‘ഞാൻ ഒരു തമാശക്ക് ചെയ്തത് ആടി.. നിനക്ക് ഇത്ര ഫീൽ ആകുമെന്ന് ഞാൻ കരുതിയില്ല.. സോറി..’
‘സോറി ഒന്നും വേണ്ട. അത് വിട്..’
അവൾ ഒരു ഒഴുക്കിൽ പറഞ്ഞു. പക്ഷെ എന്റെ മുഖം അപ്പോളും ഒരല്പം മങ്ങി ആയിരുന്നു. എന്റെ കയ്യിൽ ഇരുന്ന കാപ്പി ഗ്ലാസ് കൈ നീട്ടി വാങ്ങിച്ചു കൊണ്ട് അവൾ പറഞ്ഞു
‘എനിക്ക് കുഴപ്പം ഒന്നുമില്ലടാ.. ഞാൻ പെട്ടന്ന് വായിൽ എന്തോ വന്നത് കയറി പറഞ്ഞതാ.. ‘
‘ഞാൻ കുറച്ചു ഓവർ ആകുന്നുണ്ടല്ലേ..?
ഞാൻ ചോദിച്ചു
‘എന്റെ പൊന്ന് അർജുനെ ഞാൻ അങ്ങനെ ഒന്നും വിചാരിച്ചു പറഞ്ഞതല്ല.. നിനക്ക് അറിയാമല്ലോ ഇത് പോലത്തെ സിറ്റുവേഷൻസിൽ ഞാൻ എങ്ങനെ ആണ് റിയാക്ട് ചെയ്യുന്നത് എന്ന്..’
‘അല്ല.. രാവിലെ ആണെങ്കിലും ഞാൻ കുറച്ചു ഓവർ തന്നേ ആയിരുന്നു..’
ഞാൻ പിന്നെയും അതിൽ തന്നെ കടിച്ചു പിടിച്ചു കിടന്നു പറഞ്ഞു
‘മതി. നിർത്ത്.. ആ ടോപ്പിക്ക് വിട്.. ഇവിടെ വച്ചു നമ്മൾ പിണങ്ങില്ല എന്ന് എഗ്രിമെന്റ് ഉള്ളതാണെ..’
അവൾ ചിരിച്ചു കൊണ്ട് പറഞ്ഞു
ഞങ്ങൾ രണ്ടും ചൂട് കാപ്പി ഊതി ആറിച്ചു കുടിച്ചു കൊണ്ടിരുന്നു. വെയിൽ ഇടയ്ക്ക് മേഖങ്ങളിൽ നിന്ന് വന്നു പ്രകാശിക്കുകയും പിന്നെയും മേഖങ്ങളിൽ മറയുകയും ചെയ്തു. കാപ്പി കുടിച്ചു ഗ്ലാസ്സ് നിലത്ത് വച്ചു എന്തോ ഓർത്ത് കൊണ്ട് അവളെന്നോട് ചോദിച്ചു
‘നീ എന്നെ ഇടയ്ക്ക് നോർത്ത് ഇന്ത്യൻ എന്നൊക്കെ വിളിച്ചു കളിയക്കാറില്ലായിരുന്നോ..? ഇപ്പോൾ എന്താ അത് വിളിച്ചു കളിയാക്കാത്തത്..?
‘നിന്നെ കളിയാക്കാത്തത് ആണോ ഇപ്പോൾ പ്രശ്നം..?
ഞാൻ നെറ്റി ചുളിച്ചു ചോദിച്ചു. അവളുടെ പിറന്നാളിന്റെ അന്ന് അവളുടെ അമ്മയെ കണ്ട അന്ന് തൊട്ട് അവളെ അങ്ങനെ പറഞ്ഞു ഞാൻ കളിയാക്കിയിട്ടില്ല..
‘പറ.. ഇപ്പോൾ അങ്ങനെ കളിയാക്കാറില്ലല്ലോ…?
‘അതിന് നമ്മൾ മാസങ്ങൾ കൂടിയിട്ട് ഈ ഇടയ്ക്ക് ആണ് മിണ്ടാൻ തുടങ്ങിയത്. അതാവും..’
ഞാൻ ശരിക്കുള്ള കാരണം പറഞ്ഞില്ല
‘പണ്ട് നീ അങ്ങനെ കളിയാക്കുമ്പോളും എനിക്ക് ചെറിയ ദേഷ്യം വരുമായിരുന്നു..’
അവൾ പറഞ്ഞു
‘എന്നാൽ ഇനി അതും ഒഴിവാക്കി..’
ഞാൻ പറഞ്ഞത് ഗൗനിക്കാതെ അവൾ വേറെന്തോ ആലോചിച്ചു ഇരുന്നു
‘നീ കളിയാക്കിയതിൽ കുറച്ചു സത്യം ഉണ്ടായിരുന്നു.. ഞാൻ ശരിക്കും ഹാഫ് മല്ലു ആണ്. എന്റെ അമ്മയെ അന്ന് നീ കണ്ടില്ലേ.. അമ്മ ഇവിടുത്തുകാരി അല്ല. നോർത്ത് ആണ്..’
ആദ്യമായ് അവൾ അമ്മയെ കുറിച്ച് ഇങ്ങോട്ട് സംസാരിച്ചത് എനിക്ക് അത്ഭുതം ആയിരുന്നു..
‘അതെനിക്ക് അന്ന് മനസിലായിരുന്നു..’
ഞാൻ പറഞ്ഞു
‘അവര് ശ്രനഗർ വിട്ടു മുംബൈ വന്നു താമസിക്കുവായിരുന്നു.. അച്ഛൻ മുംബൈ ജോലിക്ക് പോയി അവിടെ വച്ചു കണ്ട് ഇഷ്ടം ആയി കല്യാണം കഴിച്ചതാണ്. ഞാൻ ജനിച്ചതും അഞ്ചാറു വയസ്സ് വരെ വളർന്നും എല്ലാം അവിടെ ആണ്. ശരിക്കും ഞാനൊരു ഹിന്ദിക്കാരി കുട്ടി തന്നെ ആയിരുന്നു..’
‘നിന്നെ കണ്ടാൽ അമ്മയുടെ നല്ല ഛായ ഉണ്ട്..’
അത് പറഞ്ഞാൽ അവൾക്ക് ഇഷ്ടം ആകുമോ എന്നറിയില്ല എങ്കിലും ഞാൻ മനസിൽ തോന്നിയത് പറഞ്ഞു
‘ ഞാൻ അന്ന് എന്തിനാ അവരോട് അത്ര ദേഷ്യത്തിൽ പെരുമാറിയത് എന്ന് നിനക്ക് അറിയാമോ..?
അവൾ ചോദിച്ചു
‘ഇല്ല..’
ഞാൻ പറഞ്ഞു
‘അവരാണ് എന്റെ അച്ഛനെ കൊന്നത്..’
ഇഷാനി മെല്ലെ പറഞ്ഞു. എനിക്ക് അത് കേട്ട് എന്തോ ഒരു മരവിപ്പ് തോന്നി. അവൾ തുടർന്നു
‘ അവര് തമ്മിൽ എന്തായിരുന്നു പ്രശ്നം എന്നൊന്നും എനിക്കറിയില്ല. അത് അറിയാനുള്ള പ്രായം ഒന്നും എനിക്ക് അന്ന് ഇല്ലായിരുന്നു. പക്ഷെ എന്തോ ഇഷ്യൂ ഉണ്ടായിരുന്നത് എനിക്ക് അറിയാൻ കഴിയുമായിയിരുന്നു.. രണ്ട് പേരും വഴക്ക് പിടിച്ചു എന്നെ ശ്രദ്ധിക്കാതെ വരുന്നത് കൊണ്ട് അത് അറിഞ്ഞാണ് ഞാനും വളർന്നത്.. ‘
പിന്നെ സംസാരിച്ചു തുടങ്ങുമ്പോ ഇഷാനി എന്നെ നോക്കിയില്ല. അവളുടെ ശബ്ദത്തിന് ഒരു മരവിപ്പ് ഉണ്ടായിരുന്നു.. അവളുടെ വാക്കുകളിൽ ഒരു തേങ്ങൽ ഒളിച്ചിരുന്നു. വയലിന്റെ മേലെ വട്ടമിട്ടു പറക്കുന്ന പക്ഷിക്കൂട്ടങ്ങളെ നോക്കി അവൾ ബാക്കി കഥ പറഞ്ഞു
‘ ഞങ്ങളുടെ റൂമിന് അടുത്തുള്ള റൂമിൽ വേറൊരു മലയാളി ഫാമിലി ആയിരുന്നു ഉണ്ടായിരുന്നെ.. ഇവർ രണ്ട് പേരും വീട്ടിൽ ഇല്ലാത്ത സമയത്തു എന്നെ അവിടെ കൊണ്ട് ആക്കിയിട്ടാണ് പോകുന്നത്. ഒരു ദിവസം രാത്രി ആയിട്ടും എന്നെ വിളിക്കാൻ അമ്മ വന്നില്ല. അച്ഛൻ കുറച്ചു വൈകി ആണ് വരുന്നത്. അച്ഛൻ വന്നപ്പോൾ ആണ് ഞാൻ അപ്പോളും അപ്പുറത്തെ വീട്ടിൽ ആണെന്ന് മനസിലായത്. അമ്മ എവിടെ പോയെന്ന് ആർക്കും മനസിലായില്ല. അച്ഛന് അറിയാമായിരുന്നു എന്ന് തോന്നുന്നു. രണ്ട് ദിവസം കഴിഞ്ഞു എന്നെ പതിവ് പോലെ ആ ഫാമിലിയുടെ അടുത്താക്കിയിട്ട് അച്ഛൻ പോയി. രാത്രി ആയിട്ടും അച്ഛൻ വന്നില്ല. പിറ്റേന്ന് നേരം വെളുത്തപ്പോൾ ആണ് ഞാൻ അറിയുന്നത് അച്ഛൻ എങ്ങും പോയിരുന്നില്ല ഞങ്ങളുടെ വീട്ടിൽ ഒരു കയറിൽ എല്ലാം അവസാനിപ്പിച്ചിരുന്നു എന്ന്..’
അത് പറഞ്ഞിട്ട് അവളൊരു നെടുവീർപ്പിട്ടു.. ഇന്നേ വരെ ആരോടും തുറക്കാത്ത കഥ ഒരാളോട് തുറക്കുന്നതിന്റെ വേദനയും ആശ്വാസവും എല്ലാം അവളുടെ മുഖത്ത് ഉണ്ടായിരുന്നു
‘എന്റെ ലൈഫിലെ വോർസ്റ്റ് ഡേ ആയിരുന്നു അത്. അച്ഛൻ പോയി എന്ന് എനിക്ക് മനസിലായി. ആ ബോധം ഒക്കെ അന്നേ എനിക്ക് വന്നിരുന്നു. പക്ഷെ എനിക്ക് മനസിലാകാഞ്ഞത് അമ്മ എവിടെ പോയി എന്നാണ്..? അമ്മ എന്താ എന്നെ കാണാൻ വരാത്തത് എന്ന് സംശയം ആയി. അമ്മയെ കാണാതെ ആയപ്പോൾ തൊട്ട് അപ്പുറെ ഇപ്പുറെ ഉള്ളവരുടെ എല്ലാം അടക്കി പിടിച്ച സംസാരം എനിക്ക് കേൾക്കാമായിരുന്നു.. പക്ഷെ അതൊന്നും എനിക്ക് മനസിലായില്ല.. അച്ഛൻ മരിച്ചു കഴിഞ്ഞാണ് അതിന്റെ ക്ലിയർ പിക്ചർ എനിക്ക് കിട്ടുന്നത്.. അവര് വേറെ ആരുടെയോ ഒപ്പം പോയതാണ്. എന്റെ അച്ഛനെയും എന്നെയും ഇട്ടിട്ട് അവരുടെ കാമുകന് ഒപ്പം പോയി.. ആ വിഷമത്തിൽ ആണ് അച്ഛൻ ജീവിതം അവസാനിപ്പിച്ചത്… അവര് രണ്ട് പേരും ഒറ്റയടിക്ക് എന്നെ ഉപേക്ഷിച്ചു പോയി ടാ.. രവിയച്ഛൻ നാട്ടിൽ നിന്ന് വരുന്ന വരെ ഞാൻ ശരിക്കും ചത്ത അവസ്‌ഥയിൽ ആയിരുന്നു.. സ്വന്തം എന്ന് പറയാൻ ആരുമില്ലാത്ത ഒരു കുട്ടി.. രവിയച്ഛൻ പിന്നെ എന്നെ നാട്ടിൽ കൊണ്ട് വന്നു.. അന്ന് മുംബൈ വിട്ടതിനു ശേഷം പിന്നെ അന്ന് ആണ് ഞാൻ അവരെ കണ്ടത്.. എല്ലാം കൂടി പെട്ടന്ന് തലയിലേക്ക് വന്നപ്പോൾ എന്റെ കണ്ട്രോൾ പോയി..’
‘എനിക്ക് മനസിലാകും..’
ഞാൻ അവളുടെ കൈ ചേർത്ത് പിടിച്ചു കൊണ്ട് പറഞ്ഞു
‘പിന്നെ ഞാൻ വളർന്നത് എല്ലാം രവിയച്ഛന്റെ വീട്ടിൽ ആണ്. എനിക്ക് പിന്നെ അവിടെ നിന്ന് യാതൊരു ബുദ്ധിമുട്ടും ഉണ്ടായിട്ടില്ല കേട്ടോ.. അവരെന്നെ സ്വന്തം മക്കളെക്കാൾ കെയർ ചെയ്താണ് വളർത്തിയത്. നീ നേരിട്ട് കണ്ടിട്ടുള്ളതല്ലേ അത്..’