‘അപ്പോൾ നമ്മളെ ഒക്കെ മറക്കും അല്ലേ തിരിച്ചു വരുമ്പോൾ..?
അവൾ പിന്നെയും ചോദിച്ചു
‘നിന്നെയോ…..!
ഞാൻ ഇല്ല എന്ന മട്ടിൽ തലയാട്ടി
‘ഉവ്വ.. ഇപ്പോൾ ഇങ്ങനെ ഒക്കെ പറയും..’
അവൾ പരിഭവം കാണിച്ചു പറഞ്ഞു
‘ വിശ്വസിക്കെന്നെ.. നിന്നെ ഞാൻ എങ്ങനെ മറക്കാനാണ്… ആരെങ്കിലും ഷോർട് ഹെയർ വച്ചാൽ തന്നെ നിന്നെ ആയിരിക്കും ഞാൻ ആദ്യം ഓർക്കുന്നത്…’
ഞാൻ പറഞ്ഞു
‘അത് കാണുമ്പോ മാത്രമേ ഓർക്കുള്ളു…?
‘അല്ല. ഹൂഡി ഇടുന്ന ഗേൾസിനെ കാണുമ്പോൾ ഓർക്കും…’
‘വേറെ എന്തൊക്കെ കാണുമ്പോൾ ഓർക്കും…?. അവൾ താല്പര്യത്തോടെ ചോദിച്ചു
‘നോർത്ത് ഇന്ത്യൻസിനെ കാണുമ്പോൾ ഓർക്കും എന്തായാലും…’
ഞാൻ പെട്ടന്ന് ഓർക്കാതെ പറഞ്ഞു പോയതാണ്. അവളെ അങ്ങനെ കുറച്ചായി ഞാൻ കളിയാക്കാറില്ലായിരുന്നു. പക്ഷെ അവൾ അത് സീരിയസ് ആയി ഒന്നും എടുത്തില്ല. എന്നാലും എന്റെ കൈക്കിട്ട് ഒരു തട്ട് വച്ചു തന്നു
‘പോടാ പട്ടി..’
ഒരു ചീത്ത കൂടി എന്നെ വിളിച്ചു
‘ആ പിന്നെ ഈ പേരയ്ക്ക ഇല്ലേ. അത് കാണുമ്പോ നിന്നെ ഓർക്കും.. പേരയ്ക്ക പേരയ്ക്ക..’
ഞാൻ അവളെ കളിയാക്കാനായി കൈ കൊണ്ട് പേരയ്ക്ക എന്ന് ആംഗ്യം കാണിച്ചു. അവൾ കൈ നീട്ടി കുറച്ചു കൂടി കനത്തിൽ എന്റെ കൈയിൽ ഒരു അടി വച്ചു തന്നു..
‘അപ്പോൾ ഇതൊക്കെ കാണുമ്പോ അല്ലേ എന്നെ ഓർക്കൂ.. ഡെയിലി ഓർക്കില്ലല്ലോ..?
ഇഷാനി കൊച്ചു കുട്ടികളെ പോലെ പിണങ്ങി പറഞ്ഞു
‘അങ്ങനെ ഞാൻ പറഞ്ഞില്ല. ഡൈയിലി ഓർക്കുമെന്ന് പറഞ്ഞാലും നീ വിശ്വസിക്കില്ല. അത് കൊണ്ടാണ് ഇതൊക്കെ കണ്ടാൽ നിന്നെ ഓർക്കുമെന്ന് പറഞ്ഞത്..’
‘ ഞാൻ നിനക്കൊരു ഗിഫ്റ്റ് തന്നാൽ നീ വാങ്ങിക്കുമോ..?
അവൾ പെട്ടന്ന് എന്തോ ഓർമയിൽ വന്ന പോലെ എന്നോട് ചോദിച്ചു
‘എന്ത് ഗിഫ്റ്റ്…?
ഞാൻ തിരിച്ചു ചോദിച്ചു
‘ദേ ഇത്..’
അവൾ സ്വന്തം കയ്യിൽ കിടന്ന രുദ്രാക്ഷം ഊരാൻ ശ്രമിച്ചു
‘ഇത് പൂജിച്ചത് അല്ലേ.. ഊരണ്ട. നിന്റെ കയ്യിൽ കിടക്കട്ടെ..’
ഞാൻ അവളെ പിന്തിരിപ്പിച്ചു
‘അത് കുഴപ്പമില്ല. എന്റെ നല്ലതിന് വേണ്ടി പൂജിച്ചത് ആണ്. നീ കെട്ടിയാൽ നിനക്ക് നല്ലതിന്..’
‘അത് വേണ്ട.. ഇത് നിന്റെ കയ്യിൽ കിടക്കുന്നത് ആണ് എനിക്ക് ഇഷ്ടം..’
ഞാൻ അവളുടെ രുദ്രാക്ഷത്തിലും അവളുടെ കയ്യിലും തലോടി കൊണ്ട് പറഞ്ഞു. അവൾ കയ്യിലെ മറ്റേ ചെയിനിൽ നോക്കി. ഞാൻ അവൾക്ക് ഗിഫ്റ്റ് കൊടുത്തത് ആണ് അത്. അത് തന്നെ എനിക്ക് തന്നെ ഗിഫ്റ്റ് ആയി തരാൻ അവൾക്ക് തോന്നിയില്ല
‘എന്നാൽ ഞാൻ ടൌൺ വരെ ഒന്ന് പോയിട്ട് വരാം.. ‘
അവൾ എഴുന്നേറ്റ്
‘ഗിഫ്റ്റ് വാങ്ങാനോ..? അതൊന്നും വേണ്ട..’
ആകെ കുറച്ചു സമയം ഉള്ളത് അവളുടെ കൂടെ ഇരിക്കാം എന്നാണ് ഞാൻ ചിന്തിച്ചത്. അവൾ ടൗണിൽ പോയി താമസിച്ചാൽ അത് കുളമാകും
‘എന്റെ ഗിഫ്റ്റ് വേണ്ടേ നിനക്ക്..?
‘വേണ്ട. ആകെ കുറച്ചു സമയം ഉള്ളയിടത്തു ഇനി ഗിഫ്റ്റ് വാങ്ങാൻ ഒന്നും പോകണ്ട. ഇവിടെ ഇരി..’
‘എന്നാൽ നിന്റെ ഗിഫ്റ്റ് നീ തന്നെ തിരിച്ചു എടുത്തോ..’
അവൾ കാൽ നീട്ടി കൊലുസ് കാണിച്ചു കൊണ്ട് പറഞ്ഞു.
‘പിണങ്ങിയോ..? ഞാൻ ഫീൽ ആക്കാൻ പറഞ്ഞതല്ല. അത്രയും നേരം കൂടി നമ്മൾക്ക് ഇവിടെ ഇരിക്കാമല്ലോ എന്നോർത്ത് പറഞ്ഞതാ.. ഇനി ഞാനായിട്ട് തടയുന്നില്ല. പക്ഷെ പെട്ടന്ന് പോയിട്ട് വരണം…’
അത് കേട്ടതും ഇഷാനി പെട്ടന്ന് തന്നെ ഡ്രസ്സ് മാറാൻ ഓടി. നിമിഷ നേരം കൊണ്ട് അവൾ ഡ്രസ്സ് മാറി ഒരു വെള്ളയിൽ മഞ്ഞ പൊട്ടുള്ള ചുരിദാർ ധരിച്ചു കൊണ്ട് പുറത്തേക്ക് വന്നു. ഒരു പേഴ്‌സ് കഴുത്തിലൂടെ ചുറ്റി അരയിൽ തൂങ്ങി കിടപ്പുണ്ട്.. ചുരിദാർ ആയത് എന്തായാലും നന്നായി. അവസാനം കാണുമ്പോൾ അവളെ നല്ല സുന്ദരി ആയി തന്നെ കാണാമല്ലോ.. ഞാൻ ഓർത്തു
‘ഞാൻ പെട്ടന്ന് വരാമേ…’
അവൾ ചാടി ഇറങ്ങി കൊണ്ട് പറഞ്ഞു
‘ദേ ഷാൾ ഇട്ടില്ല..’
ചുരിദാറിന്റെ ഷാൾ ധൃതിയിൽ അവൾ കസേരയിൽ ഇട്ടിരിക്കുകയായിരുന്നു.. അവൾ തിരിച്ചു വരുന്നതിന് പകരം ഞാൻ പുറത്തേക്ക് ചെന്നു ഷാൾ അവൾക്ക് കൊടുത്തു
‘താങ്ക്സ്.. ഞാൻ പോയിട്ട് പെട്ടന്ന് വരാം..’
അവൾ ധൃതിയിൽ വഴിയിലേക്ക് ഓടി
‘ബൈ…’
ഞാൻ ഉറക്കെ വിളിച്ചു പറഞ്ഞു
ഗിഫ്റ്റ് വാങ്ങാൻ ആയത് കൊണ്ട് കൂടെ വരാമെന്ന് പറഞ്ഞിട്ട് അവൾ കേട്ടില്ല. അല്ലെങ്കിൽ അവളെ ബൈക്കിൽ കൊണ്ട് പോകാമായിരുന്നു.. ഞാൻ കൂടെ ഉണ്ടെങ്കിൽ ഗിഫ്റ്റ് വാങ്ങുന്നതിലെ ത്രില്ല് പോകുമെന്ന് ഇഷാനിക്ക് തോന്നി
അപ്പോളും എന്ത് ഗിഫ്റ്റ് ആണ് വാങ്ങേണ്ടത് എന്ന് അവൾക്ക് ഒരു നിശ്ചയം ഇല്ലായിരുന്നു. അർജുൻ എപ്പോളും തന്നെ ഓർക്കുന്ന എന്തെങ്കിലും വേണമെന്ന് അവൾക്ക് തോന്നി. അവനെ എപ്പോളും ഓർമ്മിക്കാൻ അവളുടെ കയ്യിൽ കിടക്കുന്നത് പോലെ എന്തെങ്കിലും…. അപ്പോളാണ് ഇഷാനി വാച്ച് വാങ്ങിയാലോ എന്ന് ആലോചിച്ചത്. അർജുൻ പൊതുവെ അങ്ങനെ വാച്ച് കെട്ടാറില്ല. താൻ കൊടുത്തത് ആയത് കൊണ്ട് പക്ഷെ അത് എപ്പോളും ധരിക്കാൻ സാധ്യത ഉണ്ട്. ഇഷാനി ടൗണിലെ അത്യാവശ്യം നല്ലൊരു വാച്ച് കടയിൽ തന്നെ ചെന്നു. വാച്ച് മതി എന്ന് ഉറപ്പിച്ചെങ്കിലും ഏത് വാങ്ങുമെന്ന പുതിയ കൺഫ്യൂഷൻ ഉടലെടുത്തു. ഒരുപക്ഷെ താൻ കൊടുക്കുന്ന മോഡൽ അവന് ഇഷ്ടം ആയില്ല എങ്കിലോ..? ഇഷാനി വെറുതെ ഓവർ തിങ്ക് ചെയ്യാൻ തുടങ്ങി. ഓരോ വാച്ചും അവൾ എടുത്തു നോക്കി പിന്നീട് തിരികെ വച്ചു. ഒടുവിൽ കടയിൽ നിന്ന പെൺകുട്ടിയോട് ഗിഫ്റ്റ് വാങ്ങുന്നതിന്റെ ഉദ്ദേശം ചെറുതായ് ഒന്ന് പറഞ്ഞപ്പോൾ ആണ് ഇഷാനി ഉദ്ദേശിച്ച തരത്തിൽ ഒന്ന് കിട്ടിയത്. അർജുന് സമ്മാനം ആയി കൊടുക്കാൻ പറ്റിയ ഒരു സ്പെഷ്യൽ ഗിഫ്റ്റ്.. സംഭവം കുറച്ചു ഓവർ ആയി ഒക്കെ ഇഷാനിക്ക് തോന്നിയെങ്കിലും അത് സാരമില്ല എന്ന് അവൾ കരുതി. പെട്ടന്ന് ചെല്ലാമെന്ന് അർജുന് വാക്ക് കൊടുത്തെങ്കിലും ഇഷാനി കുറച്ചധികം സമയം എടുത്തു. വാച്ച് മാത്രം അല്ല അവന് രണ്ട് ഷർട്ട് കൂടി ഇഷാനി വാങ്ങി. പിന്നെയും എന്തൊക്കെയോ വാങ്ങണം എന്ന് അവൾക്ക് തോന്നി. സമയം കൂടുതൽ പോയാൽ അവൻ ദേഷ്യപ്പെടുമെന്ന് ഓർത്തു അവൾ തിരിച്ചു പോന്നു..
താമസിച്ചത് കൊണ്ട് ചെല്ലുമ്പോ തന്നെ അർജുൻ ദേഷ്യപ്പെടും എന്ന് അവൾക്ക് തോന്നി. അവൻ പറഞ്ഞതും കാര്യമാണ് ലാസ്റ്റ് കുറച്ചു നേരം കൂടി മിണ്ടിയും പറഞ്ഞും ഇരിക്കാൻ ഉള്ളതിന് ഷോപ്പിംഗ് പോയി സമയം കളഞ്ഞു. ഇനിയിപ്പോ എന്തായാലും സമയം വൈകി.. അത് കൊണ്ട് തന്നെ വൈകിട്ട് തിരിച്ചു താൻ താമസിക്കുന്ന ഇടത്തേക്ക് പോകേണ്ട എന്ന് ഇഷാനിക്ക് തോന്നി. നാളെ രാവിലെ അവൻ പോകും. അത് വരെ കൂടെ തന്നെ ഇരിക്കാം.. അവനെ സ്റ്റേഷനിൽ കൊണ്ട് യാത്ര ആക്കാം.. അത് കഴിഞ്ഞു താൻ താമസിക്കുന്നിടത്തേക്ക് മാറിയാൽ മതിയെന്ന് തിരിച്ചു വരുന്ന വഴി ഓട്ടോയിൽ ഇരുന്നു അവൾ തീരുമാനിച്ചു.