പഠിത്തം നിർത്തി ഒരു ഹാര്ഡ് വെയര് വിത്ത് റിപ്പയര് ഷോപ്പ് തുടങ്ങിയാലോ എന്ന് ഞാൻ ചിന്തിച്ച് തുടങ്ങി. ആങ്…. എല്ലാം നടക്കും.
എന്റെ റൂമിലുള്ള സാധനങ്ങള് വെച്ച് പുതിയ കോയിൽ എനിക്ക് ഉണ്ടാക്കാൻ കഴിയും… പക്ഷേ മെനക്കെടണം…. ഇപ്പോൾ ആ മൂഡ് എനിക്കില്ല. അതുകൊണ്ട് പുതിയത് വാങ്ങാൻ ഞാൻ തീരുമാനിച്ചു.
ടൗണിലെ കടയില് വിളിച്ച് പറഞ്ഞിട്ട് ഞാൻ ആലിയ യുടെ വീട്ടില് നിന്നും ഇറങ്ങി.
“ചേട്ടൻ ഊണു കഴിച്ചിട്ട് പോയാൽ മതി.” ഇസ പറഞ്ഞു.
“എനിക്ക് വിശക്കുന്നില്ല….” അവൾട മറുപടിക്ക് നില്ക്കാതെ ഞാൻ വേഗം പുറത്ത് വന്നു.
ഉടനെ എന്റെ മൊബൈലില് ഒരു വാറ്റ്സ്സപ് മെസേജ് വന്നു. എടുത്ത് നോക്കി… ഇസയാണ്… ദേഷ്യത്തിലുള്ള ഒരു ഈമോജി — എല്ലാവരും ഇന്ന് ദേഷ്യത്തില് ആണല്ലോ….
ടൗണിൽ നിന്നും സാധനം വാങ്ങി തിരിക്കാൻ നേരത്ത് ആലിയ കോള് ചെയ്തു. എന്നെ വഴക്ക് പറയാൻ ആവും ഈ വിളി. ഞാൻ കോള് എടുത്തു.
“വരുന്ന വഴിക്ക് ടിവി റിമോട്ട് ന്റെ രണ്ട് ബാറ്ററി കൂടി വാങ്ങിക്ക്…..”
“ആലിയ… നേരത്തെ ഞാ—”
ഉടനെ കോള് കട്ടായി.
‘അഹങ്കാരം….’ ഞാൻ മനസില് പറഞ്ഞു. അല്ലാതെന്ത് പറയാൻ മൊബൈലില് നോക്കി ഞാൻ പിറുപിറുത്തു.
ഞാൻ തിരിച്ച് വന്നപ്പോൾ ആലിയ യും ഇസയും ഹാളില് ടിവി മുന്നില് ഉണ്ടായിരുന്നു. ടിവി നോക്കി ഭയങ്കര സംസാരവും ചിരിയും ആയിരുന്നു അവര്ക്കു.
ഞാൻ ടിവി യില് നോക്കി. ഏതോ പ്രോഗ്രാം ഓടുന്നുണ്ട്.
എന്നെ കണ്ടിട്ട് രണ്ട് പേരും മൈന്റ് ചെയ്തില്ല. ടിവി ക്ക് മുകളില് ബാറ്ററി വെച്ചിട്ട് ഞാൻ നേരെ കിച്ചനിൽ പോയി.
“നി വന്നോ… ഇപ്പഴാ സമാധാനമായത്. നാല് ദിവസം കഴിഞ്ഞു, ഈ മിക്സി കേടായിട്ട്….. കൈക്കൊണ്ട് അരച്ച് എനിക്ക് മതിയായി. നേരാംവണ്ണം സീരിയല് പോലും നോക്കാൻ കഴിയുന്നില്ല…..” റസിയ ആന്റി സങ്കടം പറഞ്ഞു.
“ങേ…. മിക്സി കേടായതും സീരിയലും തമ്മില് എന്ത് ബന്ധം…..” സംശയത്തോടെ ഞാൻ ചോദിച്ചു.
“ശെരിയാണല്ലോ…. അത് രണ്ടും തമ്മില് എന്ത് ബന്ധം…..” അവർ എന്നോട് തിരിച്ച് ചോദിച്ചു.
ഞാൻ ചിരിച്ചു. “എപ്പോഴും സീരിയൽ നോക്കിയാൽ ഇതായിരിക്കും ഫലം. ഉള്ള ബുദ്ധിയും പോകും….. എന്നിട്ട് ഇതുപോലെ ഒരു ബന്ധവും ഇല്ലാത്ത കാര്യങ്ങള് സംസാരിച്ച് തുടങ്ങും.”
“നി പോടാ… നിനക്ക് സീരിയല് ഇഷ്ടല്ലാത്തോണ്ട നി എന്നെ കളിയാക്കുന്നെ…..”
ഇനി ഇവിടെ നിന്നാൽ ശരിയാവില്ല. ജോലി തീര്ത്ത് വേഗം മുങ്ങണം. ഇല്ലെങ്കില് ആന്റി സീരിയല് കഥ പറയാൻ തുടങ്ങും. നേരത്തെ എനിക്ക് അനുഭവം ഉള്ളതാ….
“ഡാ മോനെ…. മറ്റെ സീരിയല് —”
“ആന്റി, നിങ്ങൾ വേഗം പോയി മെയിൻ സ്വിച്ച് ഓഫ് ചെയ്യു.” ഞാൻ തിടുക്കത്തിൽ പറഞ്ഞു.
“ദാ ഇപ്പൊ ചെയ്യാം…..” അത്രയും പറഞ്ഞിട്ട് റസിയ ആന്റി വേഗം കിച്ചനിൽ നിന്നും ഇറങ്ങിപ്പോയി.
കുറച്ച് കഴിഞ്ഞ് വൈദ്യുതി കട്ടായി.
പെട്ടന്ന് ഹാളില് ബഹളം കേട്ടു.
“ഉമ്മ എന്തിനാ മെയിന് സ്വിച്ച് ഓഫ് ആക്കിയെ….?” ആലിയ ദേഷ്യത്തില് ഒച്ച വെച്ചു.
അതുകേട്ട് എനിക്ക് ചിരി വന്നെങ്കിലും എന്റെ വായ്ക്കകത്ത് എന്റെ കവിളിൽ കടിച്ച് പിടിച്ചു കൊണ്ട് ഞാൻ വേഗത്തിൽ മിക്സി ശെരിയാക്കി.
“എഡി…. ഡേവി അവിടെ മിക്സി ശെരിയാക്കി കൊണ്ടിരിക്കുവ….., അതിനല്ലേ മെയിന് സ്വിച്ച് ഞാൻ ഓഫ് ആക്കിയത്….” ആന്റി പറയുന്നത് കേട്ടു.
“അതിന് അവന് മിക്സി കറന്റിൽ കൊടുത്തിട്ടാണോ ശെരിയാകുന്നെ….? അങ്ങനെ ആരെങ്കിലും ചെയ്യുമോ ഉമ്മ…..? എന്ത് മണ്ടത്തരമാണ് ഉമ്മ ഇത്….!!” ആലിയ ചൂടായി.
“എഡി നീയൊന്ന് അടങ്ങ്…. ഇതിനെ കുറിച്ച് എനിക്ക് വല്ലോം അറിയോ…. അവന് പറഞ്ഞിട്ടല്ലേ ഞാൻ ഓഫ് ആക്കിയത്……?” റസിയ ആന്റിയും ചൂടായി.
പെട്ടന്ന് ഇസ പൊട്ടിച്ചിരിക്കുന്നത് ഞാൻ കേട്ടു.
“ഡേവി ചേട്ടൻ ഞങ്ങളോട് എന്തോ ദേഷ്യം തീര്ത്തതാണ് ആന്റി….” ഇസ പറഞ്ഞു.
ദൈവമേ…… പണി പാളി…… ഇനി ഇവിടെ നിന്നാൽ അവർ മൂന്ന് പേരും എന്നെ പൊരിച്ച് തിന്നും…… ഭാഗ്യത്തിന് എന്റെ ജോലി അപ്പോഴേക്കും കഴിഞ്ഞിരുന്നു. അതിനെ ഓടിച്ച് നോക്കാൻ കറന്റ് ഇല്ല, സമയവും ഇല്ല. മിക്സി എന്തായാലും ഒരു കുഴപ്പവും ഇല്ലാതെ ഓടിക്കോളും. അതെനിക്ക് ഉറപ്പുണ്ട്.