ആദി : വേണമെങ്കിൽ വിശ്വസിച്ചാൽ മതി പിന്നെ അവിടെ കിടന്ന് കരഞ്ഞു വിളിച്ചു എന്നെ കൂടി നാറ്റിക്കരുത് എത്ര വേദനിച്ചാലും കടിച്ചു പിടിച്ചു നിൽക്കണം
ഇത്രയും പറഞ്ഞ ശേഷം ആദി പേടിച്ചിരിക്കുന്ന രൂപയുടെ മുഖം മിററിലൂടെ നോക്കി പതിയെ ചിരിച്ചു
രൂപ : ടാ അവരോട് മയക്കിയിട്ട് ബ്ലഡ്‌ എടുക്കാൻ നീ ഒന്ന് പറയോ
ആദി : പിന്നേ എനിക്കതല്ലേ ജോലി
രൂപ : ദുഷ്ടൻ നീ അനുഭവിക്കുമെടാ
ആദി : പ്രാകാതെടി നീ പറഞ്ഞാൽ ചിലപ്പോൾ അത് പോലെ തന്നെ നടക്കും
രൂപ : അതേ നടക്കും എന്റെതേ കരിനാക്കാ ധാ നോക്ക് 😛
രൂപ പതിയെ നാക്ക് പുറത്തേക്കിട്ട് കാണിച്ചു
ആദി : ഉം നന്നായിട്ടുണ്ട് നല്ല അസൽ ചിമ്പാൻസി
രൂപ : ചിമ്പാസി നിന്റെ മാറ്റവള് സാന്ദ്ര
ആദി : എന്തിനാടി ആവശ്യമില്ലാതെ അവളെ ഇതിൽ വലിച്ചിടുന്നത്
രൂപ : ഓഹ് അവളെ പറഞ്ഞപ്പോൾ കൊണ്ടല്ലേ അല്ല ഇന്ന് എന്തായിരുന്നു ആ സാന്ദ്രയുമായി
ആദി : അതൊക്കെ എന്റെ പേഴ്സണൽ മേറ്റേഴ്സാണ് അല്ലെങ്കിൽ തന്നെ ഇതൊക്കെ ചോദിക്കാൻ നീ ആരാ
രൂപ : (കോഴി കാട്ട് കോഴി )
ആദി : വല്ലതും പറയാൻ ഉണ്ടെങ്കിൽ ഉറച്ചു പറയെടി
രൂപ :വേഗം പോകാൻ പറഞ്ഞതാ സമയം പോകുന്നു
ആദി : ഇതിലും വേഗത്തിൽ പോയാൽ നമുക്ക് ബ്ലഡ്‌ തരാൻ വേറേ ആരെങ്കിലും വരേണ്ടി വരും പിന്നെ നിന്റെ കാര്യം പറയുകയും വേണ്ട ചോര കിട്ടാതെ ചാകും
ഇത് കേട്ട രൂപ ആദിയുടെ കുറുക്കിൽ കൈ മുറുക്കി ഇടിച്ചു
ആദി : ദേഹത്ത്‌ തൊടരുത് എന്നല്ലെ നിന്നോട് പറഞ്ഞിട്ടുള്ളത്
രൂപ : മിണ്ടാതെ ഇരുന്നില്ലെങ്കിൽ ഇനിയും തൊടും 😡
ആദി : എന്താടി ശബ്ദത്തിനൊരു മാറ്റം കോളേജിൽ വച്ച് ഇങ്ങനെയൊന്നും ആയിരുന്നില്ലല്ലൊ
രൂപ : കാര്യം കാണാൻ കഴുതക്കാലും പിടിക്കണം എന്നല്ലേ അതുകൊണ്ട് കോളേജിൽ വച്ച് ഞാൻ ഒന്ന് താഴ്ന്നു തന്നതാ
ആദി : കഴുത നിന്റെ മറ്റവൻ
രൂപ : അത് തന്നെയാ ഞാനും പറഞ്ഞത്
ആദി :ടീ..
രൂപ : നേരെ നോക്കി ഓട്ടിക്ക് ഇല്ലെങ്കിൽ വല്ല വണ്ടിയുടെയും ഇടയിൽ പോകും എന്നെ കൂടി കൊലക്ക് കൊടുക്കല്ലേ
ആദി : നിന്നെക്കാൾ വലിയ അപകടമൊന്നും ഈ ലോകത്ത് ഇനി വരാനില്ല
അല്പ സമയത്തിനു ശേഷം സിറ്റി ഹോസ്പിറ്റൽ
ആദി :ടീ അവര് ചിലപ്പോൾ പൈസ വല്ലതും തരും അത് വാങ്ങരുത് നാണക്കേടാണ്
ഇത് കേട്ട രൂപ ആദിയെ തുറിച്ചു നോക്കാൻ തുടങ്ങി
ആദി : കണ്ണുരുട്ടണ്ട ഞാൻ ഒന്ന് പറഞ്ഞന്നെ ഉള്ളു
രൂപ : ഹോ നിനക്ക് മാത്രമല്ലെ അഭിമാനമൊക്കെ ഉള്ളു
ആദി : നീ എന്തിനാ അതിന് കരയുന്നേ
രൂപ : ആര് കരഞ്ഞു നീ എന്റെ കയ്യിന്ന് നല്ലത് വാങ്ങും
ആദി : ശബ്ദം കേട്ടപ്പോൾ അങ്ങനെ തോന്നി വാ പോകാം റൂം നമ്പർ 14 എന്നല്ലേ പറഞ്ഞത്
രൂപ : ഉം 😒
ആദി : എന്താടി നിനക്ക് ശെരി പറഞ്ഞതിന് സോറി പോരെ ഇനി വാ
ഇത്രയും പറഞ്ഞു അവർ ഹോസ്പിറ്റലിനുള്ളിലേക്ക് നടന്നു
റൂം നമ്പർ 14 നു മുന്നിൽ
ആദി :അതെ ഈ കിരൺ
“ഞാനാണ് നിങ്ങൾ വിഷ്ണു പറഞ്ഞിട്ട് വന്നതാണോ ”
ആദി :അതെ ഇതാണ് ബ്ലഡ്‌ കൊടുക്കാൻ വന്ന ആള്
ആദി രൂപയെ കാണിച്ച ശേഷം പറഞ്ഞു
കിരൺ : വേഗം വാ ആദ്യം കുറച്ചു ടെസ്റ്റ്കൾ ഉണ്ട് അത് കഴിഞ്ഞേ ബ്ലഡ്‌ കൊടുക്കാൻ പറ്റു
അല്പസമയത്തിന് ശേഷം
“ദോ ആ റൂമിലേക്ക് പൊക്കൊ അവിടെ വച്ചാ ബ്ലഡ്‌ എടുക്കുന്നെ ”
ടെസ്റ്റ്‌കൾക്കെല്ലാം ശേഷം ഒരു നേഴ്സ് രൂപയോടായി പറഞ്ഞു
രൂപ പതിയെ അങ്ങോട്ടേക്ക് നടന്നു
നേഴ്സ് :താൻ കൂടി പോടോ ബ്ലഡ്‌ എടുക്കുമ്പോൾ ആരെങ്കിലും കൂടെ വേണം
ഇത് കേട്ട ആദി രൂപയോടൊപ്പം ആ റൂമിലേക്ക് കയറി അവിടെ ഒരു നേഴ്സ് നിൽപ്പുണ്ടായിരുന്നു
നേഴ്സ് :ആ ബെഡിലേക്ക് കിടന്നോ
ഇത് കേട്ട രൂപ പതിയെ അടുത്തുള്ള ബെഡിലേക്ക് കിടന്നു
നേഴ്സ് :രൂപ പ്രസാദ് അല്ലേ
രൂപ :അതെ
നേഴ്സ് : പോകുമ്പോൾ കോൺടാക്ട് നമ്പർ ഒന്ന് കൊടുത്തിട്ട് പോണേ റെയർ ഗ്രൂപ്പ് ആയത് കൊണ്ട് ആവശ്യം വന്നാൽ വീണ്ടും വിളിക്കാം
ഇത് കേട്ട ആദി രൂപയെ നോക്കിയ ശേഷം പതിയെ വാ പൊത്തി ചിരിച്ചു
നേഴ്സ് പതിയെ നീഡിലും ട്യൂബും ബാഗുമെല്ലാം ടേബിളിലേക്ക് എടുത്തു വച്ചു ഇത് കണ്ട രൂപയുടെ മുഖം വിളറി വെളുക്കാൻ തുടങ്ങി
രൂപ :അതെന്തിനാടാ അത്രയും വലിയ നീഡിൽ 😟
ആദി :പേടിക്കണ്ട ഒരു ആന കുത്തുന്ന വേദന യേ കാണു
രൂപ : പോടാ പട്ടി
നേഴ്സ് പെട്ടെന്ന് തന്നെ രൂപയുടെ അടുത്തേക്ക് എത്തിയ ശേഷം പതിയെ പഞ്ഞികൊണ്ട് കൈ തുടച്ചു ശേഷം പതിയെ നീഡിൽ കയ്യിലേക്ക് എടുത്തു
നേഴ്സ് : കൈ ലൂസാക്കി പിടിക്ക് കുട്ടി
ആദി : രൂപേ കണ്ണ് ഇറുക്കി അടച്ചോ അങ്ങോട്ട് നോക്കണ്ട
ഇത് കേട്ട രൂപ പതിയെ കണ്ണുകൾ ഇറുക്കി അടച്ചു
അല്പനേരത്തിന് ശേഷം
“ഉം കഴിഞ്ഞു ”
ഇത്രയും പറഞ്ഞു ബ്ലഡ്‌ ബാഗ് അവിടെ തൂക്കിയിട്ട ശേഷം നേഴ്സ് റൂമിൽ നിന്ന് പുറത്തേക്കു പോയി
രൂപ : കഴിഞ്ഞോ ടാ നാറി നീ എന്നെ പറ്റിച്ചതാണല്ലെ
ഇത് കേട്ട ആദി പതിയെ ചിരിച്ചു
രൂപ :ടാ..
ആദി : മിണ്ടാതെ അവിടെ കിടക്കാൻ നോക്ക് വെറുതെ അനങ്ങി നീഡിൽ ഇളക്കണ്ട
രൂപ : നിന്നെ ഞാൻ എടുത്തോളാം ഇനി എത്ര നേരം ഇങ്ങനെ കിടക്കേണ്ടി വരും
ആദി :ദോ ആ ബാഗ് നിറയുന്നത് വരെ കിടന്നാൽ മതി നീ വേണമെങ്കിൽ അല്പം ഒന്ന് മയങ്ങിക്കൊ
ഇത് കേട്ട രൂപ പതിയെ കണ്ണുകൾ അടച്ചു
കുറച്ചു സമയത്തിനു ശേഷം കണ്ണ് തുറന്നരൂപ കണ്ടത് തനിക്കടുത്തുള്ള ചെയറിൽ ഇരുന്ന് ഫ്രൂട്ടി കുടിക്കുന്ന ആദിയെയാണ്
ആദി : തമ്പുരാട്ടി ഉണർന്നോ എന്തൊരു ഉറക്കമാടി ഇത്
രൂപ : ആ ബ്ലഡ്‌ ബാഗ് ഒക്കെ എവിടെ
ആദി :അതൊക്കെ കൊണ്ട് പോയി നീ ഉറങ്ങുന്നത് കൊണ്ട് വിളിക്കണ്ടാന്ന് ഞാനാ പറഞ്ഞത്
രൂപ : നിന്റെ കയ്യിൽ എന്താ
ആദി : ഓഹ് ഇതൊ ഇത് നീ ഉണരുമ്പോൾ തരാൻ വേണ്ടി തന്നിട്ടുപോയതാ ബോറടിച്ചപ്പോൾ ഞാൻ എടുത്തങ്ങ് കുടിച്ചു
രൂപ : ടാ ദ്രോഹി
ആദി : എന്ത് ദ്രോഹി ചിക്കൻ ബിരിയാണിയൊക്കെ തട്ടി വിട്ടതല്ലേ വലിയ ക്ഷീണം ഒന്നും കാണില്ല
രൂപ : 😡
ആദി : കണ്ണുരുട്ടണ്ട ഇന്നാ ബാക്കിയുണ്ട് കുടിച്ചോ
രൂപ : കൊണ്ട് പോയി പുഴുങ്ങി തിന്നടാ നാറി
ആദി : വേണ്ടെങ്കിൽ വേണ്ട
ഇത്രയും പറഞ്ഞു ആദി ബാക്കി കൂടി വലിച്ചു കുടിച്ചു
ഇത് കണ്ട രൂപ പതിയെ ബെഡിൽ നിന്നിറങ്ങി റൂമിന് പുറത്തേക്കു നടന്നു
ആദി :ടീ നിക്ക് ഞാൻ കൂടി വരട്ടെ
ആദി രൂപയുടെ അടുത്തേക്ക് ഓടിയെത്തി
ആദി : എങ്ങോട്ടാ ഇത്ര ധൃതിയിൽ പയ്യെ നടക്ക് തല ചുറ്റും
രൂപ :ചിക്കൻ ബിരിയാണി തട്ടി വിട്ടതല്ലേ ഒന്നും പറ്റില്ല
ഇത്രയും പറഞ്ഞു രൂപ വീണ്ടും മുന്നോട്ട് നടന്നു ആദി ചിരിച്ചു കൊണ്ട് പുറകെയും
ആദി :അതെ അവരെയൊക്കെ ഒന്ന് പോയി കാണണ്ടെ
രൂപ : ആരെ
ആദി :ആ പയ്യന്റെ വീട്ടുകാരെ
രൂപ : എന്തിന്
ആദി : ടീ നീ ഉറങ്ങി കിടന്നപ്പോൾ അവരൊക്കെ നിന്നെ വന്ന് നോക്കിയിരുന്നു അവർക്ക് നീ വലിയ സഹായമല്ലെ ചെയ്തത് പോയി കണ്ട് ഒരു താങ്ക്സ് എങ്കിലും വാങ്ങിയേക്ക്
രൂപ : അങ്ങനെ താങ്ക്സിനു വേണ്ടി ഞാൻ ഒന്നും ചെയ്യാറില്ല ഇപ്പോൾ തന്നെ വൈകി നീ വന്നേ
