തങ്ങൾക്ക് വേണ്ടിയല്ല എബി തല്ലിയത് എന്ന് കേട്ടപ്പോൾ ടിറ്റോയ്ക്കും സംഘത്തിനും ചെറിയൊരു വിഷമം തോന്നി. സണ്ണി ഗേറ്റ് അടച്ചെങ്കിലും പിന്നെ എന്തോ ആലോചിച്ച് അവരെ അകത്തേക്ക് വിളിച്ചു.
“കേറി വാ…” ഷാഹിറിന്റെ തോളിൽ കയ്യിട്ട് സണ്ണി നടന്നു. സണ്ണിയുടെ മുറിയിൽ ബെഡിൽ ടിറ്റോയും സംഘവും ഇരുന്നു. സണ്ണി കമ്പ്യൂട്ടറിന് മുന്നിലെ കസേരയിലും.
“എനിക്കറിയാവുന്ന എബി ക്ലാസ്സിൽ ടോപ്പറാണ്. പണ്ട് സെന്റർ കോർട്ടിലെ ഇടിമിന്നൽ! ഹാരിസ് എബ്രഹാം വലിയവീട്ടിൽ എന്നാണ് അവന്റെ ഒഫീഷ്യൽ നെയിം. സ്കൂളിൽ പഠിക്കുമ്പോഴാണ് ഞാൻ അവനെ കാണുന്നത്.”
“ഹാരിസ് സാറിന്റെ കൂടെ സെൻട്രൽ ജയിലിൽ താമസിച്ചവനാ അവൻ. പ്ലസ് വൺ പഠിക്കുന്ന സമയത്താണ് ഞാൻ അവനുമായി അടുക്കുന്നത്. ആ സമയത്ത് തന്നെ കേരളത്തിലെ ഒട്ടുമിക്ക ക്രിമിനലുകളോടും അവൻ സംസാരിച്ചിട്ടുണ്ട്. പോലീസും ക്രിമിനലുകളും അവന്റെ തലയിൽ ആ സമയം അത്രയ്ക്കുണ്ടായിരുന്നു.” സണ്ണി പറയുന്നത് കേട്ട് പിള്ളേർ പേടിച്ചുപോയി.
“ഇപ്പോൾ പോലീസ് എന്ന് കേൾക്കുന്നത് തന്നെ അവന് ദേഷ്യമാണ്. കുറെ കേസുകൾ അവന്റെ പേരിലുണ്ട്. പക്ഷേ നീയൊന്നും പേടിക്കണ്ട, അതൊക്കെ ചെറിയ അടിപിടി കേസുകളാണ്. സ്മിത ആന്റിക്ക് അവനെ ജീവനാണ്. ലൂക്കച്ചനും (ചേട്ടൻ) റിയയും (അനിയത്തി) സ്മിത ആന്റിയുടെ കയ്യിൽ നിന്ന് നല്ലപോലെ അടി വാങ്ങിയിട്ടുണ്ട്. പക്ഷേ എബിയെ ആന്റി ഇതുവരെ കൈവെച്ചിട്ടില്ല.”
സണ്ണി നിർത്തിയപ്പോൾ ടിറ്റോ പതുക്കെ ചോദിച്ചു, “എന്നിട്ട് എന്തിനാ ചേട്ടാ എബി ചേട്ടൻ മൂന്ന് വർഷം നാട് വിട്ടത്?”
സണ്ണി ഒരു നിമിഷം ആലോചിച്ചു. “അതൊരു വലിയ കഥയാണ്. പക്ഷേ ഒന്ന് പറയാം… അവൻ പോയത് തോറ്റതുകൊണ്ടല്ല, ജയിക്കാൻ വേണ്ടിയാണ്. വലിയവീട്ടിൽ ഗ്രൂപ്പിനെ അവൻ എങ്ങനെയാണ് കൈക്കലാക്കിയതെന്ന് കേട്ടാൽ നിന്റെയൊക്കെ പാൻ്റ് നനയും!”
“കിഴക്കൻ നാട്ടിലെ പെരിങ്ങാമല… അതാണ് ഹാരിസ് സാറിന്റെ തറവാട്. വലിയവീട്ടിൽ കുടുംബം! കുരുവിള എന്ന സിംഹത്തിന്റെ സാമ്രാജ്യം,” സണ്ണി ഒരു സിഗരറ്റിന് തീ കൊളുത്തിക്കൊണ്ട് തുടർന്നു.
“കുരുവിള പഴയൊരു പോലീസുകാരനാണ്. സ്വന്തം മക്കൾ ആരും പോലീസ് ആകുന്നത് പുള്ളിക്ക് ഇഷ്ടമല്ലായിരുന്നു. പക്ഷേ ഹാരിസ് സാർ ആരോടും പറയാതെ ടെസ്റ്റ് എഴുതി ട്രെയിനിങ് കഴിഞ്ഞു. അതോടെ കുരുവിള മകനെ പടിക്ക് പുറത്താക്കി. ഹാരിസ് സാർ പിന്നെ അങ്ങോട്ട് പോയിട്ടില്ല, ഇവിടെ സെറ്റിലായി.”
സണ്ണി ഒന്ന് നിർത്തി പിള്ളേരുടെ മുഖത്തേക്ക് നോക്കി. അവർ കഥയിൽ ലയിച്ചിരിക്കുകയാണ്.
“പക്ഷേ എബി… അവൻ ജനിച്ചപ്പോൾ മുതൽ കുരുവിളയുടെ കണ്മണിയായിരുന്നു. വെക്കേഷൻ ആയാൽ എബി പെരിങ്ങാമലയിലാണ്. സ്മിത ആന്റിയുടെ എല്ലാ ഇഷ്ടവും നടത്തിക്കൊടുത്ത ഹാരിസ് സാർ, എബിയുടെ കാര്യത്തിൽ മാത്രം സ്വന്തം അപ്പന്റെ വാക്ക് കേട്ടു. സ്മിത ആന്റിയുടെ കുടുംബം മുഴുവൻ ‘ലോപ്പസ്’ എന്ന പേര് ചേർക്കുമ്പോൾ, കുരുവിള നേരിട്ട് വന്ന് നമ്മുടെ ചെക്കന് ‘എബ്രഹാം’ എന്ന് പേരിട്ടു. സ്വന്തം ചോരയാണെന്ന് അയാൾക്ക് ഉറപ്പായിരുന്നു.”
“അപ്പന്റെ ആ സ്വഭാവം കാരണം ഭാര്യ പോലും അയാളെ വിട്ടിട്ട് വിദേശത്തേക്ക് പോയി. സ്വന്തം മക്കൾ സ്വത്തിന് വേണ്ടി കോടതിയിൽ കയറി. പക്ഷേ ആ കിളവൻ ചില്ലറക്കാരനല്ലായിരുന്നു. 18 വയസ്സ് തികഞ്ഞ ദിവസം, തന്നെ വിശ്വസിക്കാൻ കൊള്ളാവുന്ന ഒരേയൊരു രക്തത്തെ അയാൾ വിളിച്ചു വരുത്തി. അതാണ് എബി! കോടികൾ മൂല്യമുള്ള ബിസിനസ്സ് സാമ്രാജ്യത്തിന്റെ അവകാശിയായി 18-ാം വയസ്സിൽ എബി മാറി. അതോടെ വലിയവീട്ടിൽ തറവാട്ടിലെ ബാക്കി അംഗങ്ങൾ എബിയുടെ ശത്രുക്കളായി. പ്ലസ് ടു കഴിഞ്ഞ് എബി അങ്ങോട്ട് പോയത് ആ സാമ്രാജ്യം ഭരിക്കാനായിരുന്നു. എന്നിട്ടിപ്പോൾ മൂന്ന് വർഷം കഴിഞ്ഞ് ഒരു ഭ്രാന്ത് പിടിച്ച പോലെ പഠിക്കണമെന്ന് പറഞ്ഞ് തിരിച്ചു വന്നിരിക്കുന്നു!”
“വലിയവീട്ടിൽ കുടുംബത്തെക്കുറിച്ച് ചേട്ടന് ഇത്രയും അറിയാമോ?” ടിറ്റോ അമ്പരന്നു ചോദിച്ചു.