹൃത്തും പങ്കാളിയും ഒക്കെയാണ്. ഞങ്ങളോട് യാത്ര പറയുന്ന പോലെ അച്ഛൻ പോകാൻ തുനിഞ്ഞപ്പോൾ അത്രയും നേരം മിണ്ടാതെ നിന്ന ഇഷാനി അച്ഛന്റെ അടുത്തേക്ക് ചെന്നു
‘അച്ഛന് ധൃതി ഇല്ലെങ്കിൽ ഞാൻ പെട്ടന്ന് പായസം ഉണ്ടാക്കാം. അത് കുടിച്ചിട്ട് പോകാം..’
‘അതൊന്നും സാരമില്ല. വെള്ളം കുടിച്ചല്ലോ ഇപ്പോൾ..’
‘ഇത് സ്പെഷ്യൽ പായസം ആണ്. അച്ഛന് ധൃതി ഇല്ലല്ലോ.. ഞാൻ ദേ ഇപ്പോൾ ഉണ്ടാക്കാം…’
ഇഷാനി അച്ഛന്റെ സമ്മതത്തിന് കാത്തു നിൽക്കാതെ സാധനങ്ങളുമായി അടുക്കളയിലേക്ക് പോയി. അവളോട് വേണ്ടെന്ന് പറയാൻ സമയം കിട്ടാഞ്ഞത് കൊണ്ട് അച്ഛന് പോകാൻ കഴിഞ്ഞില്ല. കസേരയിൽ ഒരു ക്ഷീണത്തോടെ അച്ഛൻ മെല്ലെ ഇരിക്കുന്നത് കണ്ടു ഞാൻ ചോദിച്ചു
‘കാലിന് ഇപ്പോൾ വേദന കുറവുണ്ടോ..?
‘കുഴപ്പമില്ല. കുറച്ചു നേരം നടക്കുമ്പോൾ വേദന ഉണ്ട്..’
അച്ഛൻ മെല്ലെ പറഞ്ഞു. എന്റെ കുട്ടിക്കാലത്തു ഞാൻ കണ്ട അതികായനായ മനുഷ്യൻ അല്ല ഇപ്പോൾ എന്റെ മുന്നിൽ ഇരിക്കുന്നത് എന്ന് എനിക്ക് ബോധ്യം ഉണ്ട്.
‘ആ കുട്ടിക്ക് ആക്‌സിഡന്റ് ഉണ്ടായി എന്ന് പറഞ്ഞത് നേരാണോ..? അതോ എന്റെ മുന്നിൽ വെറുതെ ഒരു കള്ളം പറഞ്ഞതോ..?
അൽപനേരത്തെ മൗനത്തിനു ശേഷം അച്ഛൻ ചോദിച്ചു
‘അല്ല. സത്യം ആണ്. ആക്‌സിഡന്റ് എന്ന് പറയുമ്പോ അത്ര വലിയത് ഒന്നും അല്ലായിരുന്നു. എന്നാലും അവൾ അവിടെ ഒറ്റയ്ക്ക് നിൽക്കുമ്പോ ബുദ്ധിമുട്ട് ആണെന്ന് ഓർത്ത് ഞാൻ ഇങ്ങോട്ട് കുറച്ചു ദിവസം വന്നു നിൽക്കാൻ പറഞ്ഞതാണ്..’
‘ആ കുട്ടിക്ക് നിന്നെ ഇഷ്ടം ആണോ..?
അച്ഛൻ ഒരു തമാശ പോലെ ചോദിച്ചു
‘ശെടാ അച്ഛന് എന്നെ വിശ്വാസം ഇല്ലേ..? ഞാൻ എന്തിന് കള്ളം പറയണം.. ഞങ്ങൾ വെറും ഫ്രണ്ട്സ് ആണ്..’
‘നിനക്ക് ആ കുട്ടിയോട് ഒന്നുമില്ല…?
ഇത്തവണ അച്ഛന്റെ ചോദ്യം കുറച്ചു കൂടി ശക്തമായിരുന്നു. അതിൽ പതറാതെ ഞാൻ മറുപടി കൊടുത്തു
‘ഇല്ല. വീ ആർ ജസ്റ്റ്‌ ഫ്രണ്ട്സ്..’
‘ഞാൻ കരുതിയത് നമ്മുടെ വീട്ടിൽ ഏറ്റവും നന്നായി നുണ പറയുന്ന ആൾ ഞാൻ ആണെന്നാണ്. നീ മെച്ചപ്പെട്ടു വരുന്നുണ്ട്..’
അച്ഛൻ എന്നെ ആക്കി സംസാരിച്ചു. എനിക്ക് അവളോട് ഫീലിംഗ്സ് ഉള്ളത് അച്ഛന് എങ്ങനെ അറിയാം. മഹാൻ വല്ലതും ഇനി പറഞ്ഞു കൊടുത്തിട്ടുണ്ടോ..?
‘ സ്വന്തം മോനെ വിശ്വാസം ഇല്ലേ..? ഞങ്ങൾ തമ്മിൽ ഒന്നുമില്ല. അല്ലേൽ അവളോട് ചോദിച്ചു നോക്ക്..’
‘നിങ്ങൾ തമ്മിൽ ഒന്നും ഇല്ലായിരിക്കും. പക്ഷെ നിന്റെ ഉള്ളിൽ എന്തോ ഉണ്ട്….’
എങ്ങനെയോ അച്ഛന് എന്റെ ഉള്ളിലിരുപ്പ് മാനസിലായിരിക്കുന്നു
‘പിന്നെ…’
ഞാൻ അത് നിസാരമായി തള്ളി കളയുന്ന പോലെ പറഞ്ഞു
‘ഞാൻ നിന്നെ ഇന്നും ഇന്നലെയും അല്ലല്ലോ കാണാൻ തുടങ്ങിയത്. നിനക്ക് എന്നോട് സമ്മതിക്കാൻ മടിയാണെങ്കിൽ വേണ്ട. ഞാൻ ഈ കാര്യത്തിൽ നിന്നെ നിയന്ത്രിക്കാൻ ഒന്നും വരില്ല..’
‘അച്ഛൻ കരുതുന്ന പോലെ അല്ല.. എനിക്ക് ഒരിഷ്ടം അവളോട് ഉണ്ടായിരുന്നു. അത് പക്ഷെ വർക്ക്‌ ആകില്ല. സൊ ഞാൻ അത് വിട്ടു. ഞങ്ങൾ തമ്മിൽ അങ്ങനെ ഒരു ബന്ധം ഇല്ല..’