ഉണ്ണി നല്ല ഉറക്കത്തിലാണ്. ഞാനും പതുക്കെ ബെഡിലേക്ക് കിടന്നു. എ.സി മീഡിയത്തിൽ സെറ്റ് ചെയ്തു വെച്ചു.
പിറ്റേന്ന് രാവിലെ എഴുന്നേറ്റപ്പോൾ പതിവ് നടത്തത്തിന് പോയി. തിരിച്ചു വരുമ്പോൾ ചേട്ടൻ മുറ്റത്തിരുന്ന് പത്രം വായിക്കുന്നുണ്ടായിരുന്നു.
“ഗുഡ് മോർണിംഗ്,” ഞാൻ വിഷ് ചെയ്തു.
“സാർ രാവിലെ എവിടെ പോയി?” പത്രം മാറ്റാതെ തന്നെയായിരുന്നു മറുപടി. രാവിലെ തന്നെ ഒരു കാര്യവുമില്ലാതെ അവന്റെ പുച്ഛം. ഞാൻ നേരെ റൂമിലേക്ക് വിട്ടു.
ഫ്രഷായി ഇറങ്ങിയപ്പോൾ ഉണ്ണി റെഡിയായി നിൽക്കുന്നു. “നീ എങ്ങോട്ടാടാ?”
“കുറച്ച് ഷോപ്പിംഗ് ഉണ്ട്.”
“ഞാനും വരുന്നു. നാളെ കോളേജ് തുറക്കുകയല്ലേ, ഡ്രസ്സ് എടുക്കണം.”
ഞങ്ങൾ ഒന്നിച്ചിരുന്നു ഭക്ഷണം കഴിച്ചു. ബൈക്ക് കിട്ടില്ലെന്ന് ഉറപ്പായതുകൊണ്ട് പുതിയ ഒരെണ്ണം വാങ്ങുന്നതിനെക്കുറിച്ച് ഞാൻ ആലോചിച്ചു. മമ്മിയോട് പറഞ്ഞ് ഞങ്ങൾ ടൗണിലേക്ക് ബസ് കയറി.
“ചേട്ടൻ ആരോടും മിണ്ടാത്തതെന്താ?” ഉണ്ണിക്ക് ഇതൊക്കെയേ ചോദിക്കാനുള്ളൂ.
“ചില സമയത്ത് എന്റെ കൺട്രോൾ പോകും ഉണ്ണി. അതുകൊണ്ട് ഇപ്പോൾ ആവശ്യമില്ലാത്ത കാര്യങ്ങളിൽ അഭിപ്രായം പറയാൻ പോകാറില്ല.” അവന് വിശ്വസിക്കാൻ പറ്റുന്ന ഒരു മറുപടി ഞാൻ കൊടുത്തു.
“ചേട്ടൻ എന്റെ ചേച്ചിയോട് എങ്ങനെയാ അടുത്തത്?”
“നിന്റെ ചേച്ചി എന്റെ സീനിയർ ആയിരുന്നു.”
“വാട്ട്?” ഉണ്ണി അവിശ്വസനീയതയോടെ എന്നെ നോക്കി.
“കുഞ്ഞുണ്ണീ… നിന്റെ ചേച്ചിയെ ഞാൻ വളച്ചെടുത്തതാടാ.” ‘ഈ തെണ്ടിയാണ് എന്റെ ചേച്ചിയുടെ ലൈഫ് നശിപ്പിച്ചത്’ എന്ന ഭാവത്തിലാണ് അവൻ ഇപ്പോൾ എന്നെ നോക്കുന്നത്.
“ഇപ്പോൾ നിങ്ങൾ തമ്മിൽ…?” ഉണ്ണിയുടെ ടോൺ മാറി. അവനെ ഒന്ന് കളിപ്പിക്കാം എന്ന് തന്നെ ഞാൻ കരുതി.
“എന്റെ പേരിൽ ഒരു പെണ്ണ് കേസ് വന്നിരുന്നു…”
“ഞാൻ അറിഞ്ഞില്ല!” ആ കള്ളം ഉണ്ണി അപ്പാടെ വിശ്വസിച്ചു. അവൻ എന്നെ കേൾക്കാൻ റെഡിയായി നിന്നു. ഞാൻ ഒരു കഥ മെനയാൻ തുടങ്ങി.
“പ്ലസ് ടു കഴിഞ്ഞുള്ള വെക്കേഷൻ സമയം. സണ്ണിയും ഞാനും കൂടി ഫുട്ബോൾ കളിയും കായലിൽ ചാട്ടവുമായി നടക്കുകയായിരുന്നു. വെറുതെയിരുന്ന എന്നെ വിളിച്ച് സണ്ണി ഒരു പെണ്ണിനെ കാണാൻ പോയതാണ് എല്ലാത്തിന്റെയും തുടക്കം. അവൾക്ക് അവനെ ഇഷ്ടമായില്ല, പക്ഷേ സണ്ണി നടത്തം നിർത്തിയതുമില്ല.” ഞാൻ കഥ തുടർന്നു.
“എന്നിട്ട്?” ഉണ്ണി ആകാംക്ഷയോടെ ചോദിച്ചു.
“ഒരു ദിവസം ഞാൻ ആ പെണ്ണിന്റെ കയ്യിൽ കയറിപ്പിടിച്ചു. അവളുടെ ചേട്ടന്മാർ വന്ന് വലിയ ഇടിയായി. ഒടുവിൽ പോലീസ് കേസും!” സത്യത്തിൽ സണ്ണിയാണ് അവളുടെ കൈപിടിച്ചത്, പക്ഷേ ക്രെഡിറ്റ് ഞാൻ എടുത്തു.
“സണ്ണി ചേട്ടൻ ഒരു എണ്ണിയാണ്!” ഗൗരവത്തോടെ ഉണ്ണി എന്നെ നോക്കി.
“എണ്ണിയല്ല, തോട്ടിയാണ് അവൻ,” ഞാൻ ഒന്നുകൂടി മുപ്പിച്ചു കൊടുത്തു.
“അതിന് ശേഷം ആ പെണ്ണിനെ കണ്ടിട്ടുണ്ടോ?”
“ഇന്നലെയും കൂടി വിളിച്ചിരുന്നു. സഞ്ജന… കല്യാണം കഴിഞ്ഞ് പുല്ലാടാണ് താമസം.” ഒരു ബന്ധവുമില്ലാതെ സഞ്ജന ചേച്ചിയെ ഈ കഥയുടെ ഇടയിലേക്ക് ഞാൻ വലിച്ചിട്ടു.
“സണ്ണി ചേട്ടന് ഈ കാര്യം അറിയാമോ?”
“ഇല്ല!”
അവൻ കൂടുതൽ ഒന്നും ചോദിച്ചില്ല. ഉണ്ണിയുടെ കണ്ണിൽ ഞാൻ ഇപ്പോൾ ഒരു ഒന്നാംതരം പെണ്ണ് പിടിയനാണ്.
ഞങ്ങൾ ബസ് സ്റ്റാൻഡിൽ ഇറങ്ങി ടൗണിലെ ഒരു മെൻസ് ഷോപ്പിൽ കയറി. ഞാൻ മൂന്ന് ഷർട്ടും മൂന്ന് ടീ ഷർട്ടും എടുത്തു. ഉണ്ണി രണ്ട് ജോഡി ജീൻസും ഷർട്ടും വാങ്ങി. ഷോപ്പിംഗ് കഴിഞ്ഞ് ഉണ്ണി നോട്ട്ബുക്കും ബാഗും ഒക്കെ വാങ്ങി. ഞാൻ നേരത്തെ തന്നെ എല്ലാം സെറ്റ് ചെയ്തിരുന്നു.
തിരിച്ചു പോകുന്നതിന് മുൻപ് ആഹാരം കഴിക്കാൻ കയറി. ഉണ്ണിയെ എന്റെ കൂടെ നിർത്താൻ ഈ ചിലവ് അത്യാവശ്യമാണ്. കോളേജിൽ അവൻ കൂടെയില്ലെങ്കിൽ ഞാൻ ഒറ്റപ്പെട്ടു പോകും. അവന്റെ ഇഷ്ടം നോക്കി നൂഡിൽസും ചില്ലി ചിക്കനും ഓർഡർ ചെയ്തു. കഴിച്ചു പകുതിയായപ്പോൾ എന്റെ തോളിൽ ഒരു കൈ വന്നു വീണു.