“ഇങ്ങളിവർക്ക് ന്തേലും കൊടുത്തോ….?” കോലത്തിന് ഇത്തിരി മാറ്റമുണ്ടെലും സംസാരമൊക്കെ പഴയപോലെയുണ്ട്. ഉമ്മയൊന്നും മിണ്ടീല്ല.. ഇനിയിപ്പോ ഷെറിനെയും എന്നെയും ഒരുമിച്ച് കണ്ടാലതിന് സഹിക്കാൻ കഴിയില്ല ന്ന് തോന്നിക്കാണും അതോണ്ടാവും ഉള്ളോട്ട് ഓടിയത്
” അയ്യോ ഒന്നും എടുക്കണ്ട ഷെറിൻ.ഞങ്ങളിതിലെ പോയപ്പോ വെറുതെ ഒന്ന് കേറീന്നെള്ളൂ.. ” വായയിപ്പോ പൊളിഞ്ഞു കയ്യിൽ വന്നേനെ. ന്ത്‌ നുണച്ചിയാണത്.പറയണത് കേട്ടില്ലേ. ന്നാലും ഇതാണല്ലോ മര്യാദ. അപ്പൊ അവർ കൂടുതൽ നിർബന്തിച്ചു തരും. അത് അവൾക്ക് നല്ലപോലെ അറിയാലോ. ആർക്കാ അറിയാത്തെ.
“അങ്ങനെ പറഞ്ഞാൽ പറ്റില്ല. ആദ്യായിട്ട് ഇവിടെ എന്നിട്ട് വേഗം പോവേ?….” ഷെറിൻ പിടി മുറുക്കുകയാണ്. പണ്ടത്തെ പോലെ തന്നെ!!
“ആരാ പോവുന്നെ…??” ഉള്ളിൽ നിന്ന് വെപ്രാളപ്പെട്ട് ഉമ്മയും ഇറങ്ങി വന്നു. സംഭവമൊന്നും ഞാൻ കാണുന്നില്ല എല്ലാമെന്‍റെ പുറകിലും സൈഡിലും അരങ്ങേരുന്ന ശബ്‌ദം മാത്രമാണ് കേൾക്കുന്നത്.
“എന്‍റുമ്മ ഇവരിവിടെ വന്നിട്ട് നിങ്ങളുള്ളിലിരിക്കാണോ?. ”
“നീയിവിടേക്ക് കേറിയപ്പോഴാ ഞാനുള്ളിലേക്ക് പോയത്.. മോളെ അനു പോവാനൊന്നും അയീല്ല!!. ഉച്ചയായി ,,കഴിച്ചിട്ടൊക്കെ പോയാമതി ” ഉമ്മ ഇത്തിരി ദേഷ്യപ്പെട്ടാണ് പറയുന്നത് അനുസരണയില്ലാത്ത കുട്ടികളെ പേടിപ്പിക്കുന്നപോലെ. എന്‍റെ അമ്മ പറയുന്നപോലെ.
“അഭീ.. നീ കേട്ടോടാ ഇതൊക്കെ?” അവരുടെ ഇടയിൽ നിന്നു പെട്ടപ്പോ എന്നെയുങ്കൂടെ അതിൽ കൂട്ടാനുള്ള ചെറിയമ്മയുടെ ശ്രമം. ആരുടെ എടുത്തേക്ക് ഒന്ന് നോക്കണമെന്ന് കരുതിയെങ്കിലും നോക്കീല്ല.. ഇപ്പോഴെല്ലാരും തുറിച്ചെന്നെ നോക്കുന്നുണ്ടാവും.
“ഇവൻ കുറേ നേരായല്ലോ മിണ്ടാതെ നിൽക്കുന്നു…അഭീ…” ഈശ്വരാ ഉമ്മയുടെ വിളി.
“അത് ഞാനും അവനും ചെറിയ തെറ്റിലാ ഉമ്മാ..ല്ലെടാ അഭീ….” ആരാ പറഞ്ഞത് ന്ന് മനസ്സിലാക്കാൻ ഇത്തിരി സമയം വേണ്ടി വന്നു.വിശ്വസിക്കാൻ കഴിഞ്ഞില്ല ഷെറി‌നാണ്. എന്നോട് ഒരു വാക്ക് പോലും മിണ്ടുമെന്ന് കരുതീല. നോട്ടം പോലും കിട്ടില്ലെന്ന്‌ വിചാരിച്ചതേയില്ല. ഇനിയും മിണ്ടാതെ നിക്കുന്നത് മോശമാണെന്ന് തോന്നി ഒന്നുല്ലേലും ചെറിയമ്മയും ഉമ്മയുമുള്ളപ്പോ മിണ്ടാതെ നിൽക്കണ്ടല്ലോ.
മെല്ലെ എഴുനേറ്റ് തിരിഞ്ഞു നോക്കി. കൂടി നിന്നെന്നെ നോക്കിനിൽക്കുന്ന അവരുടെ മുന്നിലേക്ക് നടന്നു.ചുണ്ടിൽ നല്ലൊരു ചിരി വെച്ചു.അനുവെന്നെ നോക്കി അവര്‍ കാണാതെ വട്ട് കാണിക്കുന്നുണ്ട്. ഷെറിന്‍റെ മുഖമെന്തൊക്കെയോ ഭീകരമായ മാറ്റങ്ങൾ വന്നു നിറയുന്നുണ്ട്. എന്നാലോ അതെല്ലാമൊരു ചിരിയിൽ ഇല്ലാതാക്കുന്നുണ്ട്. ഞാൻ ഉമ്മയുടെ പുറകിൽ ചെന്ന് ആ തോളിൽ താടി ചേർത്ത് വെച്ചു മുന്നിലുള്ള രണ്ടിനെയും നോക്കി.
“നീ ഇളോട് തെറ്റിലാണോ അഭി..? ” ചെറിയമ്മ ചോദിച്ചു.
“പിന്നെ ഞങ്ങൾ തെറ്റിലാ….” ഞാൻ ഷെറിനെ നോക്കി പറഞ്ഞു.
“കണ്ടില്ലേ?ഞാൻ പറഞ്ഞില്ലേ ഉമ്മാ അവൻ തെറ്റിലാന്ന്. അപ്പൊ ഉമ്മയെന്താ പറഞ്ഞത് ഇവൻ തെറ്റൊന്നും ല്ലാന്നു ല്ലേ….? അനുവേച്ചിക്ക് അറിയോ ഇത് പറഞ്ഞാ ഉമ്മേം ഞാനും തെറ്റി നടക്കൽ പോലും. ഒരക്ഷരം മിണ്ട അത് വേണന്നില്ല തിന്നാനെന്തേലും തര അത് പോലുല്ലന്നേ..” എന്‍റമ്മോ ഇവൾ പഴയ പോലെ തന്നെ വായിട്ടലക്കൽ തുടങ്ങിയല്ലോ. കേട്ടപ്പോ ചിരി വന്നു. ഉമ്മക്കെന്നോട് എത്ര സ്നേഹമുണ്ടെന്നും മനസ്സിലായി.ചിരി മുഖത്തു വന്നു കാണും.
“കണ്ടില്ലേ…? പുറത്തു തൂങ്ങി ചിരിക്കുന്നത് കണ്ടില്ലേ?.ഇങ്ങളവൻ പറ്റിക്കാണുമ്മാ…!!!” ഞാൻ ചിരി നിർത്തി. കേറി കേറി അവളെങ്ങാട്ടാ പോണേ..
“നിർത്ത് നിർത്ത് നിർത്ത്. ഒരഭിനയവുമില്ല മോളെ തെറ്റിന്ന് പറഞ്ഞാൽ തെറ്റിയതാ.അതിനിനി മാറ്റമൊന്നുമില്ല…” ഞാനെന്‍റെ അഭിപ്രായമിട്ടു. അവൾക്കിത്ര കൂളായി സംസാരിക്കാൻ കഴിയെങ്കിൽ എനിക്കാണോ പ്രശ്നം!
“എന്‍റെ ദുഷ്ട… ഇങ്ങനെ പറയെല്ലടാ.. ഈ ഉമ്മയോട് ഞാൻ തെറ്റാതെ പിടിച്ചു നിൽക്കാൻ തുടങ്ങീട്ട് കുറച്ചേ ആയുള്ളൂ മോനെ.. അതൂടെ നീ പോക്കും.തെറ്റിലാണെൽ അങ്ങനെ തന്നെ നിക്കട്ടെ.നീയത് മാറ്റ പോലും ചെയ്യണ്ട…” അവളുടെ വേദനയേ. ഇതെല്ലാം കണ്ട് ഇത്തിരി അത്ഭുതമനുവിന്‍റെ മുഖത്തുണ്ട്.ഇങ്ങനെ തൊള്ളായിട്ട് സംസാരിക്കുന്നത് കൊണ്ടാവും
“എന്‍റുമ്മാ ഇതിന് പണ്ടുള്ള പോലെ വട്ട് കൂടീണുട്ടോ!!..” ഞാൻ ഉമ്മയുടെ തോളിൽ തൂങ്ങി പറഞ്ഞു..
“ഉമ്മാ അവനോട് മിണ്ടാതെ നിക്കാൻ പറഞ്ഞോ…..” ദേഷ്യം കാട്ടിയവളുടെ വാണിംഗ്. ആഹാ.
“നിക്കില്ലെന്ന് പറയുമ്മ…” ഞാനും പറഞ്ഞു
“ഉമ്മാ ഇങ്ങൾ നിക്കണത്തിന്‍റെ ധൈര്യട്ടോ ഓന്.”
” അതെന്ന് പറയുമ്മ.. ”
” ഉമ്മ….. ” അവൾ കാറുന്നപോലെയായി. ഉമ്മയോടൊട്ടി നിൽക്കുന്നതൊന്നും വല്ല്യ ഇഷ്ടപ്പെടുന്നുണ്ടാവില്ല. അവസരം മുതലാക്കാൻ ഞാൻ ഉമ്മയുടെ കവിളിൽ ഒരുമ്മകൂടെ കൊടുത്തു.ദേഷ്യം കേറിയ പെണ്ണ് മുഖം ചുളുക്കി നിലത്തു ചവിട്ടി.
“ഞാൻ പോവ്വാ…” തലവെട്ടിച്ചു രണ്ടടി നടന്നതും ചെറിയമ്മ അവളുടെ കൈക്ക് പിടിച്ചു.
“ഏയ്യ് ഷെറിൻ പോവ്വല്ലേ……?.” അവളൊന്നു നിന്നു.
“എന്താ അഭിയിത്….” ചെറിയമ്മയുടെ ശകാരം. എന്താന്ന് ചോദിച്ചാൽ ഷെറിനോടുള്ള ദേഷ്യമൊക്കെയില്ലാതായിട്ടുണ്ട്. അവൾ പോയത് കൊണ്ടല്ലേ എനിക്ക് ചെറിയമ്മയെ കിട്ടിയതുന്നുള്ള ബോധം ഉള്ളത് കൊണ്ടാവും. അതോണ്ട് കളിയാക്കുന്ന വാക്കുകളൊക്കെ വായിൽ വരുന്നുണ്ട്.
“ഏത് സമയവും ഇങ്ങനെ ആയിരുന്നു അനുവേച്ചി. ഇപ്പോഴെങ്ങനെയാ സഹിക്കുന്നിതിനെ…?” ഷെറിന്‍റെ കളിയാക്കല്‍ കേട്ടപ്പോ പാളി നോക്കി ചെറിയമ്മ ചിരിച്ചു. എങ്ങനെ സഹിക്കുന്നു ന്ന് ചോദിച്ചതിനാ.ദുഷ്ട.ഉമ്മയുടെ ബാക്കിൽ നിന്ന് അതിനെ ചുറ്റി നിൽക്കുന്നത് കൊണ്ടാണ് ഉമ്മയുടെ മുഖഭാവമൊന്നും മനസിലാവുന്നില്ല. മിണ്ടുന്നില്ലല്ലോ!!
“ആഭീ ഒരു കൈ കൊടുത്ത് കോംപ്രമൈസ് ആക്കടാ… പിണക്കമൊക്കെ പോട്ടെ…” ചെറിയമ്മയെന്നോട് അപേക്ഷ പോലെ പറഞ്ഞു. കൂടെയുള്ള ഷെറിന് വല്ല്യ ജാഡയുണ്ടിപ്പോ.ഓ അവളുടെ കൂടെക്കൂടി അനുവെന്നോട് പറയുന്ന കൊണ്ടാവണം.
“എടീ അനൂ…..””അപത്തം ഉമ്മയടുത്തില്ലേ??
“ചെറിയമ്മേ നോക്ക് അവൾക്കെന്ത് ജാടയാന്ന്….” ഞാൻ വിരൽ അവൾക്ക് നേരെ ചൂണ്ടി.
“ഒന്ന് പോടാ എനിക്ക് ജാഡയോ? ”
“നിനക്ക് തന്നെ….”
“മതി മതി.. രണ്ടും നിർത്ത്..ആ കൈ താ… എന്‍റെ നേരെ ചെറിയമ്മ കൈ നീട്ടിയപ്പോ ഇത്തിരി മടിച്ചാണേലും ഞാൻ ഉമ്മയുടെ തോളിൽ നിന്നിറങ്ങി അവരുടെ മുന്നിലേക്ക് നടന്നു.
“താ ഷെറിൻ….” ചോദിക്കുന്നതും കൊടുക്കുന്നതും ഒരുമിച്ചായിരുന്നു.
“ഇനി ഇഷ്യൂ ഒന്നും ല്ലാട്ടോ രണ്ടിനും….”അനു നടുക്ക് നിന്ന് ഞങ്ങളെ നോക്കി
“ഹാ….” ഞാൻ ഒഴിക്കാൻ മട്ടിൽ പറഞ്ഞു..
“അഭീ…..” ചെറിയമ്മ ഭൂമിയോളം താഴ്ന്നിരുന്നു.. അവൾ പറയുന്നത് കേൾക്കാതെയെങ്ങനെയാ.കൈ കൊടുക്കാൻ പറഞ്ഞപ്പോ ഷെറിന്‍റെ കയ്യിൽ ഞാൻ പിടിച്ചു ഒന്ന് കുലുക്കി.
