ഞാൻ വിളിച്ച പേര് മാറ്റി വിളിച്ചു.. ഇനി ആ പേര് വിളിക്കാൻ ഒരുപക്ഷെ എനിക്ക് അവകാശം ഇല്ലായിരിക്കും.. അവൾ പക്ഷെ ഒന്നും പറയാതെ കൈ വിടീക്കാൻ ശ്രമിച്ചു
‘എടി നീ ഒന്ന് ഇവിടെ ഇരിക്ക്.. എനിക്ക് പറയാൻ ഉള്ളത് കേട്ടിട്ട് നീ പൊക്കോ.. ഞാൻ തടയില്ല..’
പക്ഷെ അതിനും അവൾ എന്നെ കേൾക്കാൻ കൂട്ടാക്കിയില്ല. ഒരു നൂറ് തവണ ഞാൻ പിന്നെയും പറഞ്ഞു നോക്കി. അവൾ മറുത്തൊന്നും പറയാതെ കൈ വിടീക്കാൻ മാത്രം ശ്രമിച്ചു കൊണ്ടിരുന്നു. ബലം കൊണ്ട് മാത്രം എനിക്കവളെ പിടിച്ചു നിർത്താൻ കഴിയുള്ളു എന്നായിരുന്നു അതിനർത്ഥം..
‘എന്നാൽ നീ പോ.. എനിക്ക് പറയാൻ ഉള്ളതൊന്നും കേൾക്കണ്ട.. എന്റെ സൈഡ് കൂടി കേൾക്കാൻ നിനക്ക് പറ്റുന്നില്ല എങ്കിൽ പൊക്കോ..’
ഞാൻ കൈ വിട്ടു ശബ്ദം ഉയർത്തി പറഞ്ഞു.. എന്തിനാണ് അങ്ങനെ പറഞ്ഞത് എന്ന് എനിക്ക് അറിയില്ല.. എങ്ങനെയോ വായിൽ നിന്ന് വീണു
പോകാൻ കുതറിയ ഇഷാനി അവിടെ തന്നെ നിന്നു. ബാഗ് സോഫയിൽ വച്ചു അവൾ അവിടെ ഇരുന്നു.. എന്നെ കേൾക്കാൻ അവൾ തയ്യാറാണ്
‘എടി ഞാൻ നിന്നെ പറ്റിക്കാൻ ഒന്നും നോക്കുവല്ല.. ഞാൻ നിന്നെ ചീറ്റ് ചെയ്യുമെന്ന് നിനക്ക് തോന്നുന്നുണ്ടോ..?
അവളെ എങ്ങനെ കൺവിൻസ് ചെയ്യണം എന്ന് എനിക്ക് അറിയില്ലായിരുന്നു.
‘എനിക്ക് നിന്നെ വിശ്വാസം ആണ്. ഒറ്റ കാര്യം നീ പറഞ്ഞാൽ ഞാൻ പോവില്ല.. ഇപ്പൊ നടന്നത് ഒന്നും സത്യം അല്ല എന്ന് പറ.. ഞാൻ കേട്ടതും കണ്ടതും ഒന്നും നടന്നിട്ടില്ല എന്ന് പറ. ഞാൻ ഇവിടെ തന്നെ നിക്കാം..’
അവൾ എന്നെ തുറിച്ചു നോക്കി കൊണ്ട് പറഞ്ഞു.
‘നീ കണ്ടതും കേട്ടതും ഒക്കെ സത്യം ആണ്.. എന്റെ മിസ്റ്റേക്ക് ആണ്.. അല്ല എന്ന് ഞാൻ പറയില്ല. പക്ഷെ ഞാൻ ഇത് നിന്നോട് മനഃപൂർവം മറച്ചു വച്ചതല്ല.. ഞാൻ പലതവണ നിന്നോട് ഇത് പറയാൻ വന്നതാണ്.. നീ പക്ഷെ ഇത് പറയണ്ട പറയണ്ട എന്ന് വച്ചു നീട്ടി കൊണ്ട് പോയി. ഞാൻ ഉറപ്പായും ഇത് നിന്നോട് പറഞ്ഞേനെ..’
‘ശരി.. നീ എന്നെ ചീറ്റ് ചെയ്തില്ല. എല്ലാം എന്നോട് പറയാൻ ഇരുന്നതാണ്.. ഓക്കേ സമ്മതിച്ചു.. അവളെയോ..? അവളോട് നീ നമ്മളുടെ കാര്യം പറഞ്ഞോ..? അതോ അതും പറയാൻ വേറെ സമയം കണ്ടിട്ടുണ്ടോ..? അവളോട് അവളുടെ ചേച്ചിയെ പറ്റി നീ സംസാരിച്ചിട്ടുണ്ടൊ..? ലക്ഷ്മിക്ക് അറിയുമോ അവളുടെ കാര്യം..? എന്നെ നീ പറ്റിച്ചില്ല. പക്ഷെ അവരെ രണ്ടിനെയും…?
ഇഷാനി വളരെ ശക്തമായ ഒരു ചോദ്യം എനിക്ക് നേരെ എറിഞ്ഞു..
‘ഞാൻ ആരെയും പറ്റിക്കാനോ വിഷമിപ്പിക്കാനോ കരുതിയതല്ല..’
‘അങ്ങനെ നീ പറയരുത്.. നിനക്ക് അവളെ ആയിരുന്നു ഇഷ്ടം എങ്കിൽ എന്നെ നീ വച്ചോണ്ട് ഇരുന്നത് അവളോടുള്ള ചതിയാണ്..’
‘ഹേ.. അങ്ങനെ ഒന്നും പറയല്ലേ..’
അവളങ്ങനെ പറഞ്ഞപ്പോ എന്റെ ചങ്ക് പൊള്ളി
‘അപ്പോൾ അവളാണോ നിന്റെ സെറ്റപ്പ്.. എങ്ങനെ ആണെന്ന് അറിഞ്ഞാൽ കൊള്ളാം…’
‘എടി അത്.. അത് ടൂറിനു ഇടയിൽ എനിക്ക് പറ്റിയ ഒരു അബദ്ധം ആയിരുന്നു. അല്ലാതെ ഞാൻ അവളെ ആശ കൊടുത്തു പറ്റിച്ചത് അല്ല..’
‘അവൾക്ക് ലക്ഷ്മിയുടെ കാര്യം അറിയുമോ..?
ഇഷാനി ചോദിച്ചു
‘ഇല്ല…’
‘അപ്പോൾ അത് പറ്റിക്കൽ അല്ലേ..? നിനക്ക് എങ്ങനെ കഴിയുന്നു അർജുൻ ചേച്ചിയെയും അനിയത്തിയെയും… ഛേ…’
ഇഷാനിയുടെ മുഖം പുച്ഛം കൊണ്ട് വിളറി.. എനിക്ക് ആ മുഖത്തു നോക്കാൻ പോലും ഭയമായി
‘ഇതൊക്കെ അറിയുന്ന നീ പിന്നെ എന്തിനാ എന്നെ..’
ഇഷാനി മുഴുവിപ്പിച്ചില്ല.. അത് എനിക്ക് മനസിലായിരുന്നു..
എന്റെ അമ്മയെ പോലെ തന്നെ എന്നെയും നീ ചീത്ത ആക്കി.. താങ്ക്സ് ഡാ..’
അവൾ നിറഞ്ഞൊഴുകുന്ന കണ്ണുകളോടെ എന്നേ നോക്കി പറഞ്ഞു. എനിക്ക് കരയണം എന്നുണ്ടായിരുന്നു. പക്ഷെ കണ്ണീർ പോലും ഈ അവസ്‌ഥയിൽ എന്നോട് കരുണ കാട്ടിയില്ല.
‘ഇഷാനി…..’
എന്ത് പറഞ്ഞു അവളെ സമാധാനിപ്പിക്കണം എന്ന് എനിക്ക് അറിയില്ലായിരുന്നു..
‘ഞാൻ എന്റെ എല്ലാം നിന്നോട് പറഞ്ഞിട്ടുള്ളതല്ലേ.. എനിക്ക് ഒരു ചീത്ത കുട്ടി ആവരുതേ എന്നൊരൊറ്റ ആഗ്രഹം അല്ലായിരുന്നോ ഉള്ളു.. അത് തന്നെ നീ തകർത്തില്ലേ..’
അവൾ പിന്നെയും ഇരുന്നു കരഞ്ഞു.. കരഞ്ഞു കരഞ്ഞു ഏങ്ങലടി ആയി.. സ്നേഹിക്കുന്ന പെണ്ണ് മുന്നിൽ ഇരുന്നു കരഞ്ഞിട്ടും അവളെ ഒന്ന് ആശ്വസിപ്പിക്കാൻ പോലും കഴിയാത്ത ഒരുവൻ എത്രത്തോളം നിസ്സഹായൻ ആണെന്ന് മനസിലാക്കാമല്ലോ.. ഇവിടെ ഞാൻ തന്നെ ആണ് അവളുടെ ദുഖത്തിന് കാരണം..
ഒടുവിൽ കരഞ്ഞു കലങ്ങിയ കണ്ണുമായ് ചെറിയ ഏങ്ങലടിയോടെ അവൾ മുഖം തിരുമ്മി പോകാൻ എഴുന്നേറ്റു.. ബാഗ് കയ്യിലെടുത്തു അവൾ എന്റെ മുഖത്തേക്ക് നോക്കി. ഇനി നിനക്ക് എന്തെങ്കിലും പറയാൻ ഉണ്ടോ എന്നൊരു ധ്വനി ആ നിൽപ്പിൽ ഉണ്ടായിരുന്നു. ഞാൻ അവളെ നോക്കി നിർജീവനോടെ നിന്നു..
പോകുന്നതിന് മുമ്പായി അവളെന്നോട് യാത്ര പോലെ പറഞ്ഞു
‘ഞാൻ നിന്നെ എങ്ങനെ ആണ് കണ്ടിട്ടുള്ളത് എന്ന് നിനക്ക് ഇപ്പോളും അറിയില്ല.. അറിയില്ല നിനക്ക്.. അത് കൊണ്ട് തന്നെ ഞാൻ നിന്നെ ശപിക്കാൻ ഒന്നും പോണില്ല.. അതോർത്തു നീ പേടിക്കണ്ട..’
അത്രയും പറഞ്ഞു അവൾ പോയി.. അവൾ പോകുന്നത് നോക്കി ഞാൻ നിന്നു. ഇവിടുത്തെ മുഴുവൻ സന്തോഷവും ഐശ്വര്യവും പടിയിറങ്ങി ഒരു ബാഗും തൂക്കി പോകുന്നത് ഞാൻ വേദനയോടെ കണ്ടു. എനിക്ക് ഒന്ന് പൊട്ടിക്കരയണം എന്നുണ്ടായിരുന്നു. പക്ഷെ അതിനും സാധിക്കുന്നില്ല.. ഞാൻ നാടുവാതിലിൽ അവൾ പോയ വഴിയിലേക്ക് നോക്കി ഇരുന്നു. അവൾ തിരിച്ചു വരുമെന്ന പ്രതീക്ഷയിൽ ഒന്നുമല്ല. വെറുതെ.. ഒന്നിനും അല്ലാതെ ഇരുന്നു..
സമയം ഒരുപാട് കടന്നു പോയി. വെയിൽ മാറിയും മറിഞ്ഞും വന്നു. ഞാൻ അവിടെ തന്നെ ഇരുന്നു. ഇടയ്ക്ക് കൃഷ്ണ രണ്ട് തവണ വിളിച്ചിരുന്നു. ഞാൻ അതും എടുക്കാൻ പോയില്ല.. അതേ ഇരുപ്പ് വൈകുന്നേരം വരെ ഞാൻ അങ്ങനെ ഇരുന്നു.. അത്രയും നേരം ഞാൻ എന്താണ് ചിന്തിച്ചത് എന്ന് പോലും എനിക്കിപ്പോ ഓർമ ഇല്ല. ഞാൻ അകത്തേക്ക് കയറി. വല്ലാത്ത വീർപ്പുമുട്ടൽ എനിക്ക് അവിടെ അനുഭവപ്പെട്ടു. മുറിയിൽ കയറിയപ്പോൾ അവളുടെ കുറച്ചു സാധനങ്ങൾ കൂടി അവിടെ ഇരിപ്പുണ്ടായിരുന്നു. അത് അവൾക്ക് കൊണ്ട് കൊടുത്താലോ എന്ന് ഞാൻ ആലോചിച്ചു..
സന്ധ്യ ആകാറായിരുന്നു ഞാൻ അവളുടെ വീട്ടിൽ എത്തിയപ്പോൾ. അവളുടെ ഓണർ അമ്മ വെളിയിൽ ഉണ്ടായിരുന്നു. ആക്‌സിഡന്റ് പറ്റി കഴിഞ്ഞു ഞാൻ അവളെ നോക്കിയത് കൊണ്ട് അവർക്ക് എന്നോട് ഒരിഷ്ടവും വിശ്വാസവും ഒക്കെ തോന്നിയിരുന്നു.. അത് കൊണ്ട് എനിക്ക് അവരുടെ മുഖം കറുപ്പിക്കാതെ അവളുടെ മുകളിലെ നിലയിലേക്ക് കയറി ചെല്ലാൻ കഴിഞ്ഞു. ഡോറിൽ തട്ടി കുറച്ചു കഴിഞ്ഞാണ് അവൾ ഡോർ തുറന്നത്..